گورنر پنجاب نے لوکل گورنمنٹ ایکٹ پر دستخط کر دیئے‘ بلدیاتی انتخابات کی راہ ہموار
اشاعت کی تاریخ: 21st, October 2025 GMT
لاہور(نیوز رپورٹر +نوائے وقت رپورٹ) گورنر پنجاب نے لوکل گورنمنٹ ایکٹ 2025ء پر دستخط کر دیئے جس کے بعد صوبے میں بلدیاتی انتخابات کی راہ ہموار ہو گئی۔ گورنر کے دستخط کے بعد اب گزٹ نوٹیفکیشن جاری کیا جائے گا۔ پنجاب حکومت گزٹ نوٹیفکیشن الیکشن کمشن کو ارسال کرے گی۔ ای سی پی پنجاب حکومت کی استدعا پر نئے بلدیاتی انتخابات کیلئے حلقہ بندیاں اور حد بندیوں کا کام نئے ایکٹ کے تحت کرے گا۔ الیکشن کمیشن نے بلدیاتی انتخابات دسمبر میں کرانے کا فیصلہ دیا تھا۔ لاہور سے نیوز رپورٹر کے مطابق گورنر پنجاب سے سپیشل سیکرٹری لوکل گورنمنٹ پنجاب ارشد بیگ نے ملاقات کی۔ سپیشل سیکرٹری نے گورنر کو پانچ سالہ لوکل گورنمنٹ ایکٹ 2025 پر مکمل اعتماد میں لیا اور بریفنگ دی۔ سپیشل سیکرٹری نے بتایا کہ بلدیاتی اداروں کا دورانیہ 5 سال کا ہو گا۔ اْنہوں نے کہا کہ ایکٹ 2025 کے تحت ہر یونین کونسل میں 13 ارکان ہوں گے جو 25000 افراد کی آبادی کی نمائندگی کریں گے جس میں 9 براہ راست منتخب کونسلر اور 4 مخصوص نشستیں ہوں گی۔ مخصوص نشستوں پر ایک خواتین کی، ایک نوجوان، ایک مزدور اور ایک اقلیتوں کیلئے ہو گی۔ چیئرمین اور نائب چیئرمین کے نام یونین کونسل کے اندرونی انتخابات کے ذریعے منتخب کئے جائیں گے۔ اْنہوں نے بتایا کہ منتخب ممبران کو ایک ماہ کے اندر کسی نہ کسی سیاسی جماعت میں شمولیت اختیار کرنا ضروری ہو گا جبکہ یونین کونسل میں وارڈ نظام ختم کیا جائے گا۔ سردار سلیم حیدر خان نے کہا کہ اختیارات کی نچلی سطح تک منتقلی اور عوام کو بنیادی سہولتوں کی فراہمی حکومت کی اولین ترجیح ہونی چاہئے۔
.ذریعہ: Nawaiwaqt
کلیدی لفظ: بلدیاتی انتخابات لوکل گورنمنٹ
پڑھیں:
الیکشن کمیشن نے پنجاب میں بلدیاتی الیکشن کرانے کا شیڈول واپس لے لیا
اسلام آباد(ڈیلی پاکستان آن لائن) پنجاب میں بلدیاتی انتخابات ایک بار پھر تاخیر کا شکار ہونے کا امکان ہے، الیکشن کمیشن آف پاکستان نے دسمبر میں پنجاب میں بلدیاتی الیکشن کرانے کا شیڈول واپس لے لیا۔
نجی ٹی وی چینل دنیا نیوز کے مطابق چیف الیکشن کمشنر سکندر سلطان راجہ کی زیر صدارت الیکشن کمیشن کا اجلاس ہوا، جس میں معزز ممبرانِ کمیشن، سیکرٹری اور سینئر افسران نے شرکت کی، پنجاب میں بلدیاتی انتخابات کے انعقاد پر تفصیلی غور کیا گیا، سیکرٹری الیکشن کمیشن کی جانب سے کمیشن کو جامع بریفنگ دی گئی۔
پنجاب میں ٹریفک پولیس اور ستھرا پنجاب کیلئے ماسک پہننا لازمی قرار دیدیا گیا
دوران بریفنگ بتایا گیا کہ پنجاب اسمبلی نے پنجاب لوکل گورنمنٹ ایکٹ 2025 منظور کر لیا ہے، گورنر پنجاب نے بھی لوکل گورنمنٹ ایکٹ 2025 کی منظوری دے دی، نئے ایکٹ کے نفاذ کے ساتھ پنجاب لوکل گورنمنٹ ایکٹ 2022 منسوخ ہوگیا۔
اجلاس میں الیکشن کمیشن آف پاکستان نے دسمبر میں بلدیاتی الیکشن کرانے کا شیڈول واپس لے لیا، الیکشن کمیشن نے پنجاب حکومت کو مزید 4 ہفتوں کی مہلت دیتے ہوئے پنجاب بلدیاتی انتخابات کی حلقہ بندیوں کا کام روک دیا۔
بلدیاتی الیکشن کیلئے حلقہ بندیوں کا شیڈول واپس لینے کا فیصلہ پنجاب حکومت کی درخواست پر کیا گیا۔
بھارت کو ایشیاء کپ ٹرافی نومبر کے پہلے ہفتے میں دیئے جانے کا امکان
اعلامیہ کے مطابق الیکشن کمیشن نے پنجاب میں بلدیاتی انتخابات لوکل گورنمنٹ ایکٹ 2025 کے تحت کرانے کا فیصلہ کر لیا، لوکل گورنمنٹ ایکٹ 2022 کے تحت دیا گیا حلقہ بندی کا شیڈول واپس لینے کا بھی فیصلہ کیا گیا۔
اعلامیہ میں کہا گیا کہ الیکشن کمیشن نے پنجاب حکومت کو حلقہ بندی اور ڈیمارکیشن رولزکیلئے 4 ہفتے دے دیئے، حلقہ بندی اور ڈیمارکیشن رولز کیلئے دی گئی مہلت میں مزید اضافہ نہیں کیا جائے گا، حکام کے مطابق مقررہ مدت میں کام نہ ہوا تو معاملے کی سماعت کرکے مناسب فیصلہ کریں گے۔
سوشل میڈیا کا زیادہ استعمال بچوں کی دماغی صلاحیتوں کے لئے نقصان دہ