سری لنکا کی سنسنی خیز فتح، پاکستان کو ہرا کر فائنل میں رسائی حاصل کرلی
اشاعت کی تاریخ: 28th, November 2025 GMT
data-id="863a0a8" data-element_type="widget" data-widget_type="theme-post-content.default">
راولپنڈی: سری لنکا نے سنسنی خیز مقابلہ کرتے ہوئے پاکستان کو شکست دے کر فائنل میں رسائی حاصل کرلی۔
کرکٹ شائقین نے سہ فریقی ٹی ٹوئنٹی سیریز کے چھٹے میچ میں آخری لمحات تک سنسنی خیز کھیل دیکھا، جس میں میزبان ٹیم (پاکستان) کو 6 رنز سے شکست دے کر سری لنکن اسکواڈ نے فائنل میں رسائی بھی حاصل کر لی۔
پاکستان نے ٹاس جیت کر مہمان ٹیم کو پہلے بیٹنگ کی دعوت دی تو سری لنکن بلے بازوں نے محتاط مگر پُر اعتماد انداز میں اننگز کی بنیاد رکھی۔ آغاز سے ہی پاکستانی بولرز پر دباؤ محسوس ہوتا رہا۔
سری لنکا کی طرف سے کامل مشارا نے نہایت دلکش اور ذمہ دارانہ بیٹنگ پیش کرتے ہوئے 76 رنز کی اننگز کھیلی۔ انہوں نے نہ صرف اسٹروک پلے دکھایا بلکہ اہم مواقع پر سنگلز لے کر پارٹنرشپ کو برقرار بھی رکھا۔ دوسری جانب کوشل مینڈس نے بھی 40 رنز کی مفید اننگز کے ذریعے اسکور بورڈ کو سہارا دیا۔
پہلی اننگز میں سری لنکن کپتان داسن شناکا 17 رنز کے بعد رخصت ہوئے، جب کہ ابتدائی بلے باز پتھم نسانکا 8 رنز بنا سکے۔ آخری اوورز میں کوشل پریرا نے 6 رنز کے ساتھ اننگز کو اختتامی دھکا دیا اور ٹیم 184 کے مجموعے تک پہنچانے میں مدد کی۔
پاکستانی بالرز کی جانب سے ابرار احمد نے 2 وکٹیں لیتے ہوئے نسبتاً بہتر کارکردگی دکھائی، لیکن مجموعی طور پر بالنگ کا معیار حریف بیٹرز کو روکنے کے لیے مؤثر ثابت نہ ہو سکا۔ سلمان مرزا اور صائم ایوب ایک ایک وکٹ لینے میں کامیاب رہے۔
184 رنز کے تعاقب میں پاکستان نے بیٹنگ کا آغاز اس امید کے ساتھ کیا کہ ابتدائی اوورز میں مضبوط بنیاد رکھی جائے گی، مگر صورتحال اس کے برعکس رہی۔ بابر اعظم جیسا بڑا نام صفر پر آؤٹ ہو کر پویلین لوٹ گیا جس سے قومی ٹیم پر دباؤ بڑھ گیا۔
اوپر کے نمبرز پر فخر زمان محض ایک رن بنا سکے، جب کہ صاحبزادہ فرحان 9 رنز کے بعد آؤٹ ہوگئے۔ ٹاپ آرڈر کی کمزوری نے مڈل آرڈر پر اضافی بوجھ ڈالا۔
بعد ازاں کپتان سلمان آغا نے شاندار ذمہ داری کا مظاہرہ کرتے ہوئے 63 رنز کی ناقابلِ شکست اننگز کھیلی۔ انہوں نے قدم جما کر رنز کی رفتار بڑھائی اور میچ کو آخری اوور تک لے جانے کی کوشش کی۔ عثمان خان نے 33 رنز بنا کر کپتان کا بھرپور ساتھ دیا، جب کہ محمد نواز اور صائم ایوب نے 27، 27 رنز کے ساتھ اسکور میں اہم اضافہ کیا، تاہم مطلوبہ رن ریٹ مسلسل بڑھنے سے پاکستان کو مشکلات کا سامنا رہا۔
سری لنکا کے بالرز نے پورے اعتماد سے لائن اینڈ لینتھ برقرار رکھی۔ دشمانتا چمیرا نے اپنے تباہ کن اسپیل میں 4 کھلاڑیوں کو آؤٹ کیا۔ ان کے ساتھ ایشان ملنگا نے بھی 2 وکٹیں حاصل کیں جب کہ ونندو ہسارنگا نے ایک کھلاڑی کو پویلین بھیجا۔
مقررہ 20 اوورز میں قومی ٹیم 178 رنز تک محدود رہی اور یوں 6 رنز کے فرق سے میچ سری لنکا کے نام ہوا۔ اس شکست کے ساتھ ہی پاکستان فائنل کی دوڑ سے باہر ہوگیا جب کہ سری لنکا نے فیصلہ کن میچ کے لیے اپنی نشست پکی کرلی۔
.
