سیاسی مذاکرات: پی ٹی آئی کے کچھ مطالبات کا جواب ہاں، کچھ کا نہ میں ہوگا، رانا ثنااللہ
اشاعت کی تاریخ: 25th, January 2025 GMT
وزیراعظم کے مشیر برائے سیاسی امور رانا ثنا اللہ نے کہا ہے کہ حکومت مذاکرات پر یقین رکھتی ہے، پی ٹی آئی کے چارٹر آف ڈیمانڈ کے کچھ نکات کا جواب ہاں میں اور کچھ کا جواب نہ میں ہوگا، میری سوچ ہے کہ پی ٹی آئی جوڈیشل کمیشن کی سربراہی کے لیے جن 3 لوگوں کی بات کررہی ہے ان میں سے کوئی ایک بھی کمیشن کے قریب تک نہیں آئے گا۔
ہفتہ کے روز ایک نجی ٹی وی انٹرویو میں وزیراعظم کے مشیر برائے سیاسی امور رانا ثنا اللہ نے’پیکا آرڈیننس ترمیمی بل‘ سے متعلق صحافیوں کے احتجاج پر کہا کہ حکومت صحافیوں کے تحفظات اور خدشات دور کرنے کے لیے تیار ہے، تاہم انہوں نے واسطہ دے کر کہا کہ ’خدا را‘ پہلے سوشل میڈیا کے اس عذاب جس نے عام آدمی کو متاثر کیا ہے، سے جان چھڑانے دیں۔
انہوں نے کہا کہ صحافیوں کا احتجاج سرآنکھوں پر ہے لیکن جب سے سوشل میڈیا اور ’آرٹیفیشل اینٹلی جنس (اے آئی ) کا ’تڑکا‘ لگا ہے کسی کی عزت محفوظ نہیں رہی ہے۔
اس میں کسی کی بیٹی، بہن یا ماں کی عزت محفوظ نہیں رہی، جس کی جو مرضی ہے وہ کسی کی ماں، بہن یا بیٹی کو جس طرح چاہے دکھا دیتا ہے، اس جہالت کے بعد اگران لوگوں کو سخت ہاتھ نہ ڈالا گیا تو کسی کی بھی عزت محفوظ نہیں رہے گی نہ ہی یہ سلسلہ رکنے والا ہے، اس کو روکنے کے لیے یہی قانون نافذ العمل ہو گا تو بات بنے گی۔
رانا ثنا اللہ نے کہا کہ اس بل پر صحافیوں کے اعتراضات اور تحفظات پر وزیراعظم سے بات ہوئی ہے وہ اعلیٰ سطح پرکمیٹی تشکیل دے کر صحافیوں سے بات چیت کرنے اور تحفظات دور کرنے کے لیے تیار ہیں، لیکن خدا کے لیے اس عذاب سے جان چھوٹنے دیں۔
رانا ثنا اللہ نے کہا کہ ’اے آئی ‘ کے آنے سے رہی سہی کسر بھی نکل گئی ہے، سوشل میڈیا کو قابو کرنے کے لیے سائبر کرائم کا کوئی مؤثر ادارہ نہیں ہے اس کے لیے ایف آئی اے کے پاس جانا پڑتا ہے جہاں اسٹاف کی کمی کے باعث فوری انصاف ملنا ممکن نہیں ہوتا۔ حکومت صحافیوں کے تحفظات اورخدشات ہر حال میں دور کرنے کے لیے تیارہے۔
رانا ثنا اللہ نے صحافیوں سے درخواست کی کہ وہ اس قانون کو نافذ العمل ہونے دیں کیونکہ یہ عام آدمی کے تحفظ کے لیے ہے، اس کے نافذالعمل ہونے اور خصوصاً ادارے قائم کرنے میں ابھی بہت وقت لگے گا، اس دوران صحافیوں کے ساتھ مل کران کے تحفظات اور خدشات کو دورکر لیا جائے گا۔
وزیراعظم کےمشیر نے کہا کہ ابھی تک اس بل کی کسی ایک شق پر بھی کسی کے اعتراضات نہیں آئے ہیں، تاہم یہ اعتراض ضرورآیا ہے کہ اس کا استعمال غلط ہو سکتا ہے۔
رانا ثنا اللہ نے کہا کہ وزیراعظم پاکستان کی جانب سے اور اپنی جانب سے میڈیا ہاؤسز کو یقین دہانی کراتا ہوں کہ اس آرڈیننس کو قطعاً صحافیوں، صحافتی تنظیموں یا صحافتی اداروں کے خلاف استعمال نہیں کیا جائے گا۔
ایک سوال کے جواب میں رانا ثنا اللہ نے کہا کہ پی ٹی آئی کے ساتھ مذاکرات کے حوالے سے کسی نے کوئی بے وفائی نہیں کی، مذاکرات کا مسلمہ طریقہ یہی ہے کہ ایک فریق مطالبہ کرتا ہے اور دوسرا اس کا جائزہ لیتا ہے، پھر کوئی فیصلہ ہوتا ہے، پی ٹی آئی سے 7 ورکنگ روز کا وقت مانگا لیکن پی ٹی آئی نے کہا کہ ہمیں آئندہ مذاکرات میں بیٹھنے کی اجازت ہی نہیں ہے۔
