برصغیر کی جنگِ آزادی اور فلسطین کی جنگِ آزادی
اشاعت کی تاریخ: 28th, April 2025 GMT
ابھی چند دن پہلے ہماری دینی قیادت نے یہیں اسلام آباد میں اکٹھے ہو کر ایک فتویٰ دیا ہے جس پر ملک میں باتیں کی جا رہی ہیں کہ علماء کو جہاد کا فتویٰ دینا اب یاد آیا ہے؟ میں نے اس پر گزارش کی ہے کہ یہ پہلا موقع نہیں ہے، گذشتہ سال بھی اسلام آباد کے کنونشن سنٹر میں اسی نوعیت کی ایک کانفرنس منعقد ہوئی تھی اور انہی قائدین نے یہی باتیں کی تھیں جو اِس کانفرنس میں کی ہیں۔ ہمارے دینی قائدین مولانا مفتی محمد تقی عثمانی، حضرت مولانا فضل الرحمٰن، حضرت مولانا مفتی منیب الرحمٰن، حضرت مولانا ساجد میر ، حافظ نعیم الرحمٰن مسلسل قوم کو اور امت کو اپنے فرائض کی طرف توجہ دلاتے آ رہے ہیں کہ غزہ کا مسئلہ ہم سے کیا تقاضہ کر رہا ہے اور الحمد للہ قوم کے طبقات نے اس پر توجہ دی ہے لیکن ہمارے حکمرانوں نے اس طرف کوئی توجہ نہیں دی جن کی یہ ذمہ داری بنتی تھی۔ اسلام آباد کی حالیہ کانفرنس دراصل پچھلے سال کی اس کانفرنس کا تسلسل ہے اور یہ دینی قیادتوں کی طرف سے کوئی نیا اعلانِ جہاد نہیں ہے بلکہ یہ فتویٰ حکمرانوں کو توجہ دلانے کے لیے ہے کہ وہ اہلِ فلسطین کے مسلمانوں کو ظلم سے بچانے کے لیے اپنی ذمہ داری ادا کریں، جبکہ یوں لگتا ہے کہ شاید وہ اب بھی اس طرف توجہ کرنے کے لیے تیار نہیں ہیں۔
ایک بنیادی سوال یہ ہے کہ کیا فلسطینی مجاہدین کسی دوسرے ملک پر قبضہ کے لیے جنگ لڑ رہے ہیں یا اپنے ملک کو غیروں کے قبضہ سے چھڑانے کے لیے غاصب قوتوں سے نبرد آزما ہیں؟ وہ تو اپنے وطن کو صیہونی حملہ آوروں سے بچانے کی جدوجہد میں برسرپیکار ہیں، جسے معروف اور سیاسی معنوں میں جنگِ آزادی کہتے ہیں۔ ہم نے بھی برصغیر میں جنگِ آزادی لڑی ہے، فلسطینیوں کو تو ابھی پچھتر سال ہوئے ہیں، یا اسرائیل کے قیام سے پہلے فلسطین میں یہودی آبادکاری کا دور بھی شامل کر لیں تو ایک صدی کا عرصہ بنتا ہے، جبکہ ہم نے برصغیر میں ۱۷۵۷ء سے لے کر ۱۹۴۷ء تک ایک سو نوے سال تک جنگِ آزادی لڑی ہے جس کے مختلف مراحل ہیں۔ اور یہ بات میں نے اس لیے عرض کی ہے کہ جنگِ آزادی لڑنے والوں کی طرف سے جنگِ آزادی لڑنے والوں کو جو حمایت ملنی چاہیے تھی وہ نہیں مل رہی۔
