اعصابی درد کی دوا ’گیباپینٹن‘ کے دماغی صحت پر مضر اثرات کا انکشاف
اشاعت کی تاریخ: 12th, July 2025 GMT
ایک نئی تحقیق میں انکشاف ہوا ہے کہ مرگی، اعصابی درد اور بے چینی کے علاج کے لیے استعمال ہونے والی دوا گیباپینٹن (Gabapentin) دماغی بیماریوں جیسے ڈیمینشیا (یادداشت کی کمی) اور ذہنی کمزوری (Mild Cognitive Impairment) کے خطرات میں اضافہ کر سکتی ہے۔
یہ بھی پڑھیں:کیا مرد دماغی طور پر خواتین سے پہلے بوڑھا ہو جاتا ہے؟
جریدے ریجنل انستھیزیا اینڈ پین میڈیسن میں شائع شدہ تحقیق کے مطابق باقاعدگی سے گیباپینٹن استعمال کرنے والوں میں ڈیمینشیا کا خطرہ 29 فیصد جبکہ ذہنی کمزوری کا خطرہ 85 فیصد زیادہ پایا گیا۔
تحقیق کے مطابق 18 سے 64 سال کی عمر کے افراد، جنہیں عام طور پر ذہنی کمزوری کا خطرہ نہیں ہوتا، میں یہ خطرہ دو گنا سے بھی زیادہ پایا گیا۔
کیس ویسٹرن ریزرو یونیورسٹی، کلیولینڈ کے طبی طالبعلم نافیس اغریری اور ان کی ٹیم نے تحقیق کے نتائج میں کہا کہ اس دوا کے استعمال کرنے والے بالغ مریضوں میں دماغی کمزوری کے امکانات کا بغور مشاہدہ ضروری ہے۔
تحقیق کیسے کی گئی؟محققین نے 26,400 سے زائد مریضوں کے میڈیکل ریکارڈز کا جائزہ لیا جنہیں کمر کے دیرینہ درد کے لیے گیباپینٹن تجویز کی گئی تھی، اور ان کا موازنہ ایسے مریضوں سے کیا جنہیں یہ دوا نہیں دی گئی۔
یہ بھی پڑھیں:دماغ خور امیبا کیخلاف نیشنل انسٹیٹیوٹ آف ہیلتھ کا انتباہ
نتائج کے مطابق جن مریضوں کو گیباپینٹن 6 یا اس سے زائد بار تجویز کی گئی، ان میں 10 سال کے اندر ڈیمینشیا یا ذہنی کمزوری کی تشخیص کا امکان کہیں زیادہ تھا۔ 35 سے 64 سال کے درمیان مریضوں میں خطرہ دو سے تین گنا زیادہ تھا۔
جنہیں دوا 12 بار یا اس سے زیادہ دی گئی، ان میں ڈیمینشیا کا خطرہ 40 فیصد اور ذہنی کمزوری کا خطرہ 65 فیصد تک بڑھ گیا۔
دوا کیسے نقصان پہنچا سکتی ہے؟تحقیق میں بتایا گیا کہ گیباپینٹن دماغ کے اعصابی خلیوں کے درمیان رابطہ کمزور کرتی ہے، جس کی وجہ سے یادداشت اور سوچنے سمجھنے کی صلاحیت متاثر ہو سکتی ہے۔
تحقیق چونکہ مشاہداتی (observational) ہے، اس لیے اس سے یہ ثابت نہیں کیا جا سکتا کہ گیباپینٹن براہ راست ڈیمینشیا کا سبب بنتی ہے، تاہم یہ ایک مضبوط اشارہ ضرور ہے۔
محققین کا کہنا ہے کہ ہم امید کرتے ہیں کہ یہ تحقیق مستقبل میں اس دوا کے دماغ پر اثرات پر مزید سائنسی تجزیے کی بنیاد بنے گی۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
اعصاب اعصابی درد دماغ گیباپینٹن.ذریعہ: WE News
پڑھیں:
سیگریٹ نوشی ٹائپ 2 ذیابیطس کے امکانات کو بڑھا دیتی ہے، تحقیق
ایک نئی تحقیق کے مطابق سگریٹ نوشی کرنے والوں میں ٹائپ ٹو ذیابیطس لاحق ہونے کے بہت زیادہ امکانات ہوتے ہیں بالخصوص ایسے افراد جن میں جینیاتی یا خاندانی طور پر یہ بیماری وراثتی طور پر موجود ہو۔
یہ رپورٹ گزشتہ ہفتے ویانا میں منعقدہ یورپین ایسوسی ایشن فار اسٹڈی آف ڈائیبٹیس کے اجلاس میں پیش کی گئی۔ رپورٹ کے مطابق جو لوگ کبھی بھی سگریٹ نوشی کر چکے ہیں، ان میں ٹائپ 2 ذیابیطس کی تمام چار اقسام کا خطرہ بڑھ جاتا ہے اور جو لوگ زیادہ سگریٹ نوشی کرتے ہیں، ان میں یہ خطرہ اور بھی زیادہ ہوتا ہے۔
اس تحقیق کی سربراہ اور اسٹاک ہوم (سوئیڈن) میں قائم کیرولنسکا انسٹیٹوٹ کی ڈاکٹریٹ کی اسٹوڈنٹ ایمی کیسینڈل نے ایک نیوز ریلیز میں اس حوالے سے کہا کہ یہ بات واضح ہے سگریٹ نوشی ٹائپ 2 ذیابیطس کے خطرے کو بڑھا دیتی ہے، چاہے ذیابیطس کی کوئی بھی قسم ہو یعنی یہ انسولین کی مزاحمت والی قسم ہو، انسولین کی کمی کا معاملہ ہو، موٹاپا یا بڑھاپے کی وجہ سے ہو۔
اس تحقیق کے لیے ریسرچرز نے ناروے اور سوئیڈن میں ذیابیطس کی تحقیق میں شامل 3,325 ٹائپ 2 ذیابیطس کے مریضوں اور 3,897 صحت مند افراد کے ڈیٹا کا تجزیہ کیا۔
تحقیق کے نتائج سے یہ بات سامنے آئی کہ جو لوگ کبھی بھی سگریٹ نوشی کر چکے تھے ان میں انسولین کے خلاف شدید مزاحمت کرنیوالی ذیابیطس میں مبتلا ہونے کے امکانات ان لوگوں کے مقابلے میں دو گنا سے زیادہ تھی جنھوں کبھی سگریٹ نوشی نہیں کی۔
محققین کے مطابق یہ بیماری اس وقت ہوتی ہے جب جسم مؤثر طریقے سے انسولین استعمال نہیں کر پاتا تاکہ خون میں موجود شکر کو توانائی میں تبدیل کیا جا سکے۔
سید محمد علی بن سید مرشد علی