حُسن نیّت: ہم دردی، اخلاص و ایثار کا جوہر
اشاعت کی تاریخ: 11th, April 2025 GMT
اسلام میں اخلاص اور حُسن نیّت کو بڑی اہمیت حاصل ہے، اسلام اپنے ماننے والوں کو تمام حالات میں خلوصِ نیّت کی ترغیب دیتا ہے۔
قرآنِ مجید میں اﷲ تعالیٰ نے اور احادیث نبوی میں رسول اکرم ﷺ نے اہل ایمان کو تمام ظاہری و باطنی اقوال و افعال اور اعمال و احوال میں نیّت کو مستحضر رکھنے، اُس کو ٹٹولتے رہنے اور اُس میں اخلاص کی چاشنی کو باقی رکھنے کی تعلیم دی ہے۔ بلاشبہ! تمام اعمال کا دار و مدار اخلاصِ نیّت پر ہی ہوتا ہے اور اچھی نیّت ہی تمام اعمال و افعال کی جڑ اور بنیاد ہوتی ہے۔ چناں چہ نیّت اگر خالص ہوگی تو اعمال جان دار ہوں گے اور نیّت اگر خراب ہوگی تو اعمال میں وزن نہیں رہے گا۔
اچھی نیّت سے اعمال اچھے اور بُری نیّت سے اعمال بُرے ہوجاتے ہیں۔ نیّت صاف ہو تو انسان کی منزل اُس کے لیے آسان ہوجاتی ہے اور اگر نیّت خراب ہو یا اُس میں فتور واقع ہوجائے تو قدم قدم پر انسان کو ٹھوکریں کھانی پڑتی ہیں، ذلیل و خوار ہونا پڑتا ہے اور بالآخر منزل مقصود تک پہنچنا اُس کے لیے ناممکن ہوکر رہ جاتا ہے۔
اخلاصِ نیّت کی اہمیت پیش نظر قرآنِ مجید میں اﷲ تعالیٰ ارشاد فرماتے ہیں، مفہوم:
’’اور اُنہیں اِس کے سوا اور کوئی حکم نہیں دیا گیا تھا کہ وہ اﷲ کی عبادت اِس طرح کریں کہ بندگی کو بالکل یک سُو ہوکر صرف اُسی کے لیے خالص رکھیں، اور نماز قائم کریں، اور زکوٰۃ ادا کریں اور یہی سیدھی سچی اُمت کا دین ہے۔‘‘ (سورۃ البینہ)
مفہوم: ’’اﷲ کو نہ اُن کا گوشت پہنچتا ہے، نہ اُن کا خون، لیکن اُس کے پاس تمہارا تقویٰ پہنچتا ہے۔‘‘ (سورۃ الحج)
مفہوم: ’’اے رسول (ﷺ)! لوگوں کو بتا دو کہ جو کچھ تمہارے دلوں میں ہے تم اسے چھپاؤ یا ظاہر کرو، اﷲ اسے جان لے گا۔‘‘ (سورۂ آلِعمران)
اسی طرح احادیث مبارکہ میں بھی اخلاصِ نیّت کی بڑی اہمیت وارد ہوئی ہے، چناں چہ ایک حدیث میں آتا ہے، حضورِ اقدس ﷺ نے ارشاد فرمایا، مفہوم: ’’ہر عمل کا دار و مدار نیّت پر ہے، اگر نیت درُست ہے تو اجر کا مستحق ہے، جو اﷲ اور رسول ﷺ کے لیے ہجرت کرتا ہے تو اُس کی ہجرت اﷲ اور رسول ﷺ کے لیے ہوتی ہے، لیکن اگر دُنیا یا کسی عورت کے لالچ میں ہجرت کرتا ہے تو جس غرض کے لیے ہجرت کرتا ہے اُس کی ہجرت اسی غرض کے لیے شمار کی جاتی ہے۔‘‘ (بخاری۔ مسلم)
حضورِ اقدس ﷺ نے ارشاد فرمایا، مفہوم: ’’اﷲ تعالیٰ وہی عمل قبول کرتا ہے، جس کی بنیاد خلوص پر ہو۔‘‘ (سنن نسائی)