ایسٹ انڈیا کمپنی برصغیر میں آئی تھی اور اس نے ہماری تجارت اور معیشت پر کنٹرول حاصل کر کے یہاں کے حکومتی نظام میں مداخلت شروع کر دی تھی۔ اس کے خلاف پہلی جنگِ آزادی بنگال کے نواب سراج الدولہؒ نے ۱۷۵۷ء میں ایسٹ انڈیا کمپنی کے خلاف لڑی تھی جسے جنگِ پلاسی کہتے ہیں۔ دوسری جنگِ آزادی سلطان ٹیپوؒ نے ۱۸۰۱ء میں ایسٹ انڈیا کمپنی سے لڑی تھی جو جنگِ میسور کہلاتی ہے۔ یہ دونوں جنگیں ملکی نظام میں دخل اندازی کرنے والے بیرونی مداخلت کاروں کے خلاف لڑی گئی تھیں۔ اس کے بعد ایسٹ انڈیا کمپنی کی فوجوں نے جب دہلی کا رخ کیا تو مغل حکمرانوں نے سراج الدولہ شہید اور سلطان ٹیپو شہید کا راستہ اختیار کرنے کی بجائے ایسٹ انڈیا کمپنی سے مصالحت کر لی تھی۔ شاہ عالم ثانی نے مداخلت کار قوتوں کے ساتھ سودے بازی کر کے ان کو اقتدار میں شریک کر لیا تھا۔ اس پر شاہ عبد العزیز محدث دہلویؒ نے جہاد کا فتویٰ دیا تھا جس کا عنوان یہ تھا کہ چونکہ ریاست پیچھے ہٹ گئی ہے اور اس نے مداخلت کاروں کے ساتھ مصالحت کا راستہ اختیار کر لیا ہے اس لیے جہاد فرض ہو گیا ہے، فتاویٰ عزیزی میں یہ فتویٰ موجود ہے۔ چنانچہ اس کے بعد کی جنگیں حضرت شاہ عبد العزیزؒ کے فتوے پر لڑی گئیں۔ بالاکوٹ کی جنگ، بنگال میں فرائضی تحریک کی جنگ، پنجاب میں احمد شاہ کھرلؒ کی جنگ، سندھ میں حروں کی جنگ ، اس لیے کہ جب ریاست نے اپنا کردار ادا کرنے سے گریز کیا تو پھر علماء کو میدان میں آنا پڑا۔یہ تاریخی حقیقت ہمارے سامنے ہونی چاہیے اور یہ میں نے اس لیے عرض کی ہے کہ آج بھی یہی ہوتا نظر آ رہا ہے۔ میں اس سے زیادہ تفصیل میں نہیں جانا چاہتا، صرف اپنے حکمرانوں کو یہ پیغام دینا چاہتا ہوں کہ ہم شاہ عبد العزیزؒ کے کیمپ کے لوگ ہیں اور ان شاء اللہ العزیز ہم اپنا یہ کردار ادا کرتے رہیں گے۔ دوسری بات یہ کہ کیا غزہ کی جنگ صرف ڈیڑھ سال کی جنگ ہے یا پچھتر سال پرانی جنگ ہے؟ آزادی کے لیے لمبی جنگیں کوئی بڑی بات نہیں ہوتی لیکن اس سے پہلے کے چوہتر سال ہم کیسے بھول سکتے ہیں۔ چلیں اسی غزہ کی جنگ کی بات کریں تو اس کا نتیجہ جنگ بندی کے معاہدہ کی صورت میں سامنے آیا تھا جس پر عملدرآمد کا آغاز ہو گیا تھا اور ساری دنیا دیکھ رہی تھی کہ قیدیوں کا تبادلہ شروع ہو گیا ہے۔ سوال یہ ہے کہ اس معاہدے کو سبوتاژ کس نے کیا ہے؟ اس وقت غزہ کی جنگ کی کمان امریکی صدر ٹرمپ کے ہاتھ میں ہے اور ڈونلڈ ٹرمپ صاحب جو کردار ادا کر رہے ہیں اس میں ہمارے ایک موقف کی تائید بھی ہے۔ ہمیں یہ سبق دیا جاتا تھا کہ یہ جنگ فلسطینیوں کی ہے، ہمیں اس میں پریشان ہونے کی ضرورت نہیں ہے۔ لیکن امریکی صدر کے طرز عمل نے یہ واضح کر دیا ہے کہ یہ صرف فلسطینیوں کی جنگ نہیں ہے بلکہ یہ امریکہ کی جنگ بھی ہے اور یورپی یونین کی جنگ بھی ہے۔میرا اپنے حکمرانوں سے اور دنیا بھر کے مسلم حکمرانوں سے سوال یہ ہے کہ تم یہ دوٹوک فیصلہ کر لو کہ ٹرمپ کے کیمپ میں ہو یا فلسطینیوں کے کیمپ میں ہو؟ ورنہ یہ وہی شاہ عالم ثانی والی بات ہو گی۔ہم مداخلت کار قوتوں کے ساتھ حکمران قوتوں کی سودے بازی پہلے بھگت چکے ہیں، آئندہ بھی بھگتنے کے لیے تیار ہیں، اور صدر ٹرمپ نے اس کی جنگ کی کمان اپنے ہاتھ میں لے کر جو چیلنج دیا ہے ہم اسے قبول کرتے ہیں، ان شاء اللہ تعالیٰ۔
تیسری اور آخری بات یہ کہ اللہ تعالیٰ سے دعائیں کرنا اور عالمِ غیب پر بھروسہ اپنی جگہ درست ہے لیکن ہمیں اسباب پر بھی توجہ دینا ہو گی کہ دنیا کے معاملے اسباب سے چلتے ہیں۔ یوں لگتا ہے کہ ملاحمِ کبریٰ کا آغاز ہو گیا ہے جس کا ذکر حدیث مبارکہ میں ہے، اور اس کا اختتام تب ہو گا جب لُد کے مقام پر حضرت مسیح ابن مریمؑ کے ہاتھوں مسیح دجال قتل ہو گا۔ اور لُد تل ابیب کا پرانا نام ہے۔ والد محترم حضرت مولانا محمد سرفراز خان صفدرؒ اس حوالے سے ایک بات کہا کرتے تھے کہ ہمارے کام کی ذمہ داری اسباب کے دائرے میں ہے۔ فرمایا کرتے تھے کہ دیکھو، حضرت عیسیٰ علیہ السلام جب تشریف لائیں گے تو آسمانوں سے دمشق کی جامع مسجد کے مینار پر اتریں گے، یہ فجر کی نماز کا وقت ہو گا، حضرت مسیح ابن مریمؑ مینار پر آکر آواز دیں گے کہ سیڑھی لاؤ تاکہ میں نیچے اتر سکوں۔ والد صاحبؒ کہتے تھے کہ آسمان سے آ گئے ہیں تو اب سیڑھی کیوں مانگ رہے ہیں؟ فرماتے تھے کہ یہ اللہ تعالیٰ کا قانون ہے کہ زمین کا نظام اسباب سے چلتا ہے، اوپر کا نظام عالمِ غیب ہے لیکن زمین کا نظام اللہ تعالیٰ نے اسباب کے تحت رکھا ہے۔
اس لیے ہمیں جنگ و جہاد اور جدوجہد کے تمام اسباب اختیار کرنے ہوں گے، معاشی بائیکاٹ بھی کرنا ہو گا، میڈیا کی جنگ بھی لڑنی ہو گی، سٹریٹ پاور کا مظاہرہ بھی کرنا ہو گا، سیاسی اور اخلاقی جدوجہد بھی کرنا ہو گی۔ یہ بات درست ہے کہ جنگ کا مطالبہ ہم انہی سے کریں گے جن کی ذمہ داری ہے۔ جہاد کا فتویٰ بھی انہی کے لیے آیا ہے اور ان شاء اللہ ہم ان سے اس وقت تک اس کا مطالبہ کرتے رہیں گے جب تک وہ میدان میں نہیں آتے۔ البتہ اس کے علاوہ جنگ کے جو باقی شعبے ہیں، میڈیا کی جنگ ہے، معاشی جنگ ہے، سیاسی جنگ ہے، ان کے لیے ہم نے اسباب اختیار کرنے ہیں اور میری ہر فرد اور ہر طبقے سے درخواست ہے کہ اپنے دل کو ٹٹولیں اور اپنے دائرہ کار کو دیکھیں کہ وہ اس سلسلہ میں کیا کر سکتے ہیں، اور جو کچھ ممکن ہو اس سے گریز نہ کریں، ورنہ قیامت کے دن پیشی ہو جائے گی، اللہ تعالیٰ ہم سب کی حفاظت فرمائیں اور اپنا کردار صحیح ادا کرنے کی توفیق عطا فرمائیں، وآخر دعوانا ان الحمد للہ رب العالمین۔
ذریعہ: Daily Ausaf
کلیدی لفظ: ایسٹ انڈیا کمپنی حضرت مولانا اللہ تعالی اختیار کر رہے ہیں نہیں ہے جنگ ہے تھے کہ ہے اور اس لیے کی جنگ کے لیے ہو گیا
پڑھیں:
