میری حکومت معاشرے کے تمام مکاتب فکر کیلئے پھولوں کا گلدستہ اور نئی اُمید سحر ہے، راجہ فیصل ممتاز
اشاعت کی تاریخ: 25th, November 2025 GMT
وزیراعظم آزاد کشمیر کا کہنا ہے کہ وفاقی حکومت سے بہترین ورکنگ ریلیشن ہماری ترجیحات میں شامل ہیں، عوام کیلئے ہمہ وقت دروازے کھلے ہیں، ایکشن کمیٹی کے ساتھ نکات پر عملدرآمد کیلئے خلوص نیت سے آگے بڑھیں گے۔ اسلام ٹائمز۔ وزیراعطم آزاد حکومت ریاست جموں و کشمیر راجہ فیصل ممتاز راٹھور نے کہا ہے کہ 7 ارب روپے کی لاگت سے لیپہ اور حویلی میں دانش سکولوں کی منظوری سے تعلیمی انقلاب کا آغاز ہو جائے گا، وزیراعظم پاکستان میاں محمد شہباز شریف کا عوام کی جانب سے شکریہ ادا کرتا ہوں، رواداری، شائستگی، وضع داری، سیاسی بردباری، مشاورت، اعتماد سازی پیپلز پارٹی کی طویل جدوجہد جزو لاینفک ہے، میری حکومت معاشرے کے تمام مکاتب فکر کیلئے پھولوں کا گلدستہ اور نئی اُمید سحر ہے، لائن آف کنٹرول کے عوام نے بہادر افواج پاکستان کے شانہ بشانہ دفاع پاکستان، تحریک آزادی کشمیر، ریاستی تشخص، قومی وقار کیلئے جانوں کے نذرانے پیش کیے، 15 سالوں تک بھارتی گولہ باری کا دلیری سے مقابلہ کرنے والے علاقوں وادی لیپہ، وادی نیلم، فاروڈ کہوٹہ، نکیال، پونچھ سیکٹر کے عوام کو بنیادی ضروریات زندگی فراہم کر کے پسماندہ علاقوں کو ترقی یافتہ بنائیں گے۔ وزراء کرام تمام ضلعی، تحصیل مقامات پر کھلی کچہریاں لگا کر عوام کے مسائل ان کی دہلیز پر حل کریں گے، میں جلد لائن آف کنٹرول وادی لیپہ کا دورہ کر کے عوام کے مطالبات کو پورا کروں گا۔ ان خیالات کا اظہار انہوں نے گزشتہ روز پاکستان پیپلز پارٹی آزادکشمیر کے مرکزی ڈپٹی سیکرٹری اطلاعات، امیدوار اسمبلی حلقہ سات شوکت جاوید میر سے ایوان وزیراعظم میں ہونے والی ملاقات کے موقع پر گفتگو کرتے ہوئے کیا۔ اس موقع پر وزیر صحت، بہبود آبادی سید بازل علی نقوی بھی موجود تھے۔
وزیراعظم آزاد کشمیر راجہ فیصل ممتاز راٹھور نے کہا کہ معرکہ حق بنیان مرصوص میں جس طرح پاکستانی، کشمیری قوم نے فلیڈ مارشل حافظ سید عاصم منیر کی قیادت میں ناقابل تسخیر دفاع اور قومی غیرت کیلئے ہر اول دستے کا کردار ادا کیا وہ تاریخ کا درخشندہ باب ہے، اسی اتحاد و اتفاق سے بھارت کو آپریشن سندھور میں شکست فاش کا سامنا کرنا پڑا اور پوری دنیا میں سفارتی تنہائی کے بعد حواس باختہ ہو چکا ہے، معرکہ بنیان مرصوص کی کامیابی سے صرف پاکستان اور کشمیر میں ہی نہیں پوری دنیا میں افواج پاکستان کی عزت و تکریم میں اضافہ اور ملک کی نیک نامی کو چار چاند لگے، پاکستنان اور کشمیر میں افواج پاکستان کو دیکھ کر عوام گل پاشی کرتے ہیں ان سے عقیدت کا اظہار کرنے کیلئے گلدستے پیش کر کے گلے میں ہار ڈالتے ہیں جب کہ بھارتی عوام اپنی فوج کو دیکھ پر ان پر سنگ باری بھی کرتے ہیں، راستے بھی روکتے ہیں اور ناقص حکمت عملی اور جارحیت کا ارتکاب کرنے پر جواب بھی طلب کرتے ہیں۔