حضورِ اقدس ﷺ نے ارشاد فرمایا، مفہوم: ’’آخر زمانے میں ایک لشکر کعبہ پر چڑھائی کرے گا، لیکن جب یہ ’’بیداء‘‘ نامی مقام میں پہنچے گا تو زمین میں دھنسا دیا جائے گا، پھر یہ لوگ قیامت میں اپنی نیّتوں کے موافق اُٹھائے جائیں گے، اِس لشکر میں بعض لوگ ایسے بھی ہوں گے، جو زبردستی شریک کر لیے گئے تھے، اُن کی نیّت کعبہ پر حملہ کی نہ تھی، ایسے لوگوں سے کوئی مؤاخذہ نہ ہوگا۔‘‘ (بخاری۔ مسلم)
حضورِ اقدس ﷺ نے ارشاد فرمایا، مفہوم: ’’ایک شخص کے پاس مال بھی ہے اور علم بھی، اور یہ اچھے کام کرتا ہے اور غرباء کا حق سمجھتا ہے، تو قیامت میں یہ اعلیٰ منازل میں ہوگا، لیکن ایک شخص کے پاس مال اور علم تو نہیں، لیکن اُس کی یہ نیّت ضرور ہے کہ اگر میرے پاس مال اور علم ہوتا، تو میں بھی یہی کام کرتا جو فلاں شخص کر رہا ہے تو قیامت میں دونوں کو اَجر برابر ملے گا۔‘‘ (جامع ترمذی)
حضورِ اقدس ﷺ نے ارشاد فرمایا، مفہوم: ’’اگر کسی شخص نے نیکی کرنے کی نیّت کی، لیکن اُس کی نیکی کا وقوع نہیں ہُوا، تب بھی اُس کے لیے ایک نیکی لکھ دی جاتی ہے۔‘‘ (بخاری۔ مسلم)
حضورِ اقدس ﷺ نے ارشاد فرمایا، مفہوم: ’’ایک شخص نے بستر پر لیٹتے وقت یہ نیّت کی کہ رات کو تہجّد کی نماز پڑھوں گا، مگر رات کو آنکھ نہیں کھلی، یہاں تک کہ صبح ہوگئی، تو اُس کے لیے تہجّد کا ثواب لکھ دیا جاتا ہے، اور یہ سونا اﷲ تعالیٰ کی طرف سے اُس بندے پر احسان کے طور پر رہا۔‘‘ (سنن نسائی)
جہانگیر بادشاہ نے اپنی ’’تزک‘‘ میں لکھا ہے کہ ایک سلطان گرمی کے موسم میں ایک باغ کے دروازہ پر پہنچا، وہاں ایک بوڑھا باغبان کھڑا تھا، اُس کو دیکھ کر سلطان نے پوچھا: ’’ کیا اِس باغ میں انار ہے؟‘‘
باغبان نے کہا: ’’جی موجود ہے‘‘
سلطان نے کہا: ’’ایک پیالا انار کا رَس لاؤ!‘‘
باغبان کی ایک لڑکی جو صورت کے جمال اور سیرت کے حسن سے بھی آراستہ تھی، باغبان نے اُس سے انار کا رَس لانے کو کہا، وہ گئی اور ایک پیالا بھر کر انار کا رَس لے آئی، پیالے پر انار کی کچھ پتیاں رکھی ہوئی تھیں، سلطان نے اُس کے ہاتھ سے پیالا لیا اور پورا پی گیا، پھر لڑکی سے پوچھا: ’’پیالے کے رَس کے اوپر تم نے پتیاں کس لیے رکھ دی تھیں؟‘‘
لڑکی نے عرض کیا: ’’اِس گرمی میں آپ پسینے میں غرق تھے، رَس کا ایک سانس میں پی جانا آپ کے لیے مناسب نہ تھا، میں نے احتیاطاً اِس پر پتیاں ڈال دی تھیں کہ آپ آہستہ آہستہ اِس کو نوشِ جان فرمائیں۔
سلطان کو یہ حسن ادا بہت پسند آئی، اُس کے بعد اُس باغبان سے پوچھا کہ تم کو ہر سال اِس باغ سے کیا حاصل ہوتا ہے؟‘‘
اُس نے جواب دیا: ’’تین سو دینار‘‘
سلطان نے پوچھا: ’’حکومت کو کیا دیتے ہو؟‘‘
باغبان نے کہا: میرا بادشاہ درخت سے کچھ نہیں وصول کرتا، بل کہ کھیتی سے عشر لیتا ہے۔‘‘
