کراچی، حیدرآباد پیکیج پر تشویش،سندھ حکومت کا ترقیاتی منصوبوں پر وفاق کا اختیار ختم کرنے کا فیصلہ
اشاعت کی تاریخ: 28th, September 2025 GMT
پی آئی ڈی سی ایل فوری طور پر صوبے میں نئی ترقیاتی اسکیموں پر فوری طور پر اپنا کام بند کرے اور صرف ان منصوبوں تک محدود رہے جو اسے سابقہ پاک ورکس ڈپارٹمنٹ سے منتقل ہوئے تھے
صوبائی حکومت کا اس معاملے پر تنازعات سے بچنے کیلئے وفاقی حکومت کو اعتماد میں لینے کا فیصلہ ،سیکرٹری لوکل گورنمنٹ نے وفاقی ادارے پاکستان انفرااسٹرکچر ڈویلپمنٹ کمپنی لمیٹڈ کو باضابطہ خط لکھ دیا
سندھ حکومت کا صوبے میں ترقیاتی منصوبوں پر وفاقی اختیار ختم کرنے کا فیصلہ،سندھ حکومت نے صوبے میں ترقیاتی منصوبوں پر وفاقی ادارے پاکستان انفرااسٹرکچر ڈویلپمنٹ کمپنی لمیٹڈ (PIDCL) کے اختیار کو ختم کرنے کا فیصلہ کرلیا ہے اور اس حوالے سے کمپنی کو باضابطہ خط بھی لکھ دیا گیا ہے سیکرٹری لوکل گورنمنٹ کی جانب سے خط میں ہدایت کی گئی ہے کہ پی آئی ڈی سی ایل فوری طور پر صوبے میں نئی ترقیاتی اسکیموں پر کام بند کرے اور صرف ان منصوبوں تک محدود رہے جو اسے سابقہ پاک ورکس ڈپارٹمنٹ (Pak PWD) سے منتقل ہوئے تھے۔ واضح رہے وزیر اعلیٰ سندھ سید مراد علی شاہ کی زیر صدارت 26 ستمبر کو اجلاس منعقد ہوا جس میں صوبے میں پی آئی ڈی سی ایل کے کردار کا تفصیلی جائزہ لیا گیا اجلاس کے بعد صوبائی حکومت کی جانب سے لکھے گئے خط میں کہا گیا ہے کہ پی آئی ڈی سی ایل کو صرف پاک ڈبلیو پی ڈی کے پرانے منصوبے مکمل کرنے کا مینڈیٹ دیا گیا ہے، تاہم حالیہ دنوں میں ادارہ صوبے کے دیگر ترقیاتی منصوبوں میں بھی مداخلت کررہا ہے جو کہ صوبائی خودمختاری کے منافی اور وفاق و صوبے کے درمیان طے شدہ دائرہ کار کی خلاف ورزی ہے خط کے مطابق سندھ حکومت کو اس بات پر تشویش ہے کہ کراچی اربن انفراسٹرکچر ڈویلپمنٹ پیکیج اور حیدرآباد اربن انفراسٹرکچر ڈویلپمنٹ پیکیج جیسے صوبائی منصوبوں پر پی آئی ڈی سی ایل عمل درآمد کررہا ہے حالانکہ یہ مکمل طور پر صوبائی حکومت کی ذمہ داری ہیں۔ صوبائی حکومت نے مؤقف اپنایا ہے کہ وفاقی ادارے کی اس مداخلت سے ترقیاتی عمل میں رکاوٹیں پیدا ہورہی ہیں اور مربوط پالیسی سازی متاثر ہورہی ہے سندھ حکومت نے اپنے خط میں وفاقی کمپنی سے مطالبہ کیا ہے کہ صوبے کے تمام ترقیاتی منصوبوں سے فوری طور پر اپنا کردار واپس لے اور صرف ان منصوبوں تک محدود رہے جو پاک ڈبلیو پی ڈی سے وراثت میں ملے تھے۔ صوبائی حکومت نے اس معاملے پر وفاقی حکومت کو بھی اعتماد میں لینے کا فیصلہ کیا ہے تاکہ مستقبل میں ایسے تنازعات سے بچا جا سکے۔