اقوام متحدہ میں مسئلہ فلسطین پر تین روزہ اہم کانفرنس آج سے شروع
اسلام آباد (اُردو پوائنٹ ۔ DW اردو۔ 28 جولائی 2025ء) اقوام متحدہ کی جنرل اسمبلی نے گزشتہ سال ستمبر میں اس کانفرنس کے انعقاد کا فیصلہ کیا تھا۔ فرانس اور سعودی عرب کی میزبانی میں ہونے والی یہ کانفرنس جون میں اس وقت ملتوی کر دی گئی تھی جب اسرائیل نے ایران پر حملہ کیا تھا۔ درجنوں ملکوں کے وزراء اس کانفرنس میں شریک ہوں گے، جس کا مقصد اسرائیل اور فلسطین کے درمیان دو ریاستی حل کے لیے پیش رفت کرنا ہے، تاہم امریکہ اور اسرائیل اس کانفرنس کا بائیکاٹ کر رہے ہیں۔
اس کانفرنس میں پاکستان کی نمائندگی وزیر خارجہ اور نائب وزیر اعظم اسحاق ڈار کر رہے ہیں۔
یہ کانفرنس ایک ایسے وقت پر ہو رہی ہے جب غزہ میں انسانی صورت حال بدترین سطح پر پہنچ چکی ہے اور اسرائیلی حملوں کے نتیجے میں ہزاروں فلسطینی جانیں گنوا چکے ہیں جبکہ بنیادی ڈھانچہ مکمل طور پر تباہ ہو چکا ہے۔
(جاری ہے)
اس کانفرنس سے چند روز قبل فرانسیسی صدر ایمانوئل ماکروں نے اعلان کیا تھا کہ پیرس ستمبر میں باقاعدہ طور پر فلسطین کو تسلیم کرے گا، جس کے بعد اسرائیل اور فلسطین کے درمیان مذاکرات کی نئی تحریک کو تقویت ملی ہے۔
کانفرنس کا مقصد ایک فلسطینی ریاست کے قیام کے لیے روڈمیپ کے خد و خال وضع کرنا ہے، جبکہ اسرائیل کی سکیورٹی کو بھی یقینی بنانا اس کا ایک اہم جزو ہے۔
سعودی عرب نے کیا کہا؟کانفرنس سے قبل سعودی وزیر خارجہ شہزادہ فیصل بن فرحان نے اپنے ایک بیان میں کہا ہے کہ ’’مملکت ہر اس کوشش کی مکمل حمایت کرتی ہے جو خطے اور دنیا میں منصفانہ امن کے قیام کے لیے کی جا رہی ہو۔
‘‘انہوں نے مزید کہا کہ اسی نظریے کے تحت سعودی عرب نے فرانس کے ساتھ مل کر اس بین الاقوامی کانفرنس کی صدارت سنبھالی ہے تاکہ فلسطینی تنازعے کو پرامن طریقے سے حل کیا جا سکے۔
سعودی عرب کے وزیر خارجہ نے کہا کہ اس کانفرنس کا مقصد مشرقی یروشلم (القدس) کو دارالحکومت بنانے والی 1967ء کی سرحدوں پر مشتمل آزاد فلسطینی ریاست کے قیام کے سے منصفانہ اور جامع امن قائم کرنا ہے۔
فرانس کا بیانفرانسیسی وزیر خارجہ ژاں نوئل بارو نے اتوار کو ایک فرانسیسی اخبار کو دیے گئے ایک انٹرویو میں کہا ہے کہ وہ اس کانفرنس کو اس مقصد کے لیے بھی استعمال کریں گے کہ دیگر ممالک کو فلسطینی ریاست کو تسلیم کرنے کے لیے قائل کیا جا سکے۔
بارو نے کہا، ’’ہم نیویارک میں ایک اپیل کا آغاز کریں گے تاکہ دیگر ممالک بھی ہمارے ساتھ شامل ہوں اور ایک ایسی مزید پُرعزم اور مؤثر سفارتی تحریک کی ابتدا کریں جو 21 ستمبر کو اپنے عروج پر پہنچے۔
