بھارت کو سخت پیغام، زمین سے زمین پر مار کرنے والے فتح میزائل کا کامیاب تجربہ
اشاعت کی تاریخ: 5th, May 2025 GMT
پاکستان نے زمین سے زمین پر مار کرنے والے فتح سیریز کے میزائل کا کامیاب تجربہ کیا ہے۔ پاک فوج کے شعبہ تعلقات عامہ (آئی ایس پی آر) کے مطابق یہ تجربہ ٹریننگ مشق “ایکسرسائز انڈس” کے دوران کیا گیا ہے۔ فتح میزائل کی رینج 120 کلومیٹر ہے۔ یہ تجربہ جنگی جنون کا شکار بھارت کے لیے ایک واضح اور کلیئر جواب ہے کہ پاکستان کسی بھی جارحیت کا مقابلہ کرنے کے لیے چوکس ہے۔یہ تجربہ ایک ایسے موقع پر کیا گیا ہے، جب پاک بھارت کشیدگی عروج پر ہےاور جنگی جنون میں مبتلا بھارت نے آبی جارحیت کا مظاہرہ کرتے ہوئے دریائے چناب کا پانی بند کرنا شروع کردیا ہے، دوسری طرف امریکی محکمہ خارجہ کی جانب سے اپنے شہریوں کو جاری کی گئی ٹریول ایڈوائزری بھی دونوں ممالک کے درمیان گھمیبر ہوتے تعلقات کو ظاہر کر رہی ہے۔آئی ایس پی آر کے مطابق فتح میزائل کا یہ تربیتی لانچ 120 کلومیٹر رینج تک اپنے ہدف کو کامیابی سے نشانہ بنانے میں کامیاب رہا۔ لانچ کا مقصد فوجیوں کی آپریشنل تیاری کو جانچنا اور میزائل کے جدید نیوی گیشن سسٹم، بہتر درستگی، اور دیگر اہم تکنیکی پہلوؤں کی توثیق کرنا تھا۔آئی ایس پی آر کے مطابق فتح سیریز کے میزائل قریبی فاصلے کے اہداف پر انتہائی مؤثر حملے کی صلاحیت رکھتے ہیں۔ میزائل کی یہ صلاحیت دشمن کی پیش قدمی روکنے اور ملکی دفاع کو مزید مضبوط بنانے میں اہم کردار ادا کرے گی۔پاکستان کی مسلح افواج نے اس کامیاب تجربے پر اطمینان کا اظہار کیا ہے اور کہا ہے کہ یہ پیشرفت ملک کے دفاع کو مزید مستحکم بنانے کی جانب ایک اہم قدم ہے۔فتح میزائل سیریز پاکستان کی کم فاصلے تک مار کرنے والے ٹیکٹیکل میزائلوں میں شامل ہے، جو ملک میں ہی تیار کیے گئے ہیں۔ یہ میزائل دشمن کے قریبی ٹھکانوں اور جنگی تنصیبات کو نشانہ بنانے کی صلاحیت رکھتے ہیں۔فتح میزائل کا شمار پاکستان کے اسلحہ خانے میں ان جدید ہتھیاروں میں ہوتا ہے جو دشمن کی کسی بھی جارحیت کا فوری اور مؤثر جواب دینے کے لیے تیار رکھے جاتے ہیں۔فتح سیریز کا آغاز دفاعی خودکفالت کے ایک اہم سنگ میل کے طور پر کیا گیا تھا۔ یہ میزائل اپنے کمپیکٹ سائز، موبائل لانچر اور تیز ردعمل کی صلاحیت کے باعث میدان جنگ میں تیزی سے استعمال کیے جا سکتے ہیں۔اس کا جدید نیویگیشن سسٹم اور درست نشانہ بنانے کی صلاحیت اسے ایک مہلک اور مؤثر ہتھیار بناتی ہے۔ موجودہ پاک بھارت کشیدگی کے تناظر میں ایسے میزائل کا تجربہ جنگی جنون کے شکار بھارت کو ایک واضح اور کرارا جواب ہے کہ بھارت کسی بھول میں نہ رہے۔اس کامیاب تجربے پر اعلیٰ عسکری قیادت نے متعلقہ ٹیموں کو سراہا اور کہا کہ پاکستان کی مسلح افواج ملکی سالمیت کے تحفظ کے لیے ہمہ وقت تیار ہیں۔
.ذریعہ: Nawaiwaqt
کلیدی لفظ: فتح میزائل میزائل کا کی صلاحیت کے لیے
پڑھیں:
پینٹاگون نے یوکرین کو ٹوماہاک میزائل فراہمی کی منظوری دے دی
واشنگٹن: (ویب نیوز) امریکی وزارتِ دفاع نے یوکرین کو طویل فاصلے تک مار کرنے والے ٹوماہاک کروز میزائلوں کی فراہمی کی منظوری دے دی۔غیر ملکی میڈیا کے مطابق پینٹاگون کے اہلکاروں نے بتایا کہ وزارتِ دفاع کی جانب سے یوکرین کو امریکی ٹوماہاک کروز میزائلوں کی فراہمی کی منظوری دی گئی ہے، میزائلوں کی فراہمی سے امریکی ہتھیاروں کا ذخیرہ متاثر نہیں ہوگا، یوکرین کو امریکی ساختہ ٹوماہاک میزائل فراہم کرنے سے متعلق حتمی فیصلہ امریکی صدر ڈونلڈ ٹرمپ کریں گے۔
خیال رہے کہ یوکرین کے صدر زیلنسکی کی جانب سے روسی توانائی اور انفراسٹرکچر اہداف کو نشانہ بنانے کیلئے امریکی ٹوماہاک کروز میزائلوں کی فراہمی کی درخواست کی گئی تھی، ٹوماہاک کروز میزائل 1 ہزار میل (تقریباً 1600 کلومیٹر) کی حدِ ضرب رکھتا ہے اور اس کو آبدوز اور بحری جہاز سے آسانی سے داغا جاسکتا ہے۔امریکی دفاعی اہلکاروں نے مزید بتایا ہے کہ ابھی ان میزائلز کو حوالے کرنے سے متعلق کئی اہم امور زیرِ غور ہیں جن میں اس کی تعیناتی اور تربیت کے معاملات قابل ذکر ہیں۔
افغانستان سے کشیدگی میں تحریک انصاف ریاست پاکستان کے ساتھ کھڑی ہوگی، بیرسٹر گوہر