انہوں نے کہا کہ ہم پی ٹی آئی کے مطالبات پراپنے جوابات تیار کر چکے ہیں، جس طرح انہوں نے چارٹر آف ڈیمانڈ پیش کیا ہے اسی طرح ہم بھی انہیں ان ڈیمانڈز پرجوابات دیں گے۔
مذاکراتی کمیٹی کے ممبر حامد رضا کے مدرسے پر چھاپے سے متعلق سوال کے جواب میں رانا ثنا اللہ نے کہا کہ انہوں نے اس کی شکایت اسپیکر اسمبلی سے نہیں کی، مذاکرات کے حوالے سے یہ ایک بہانہ بنا رہے ہیں۔
رانا ثنا اللہ نے انکشاف کیا کہ پی ٹی آئی کے چارٹرآف ڈیمانڈ کے کچھ نکات پر جواب ہاں میں بھی ہو گا اور نہ میں بھی ہوگا، جہاں تک جوڈیشل کمیشن کے قیام کا مطالبہ ہے تو اس میں دیکھنا ہے کہ ٹرمزآف ریفرنس کیا ہے؟
پی ٹی آئی والے کہتے ہیں کہ فلاں شخص کو جوڈیشل کمیشن کا سربراہ بنایا جائے، آیا جس کی وہ کہہ رہے ہیں وہ اس کمیشن کا سربراہ بننے کے لیے تیار ہوگا یہ ساری چیزیں دیکھنے کے بعد ہی فیصلہ کیا جاسکتا ہے، تاہم میری ذاتی سوچ ہے کہ سپریم کورٹ سے کوئی بھی جوڈیشل کمیشن کے قریب تک نہیں آئے گا۔
انہوں نے کہا کہ ہم نے پی ٹی آئی کو کسی بھی چیز سے نہیں روکا، نہ احتجاج سے روکا نہ سول نافرمانی کی تحریک سے روکا ہے، یہ جمہوریت کا حصہ ہے اور جمہوریت میں مسائل کا واحد راستہ مذاکرات ہوتے ہیں اور ہم میز پر ہی مسائل حل کرنے کے خواہاں ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
.
ذریعہ
ذریعہ: WE News
کلیدی لفظ: رانا ثنا اللہ نے کہا کہ جوڈیشل کمیشن پی ٹی ا ئی کے کرنے کے لیے کے لیے تیار صحافیوں کے انہوں نے نہیں ا کسی کی
پڑھیں:
ایران سے مذاکرات کے امکانات روشن ہیں، معاہدے کا حتمی نہیں کہہ سکتے، امریکی وزیر خارجہ مارکو روبیو
امریکی وزیر خارجہ مارکو روبیو نے کہا ہے کہ ایران کے ساتھ جوہری مذاکرات کی بحالی کے امکانات روشن ہیں اور ایران بعض ایسے نکات پر بات چیت کے لیے آمادہ ہو گیا ہے جن پر وہ ماضی میں گفتگو سے انکار کرتا رہا تھا تاہم اس بات کی کوئی ضمانت نہیں دی جا سکتی کہ مذاکرات کسی قابل قبول معاہدے پر منتج ہوں گے۔
یہ بھی پڑھیں: امریکی صدر ڈونلڈ ٹرمپ اسرائیلی حملوں پر برہم، نیتن یاہو کو سخت پیغام
سینیٹ کی خارجہ تعلقات کمیٹی کے سامنے اپنے بیان میں مارکو روبیو نے کہا کہ ایران نے اپنے جوہری پروگرام کے بعض پہلوؤں پر بات چیت پر آمادگی ظاہر کی ہے جو چند ماہ قبل تک ممکن نہیں سمجھی جا رہی تھی۔
انہوں نے کہا کہ ایران ایسے معاملات پر مذاکرات کے لیے تیار ہوا ہے جن کا ذکر کرنے سے بھی وہ پہلے گریز کرتا تھا تاہم یہ اس بات کی ضمانت نہیں کہ بالآخر کوئی ایسا معاہدہ طے پا جائے گا جو سب کے لیے قابل قبول ہو۔
روبیو کے مطابق ایرانی قیادت کے اندر پائی جانے والی غیر یقینی صورتحال بھی مذاکراتی عمل کو پیچیدہ بنا رہی ہے۔
تاہم امریکی وزیر خارجہ کی امید افزا باتیں ایسے وقت سامنے آئی ہیں جب ایران اور امریکا کے درمیان بالواسطہ رابطوں میں نئی رکاوٹیں پیدا ہونے کی اطلاعات سامنے آئی ہیں۔ ایرانی ذرائع ابلاغ کے مطابق اسرائیل کی جانب سے بیروت پر حملوں کی دھمکیوں کے بعد ایران نے ثالثوں کے ساتھ رابطے معطل کر دیے ہیں۔