وفاقی حکومت سے بہترین ورکنگ ریلیشن ہماری ترجیحات میں شامل ہیں، عوام کیلئے ہمہ وقت دروازے کھلے ہیں، ایکشن کمیٹی کے ساتھ نکات پر عملدرآمد کیلئے خلوص نیت سے آگے بڑھیں گے، ماضی میں عوام اور حکومتوں کے درمیان بڑھنے والی خلیج کو کم کرنے کیلئے پارٹی عہدیداران، کارکنان عوام سے قریبی رابطہ رکھیں۔ راجہ فیصل ممتاز راٹھور نے کہا کہ چیئرمین بلاول بھٹو زرداری، صدر پاکستان آصف علی زرداری اور سیاسی اُمور کی چیئرپرسن محترمہ فریال تالپورکی قیادت میں عوامی خوشحالی کا انقلاب برپا کریں گے اور پہلے تین ماہ میں عوام کو بنیادی تبدیلیاں نظر آنا شروع ہو جائیںگی۔ ہمارا عزم ہے کہ ہم نے چہروں کی بجائے فرسودہ نظام تبدیل کر کے تعلیم، صحت، روزگار، انفراسٹرکچر پر توجہ مرکوز کرنی ہے، یہی عوام کے بنیادی حقوق ہیں۔ انہوں نے کہا کہ ہم میڈیا سے بے مقصد پنجہ آزمائی کے بجائے ان کی مشاورت سے اصلاحات کا نفاذ کریں گے اور ان کے تمام جائز معاملات کو سرخ فیتے کے کلچر سے نکال کر مشاورت سے عملدرآمد یقینی بنائیں گے، انہوں نے کہا کہ مہاجرین جموں و کشمیر کے مسائل میرے علم میں بھی ہیں اور میری حکومت کی حتی المقدور کوشش ہو گی کہ تحریک آزادی کیلئے اپنے گھر بار، کاروبار اور اپنوں کو چھوڑ کر جانیں قربان کرنے والوں کے ورثاء کی محرومیوں کا ازالہ کیا جا سکے۔
مہاجرین کیمپوں کا دورہ کر کے ان کے جائز مسائل کو حل کروں گا، اس موقع پر شوکت جاوید میر نے وزیراعظم آزاد جموں و کشمیر راجہ فیصل ممتاز راٹھورکو حلقہ سات لیپہ کی دعوت دی، جو انہوں نے قبول کر لی۔ انہوں نے لیپہ اور فاروڈ کہوٹہ میں دانش سکولوں کی وزیراعظم پاکستان کی بر وقت و بر موقع منظوری حاصل کرنے پر دونوں حکومتوں کا شکریہ ادا کیا اور وزیراعظ٘م راجہ فیصل ممتاز راٹھور کی قیادت میں قائم پیپلز پارٹی کی حکومت میں عوامی توقعات کیلئے پورا اترنے کیلئے ان کی پالیسیوں کو سراہا۔
ذریعہ: Islam Times
کلیدی لفظ: راجہ فیصل ممتاز راٹھور نے کہا کہ میں عوام انہوں نے
پڑھیں:
قرآن و سنت کیخلاف تمام ترامیم مسترد کرتے ہیں، حافظ نعیم الرحمان