ذریعہ
ذریعہ: Jasarat News
کلیدی لفظ: سری لنکا کے ساتھ رنز کی رنز کے
پڑھیں:
پاکستان ڈی ایٹ ممالک کے ساتھ مضبوط معاشی شراکت داری قائم کرنا چاہتا ہے، عرفان سومرو
وزارت خارجہ کے ڈائریکٹر جنرل عرفان سومرو نے کہا ہے کہ تجارتی ڈپلومیسی حکومت پاکستان کی خارجہ پالیسی کا بنیادی ستون ہے اور پاکستان ڈی ایٹ ممالک کے ساتھ محض تجارتی حجم بڑھانے کا خواہاں نہیں بلکہ مضبوط اور پائیدار معاشی شراکت داری قائم کرنا چاہتا ہے۔
فیڈریشن ہاؤس کراچی میں فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے زیر اہتمام ڈی ایٹ چیمبرز آف کامرس اینڈ انڈسٹری (D-8 CCI) کی پاکستان نیشنل کمیٹی کے اجلاس سے خطاب کرتے ہوئے دائریکٹر جنرل وزارت خارجہ عرفان سومرو نے کہا کہ ڈی ایٹ کے قیام کو تین دہائیاں گزر چکی ہیں، اب وقت آ گیا ہے کہ اس وژن کو عملی اقدامات میں تبدیل کیا جائے۔
ان کا کہنا تھا کہ ڈی ایٹ ممالک کی مشترکہ معیشت تقریباً 5 ہزار ارب ڈالر پر مشتمل ہے اور ایک ارب سے زائد آبادی مشرق بعید سے افریقہ تک پھیلی ہوئی ہے، جو باہمی تجارت اور سرمایہ کاری کے بے شمار مواقع فراہم کرتی ہے۔
انہوں نے کہا کہ زراعت، معدنیات، سیاحت اور نوجوان افرادی قوت ڈی ایٹ ممالک کے اہم اثاثے ہیں، تاہم مختلف مفاہمتی یادداشتوں (ایم او یوز) پر مؤثر عمل درآمد نہ ہونے کے باعث رکن ممالک اپنی حقیقی معاشی صلاحیت سے بھرپور فائدہ نہیں اٹھا پا رہے۔
ڈی جی وزارت خارجہ کے مطابق پاکستان کی ڈی ایٹ ممالک کے ساتھ سالانہ تجارت تقریباً 11 ارب ڈالر ہے، جس میں 8 ارب ڈالر درآمدات جبکہ 2.8 ارب ڈالر برآمدات شامل ہیں، اس عدم توازن کو کم کرنے اور برآمدات میں اضافے کی ضرورت پر زور دیا۔
عرفان سومرو نے کہا کہ پاکستان کی بندرگاہیں اور نوجوان آبادی ملکی معیشت کے لیے قیمتی اثاثہ ہیں، کاروباری برادری پر زور دیتے ہوئے انہوں نے کہا کہ وہ پاکستانی سفارت خانوں کے ساتھ روابط بڑھائے تاکہ نئی منڈیوں تک رسائی اور سرمایہ کاری کے مواقع سے فائدہ اٹھایا جا سکے۔
انہوں نے کہا کہ حکومت بین الاقوامی معاہدے اور سازگار پالیسی فریم ورک فراہم کر سکتی ہے، تاہم تجارت اور سرمایہ کاری کو فروغ دینا نجی شعبے کی ذمہ داری ہے، اس سلسلے میں ایف پی سی سی آئی کا کردار انتہائی اہم ہے۔
ڈائریکٹر جنرل وزارت خارجہ نے خواتین اور نوجوان کاروباری افراد پر زور دیا کہ وہ علاقائی تجارت اور اقتصادی سرگرمیوں میں بھرپور کردار ادا کریں، پاکستان ڈی ایٹ ممالک کے ساتھ تعلقات کو مزید مضبوط بنانے کے لیے مکمل طور پر تیار ہے۔
اس موقع پر ایف پی سی سی آئی کے صدر عاطف اکرام شیخ نے قاہرہ میں منعقدہ چوتھی ڈی ایٹ ٹریڈ منسٹر کونسل کے فیصلوں کا خیرمقدم کرتے ہوئے استنبول میں ترکیہ کی تنظیم TOBB کی سرپرستی میں ڈی ایٹ چیمبرز کے مستقل سیکرٹریٹ کے قیام کو اہم پیش رفت قرار دیا۔
ڈی ایٹ سیکریٹری جنرل سہیل محمود نے اپنے خصوصی پیغام میں رکن ممالک پر زور دیا کہ وہ حلال معیشت، مالیاتی انضمام اور علاقائی تجارت کے مواقع سے بھرپور فائدہ اٹھائیں۔
ایف پی سی سی آئی کے سینئر نائب صدر ثاقب فیاض مگوں نے کہا کہ ڈی ایٹ ممالک کے درمیان اندرونی تجارت میں نمایاں اضافہ وقت کی اہم ضرورت ہے اور فیڈریشن پریفرینشل ٹریڈ ایگریمنٹ (پی ٹی اے) کو ناگزیر سمجھتی ہے۔
اجلاس میں انڈونیشیا، ترکیہ، ایران، مصر، ملائیشیا، نائجیریا، آذربائیجان اور بنگلہ دیش کے قونصل جنرلز، سینئر سفارت کاروں، ایف پی سی سی آئی کے نائب صدور امان پراچہ، آصف سخی، سابق صدر زبیر طفیل، سابق نائب صدور خالد تواب، حنیف گوہر، شبیر منشا، ناہید مسعود، نازلی عابد، ماہین خان اور دیگر کاروباری رہنماؤں نے بھی شرکت کی۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار