وجائنل ڈلیوری کو آئیڈیل مانتے اور سیزیرین زچگی پر لعنت بھیجتے ہوئے بیشتر لوگ ایک بات بھول جاتے ہیں کہ ڈیلیوری کے اہم ترین فریقین میں عورت، گھر والوں اور ڈاکٹر کے علاوہ ایک اہم ترین فریق اور بھی ہوتا ہے، یعنی بچہ!
زچگی کے عمل میں عورت اور بچہ ایک ایسا سفر طے کرتے ہیں جس کا ہر پیچ وخم ایک اندھا موڑ ہے جس کے آگے کھائی ہے یا منزل، جاننا مشکل ہے۔ سو انہیں ایک ایسا رہبر چاہیے جو بروقت بھانپ سکے کہ کس وقت کیا ہونے والا ہے اور اب کیا کرنا چاہیے۔
احباب کو بہت شوق ہے یورپ اور امریکا میں زچگی کی مثالیں دینے کا سو وہیں کی بات کر لیتے ہیں۔ یورپ اور امریکا میں ہر زچگی تربیت یافتہ مڈوائف اور ڈاکٹر کی نگہداشت میں ہوتی ہے۔ بعض مڈوائفز تو بسا اوقات ڈاکٹر سے بھی زیادہ سمجھ دار ہوتی ہیں اور ڈیوٹی ڈاکٹر کے چھکے چھڑا دیتی ہیں۔
ہمیں سعودی عرب کے جس اسپتال میں کام کرنے کا موقع ملا وہاں سب مڈوائفز ساؤتھ افریقین تھیں۔ حد سے زیادہ ہوشیار اور کائیاں کہ ڈاکٹر کی معمولی سی لغزش بھی بھانپ لیتیں اور بااعتماد اس قدر کہ شکایت کرنے ہیڈ آف ڈیپارٹمنٹ کے پاس پہنچ جاتیں۔ ہیڈ آف ڈیپارٹمنٹ کی مجال نہیں تھی کہ وہ ان کی بات کو نظر انداز کریں۔ سو سب ڈاکٹرز بہت محتاط رہ کر کام کرتے اور اگر مڈوائف کسی مسلے کی نشان دہی کرتیں، ڈاکٹر فورا اس پر کان دھرتے۔ ہم نے پہلی بار وہاں جانا کہ نرسنگ اسٹاف اور مڈوائف کی اتھارٹی اور رائے کی اہمیت کیا ہوتی ہے؟
یہ بھی پڑھیں: بچہ پیدا کرنے کے لیے ویجائنا کٹوائیں یا پیٹ؟
اسٹاف کے ساتھ ساتھ یورپ اور امریکا میں زچگی کے عمل کو مسلسل سی ٹی جی کی مدد سے مانیٹر کیا جاتا ہے اور بچے کے دل کی دھڑکن کا گراف پیپر مشین سے ریکارڈ ہو کر نکلتا رہتا ہے۔ ڈیلیوری کا عمل اگر طویل ہو جائے تو 200،100 میٹر گراف تو کہیں نہیں گیا۔
ہر مریضہ کے ساتھ ایک مڈوائف زچگی کے پورے عمل کے دوران موجود رہتی ہے جو نہ صرف اس کا حوصلہ بڑھاتی ہے بلکہ اس کا پیٹ سہلاتی، پانی پلاتی، پوزیشن بدلواتی، ڈرپ لگواتی اور پیشاب کرنے میں مدد دیتی ہے۔ اس کے ساتھ ساتھ وہ ہر انہونی کی طرف نظر رکھتی ہے خاص طور پر سی ٹی جی مشین کی طرف۔ یاد رہے کہ سی ٹی جی گراف پڑھنے میں بھی وہ ہوشیار ہے سو جونہی شائبہ ہو کہ سی ٹی جی میں کچھ گڑبڑ ہے، مڈوائف ڈاکٹر کو کال کرتی ہے کہ آکر دیکھو۔ جونیئر ڈاکٹر اگر مصروف ہو تو وہ فوراً سینیئر ڈاکٹر کا فون ملا لیتی ہے۔ کسی ڈاکٹر کی مجال نہیں کہ اس کی بات نہ سنے یا اسے جھاڑ دے۔ بخدا جب کبھی ہمیں مڈوائف کی کال آ جاتی کہ جونیئر دوسرے کمرے میں مصروف ہے، تم پہنچو۔ ہم اسپتال کے جس کونے میں بھی ہوتے وہاں سے دوڑ لگا دیتے کہ مڈوائف ڈاکٹر کے پہنچنے کاوقت بھی نوٹ کرتی ہے اور ڈاکٹر کو سی ٹی جی گراف پر اپنی مہر لگانی ہوتی ہے کہ اس مرحلے پر ڈاکٹر پہنچ گیا تھا۔ مڈوائف کی بات سن کر اور مریضہ پلس سی ٹی جی کا معائنہ کر کے فیصلہ ڈاکٹر کو کرنا ہوتا ہے کہ اب کیا کیا جائے؟