ادھر امریکا کی میزبانی میں اسرائیل اور لبنان کے درمیان سیاسی مذاکرات کا نیا دور بھی جاری ہے جبکہ اسرائیل اور حزب اللہ کے درمیان بڑھتی ہوئی کشیدگی نے پہلے سے موجود نازک جنگ بندی کو مزید غیر یقینی بنا دیا ہے۔
مزید پڑھیے: لبنان جنگ بندی پراتفاق ہونے کے بعد امریکا، ایران مذاکرات دوبارہ تیز رفتاری سے شروع ہو گئے ہیں، ڈونلڈ ٹرمپ کا اعلان
مارکو روبیو نے کانگریس میں 2 روزہ بریفنگ کے دوران ایران، مشرق وسطیٰ، کیوبا، غیر ملکی امداد اور دیگر خارجہ پالیسی امور پر قانون سازوں کے سوالات کے جوابات دیے۔
ایران جنگ پر سوالاتکانگریس میں اپنی پہلی عوامی پیشی کے دوران روبیو کو ایران کے خلاف امریکی اور اسرائیلی کارروائیوں سے متعلق سخت سوالات کا سامنا بھی کرنا پڑا۔
متعدد ڈیموکریٹ ارکان نے جنگ کے آغاز سے قبل کانگریس کی منظوری نہ لینے پر تنقید کی جبکہ بیشتر ریپبلکن ارکان نے ایران کے خلاف کارروائی کی حمایت کی۔
امریکی صدر ڈونلڈ ٹرمپ کی جانب سے ایران کے خلاف فوجی کارروائی کے فیصلے پر بھی بحث جاری ہے خصوصاً ایسے وقت میں جب انہوں نے ماضی میں مشرق وسطیٰ میں طویل جنگوں سے گریز کا وعدہ کیا تھا۔
جنگ کے معاشی اثراتایران کے ساتھ جاری کشیدگی کے باعث آبنائے ہرمز میں تیل بردار جہازوں کی آمدورفت متاثر ہوئی ہے جس کے نتیجے میں عالمی منڈی میں تیل اور گیس کی قیمتوں میں اضافہ دیکھنے میں آیا ہے۔
مزید پڑھیں: ٹرمپ نے ایران جنگ بندی معاہدے کی شرائط مزید سخت کر دیں، تہران کے جواب کا انتظار، امریکی میڈیا
ماہرین کے مطابق دنیا کی تقریباً 20 فیصد تیل اور قدرتی گیس کی تجارت آبنائے ہرمز کے ذریعے ہوتی ہے اس لیے خطے میں کسی بھی قسم کی کشیدگی عالمی معیشت پر براہ راست اثر ڈال سکتی ہے۔
کیوبا سے متعلق بھی سخت مؤقفمارکو روبیو کو سماعت کے دوران کیوبا کے حوالے سے بھی سوالات کا سامنا کرنا پڑا۔ سماعت کے آغاز پر چند مظاہرین نے ’کیوبا کو جینے دو‘ اور ’کیوبن عوام کا قتل بند کرو‘ جیسے نعرے لگائے جنہیں بعد ازاں کمرے سے باہر نکال دیا گیا۔
یہ بھی پڑھیے: ایران ڈیل کے قریب ہیں، مگر جلد بازی نقصان دہ ہوگی، صدر ٹرمپ کا فوکس نیوز کو انٹرویو میں دعویٰ
روبیو، جو کیوبن تارکین وطن خاندان سے تعلق رکھتے ہیں، طویل عرصے سے کیوبا کو امریکی قومی سلامتی کے لیے خطرہ قرار دیتے رہے ہیں۔ ان کا کہنا ہے کہ کیوبا کے امریکا کے مخالف ممالک کے ساتھ تعلقات واشنگٹن کے لیے تشویش کا باعث ہیں۔
امریکی انتظامیہ نے حالیہ دنوں میں کیوبا کے سابق صدر راول کاسترو کے خلاف فوجداری الزامات بھی عائد کیے ہیں جس پر کیوبا کی حکومت نے شدید ردعمل ظاہر کرتے ہوئے اسے سیاسی اقدام قرار دیا ہے۔
مزید پڑھیں: ایران اور امریکا کے درمیان جنگ بندی معاہدہ تیار، ٹرمپ کی منظوری باقی، امریکی نیوز ویب سائٹ کا دعویٰ
مارکو روبیو بدھ کے روز بھی کانگریس کی مختلف کمیٹیوں کے سامنے پیش ہو کر امریکی محکمہ خارجہ کے بجٹ اور خارجہ پالیسی سے متعلق معاملات پر بریفنگ دیں گے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
امریکی وزیر خارجہ مارکو روبیو ایران امریکا تنازع ایران امریکا مذاکرات ایران امریکا معاہدہ
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