پاکستان سعودی عرب دفاعی اسٹرٹیجک معاہدہ
اشاعت کی تاریخ: 2nd, October 2025 GMT
پاکستان اور سعودی عرب کے درمیان ہونے والے دفاعی اسٹرٹیجک معاہدے کو محض ان دونوں ممالک کی بنیاد پر ہی نہیں دیکھا جارہا بلکہ اسے عالمی،علاقائی اور عرب دنیا میں بھی ایک بڑی تبدیلی کے طورپر سمجھا گیا ہے۔
یہ ہی وجہ ہے کہ اس معاہدہ کی بازگشت ہمیں عالمی تناظر میں دیکھنے کو مل رہی ہے۔یقینی طور پر یہ معاہدہ چند دنوں کی منصوبہ بندی کا نتیجہ نہیں بلکہ کافی عرصے سے اس سوچ اور فکر پر دونوں ممالک کی فیصلہ کن قوتوں میں بات چیت کا عمل جاری تھا۔
یہ بات پہلی دفعہ کسی تحریری معاہدہ کا حصہ بنی کہ دونوں ممالک کے دشمن ایک دوسرے کے دشمن سمجھیں جائیں گے اور دونوں ممالک ایک دوسرے کے دفاع میں ایک دوسرے کے ساتھ کھڑے ہوںگے۔
اگرچہ پاکستان اور سعودی سطح کے تعلقات ہمیشہ سے مثبت رہے ہیں مگر اس معاہدہ کے بعد دونوں ممالک کا ایک دوسرے پر انحصار بڑھ گیا ہے اور بالخصوص سعودی عرب سمجھتا ہے کہ موجودہ عالمی اور عرب دنیا کے حالات میں پاکستان اس کا اہم دفاعی پارٹنر ہوسکتا ہے۔
اسی بنیاد پر سعودی عرب کا انحصار پاکستان پر بڑھ گیا ہے جس سے پاکستان سعودی عرب کے درمیان تعلقات میں جہاں نئی جہتیں پیدا ہوںگی بلکہ پاکستان کے لیے معاشی ترقی کے بھی نئے امکانات پیدا ہوںگے۔
پاکستان اور سعودی عرب کے درمیان ہونے والے اس دو طرفہ معاہدہ کی مکمل تفصیلات سامنے نہیں آسکیں مگر اس کے باوجود عالمی سطح کی سیاست پر گہری نظر رکھنے والے افراد اور ادارے اس معاہدہ کی اہمیت پر بہت زور دے رہے ہیں کہ دنیا کے ممالک اور بالخصوص اسلامی اور عرب ممالک ایک متبادل سوچ اور فکر کے ساتھ آگے بڑھنے کی کوشش کررہے ہیں۔
حال ہی میں سینیٹر مشاہد حسین سید جو عالمی امور سے جڑے معاملات پر گہری نظر رکھتے ہیں ۔ان کی سربراہی میں چلنے والے ایک اہم تھنک ٹینک’’ پاکستان چائنہ انسٹی ٹیوٹ‘‘ نے دفاعی معاہدہ کی اہمیت اور مضمرات پر مشتمل پاکستان اور سعودی عرب;مسلم دنیا کے تزویراتی دفاعی شراکت دار کے عنوان سے پہلی جامع اور تحقیقاتی سطح کی رپورٹ جاری کی ہے۔
یہ رپورٹ سینیٹرمشاہد حسین سید کے لکھے گئے دیباچہ اور اہم نکات کے ساتھ 17ستمبر کو طے پانے والے دونوں ممالک کے دفاعی معاہدے کی اہمیت،مضمرات اور جیو پولیٹیکل تناظر کا احاطہ کرتی ہے۔
ان کے بقول مشرق وسطی کے تیزی سے بدلتے اہم جغرافیائی منظر نامہ میں گریٹراسرائیل کے بڑھتے ہوئے خطرے اور امریکی دفاعی ضمانتوں پر اعتماد کے فقدان نے سعودی عرب کے ساتھ اس معاہدے کی راہ ہموار کی ہے۔