‘‘خیال رہے کہ صدر ایمانوئل ماکروں نے گزشتہ ہفتے اعلان کیا تھا کہ فرانس ستمبر میں اقوام متحدہ کی جنرل اسمبلی کے سالانہ اجلاس کے دوران باضابطہ طور پر فلسطینی ریاست کو تسلیم کرے گا۔
بارو نے نے مزید کہا کہ انہیں امید ہے کہ اس وقت تک عرب ممالک بھی فلسطینی عسکری گروہ حماس کی مذمت کریں گے اور اس کے غیر مسلح کیے جانے کا مطالبہ کریں گے۔
امریکہ اور اسرائیل کانفرنس میں شریک نہیںامریکی محکمہ خارجہ کے ترجمان نے کہا ہے کہ امریکہ اقوام متحدہ میں ہونے والی اس کانفرنس میں شرکت نہیں کرے گا۔ ترجمان کے مطابق یہ کانفرنس ’’حماس کے لیے ایک تحفہ ہے، جو تاحال ان جنگ بندی تجاویز کو مسترد کر رہا ہے جنہیں اسرائیل منظور کر چکا ہے اور جو یرغمالیوں کی رہائی اور غزہ میں امن کے قیام کا باعث بن سکتیں۔
‘‘ترجمان نے مزید کہا کہ واشنگٹن نے گزشتہ سال جنرل اسمبلی میں اس کانفرنس کی قرارداد کے خلاف ووٹ دیا تھا اور’’ایسے کسی بھی اقدام کی حمایت نہیں کرے گا جو اس تنازعے کے طویل المدتی اور پرامن حل کے امکانات کو خطرے میں ڈالے۔‘‘
اسرائیل بھی اس کانفرنس میں شریک نہیں ہو رہا ہے۔
اقوام متحدہ میں اسرائیلی مشن کے ترجمان جوناتھن ہارونوف نے کہا، ’’یہ کانفرنس سب سے پہلے فوری طور پر حماس کی مذمت اور باقی تمام یرغمالیوں کی واپسی جیسے اہم مسائل کو حل نہیں کرتی، اسی لیے اسرائیل اس میں شرکت نہیں کر رہا۔
‘‘ پاکستان کا ردعملکانفرنس میں پاکستان کی نمائندگی کرنے والے اسحاق ڈار کا کہنا ہے کہ ’’میں نیو یارک میں منعقدہ اس اعلیٰ سطح بین الاقوامی کانفرنس میں فلسطین کے حوالے سے پاکستان کے دیرینہ، اصولی اور مستقل مؤقف کا اعادہ کروں گا۔‘‘
اسحاق ڈار نے ایکس پر اپنے ایک بیان میں کہا،’’ہم امید رکھتے ہیں کہ یہ کانفرنس فلسطینی ریاست کے قیام، 1967 سے قبل کی سرحدوں کے مطابق اور بیت المقدس کو اس کا دارالحکومت بنانے، غزہ کے تباہ حال علاقوں کی تعمیر نو اور فلسطینی عوام کی مشکلات کم کرنے کے لیے ٹھوس اقدامات فراہم کرے گی۔
‘‘پاکستان کے نائب وزیر اعظم کا کہنا تھا کہ ’’یہ مسئلہ سنبھالنے میں پہلے ہی بہت دیر ہو چکی ہے۔ سعودی عرب اور فرانس کی کوشش قابل ستائش ہے۔ پاکستان ہمیشہ سے کہتا آیا ہے کہ فلسطین کا حل صرف دو ریاستی فارمولہ ہے۔‘‘
انہوں نے امید ظاہر کی کہ یہ کانفرنس فوری جنگ بندی، خوراک، ادویات اور دیگر امداد کی روانی کی راہ ہموار کرے گی اور فلسطین کو آزاد ریاست تسلیم کروانے میں مددگار ہو گی۔
ادارت: صلاح الدین زین
وزیر قانون و انصاف سینیٹر اعظم نذیر تارڑ کادورہ آذربائیجان، وزیرِ اعظم ، وزیر انصاف اور سپریم کورٹ کے چیف جسٹس سے ملاقاتیں