اگر سی ٹی جی ظاہر کرے کہ بچے کو آکسیجن ٹھیک طرح نہیں مل رہی اور بچے کی طبعیت خراب ہو رہی ہے تب اگلا قدم اس آبزرویشن کو کنفرم کرنا ہے۔
وجائنا میں ایک اوزار ڈال کر بچے کے سر پر بلیڈ سے ہلکا سا کٹ لگا کر خون کے 2، 3 قطرے لیے جاتے ہیں اور انہیں ایک مشین میں ڈال کر پی ایچ چیک کی جاتی ہے۔
انسانی خون کی پی ایچ 7 اعشاریہ 2 سے زیادہ ہوتی ہے۔ اگر بچے کے خون کی پی ایچ اس سے کم ہو مگر 7 اعشاریہ ایک سے زیادہ ہو تو اس کا مطلب ہے کہ کچھ دیر انتظار کیا جا سکتا ہے۔ اگر پی ایچ 7 اعشاریہ ایک سے کم نکلے تو اس کا مطلب یہ ہے کہ بچہ فوراً پیدا کروایا جائے۔ فوراً کا مطلب فوراً۔
اب یہ ہے وہ فوراً جس پر پاکستانی عوام ڈاکٹرز پر چڑھ دوڑتے ہیں کہ ابھی تک تو سب ٹھیک تھا پھر ایک دم کیسے سب بدل گیا؟
یہاں یہ بات یاد رکھیں کہ پاکستان میں نہ تو بچے کے سر سے خون کے قطرے لے کر پی ایچ چیک کرنے والا سسٹم موجود ہے، نہ ایسی مڈوائفز جو’ون ٹو ون‘ کی بنیاد پر ہر مریض کے سرہانے بیٹھیں، نہ ہر مریض کے لیے علیحدہ سی ٹی جی مشین اور نہ ہی مشین میں 200،100 میٹر گراف پیپر۔
پاکستان میں ایک انار سو بیمار کے مصداق ڈھیروں مریضوں میں ایک 2 نرسیں، ایک آدھ سی ٹی جی مشین، گراف پیپر کی قلت اور ایک 2 ڈاکٹر۔ سرکاری اسپتال ہو تو معمولی تنخواہ میں کام کر کر کے بے حال اور پرائیویٹ اسپتال ہو تو ڈاکٹر کی مہارت مشکوک۔
کوئی بھی ڈیلیوری اس وقت تک محفوظ نہیں ہے جب تک مریضہ کے پاس ’ون ٹو ون‘ نرس یا مڈوائف، مسلسل چلتی سی ٹی جی مشین اور ماہر ڈاکٹر موجود نہ ہو۔
اسی لیے جب تقابل کیا جاتا ہے یورپ اور امریکا کے لیبر روم اور سہولیات سے جن کا عشر عشیر بھی ہمارے یہاں موجود نہیں تو ہم سر پیٹ لیتے ہیں۔
ایسے حالات میں کوئی بھی درد دل رکھنے والی ڈاکٹر ماں اور بچے کی زندگی کی ذمہ داری کیسے اُٹھائے؟ اس سوال کا جواب سب کو ڈھونڈنے کی ضرورت ہے۔
مزید پڑھیے: اگر بچہ وجائنا سے باہر نہ نکل سکے تو؟
زچگی کے عمل میں جب بچے دانی سکڑتی ہے تب بچے کو پہنچنے والی آکسیجن منقطع ہو جاتی ہے ۔ یہ وقفہ درد کا وقت ہوتا ہے یعنی یوں سمجھیے کہ ماں کو ہونے والے ہر درد میں بچے کو آکسیجن نہیں پہنچتی۔ ایک سے دوسرا درد آنے کے بیچ جو وقفہ ہوتا ہے اس میں آکسیجن کی سپلائی دوبارہ بحال ہوتی ہے۔ سو بچہ مسلسل آکسیجن کی سپلائی کی کمی اور بحالی کے عمل سے گزر رہا ہوتا ہے۔ یہ عمل سی ٹی جی مشین کے گراف پیپر پر ریکارڈ ہوتا رہتا ہے اگر سی ٹی جی مشین مسلسل چلتی رہے تو۔
ماہر ڈاکٹر اور مڈوائف آکسیجن کی کمی اور بحالی کے وقت پر نظر رکھتے ہیں۔ اگر انہیں لگے کہ آکسیجن کمی کا دورانیہ زیادہ ہو گیا ہے اور بحالی کا کم تب سوچا جاتا ہے کہ کیا کیا جائے؟
کیا بچہ ایسی جگہ پر ہے کہ اسے اوزار لگا کر نکالا جائے؟ یا ابھی وہ اس مرحلے سے دور ہے؟
اگر بچے اوزاری ڈیلیوری والی جگہ پر ابھی نہیں پہنچا اور بچے کی آکسیجن کمی کا وقت زیادہ ہوتا جا رہا ہے تب آپ بتائیے کیا کیا جائے؟
مزید پڑھیں: چھلاوہ حمل!