مشاہد حسین سید کہتے ہیں کہ اس معاہدے کی تین وجوہات ہیں۔اول اسرائیل کی قطر کے خلاف جارحیت ہے جو ایک ایسا ملک ہے جو امریکا کا اتحادی ہے جہاں اسرائیل، امریکا فلسطینی مزاحمتی تحریک حماس کے نمائندوں سے ملاقاتیں کرتے رہے ہیں۔
قطر چھٹا اسلامی ملک ہے جس کے خلاف اسرائیل نے جارحیت کی ہے، اس سے قبل وہ فلسطین،ایران ،لبنان، شام اور یمن کے خلاف جارحیت کرچکا ہے ۔دوئم قطر پر حملہ مشرقی وسطی کی سیاست میں ایک فیصلہ کن موڑ تھا کیونکہ قطر خطے میں امریکا کا سب سے بڑا فوجی اڈا رکھتا ہے اور امریکا نے قطر کے دفاع کو اپنی فوجی طاقت اور ٹیکنالوجی کے ذریعے تحفظ دینے کا وعدہ کیا تھا ،لیکن امریکا یہ کردار ادا کرنے میں عملا ناکام رہا ہے۔
اس تناظر میں اب خطے کے مسلم ممالک نے دفاعی آپشنز تلاش کرنا شروع کردیے ہیں اور پاکستان کے مسلم ممالک کے ساتھ دفاعی تعاون کے ریکارڈ کو دیکھتے ہوئے پاکستان ایک قابل عمل متبادل کے طور پر ابھرا ہے تاکہ ضرورت پڑھنے پر موثر تحفظ فراہم کرسکے۔
سوئم پاکستان نے فوجی میدان میں اپنی طاقت ثابت کی جب اس نے مئی 2025میں بھارتی جارحیت کا کامیابی سے نہ صرف دفاع کیا بلکہ ایک عددی طور پر بڑے اور زیادہ طاقت ور دشمن کو شدید اور بڑا نقصان پہنچایا ۔
اسی رپورٹ میں کہا گیا ہے کہ مسلم ممالک کے درمیان فوجی اتحاد کی خواہش موجود ہے اور ایرانی صدر مسعود پزشکیان نے اس کی طرف اشارہ بھی کیا ہے کہ یہ معاہدہ مسلم ممالک کے تعاون سے ایک جامع علاقائی دفاعی نظام کی طرف ایک اہم قدم ہے۔
سینیٹر مشاہد حسین سید کے بقول یہ معاہدہ ابھرتے ہوئے بھارت اسرائیل معاہدے کو موثر طریقے سے قابو کرنے میں مدد دے گا اور اس عمل میںیہ معاہدہ بائیڈن اور مودی کے اس منصوبے کو بھی دفن کرچکا ہے جو ستمبر2023 میں جی20کانفرنس کے دوران آئی ایم ای سی)انڈیا اسرائیل اکنامک کوریڈور(کے آغاز کے لیے اعلان کیا گیا تھا جو کہ سی پیک اور چین کے بیلٹ اینڈ روڈانیشیٹو )بی آر آئی (کا مقابلہ کرنے کے لیے بنایا گیا تھا۔
پاکستان سعودی عرب دفاعی شراکت داری دفاع کے لیے ایک نیا ماڈل فراہم کرتا ہے جو پاکستان کی فوجی طاقت اور سعودی عرب کی معاشی قوت کے بہترین امتزاج پر مبنی ہے۔
عرب دنیا یا خلیجی ممالک اپنی سیاسی بقا اور دفاع کی سطح پر امریکا پر بڑا بھروسہ کرتے ہیں۔لیکن اب ان میں یہ احساس پیدا ہورہا ہے کہ امریکا پر یکطرفہ انحصار ان کے حق میں نہیں ہے اور امریکا ان کے مقابلے میں اسرائیل کی پشت پناہی کررہا ہے ۔
