اسرائیل کا مقصد ایرانی نظام حکومت کا تختہ الٹنا تھا لیکن ایران پہلے سے بڑھکر مستحکم ہوا ہے، مصری تجزیہ کار
اشاعت کی تاریخ: 2nd, July 2025 GMT
یہ بیان کرتے ہوئے کہ قابض اسرائیلی رژیم کیجانب سے ایران پر مسلط کردہ جنگ کا اصلی مقصد ایرانی نظام حکومت کا خاتمہ تھا، معروف مصری تجزیہ کار نے اعلان کیا کہ اس حملے میں تل ابیب کی ذلت آمیز شکست کے سبب تہران پہلے سے زیادہ مستحکم ہوا ہے لہذا اب چین و روس کو بھی مضبوطی کیساتھ ایران کیساتھ آ کھڑا ہونا چاہیئے! اسلام ٹائمز۔ مصر کے معروف سیاستدان و تجزیہ کار حمدین صباحی نے ایران کے خلاف غاصب صیہونی رژیم کی 12 روزہ جنگ کے بارے اعلان کیا ہے کہ اسلامی جمہوریہ ایران کے خلاف قابض صیہونی دشمن کی جارحیت کو ذلت آمیز شکست ہوئی ہے جس کے بدولت ایران اپنی قومی و جمہوری قوت کو برقرار رکھنے میں کامیاب رہا، تاہم، اگر خدا نخواستہ ایران ٹوٹ گیا تو اسرائیلی جارحیت کا اگلا ہدف، خطے کے بڑے ممالک جیسا کہ مصر، سعودی عرب اور ترکی ہوں گے۔ لبنانی چینل المیادین کے خصوصی پروگرام "اگر ممکن ہو" میں گفتگو کرتے ہوئے حمدین صباحی کا کہنا تھا کہ ایران، مشرق وسطی سے متعلق اسرائیل کے گھناؤنے منصوبے میں سب سے بڑی رکاوٹ ہے لہذا ایران کو راستے سے ہٹانے اور تنہاء کرنے کے لئے اس جعلی رژیم کو، کسی نہ کسی طور جنگ شروع کرنا ہی تھی تاکہ ایران بھی ایک "منحصر" ملک میں بدل جائے، اور یہی وجہ ہے کہ اس نے جنگ شروع کی جو 12 روز تک جاری رہی لیکن آخر کار اس نے خود ہی جنگ بندی کا مطالبہ بھی شروع کر دیا۔
مصری سیاستدان و تجزیہ کار نے تاکید کی کہ غاصب اسرائیلی رژیم کی جارحیت اب بھی "ختم" نہیں ہوئی اور نہ ہی کبھی ہو گی جبکہ عربی-ایرانی-ترکی تہذیبی مثلث، ایران کے لئے "تکمیلی مزاحمتی منصوبہ" ثابت ہو سکتی ہے درحالیکہ یہ نئے مشرق وسطی کے تسلط پسند منصوبے کے خلاف، شامی خطے کی بقا کے لئے بھی ایک سنہری اصول ہے لہذا ان تینوں فریقوں کے درمیان سنجیدہ مذاکرات کو فعال ہونا چاہیئے۔
حمدین صباحی نے تاکید کی کہ ایک تکمیلی نکتہ یہ بھی ہے کہ "شام" اور اس کے وسط میں "مشرق وسطی" پر تسلط کی جدوجہد؛ دراصل مستقبل قریب کے نئے عالمی نظام کے لئے جدوجہد ہے لہذا چین و روس کو بھی مزید سنجیدہ اقدامات اٹھانے چاہیئیں تاکہ وہ واضح، شفاف اور دوٹوک انداز میں ایران کے ساتھ آ کھڑے ہوں؛ نہ صرف ایران کے تحفظ کے لئے بلکہ اپنے، اپنے مفادات اور دنیا بھر میں اپنے مقام و کردار کے تحفظ کے لئے بھی!
انہوں نے زور دیتے ہوئے کہا کہ قابض اسرائیلی رژیم نے درحقیقت ایران کو خود سے دور کرنے اور اپنے تسلط کے تحت مشرق وسطی کا نیا نظام قائم کرنے کے لئے ہی حملہ کیا تھا، اگرچہ اس نے یہ اعلان کر رکھا تھا کہ اس کا مقصد ایرانی جوہری صلاحیت یا اس کے میزائل پروگرام کو تباہ کرنا ہے، لیکن یہ دونوں بنیادی مقاصد نہ تھے جبکہ اس کا بنیادی مقصد ایران پر برسراقتدار حکومتی نظام کا تختہ الٹنا اور اسرائیلی کنٹرول کے تحت ایک نیا مشرق وسطی بنانا تھا۔
معروف مصری سیاستدان نے تاکید کرتے ہوئے ایک مرتبہ پھر کہا کہ امریکی-صیہونی جارحیت کا اولین و آخرین ہدف ایران پر برسر اقتدار اسلامی نظام حکومت کا خاتمہ ہے کیونکہ یہ حکومت اس قوم کے خودمختار عزم کا نتیجہ ہے اور جیسا کہ امریکہ بڑا شیطان اور اسرائیل چھوٹا شیطان ہے، ان کا اولین مقصد اسلامی جمہوریہ ایران کی "خود مختار حکومت" کا تختہ الٹنا جبکہ دوسرا مقصد ایران کے جوہری پروگرام کو تباہ کرنا ہے۔ اس حوالے سے اپنی گفتگو کے آخر میں ان کا کہنا تھا کہ دشمن کے شوم منصوبوں کے برعکس، اسلامی جمہوریہ ایران نہ صرف مسلط کردہ اس جنگ سے اپنے بھرپور قومی اتحاد و قومی خود مختاری کے ہمراہ کامیابی کے ساتھ باہر نکلا بلکہ اس نے اپنے ایٹمی پروگرام کو بھی، قانون کے مطابق، بغیر کسی توقف کے محفوظ رکھا اور اب وہ اسے مزید ترقی دینے کا ارادہ رکھتا ہے!