لیکن یاد رکھیے کہ زچگی کی اس سائنس پر مہارت ہونے کے لیے وہ سب عناصر درکار ہیں جن کا ہم نے ذکر کیا۔ یقین کیجیے یہ سب ہمیں ڈاکٹر بن کے بھی نہیں آتا تھا، اس کے پیچھے برسہا برس کی ریاضت اور بدیسی یاترا شامل ہے۔
اسی لیے تو ہمارے تصورمیں کروڑ پکا، کوٹ ادو، لیہ، قصور، احمد نگر چٹھہ ، ژوب، چترال ، اسکردو، زیارت، تھر اور ان کے آس پاس کے سب دیہاتوں میں بسنے والی عورتیں آتی ہیں کہ کیا کرتی ہوں گی وہ سب اور ان کے پیٹ میں موجود بچہ؟
آپ بھی سوچیے!
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
ذریعہ: WE News
کلیدی لفظ: پی ایچ زچگی زچگی کا دوسرا فریق زچہ و بچہ سیزیرین ڈیلیوری مڈوائف نارمل ڈیلیوری یورپ اور امریکا سی ٹی جی مشین مڈوائف کی گراف پیپر زیادہ ہو ڈاکٹر کی ہوتی ہے ہوتا ہے اور بچے بچے کے ہے اور پی ایچ ہیں کہ کی بات کے لیے
پڑھیں:
ترکیہ کے رنگ میں رنگا پاکستان
فاروق بھائی، فلم دیکھیں گے؟
برادرِ محترم ڈاکٹر خلیل طوقار نے یہ سوال پوچھا تو میں چونک گیا۔ احباب جانتے ہیں کہ ڈاکٹر خلیل طوقار سنجیدہ فکر ادیب اور محقق ہیں اتنے سنجیدہ کہ افسانہ و ناول کو بھی ان کی توجہ پانے کے لیے محنت کرنا پڑتی ہے۔ یہ پس منظر تھا جب انھوں نے فلم دیکھنے کی دعوت دی تو میں چونکا۔ یہ گزشتہ ہفتے کی بات ہے جب پاکستان میں وزیرِ اعظم شہباز شریف کے اعلان کے مطابق ہفتہ ترکیہ منایا جا رہا تھا۔
ترکیہ کی قومی تاریخ میں اکتوبر کا مہینہ غیر معمولی اہمیت رکھتا ہے۔ پہلی جنگِ عظیم کے موقع پر عالمی استعماری طاقتوں نے نہ صرف سلطنتِ عثمانیہ کے حصے بخرے کیے بلکہ استنبول پر بھی قبضہ کر لیا۔ یوں ترکیہ کی آزادی ہی داؤ پر لگ گئی۔
یہ بڑا مشکل زمانہ تھا، مگر ترکیہ کی قومی فوج نے غازی مصطفی کمال اتاترک کی قیادت میں استعماری قوتوں کے خلاف کامیابی سے جنگ لڑی اور اپنے ملک کی آزادی برقرار رکھی۔ اکتوبر 1915 میں چناق قلعے کا معرکہ ہوا جس میں اتحادی فوج کو فیصلہ کن شکست ہوئی، اور 29 اکتوبر 1923 کو غازی مصطفی کمال اتاترک نے انقرہ کو دارالحکومت قرار دے کر جدید جمہوریہ ترکیہ کے قیام کا اعلان کیا۔ ہمارے ترک بھائی یہ دن بڑے تزک و احتشام سے مناتے ہیں۔ اسی تاریخی پس منظر پر مبنی وہ فلم تھی جسے دیکھنے کی دعوت مجھے ڈاکٹر خلیل طوقار نے دی۔
فلم کا نام ہے آخری خط۔ یہ سلطنتِ عثمانیہ کی فضائیہ کے ایک بہادر پائلٹ صالح کی سرفروشی اور محبت کی کہانی ہے۔ ترکیہ میں میرا آنا جانا بہت رہا ہے۔ استنبول میں قیام کے دوران استقلال جادہ سی پر جانا ہمیشہ ایک خوش گوار تجربہ رہا۔ وہاں ہر وقت ہزاروں سیاح مٹرگشت کرتے دکھائی دیتے ہیں۔