سلطان کے دل میں یہ خیال گزرا کہ میری مملکت میں بہت سے باغ اور درخت ہیں، اگر باغ سے بھی عشر لیا جائے تو کافی رقم جمع ہوسکتی ہے اور رعیت کو بھی زیادہ نقصان نہیں پہنچے گا، اِس لیے میں حکم دوں گا کہ باغات کے محصولات سے بھی خراج لیا جائے، یہ سوچ کر اُس نے انار کا رَس پھر پینے کو مانگا، لڑکی رَس لانے گئی تو بہت دیر میں آئی، جب پیالا لائی تو سلطان نے کہا: ’’پہلی بار تم گئیں تو بہت جلد آئیں، اِس بار دیر بھی کی اور رَس بھی کم لائیں۔‘‘
لڑکی نے کہا: ’’پہلی بار ایک انار میں پیالا بھر گیا تھا، اِس بار میں نے پانچ چھے انار نچوڑے پھر بھی رَس پورا نہیں ہُوا۔‘‘
یہ سن کر سلطان کو حیرت ہوئی، باغبان نے عرض کیا: ’’محصول کی برکت بادشاہ کی نیک نیّت پر منحصر ہے، میرا خیال ہے کہ آپ باد شاہ ہیں، آپ نے جس وقت باغ کی آمدنی مجھ سے پوچھی، اُسی وقت آپ کی نیّت میں تبدیلی پیدا ہوئی اور پھل سے برکت چلی گئی۔‘‘
یہ سن کر سلطان متاثر ہُوا اور دل سے باغ کی آمدنی کا خیال دُور کردیا، اِس کے بعد پھر انار کا رَس مانگا ، لڑکی گئی اور جلد ہی پیالا بھر کر انار کا رَس لے آئی، تب سلطان نے باغبان کی فراست کی داد دی، اپنے دل کی بات بتائی اور اُس لڑکی کا خواست گار ہُوا۔ (بہ حوالہ: تزکِ جہانگیری)
یقیناً اِنسان کی نیّت کا اثر اُس کی زندگی کے تمام حالات پر پڑتا ہے، نیّت اچھی اور خالص ہوگی تو زندگی بھی اچھی اور آسان گزرے گی، اہل و عیال میں برکت نصیب ہوگی، مال و دولت میں فراوانی حاصل ہوگی، عبادات ادا کرنے کی توفیق ملے گی، اﷲ تعالیٰ کا دھیان اور اُس کا قرب نصیب ہوگا، اور اگر نیّت خراب ہوئی اور اُس میں فتور ہُوا تو زندگی سے سکون اُٹھ جائے گا، مال و دولت میں کمی واقع ہوجائے گی، عبادات کی توفیق چھن جائے گی، اور اﷲ تعالیٰ کی ناراضی اور اُس کی خفگی مقدر بنے گی اور انسان کو زمین اپنی وسعتوں کے باوجود تنگ ہوتی نظر آئے گی۔
.ذریعہ: Express News
کلیدی لفظ: اقدس ﷺ نے ارشاد فرمایا انار کا ر س ا س کے لیے اﷲ تعالی کرتا ہے اور ا س کی نی ت نی ت کی نے کہا لیکن ا ہے اور سے بھی
پڑھیں:
ایسا ہوتا نظر نہیں آرہا
ایک ماحول بن رہا ہے کہ سب ٹھیک نہیں ہے۔ چند دوست ماحول بنا رہے ہیں کہ کچھ ہونے والا ہے ۔ ان کی رائے میں اسٹبلشمنٹ اور حکومت کے دمیان سب ٹھیک نہیں ہے۔ دوریاں پیدا ہو رہی ہیں۔ ناراضگیاں جنم لے رہی ہیں۔
اس لیے دوستوں کی رائے میں کچھ ہوسکتا ہے۔ دوستوں کی رائے میں کرپشن پر بھی اختلافات ہیں۔ایسے میں سیالکوٹ کے واقعہ میں اے ڈی سی آر کی گرفتاری نے بھی ماحول کو گرما دیا ہے۔ اس لیے اب ساری صورتحال کا جائزہ لینا ضروری ہے۔