یہ ہی وہ نقطہ ہے جس نے عرب دنیا میں اپنی دفاعی حکمت عملی میں بڑی تبدیلی کی طرف مائل کیا ہے اور اب ان کو لگتا ہے کہ پاکستان اور سعودی عرب معاہدہ ان کے حق میں ایک نیا محفوظ راستہ کھول سکتا ہے۔ اسی طرح امریکا ،اسرائیل اور بھارت گٹھ جوڑ پر بھی مسلم دنیا میں تحفظات پائے جاتے ہیں۔
بلوم برگ کی رپورٹ کے مطابق امریکا کے عالمی منظر نامہ سے پیچھے ہٹنے کی وجہ سے سعودی عرب اور پاکستان جیسے ممالک نئے حفاظتی معاہدوں کی طرف بڑھ رہے ہیںاور یہ معاہدہ عالمی سیاست میں ایک نئے دور کی عملی نشاندہی کرتا ہے۔
خود بھارت میں بھی پاکستان اور سعودی عرب کے درمیان ہونے والے اس دفاعی معاہدے پر سخت پریشانی دیکھنے کو مل رہی ہے اور عملا بھارت کو پاکستان سے حالیہ جنگ میں پسپائی کے بعد اس معاہدے کی شکل میں دوسرا بڑا سیاسی جھٹکا لگا ہے ۔
کیونکہ بھارت سعودی عرب اور اسرائیل سے تعلقات کو آگے بڑھا کر پاکستان کو سیاسی طور پر تنہا کرنے کی کوشش کررہا تھا جس میں اب اسے ناکامی کا سامنا ہے اورپاکستان ایک نئی قوت کے طور پر ابھر کر سامنے آیا ہے جو یقینی طور پر بھارت کی سفارت کاری کی بڑی ناکامی ہے ۔
بھارت جو ایران کو بھی پاکستان کے خلاف استعمال کرنے کی کوشش کررہا تھا مگر اب ایران کے موقف میں بھی بڑی تبدیلی دیکھنے کو مل رہی ہے ۔
.
ذریعہ
ذریعہ: Express News
کلیدی لفظ: پاکستان اور سعودی عرب سعودی عرب کے درمیان دونوں ممالک مسلم ممالک یہ معاہدہ ایک دوسرے معاہدے کی معاہدہ کی عرب دنیا ممالک کے کے خلاف رہے ہیں کے ساتھ میں ایک کی طرف گیا ہے ہے اور کے لیے
پڑھیں:
ایران، امریکا مذاکرات: یورپی یونین بھی پاکستان کے کردار کی معترف لیکن مسئلے کا حل تاحال تاخیر کا شکار کیوں؟
ایران امریکا مذاکرات میں دُنیا پاکستان کے ثالثی کردار کی تعریف کر رہی ہے۔ یورپی یونین کی نائب صدر کاجا کالاس نے گزشتہ روز اسلام آباد میں پریس کانفرنس سے خطاب کرتے ہوئے پاکستان کے کردار کی زبردست تعریف کی۔
اس سے قبل پاکستان کے نائب وزیراعظم و وزیرخارجہ اسحاق ڈار نے دورہ واشنگٹن کے دوران جب امریکی وزیر خارجہ مارکو روبیو سے ملاقات کی تو انہوں نے بھی پاکستان کے کردار کی کھل کر تعریف کی۔
لیکن اِس سب کے باوجود امریکا ایران تنازعے کا پائیدار حل نظر نہیں آ رہا جس کی بُنیادی وجہ دونوں فریقین کے درمیان اعتماد کا فقدان اور اسرائیل کی جانب سے غزہ اور اب لبنان میں نہ رُکنے والی جنگی جارحیت ہے، حالاں کہ ایرانی وزیرِخارجہ عباس عراقچی نے اس بات کو کھل کر دُہرایا کہ جنگ بندی معاہدے میں لبنان بھی شامل ہے۔