ان ہی گلی کوچوں میں گھومتے ہوئے ترکیہ کی فلم انڈسٹری سے بھی تعارف ہوتا ہے۔ جگہ جگہ بڑے بڑے پوسٹر نظر آتے ہیں، جیسے کبھی ہماری فلموں کے ہوا کرتے تھے۔ مجھے ایک فلم کا نام یاد ہے بابا میراثی۔ یہ نام دیکھ کر میں چونکا کہ کیا ترکیہ میں بھی میراثی ہوتے ہیں؟ معلوم ہوا کہ یہاں میراثی سے مراد صاحبِ میراث ہے، نہ کہ ہمارے روایتی قصہ گو۔ہمارا میراثی تو امتدادِ زمانہ سے بے حال ہو چکا ہے، ورنہ ماضی میں وہ عزت دار شخص تھا جو خاندان کے شجرے کا ریکارڈ رکھا کرتا تھا۔ اگر آج بھی کوئی برگزیدہ میراثی مل جائے تو وہ اپنی بے نظیر یادداشت کے سہارے ایسے دل چسپ انداز میں شجرہ سناتا ہے کہ سننے والا مبہوت ہو کر رہ جاتا ہے۔
بات کسی اور طرف جا نکلی۔ استقلال جادہ سی میں فلموں کے اشتہار دیکھ کر میری رائے بنی تھی کہ ترکیہ کی فلمیں بھی ہماری فلموں جیسی ہی ہیں۔ اگر کبھی ترکیہ میں کوئی فلم دیکھنے کا موقع ملتا تو شاید یہ خیال بدل جاتا، مگر ایسا کوئی موقع میسر نہ آ سکا۔ اب کئی برس کے بعد ڈاکٹر خلیل طوقار کی دعوت پر یہ فلم دیکھی تو اندازہ ہوا کہ ترکیہ کی فلم انڈسٹری تو معیار کے اعتبار سے ہالی ووڈ کو شرماتی ہے۔فلم دیکھ کر دوہری خوشی ہوئی: ایک فلم کے اعلی معیار کی، اور دوسری وزیرِ اعظم کے اس فیصلے کی۔ اگر انھوں نے ہفت ترکیہ منانے کا اعلان نہ کیا ہوتا تو شاید یہ فلم دیکھنے کا موقع ہی نہ ملتا۔
کچھ عرصہ قبل سردیوں کی ایک خوش گوار شب ڈاکٹر خلیل طوقار نے عشائیے کا اہتمام کیا۔ ان کے مہمان دو تھے: برادرِ محترم پروفیسر ڈاکٹر یوسف خشک اور ان سطور کا لکھنے والا۔ ڈاکٹر طوقار ترکیہ کے ثقافتی مرکز یونس ایمرے انسٹی ٹیوٹ کی پاکستان شاخ کے سربراہ ہیں۔ پاکستان ان کے لیے اجنبی ملک نہیں ۔وہ اس کے داماد بھی ہیں اور فرزندِ اردو بھی۔ انھوں نے گزشتہ پینتیس چالیس برس میں اردو زبان و ادب کو مالا مال کر دیا ہے۔ تیس چالیس کتابوں کے مصنف ہیں اور ہندکو زبان کی گرامر بھی انھوں نے مرتب کی ہے۔
یوں وہ پاکستان میں ہوں یا ترکیہ میں، ہمارے لیے اجنبی نہیں لیکن وہ چوں کہ ایک سرکاری اسائنمنٹ پر یہاں ہیں، اس لیے انھیں بھی یہ احساس تھا اور ہمیں بھی کہ جیسے ہی وہ واپس جائیں گے، ان کے دم قدم سے قائم یہاں تہذیبی رونقیں ماند پڑ جائیں گی۔ یہی احساس تھا جس نے اس رات کے کھانے کو یادگار بنا دیا، کیونکہ اسی نشست میں تجویز ہوا کہ پاک ترکیہ دوستی اور ثقافتی رشتوں میں مزید گہرائی پیدا کرنے کے لیے ایک تنظیم قائم کی جائے۔