جہان تک خواجہ آصف کے استعفیٰ کی خبر نماافواہوں کا تعلق ہے تو انھوں نے کوئی استعفیٰ نہیں دیا تھا، وہ خبریں غلط تھی۔ یہ درست ہے کہ اے ڈی سی آر کے لیے ان کی ہمدردی تھی لیکن خواجہ آصف جیسا جہاندیدہ سیاستدان ایسے معاملے کے لیے استعفیٰ نہیں دیتا۔ انھوں نے سیاست کے بہت نشیب و فرا ز دیکھے ہیں۔
پھر دوست یہ بھی بھول جاتے ہیں کہ اس اے ڈی سی آر کو خواجہ آصف نے نہیں لگوایا تھا۔ وہ نگران دور میں تعینات ہوا تھا اور آج تک وہاں تعینات تھا ، چیف سیکریٹری، آئی جی سمیت اہم عہدوں پر نگران دور کے تعینات افسر ہی موجود ہیں۔ مسلم لیگ (ن) نے اپنے افسر نہیں لگائے جو تعینات تھے،انھیں کے ساتھ گزارا کیا ہے۔ اے ڈی سی آر سیالکوٹ بھی اس کی ایک مثال ہے۔ ایسی درجنوں مثالیں موجود ہیں۔
دوسری طرف ایک اے ڈی سی آر جیسے معاملے پر حکومت اور اسٹبلشمنٹ کے تعلقات خراب نہیں ہو سکتے، یہ بہت چھوٹا معاملہ ہے۔ میڈیا نے غیر ضروری اہمیت دے دی ہے۔ اسٹبلشمنٹ اور مسلم لیگ (ن) کے تعلقات بالکل ٹھیک ہیں۔ کوئی دوریاں نہیں ہیں۔ حال ہی میں امریکا میں اوور سیز پاکستانیوں سے خطاب میں فیلڈ مارشل جنرل عاصم منیر نے وزیر اعلیٰ پنجاب اور وزیر اعظم میاں شہباز شریف کی بہت تعریف کی ہے۔ وہ ان کی کارکردگی سے خوش نظرا ٓئے ہیں۔ اس لیے انھوں نے ایسا کوئی تاثر نہیں دیا کہ حکومت سے انھیں کوئی شکایت ہے۔ بلکہ وہ تو حکومت کی تعریف کر رہے تھے۔
سوال یہ ہے کہ پھر مسئلہ کیا ہے۔ میری راے میں مسئلہ اٹھارویں ترمیم ہے۔کیونکہ ایک کمزور وفاق نے کمزور پاکستان بنا دیا ہے۔ صوبوں کے پاس وسائل کی بھر مار ہے۔ لیکن وفاق غریب ہے۔ یہ عدم توازن ہے۔ پہلے سب کچھ وفاق کے پاس تھا تو صوبے بہت غریب تھے۔ پھر سب کچھ صوبوں کے پاس چلا گیا تو وفاق غریب ہوگیا۔
ہم ابھی تک کوئی متوازن فارمولہ نہیں بنا سکے۔مضبوط اور باوسائل صوبائی حکومتیں اپنے اپنے صوبوں کو ترقی یافتہ بنا سکیں نہ پاکستان کو ترقی دینے میں معاون ثابت ہوسکیں۔ اسٹبلشمنٹ کی اس حوالے سے ایک اپنی سوچ ہے۔
یہ بھی دلیل ہے کہ اٹھارویں ترمیم اس لیے کی گئی تھی کہ اختیارات کو نچلی سطح تک لیجایا جائے۔ لیکن ایسا نہیں ہوا۔ جو سیاسی جماعتیں اٹھارویں ترمیم کے حق میں ہیں، انھوں نے اپنے اپنے صوبوں میں لمبے اقتدار کے بعد بھی کوئی اچھا موثر بلدیاتی نظام نہیں بنایا۔ وسائل وفاق سے نکل کر صوبائی حکومت کی تحویل میں آگئے ہیں۔ صوبائی حکومتیں اپنے اختیار بلدیاتی اداروں تک منتقل کرنے کے لیے تیار نہیں ہیں۔ اس لیے اٹھارویں ترمیم کا اصل مقصد حا صل نہیں ہوا ہے۔ لہٰذا اب اگراس کو ختم نہیں کرنا تو ا س میں تبدیلی لانا ناگزیر ہے۔