ذریعہ
ذریعہ: Islam Times
کلیدی لفظ: مقصد ایران تجزیہ کار ایران کے ہے لہذا کے لئے
پڑھیں:
ایرانی جزیرے پر امریکی حملے کے بعد ایران کا جوابی وار، بحرین، عراق اور قطر میں سائرن بج گئے
امریکی فوج کی جانب سے ایرانی جزیرے قشم پر کارروائی کے دعوے کے بعد ایران نے خطے میں موجود امریکی مفادات اور فوجی تنصیبات کو نشانہ بنانے کا اعلان کرتے ہوئے جوابی حملوں کا دعویٰ کیا ہے۔
امریکی سینٹرل کمانڈ (سینٹ کام) کے مطابق امریکی افواج نے قشم جزیرے میں موجود ایک ایرانی فوجی تنصیب کو نشانہ بنایا۔
امریکی حکام کا کہنا ہے کہ یہ کارروائی ایران کی جانب سے میزائل اور ڈرون حملوں کے ردعمل میں کی گئی۔
سینٹ کام کے مطابق امریکی اور اتحادی دفاعی نظام نے متعدد ایرانی میزائل اور ڈرون راستے میں ہی تباہ کر دیے۔
امریکی بیان میں یہ دعویٰ بھی کیا گیا کہ ایران کی جانب سے داغے گئے بعض بیلسٹک میزائل اپنے اہداف تک پہنچنے میں ناکام رہے۔
کویت کی جانب فائر کیے گئے دو میزائل راستے میں گر گئے جبکہ بحرین کی طرف بڑھنے والے تین میزائل امریکی اور بحرینی فورسز نے فضا میں ہی تباہ کر دیے۔
اسی دوران امریکی فوج نے ایک ایسے آئل ٹینکر کو بھی ناکارہ بنانے کا دعویٰ کیا ہے جو مبینہ طور پر ایرانی جزیرے خارگ کی جانب رواں تھا۔
امریکی حکام کے مطابق مذکورہ جہاز پر بوٹسوانا کا پرچم لہرا رہا تھا۔
مزید پڑھیںایران کے ساتھ مذاکرات جاری ہیں، ڈونلڈ ٹرمپ
امریکا، اسرائیل کو جارحیت کے دوران ایرانی فضائی دفاع نے بھاری نقصان پہنچایا، ایرانی کمانڈر
دوسری طرف ایرانی پاسدارانِ انقلاب نے امریکی کارروائی کا فوری جواب دینے کا اعلان کرتے ہوئے کہا ہے کہ قشم میں کمیونیکیشن انفراسٹرکچر کو نشانہ بنانے کے بعد امریکی فوجی اڈوں پر میزائل اور ڈرون حملے کیے گئے ہیں۔
ایرانی ذرائع ابلاغ کے مطابق جوابی کارروائی میں بحرین میں موجود امریکی ففتھ فلیٹ کے ہیڈکوارٹر، بعض فضائی تنصیبات اور ہیلی کاپٹر مراکز کو ہدف بنایا گیا۔
پاسدارانِ انقلاب کا کہنا ہے کہ امریکی حملوں کا جواب دینا ناگزیر تھا اور خطے میں کسی بھی جارحیت کا بھرپور ردعمل دیا جائے گا۔
عرب میڈیا کے مطابق بحرین، کویت اور عراق میں سیکیورٹی الرٹ جاری کر دیا گیا ہے جبکہ بحرین کے مختلف علاقوں میں خطرے کے سائرن بھی بجائے گئے۔
بحرینی وزارتِ داخلہ نے شہریوں کو احتیاطی تدابیر اختیار کرنے کی ہدایت کی ہے۔
ادھر ایرانی میڈیا نے دعویٰ کیا ہے کہ آبنائے ہرمز کے قریب ایک ایرانی آئل ٹینکر کو نشانہ بنائے جانے کے بعد پاسداران انقلاب نے ایک بحری جہاز پر میزائل حملہ کیا۔
ایرانی حکام کا کہنا ہے کہ آبنائے ہرمز کی سلامتی کو خطرے میں ڈالنے کی قیمت امریکا کو چکانا پڑے گی۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