گزشتہ 10 روز میں کیا پیش رفت ہوئی؟مختلف سفارتی ذرائع کے مطابق حالیہ دنوں میں تہران اور واشنگٹن کے درمیان متعدد بالواسطہ رابطے اور مذاکرات ہوئے جن کے بنیادی نکات میں جنگ بندی پر عملدرآمد، آبنائے ہرمز میں جہاز رانی کا تحفظ، پابندیوں میں ممکنہ نرمی، منجمد ایرانی اثاثوں کا معاملہ اور ایران کے جوہری پروگرام سے متعلق اختلافات کو دور کرنا شامل تھا۔
مغربی میڈیا کے مطابق فریقین ایک عبوری معاہدے کے قریب پہنچ گئے تھے تاہم ایرانی حُکام ایسی خبروں کی تردید کر رہے ہیں۔ ایرانی حُکام اپنا مؤقف کھل کر بیان کر رہے ہیں کہ کسی بھی حتمی معاہدے کے اعلان سے قبل عملی اقدامات اور قابلِ تصدیق ضمانتیں ضروری ہیں، یہی وجہ ہے کہ مذاکرات جاری ہونے کے باوجود حتمی پیش رفت کا اعلان ابھی تک سامنے نہیں آیا۔
لبنان پر اسرائیلی جارحیت اور ایرانی وزیرِ خارجہ کا بیانتازہ ترین اور شاید سب سے اہم پیش رفت ایرانی وزیر خارجہ سید عباس عراقچی کے اس بیان کی صورت میں سامنے آئی جس میں انہوں نے واضح کیا ہے کہ ایران اور امریکا کے درمیان ہونے والی کسی بھی جنگ بندی کا اطلاق پورے خطے پر ہوگا۔
عباس عراقچی نے اپنے بیان میں کہا کہ ایران اور امریکا کے درمیان سیز فائر کا اطلاق ’تمام محاذوں پر مکمل جنگ بندی‘ سے تعبیر ہے، جس میں لبنان بھی شامل ہے۔ ان کا کہنا تھا کہ ’اگر کسی ایک محاذ پر جنگ بندی کی خلاف ورزی ہوئی تو اسے تمام محاذوں پر جنگ بندی کی خلاف ورزی تصور کیا جائے گا اور اس کے نتائج کی ذمہ داری امریکا اور اسرائیل پر عائد ہوگی‘۔
پاکستان کی تازہ سفارتکاری کوششیںگزشتہ 10 روز کے دوران پاکستان کی سفارتی سرگرمیوں میں غیر معمولی اضافہ دیکھنے میں آیا ہے، وفاقی وزیر داخلہ محسن نقوی کے تہران کے دورے، ایرانی قیادت سے ملاقاتیں اور پاکستانی حکام کی مسلسل رابطہ کاری نے یہ تاثر مضبوط کیا کہ اسلام آباد تہران اور واشنگٹن کے درمیان ایک اہم سفارتی چینل کے طور پر کام کر رہا ہے۔
اسی دوران پاکستان کے فیلڈ مارشل سید عاصم منیر کے دورہ تہران نے سفارتی حلقوں کی خصوصی توجہ حاصل کی۔ متعدد مبصرین کے مطابق پاکستان صرف پیغامات منتقل نہیں کر رہا بلکہ اعتماد سازی اور مذاکراتی عمل کو برقرار رکھنے میں بھی کردار ادا کر رہا ہے۔
واشنگٹن میں اسحاق ڈار اور مارکو روبیو کی ملاقاتپاکستان کی سفارت کاری کی اہمیت اس وقت مزید نمایاں ہوئی جب نائب وزیراعظم و وزیر خارجہ اسحاق ڈار کی امریکی وزیر خارجہ مارکو روبیو سے ملاقات ہوئی۔اس ملاقات میں ایران، امریکا مذاکرات، علاقائی سلامتی، آبنائے ہرمز اور پاکستان کی سفارتی کوششوں پر تفصیلی تبادلۂ خیال کیا گیا۔