پاکستان مسلم لیگ (ن ) کو ان تبدیلوں پر کوئی اعتراض نہیں، دیکھا جائے تو رکاوٹ پیپلزپارٹی ہے۔ اگر پیپلزپارٹی تیار ہو جائے تو کل ہی ترامیم ہو سکتی ہیں۔ ایم کیو ایم بھی تیار ہے۔ پاکستان مسلم لیگ (ق) اور آئی پی پی بھی تیار ہیں۔ رکاوٹ پیپلزپارٹی ہے۔ اس لیے دوست شاید صورتحال کو صحیح دیکھ نہیں رہے۔ مسئلہ وفاقی حکومت سے نہیں پیپلزپارٹیٰ سے ہے۔
اس سے پہلے نہروں کے مسئلہ پر بھی اختلاف پیپلزپارٹیٰ سے ہی تھا۔نہروں کا معاملہ بھی پیپلزپار ٹی کی وجہ سے ہی رول بیک ہوا۔پاکستان مسلم لیگ (ن) تب بھی نہروں کے حق میں تھی۔ صدر آصف زرداری پہلے مان گئے پھر پیپلزپارٹی نے سیاسی نقصان کی وجہ سے یو ٹرن لیا۔ اس کے جواب میں پاکستا ن مسلم لیگ (ن) کا یہ بھی موقف ہے کہ وہ بھی سیاسی وجوہات کی وجہ سے کئی معاملات پر یوٹرن لے سکتے تھے۔ لیکن انھوں نے نہیں لیا۔ بلکہ اپنا سیاسی نقصان برداشت کیا۔
یہ کیسا اتحاد ہے کہ آپ سیاسی فائدہ تو خوشی خوشی لے لیں۔ لیکن نقصان کی دفعہ بھاگ جائیں۔ یہ کوئی اتحاد نہیں۔ اس لیے پیپلزپارٹی کے بارے میں یہ رائے بن رہی ہے کہ وہ فائدے تو لے لیتی ہے لیکن نقصان کی دفعہ نظر یں بدل لے لیتی ہے۔ اس طرح معاملات کیسے چل سکتے ہیں۔ پاکستان مسلم لیگ (ن) کو بھی یہی شکا یت ہے کہ پیپلزپارٹی فائدے سب لیتی ہے اور پھر آنکھیں بھی دکھاتی ہے۔
اس لیے اگر دیکھا جائے تو اسٹبلشمنٹ کے ایجنڈے کی تکمیل میں پیپلزپارٹی رکاوٹ ہے۔ ایسے میں مجھے حکومت جاتی تو نظر نہیں آرہی۔ البتہ ایک ایسا منظر نامہ تو نظرا ٓرہا ہے کہ اسی پارلیمان میں حکومتی اتحاد پہلے سادہ اکثریت اور پھر دو تہائی اکثریت حا صل کرنے کی کوشش کر رہا ہے۔ نا اہلیوں کا موسم شروع ہے۔
مسلم لیگ (ن) کی سیٹوں میں اضافہ ہوتا نظر آرہا ہے۔ سزاؤں کی وجہ سے تحریک انصاف میں تقسیم نظرآ ٓرہی ہے۔ وہاں سے بھی ایک فاورڈ بلاک بن رہا ہے۔ جو مسلم لیگ (ن) کے ساتھ آجائے گا۔ مجھے ایسا لگ رہا ہے کہ اگلے چند ماہ میں مسلم لیگ (ن) کو سادہ اکثریت کے لیے اتحادی کی ضرورت نہیں ہوگی، پھر دو تہائی بھی پیپلز پارٹی کے بغیر بن جائے گی۔
معاملات پیپلزپارٹی کے بغیر چلانے کی تیاری ہو رہی ہے۔ مسلم لیگ (ن) کی پوزیشن مضبوط ہوتی نظر آرہی ہے۔ اس کی پارلیمان میں تعداد بڑھتی نظرآرہی ہے۔ لیکن کیا نظام کو ختم کیا جا رہا ہے۔ مجھے نہیں لگتا۔ کیا ملک میں مارشل لا لگ رہا ہے؟ مجھے نہیں لگتا۔ کیا پارلیمان کو ختم کیا جا رہا ہے ؟مجھے نہیں لگتا۔ البتہ اسی پارلیمان میں عددی تبدیلی کوشش ہو رہی ہے۔ لیکن اگر یہ فارمولہ ناکام ہو گیا تو پھر کوئی حل سوچا جا سکتا ہے۔ لیکن ابھی اسی حل پر کام ہو رہا ہے۔ یہ حل مسلم لیگ (ن) کے لیے اچھا ہے۔ مشکلات پیپلزپارٹی کے لیے ہوںگی۔ وہ نظر بھی آرہی ہیں۔
عمر ایوب اور شبلی فراز کو ڈی نوٹیفائی کرنے کا فیصلہ پشاور ہائیکورٹ میں چیلنج