.ذریعہ: Juraat
کلیدی لفظ: پی ا ئی ڈی سی ایل ترقیاتی منصوبوں صوبائی حکومت فوری طور پر سندھ حکومت حکومت نے کا فیصلہ کرنے کا
پڑھیں:
شہریوں کو درپیش مشکلات وقتی ہیں، ترقیاتی منصوبے شاندار مستقبل کی نوید ہیں، شرجیل میمن
کراچی:سینئر صوبائی وزیر شرجیل انعام میمن نے کہا ہے کہ شہریوں کو درپیش مشکلات وقتی ہیں، تاہم ترقیاتی منصوبے شہری سہولیات کے ساتھ ساتھ شاندار مستقبل کی نوید ہیں۔ شہر قائد میں جاری ترقیاتی کاموں اور عوام کو درپیش مسائل کے حوالے سے سندھ کے سینئر وزیر اور صوبائی وزیر اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ کراچی میں جاری ترقیاتی منصوبے شہریوں کی سہولت اور شہر کے پائیدار مستقبل کے لیے سنگِ میل ثابت ہوں گے۔ انہوں نے کہا کہ کے۔فور منصوبہ کراچی کے عوام سے کیا گیا وہ وعدہ ہے، جس کے تحت شہر کو صاف، معیاری اور وافر پانی فراہم کیا جا رہا ہے۔ اپنے بیان میں شرجیل انعام میمن نے کہا کہ سندھ حکومت کے تمام ادارے وزیر اعلیٰ سندھ کی ہدایت کے مطابق بھرپور ہم آہنگی کے ساتھ کام کر رہے ہیں تاکہ ترقیاتی منصوبوں کو مقررہ مدت میں مکمل کیا جا سکے۔ انہوں نے کہا کہ عزیز بھٹی پارک سے اردو یونیورسٹی تک پانی کی نئی پائپ لائن بچھانے کا مقصد شہریوں کو طویل المدتی سہولت فراہم کرنا ہے۔ انہوں نے تسلیم کیا کہ ان منصوبوں کے دوران ٹریفک کی عارضی مشکلات پیش آ رہی ہیں، لیکن یہ وقتی مسائل ہیں اور عوام کو مستقبل میں ان کے واضح اور دیرپا فوائد حاصل ہوں گے۔ شرجیل میمن نے شہریوں سے اپیل کی کہ وہ حکومت سے تعاون کریں کیونکہ یہ منصوبے دراصل ان ہی کے بہتر مستقبل کے لیے بنائے جا رہے ہیں۔ انہوں نے مزید کہا کہ کے۔فور، ریڈ لائن اور دیگر منصوبے صرف تعمیراتی سرگرمیاں نہیں بلکہ سندھ حکومت کے وژن کا حصہ ہیں جس کا مقصد کراچی کو ایک جدید، سہولیات سے آراستہ اور بین الاقوامی معیار کے شہر میں تبدیل کرنا ہے۔ ان کا مزید کہنا تھا کہ وزیر اعلیٰ سندھ کی خصوصی ہدایت پر تمام منصوبوں کی رفتار تیز کر دی گئی ہے اور جہاں کہیں عوامی مشکلات درپیش ہیں، وہاں فوری طور پر اقدامات کیے جا رہے ہیں تاکہ شہریوں کو کم سے کم تکلیف ہو۔ شرجیل میمن نے کہا کہ سندھ حکومت عوامی خدمت کے جذبے سے کام کر رہی ہے اور بہت جلد کراچی کے شہری ان منصوبوں کے ثمرات اپنی روزمرہ زندگی میں محسوس کریں گے۔
27ویں آئینی ترمیم کا مسودہ پیر یا منگل کو قومی اسمبلی میں پیش کیا جائے گا: رانا ثناء اللہ