کوئٹہ سے چمن ٹرین سروس چھٹے روز بھی معطل
اشاعت کی تاریخ: 21st, October 2025 GMT
کوئٹہ سے چمن کے درمیان چلنے والی پسنجر ٹرین سروس مسلسل چھٹے روز بھی معطل ہے جبکہ دیگر ٹرینیں معمول کے مطابق رواں دواں ہیں۔
ریلوے حکام کے مطابق، ٹرین کی معطلی کی وجہ بارڈر کی موجودہ صورتحال ہے جس کے باعث سیکیورٹی خدشات کے پیش نظر ٹرین سروس منسوخ کی گئی ہے۔
کوئٹہ سے پشاور کے لیے چلنے والی جعفر ایکسپریس اور کراچی کے لیے بولان میل اپنی معمول کی آمد و رفت کے مطابق چل رہی ہیں۔
ادھر لاہور ریلوے اسٹیشن سے کراچی، کوئٹہ، راولپنڈی اور دیگر شہروں کو جانے والی بیشتر ٹرینیں اپنے مقررہ وقت پر روانہ ہو رہی ہیں۔ قراقرم ایکسپریس (42-ڈاؤن) سہ پہر 3 بجے، کراچی ایکسپریس (16-ڈاؤن) شام 6 بجے، اور گرین لائن (6-ڈاؤن) رات 8:50 پر اپنے مقررہ وقت کے مطابق روانہ ہوں گی۔
پاک بزنس ایکسپریس (34-ڈاؤن) کو 3 گھنٹے تاخیر کا سامنا ہے اور یہ ٹرین اب شام 7:30 بجے روانہ ہوگی۔ شاہ حسین ایکسپریس (44-ڈاؤن) کے مسافروں کو آج گرین لائن میں ایڈجسٹ کیا جا رہا ہے اور ان سے درخواست کی گئی ہے کہ وہ گرین لائن کی روانگی سے کم از کم ایک گھنٹہ قبل اسٹیشن پر موجود ہوں تاکہ انہیں آسانی سے سیٹیں فراہم کی جا سکیں۔
کراچی جانے والی پاکستان ایکسپریس (46-ڈاؤن)، ملت ایکسپریس (18-ڈاؤن)، اور رحمان بابا ایکسپریس (48-ڈاؤن) لاہور اور ساہیوال کے راستے کراچی روانہ ہوں گی۔
اسی طرح کراچی سے آنے والی پاکستان ایکسپریس (45-اپ) راولپنڈی، ملت ایکسپریس (17-اپ) فیصل آباد، اور رحمان بابا ایکسپریس (47-اپ) پشاور کے لیے لاہور و ساہیوال کے راستے سفر کریں گی۔
ڈویژنل سپرنٹنڈنٹ ریلوے لاہور انعام اللہ کی ہدایت پر مسافروں کی سہولت کے لیے فیسیلیٹیشن عملہ اسٹیشن پر ہر وقت موجود رہے گا۔ مسافروں سے درخواست کی گئی ہے کہ کسی بھی قسم کی رہنمائی یا معلومات کے لیے ریلوے کے انکوائری نمبرز 117-042 اور 99070011-042 پر رابطہ کریں۔
.ذریعہ: Express News
پڑھیں:
کراچی: ایک اوربچہ مین ہول میں گر کر جاں بحق، 2 افسران معطل
کراچی:(نیوزڈیسک) کراچی کے علاقے گلشن اقبال میں بچے کے گٹر میں گرنے سے جاں بحق ہونے کے واقعے پر اسسٹنٹ کمشنر اور مختیار کار گلشن اقبال کو معطل کردیا گیا۔
ذرائع کے مطابق بلدیہ عظمیٰ کراچی، ٹاؤن انتظامیہ اور واٹر کارپوریشن کے متعلقہ افسران کے خلاف کارروائی ہوگی، اسسٹنٹ کمشنر اور مختیار کار گلشن اقبال کو معطل کردیا گیا ہے۔
وزیر اعلیٰ سندھ مراد علی شاہ نے نیپا چورنگی پر مین ہول میں گرنے سے 3 سالہ بچے کے جاں بحق ہونے پر تمام متعلقہ افسران کو معطل کرنے کی ہدایت کی تھی۔
وزیر اعلیٰ سندھ کی زیر صدارت نیپا چورنگی واقعے سے متعلق اجلاس ہوا جس میں صوبائی وزراء، کے ایم سی، ٹاؤن انتظامیہ، ریونیو اور پولیس حکام نے شرکت کی۔
مراد علی شاہ کا کہنا تھا کہ بچے کے جاں بحق ہونے پر دلی افسوس ہے، جس کی بھی کوتاہی ہے اس کے خلاف سخت کارروائی کی جائے، ایک دوسرے پر ذمہ داری عائد کرنا افسوسناک ہے۔
ذرائع کے مطابق وزیراعلیٰ نے ہدایت کی کہ تمام متعلقہ افسران کو معطل کیا جائے، مراد علی شاہ کا کہنا تھا کہ چیف سیکرٹری سندھ آج ہی ذمہ دار افسران کے خلاف کارروائی کریں۔
واضح رہے کہ اتوار کی شب 10 بجے کراچی کے علاقے گلشنِ اقبال میں نیپا چورنگی کے قریب واقع ڈپارٹمیٹل اسٹور سے 3 سالہ بچہ ابراہیم والدین کے ہمراہ نکل کر مین ہول پر کھڑا ہو گیا تھا جس کا ڈھکن نہ ہونے کی وجہ سے عارضی طور پر اسے گتے کی مدد سے بند کیا گیا تھا۔
اس موقع پر گتہ بچے کا وزن برداشت نہ کر سکا جس کے بعد ابراہیم مین ہول میں گر کر لاپتہ ہوگیا تھا، کھلے مین ہول میں گرنے والے بچے کی لاش 15 گھنٹے بعد ایک کلو میٹر دور نالے سے ملی تھی۔
پولیس کی زیر حراست تشدد اور ماورائے عدالت قتل پر سپریم کورٹ کا تاریخی فیصلہ