امریکی قیادت کی جانب سے پاکستان کے کردار کو سراہا جانا اس بات کا اشارہ تھا کہ واشنگٹن اسلام آباد کو ایک مؤثر رابطہ کار کے طور پر دیکھ رہا ہے۔
یورپی یونین کی غیر معمولی تائیدیکم جون 2026 کو اسلام آباد میں ہونے والے 8 ویں پاکستان، یورپی یونین اسٹریٹجک ڈائیلاگ نے پاکستان کی سفارتی حیثیت کو مزید تقویت دی۔
اجلاس کی صدارت پاکستان کے وزیر خارجہ اسحاق ڈار اور یورپی یونین کی اعلیٰ نمائندہ کاجا کلاس نے مشترکہ طور پر کی جس کے بعد جاری مشترکہ اعلامیے کا سب سے اہم پہلو یہ تھا کہ کاجا کالاس نے ایران اور امریکا کے درمیان ثالثی کی پاکستانی کوششوں کو تعمیری اور بامعنی قرار دیا۔
اعلامیے میں خاص طور پر امریکا اور ایران کے درمیان پاکستان کی ثالثی اور اسلام آباد مذاکرات کا ذکر کیا گیا ہے۔ یورپی یونین نے نہ صرف پاکستان کے کردار کو سراہا بلکہ آبنائے ہرمز میں آزاد اور محفوظ بحری آمدورفت کی ضرورت پر بھی زور دیا۔
یہ ایک غیر معمولی سفارتی پیش رفت ہے کیونکہ اس سے قبل پاکستان کی ثالثی کو زیادہ تر علاقائی تناظر میں دیکھا جا رہا تھا، جبکہ اب یورپی یونین بھی اسے باضابطہ طور پر تسلیم کر رہی ہے۔
’آبنائے ہرمز ‘ مذاکرات کا اصل مرکزموجودہ بحران میں ’آبنائے ہرمز‘ صرف ایک بحری گزرگاہ نہیں بلکہ عالمی سیاست اور معیشت کا مرکزی نقطہ بن چکی ہے۔ دنیا کے بیشتر ممالک کو توانائی سپلائی کا ایک بڑا حصہ اسی راستے سے گزرتا ہے۔اسی لیے ایران، امریکا، یورپی یونین اور پاکستان سب اس بات پر متفق دکھائی دیتے ہیں کہ ’آبنائے ہرمز‘ میں کشیدگی کم کرنا اور محفوظ جہاز رانی کو یقینی بنانا ضروری ہے۔
اگرچہ جنگ بندی برقرار ہے، سفارتی رابطے بھی جاری ہیں لیکن اختلافی مسائل اب بھی باقی ہیں۔تاہم ایک حقیقت واضح ہے کہ ’ مذاکرات ٹوٹے نہیں بلکہ آگے بڑھے ہیں‘۔
امریکا، ایران، پاکستان اور یورپی یونین سب سفارتی راستے کو زندہ رکھنے کی کوشش کر رہے ہیں۔ اگر آنے والے ہفتوں میں کوئی عبوری معاہدہ، توسیع شدہ جنگ بندی یا وسیع علاقائی سلامتی فریم ورک وجود میں آتا ہے تو پاکستان کو صرف ایک سہولت کار نہیں بلکہ اس پورے سفارتی عمل کے اہم معماروں میں شمار کیا جائے گا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
اسرائیل امریکا ایران پاکستان تہران سفارت کاری کاجا کالاس مذاکرات واشنگٹن یورپی یونین
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