یہ تنظیم آج بنے یا کل، ان ہی باتوں میں کافی وقت گزر گیا یہاں تک کہ ڈاکٹر یوسف خشک شاہ عبد اللطیف بھٹائی یونیورسٹی کے وائس چانسلر بن کر خیرپور جا پہنچے۔ اس پیش رفت نے احساسِ زیاں کو بڑھا دیا۔ یوں مشاورت کا دائرہ وسیع کر دیا گیا جس میں جناب خورشید احمد ندیم، ڈاکٹر مجیب میمن، ڈاکٹر زاہد مجید، محترمہ نعیم فاطمہ علوی، ڈاکٹر محمد کامران اور ڈاکٹر صدف نقوی سمیت دیگر احباب شامل ہوئے۔ مکمل اتفاقِ رائے سے دوست کے نام سے پاک ترکیہ فرینڈشپ فورم قائم کیا گیا۔اس فورم کے قیام کا اعلان 30 اکتوبر کو علامہ اقبال اوپن یونیورسٹی میں ہونے والی بین الاقوامی کانفرنس میں کیا گیا جو ہفتہ ترکیہ کے سلسلے میں یونس ایمرے انسٹی ٹیوٹ کے اشتراک سے منعقد ہوئی۔ کانفرنس میں شہر کی مختلف جامعات اور کالجوں کے اساتذہ و طلبہ امڈ آئے۔
ہفت ترکیہ کی تقریبات بھرپور رہیں۔ پی این سی اے کے تعاون سے ترک موسیقی کی محفل ہوئی، فلم شو کا ذکر آ چکا۔ لوک ورثہ میں بحیرہ اسود کے معروف رقص ہورون کا مظاہرہ ہوا۔ ترکوں کے مختلف خطوں میں الگ الگ رقص رائج ہیں جو اپنے اپنے علاقوں کی ثقافت اور روایت کی نمائندگی کرتے ہیں۔ انھیں دیکھ کر اندازہ ہوتا ہے کہ تہذیبی مظاہر میں نظم و ترتیب کے کیا معنی ہیں۔ ہورون ان سب سے بڑھ کر ہے۔
ہفتہ ترکیہ ہر اعتبار سے کامیاب اور شاندار رہا، پاکستانیوں اور ترک بھائیوں، سب نے مل کر ہفت ترکیہ پورے جوش و خروش سے منایا۔ اس موقع پر اسلام آباد میں چھ تصویری نمائشوں کے علاوہ خیر پور اور جامعہ کراچی میں ایک ایک تصویری نمائش کا اہتمام کیا گیا ۔ ان مواقع پر حاضرین کی تواضع ترک کافی سے کی گئی۔ اس گہما گہمی کے پیچھے ایک بڑی قوت محرکہ یونس ایمرے انسٹی ٹیوٹ کی تھی جس کے ان تھک سربراہ ڈاکٹر خلیل طوقار ہیں جو ہمہ وقت مصروف رہتے ہیں۔
کچھ عرصہ قبل ڈاکٹر عرفان نذیر اوغلو سفیر کی حیثیت سے اسلام آباد تشریف لائے ہیں۔ ترکیہ کے تمام سفیر متحرک ہوتے ہیں لیکن ڈاکٹر عرفان نذیر اوغلو کے عوامی انداز نے ترک سفارت خانے کو بہت متحرک کر دیا ہے یہی سبب ہے کہ اس ہفتے کی رونقیں صرف وفاقی دارالحکومت میں نہیں بلکہ خیرپور کی شاہ عبد اللطیف بھٹائی یونیورسٹی جیسے دور دراز علاقوں میں بھی دیکھی گئیں۔ہم اب تک یومِ پاکستان اور یومِ آزادی کے موقع پر آبنائے باسفورس کے اساطیری پل کو پاکستان کے رنگ میں رنگا دیکھتے آئے تھے مگر اس بار پورا پاکستان ترکیہ کے رنگ میں رنگا گیا۔
مریم نواز کی امریکی سرمایہ کاروں کو شاندار مواقع سے فائدہ اٹھانے کی دعوت