امیر جماعت اسلامی نے مینار پاکستان میں اجتماع عام سے خطاب کرتے ہوئے کہا کہ اجتماع میں ملک بھر سے آئے ہوئے عوام شریک ہیں، بدل دو نظام کے حوالے سے شرکاء پُرعزم ہیں۔ آئین و دستور کے مطابق حاکمیت صرف اور صرف اللہ تعالیٰ کی ہے۔ حاکمیت کا مطلب یہی ہے کہ اللہ اور اس کے بتائے ہوئے احکامات کے مطابق دنیا کے نظام کو قائم کرنا ہے۔ ہمہ جہت تحریک کیلئے ایسی قیادت ضرورت ہے جو عوام کے ساتھ اور عوام اس کیساتھ ہو۔ عوام کو ایسی قیادت کی ضرورت نہیں جو صبح اور شام مؤقف بدلتے ہیں۔ اسلام ٹائمز۔ امیر جماعت اسلامی پاکستان حافظ نعیم الرحمان نے مینار پاکستان میں اجتماع عام سے خطاب کرتے ہوئے کہا ہے کہ قرآن و سنت کیخلاف تمام ترامیم مسترد کرتے ہیں، موقع ملا تو تمام اختیارات گراس روٹ لیول تک پہنچائیں گے۔ خاندان، وصیت اور وراثت میں چلنے والی جماعتیں کبھی بھی انقلاب نہیں لا سکتیں، جماعت اسلامی نظریاتی و جمہوریت جماعت ہے، حکمران جمہوریت کی نرسری کالج و یونیورسٹی میں سٹوڈنٹس کے انتخابات نہیں کروانا چاہتے، خاندان، وصیت اور وراثت پر چلنے والی جماعتیں نوجوانوں سے خوفزدہ ہیں، پنجاب کے ظالمانہ ایکٹ کو کسی صورت قبول نہیں کریں گے، ایکٹ کیخلاف ملک بھر میں بھرپور تحریک چلائیں گے۔ انہوں نے کہا کہ پنجاب کے تمام شہریوں میں صاف وشفاف بلدیاتی انتخابات کروائے جائیں اور تمام اختیارات نچلی سطح پر منتقل کیے جائیں، جب نچلی سطح پر اختیارات منتقل کیے جائیں گے تو اجارہ داری نظام کا خاتمہ ہوگا۔چیئرمین پیپلز پارٹی بلاول بھٹو زرداری بہت بڑے جاگیردار اور جمہوریت کے دعویدار ہیں، وہ بتائیں کہ انہوں نے سندھ کے ہاریوں کو ان کے حقوق کیوں نہیں دیئے؟ سندھ کے بچوں کو مفت اور معیاری تعلیم کیوں نہیں دی جاتی؟، ڈیلی ویجز پر کام کرنیوالی خواتین کو ان کے حقوق کیوں نہیں دیئے جاتے؟ پورے ملک میں سرمایہ دارانہ ذہنیت کے تحت غریب کو مزید غریب کیا جا رہا ہے۔
انہوں ںے کہا کہ سندھ میں سرمایہ دارانہ ذہنیت کے خاتمے اور ظلم کے نظام کے خاتمے کیلئے بھی بدل دو نظام تحریک کو چلانا ہوگا، معیشت، تجارت یا تعلیم ہو سب سے جاگیرداروں اور وڈیروں کا خاتمہ کرنا ہوگا، آئین کے آرٹیکل 140-A کے تحت تمام اختیارات نچلی سطح پر منتقل کرنا اور مالی و انتظامی معاملات فراہم کرنا ہے۔ کارکنان ظلم کی ہر شکل کو بدلنے کیلئے جدوجہد کو تیز کریں، ہم آئین و دستور کے مطابق قرآن و سنت کیخلاف تمام ترامیم کو مسترد کرتے ہیں، ہمیں موقع ملا تو ملک کے آئین و دستور کے مطابق اختیارات گراس روٹ لیول تک پہنچائیں گے، گلی اور محلے کی سطح پر عدل و انصاف قائم کرنے کیلئے کمیٹیاں بنائیں گے۔ عدالتی نظام کو آئین و دستور کے مطابق کریں گے۔ کارکنان اختلاف کو اختلاف کی طرح رکھیں، پی ٹی آئی کا ورکر ہو یا مسلم لیگ(ن) کا سب کو اپنے ساتھ ملائیں اور ’’بدل دو نظام تحریک‘‘ کا حصہ بنائیں۔ کارکنان اصولی مؤقف کو قائم رکھتے ہوئے سب کو اپنے ساتھ لے کر چلیں گے تو بہت جلد انقلاب آپ کو دستک دے گا، مملکت خداداد پاکستان میں پاکستان کی ریاست کا آئین و دستور بنایا تھا۔ آئین و دستور کے مطابق سب کو یکساں نظام تعلیم میسر ہوگی، مزدوروں کو ان کے حقوق دیئے جائیں گے۔ آئین و دستور کے مطابق خواتین کو ان کے بنیادی حقوق دیئے جائیں گے۔ ملک سے آئے ہوئے نوجوانوں کو خراج تحسین پیش کرتا ہوں۔
حافظ نعیم نے کہا کہ جماعت اسلامی کے کارکن سردی گرمی اور ہر طرح کی مشکلات کا سامنا کرلیں گے لیکن ظلم کے نظام کو کسی صورت قبول نہیں کریں گے۔ جاگیرداروں اور وڈیروں کو اپنے سروں پر بٹھا کر تبدیلی کا نعرہ نہیں لگایا جا سکتا، ہم کسی کی آشیر باد سے نہیں بلکہ عوامی رائے سے اقتدار میں آئیں گے۔ کارپوریٹ سسٹم سے جاگیرداروں اور وڈیروں کو خیر آباد کرکے کسانوں کو ان کی محنت کا حصہ دلوائیں گے، کسانوں کی قسمت میں غلام بن کر رہنا نہیں، بلکہ کسانوں ان کا حصہ ملنا چاہیے، عوام جماعت اسلامی کیساتھ کھڑے ہوں، جماعت اسلامی عوام کے حقوق دلوائے گی۔ مشرقی پاکستان میں 4 بڑی جماعت میں سٹوڈنٹس یونین کے انتخابات ہوئے اور سب میں اسلامک چھاترو کامیاب ہوئی ہے۔ یہ کامیابی اسلامی تحریکوں کی کامیابی ہے۔اجتماع عام کے دوسرے روز شرکاء سے منتظم اعلیٰ جمعیت طلبہ عربیہ پاکستان مولانا محمد افضل، اسلامی جمعیت طلبہ پاکستان کے ناظم اعلیٰ حسن بلال ہاشمی نے بھی خطاب کیا۔
حافظ نعیم الرحمان نے خطاب کرتے ہوئے مزید کہاکہ اجتماع میں ملک بھر سے آئے ہوئے عوام شریک ہیں، بدل دو نظام کے حوالے سے شرکاء پُرعزم ہیں۔ آئین و دستور کے مطابق حاکمیت صرف اور صرف اللہ تعالیٰ کی ہے۔ حاکمیت کا مطلب یہی ہے کہ اللہ اور اس کے بتائے ہوئے احکامات کے مطابق دنیا کے نظام کو قائم کرنا ہے۔ ہمہ جہت تحریک کیلئے ایسی قیادت ضرورت ہے جو عوام کے ساتھ اور عوام اس کیساتھ ہو۔ عوام کو ایسی قیادت کی ضرورت نہیں جو صبح اور شام مؤقف بدلتے ہیں۔ حافظ نعیم الرحمان نے کہاکہ بد قسمتی سے پاکستان میں کسی بھی سیاسی پارٹی کا ایجنڈے میں تعلیم نہیں، ملک میں 2 کروڑ 62 لاکھ بچے تعلیم سے محروم ہیں، ہم ایسا نظام چاہتے ہیں کہ جس میں پوری قوم کیلئے یکساں نظام تعلیم ہو۔ 50 ارب روپے اگر تعلیم کے بجٹ پر خرچ کیے جائیں اور بچوں کو مفت و معیاری تعلیم فراہم کی جائے تو قوم ترقی کرے گی، نوجوانوں میں پوٹینشل موجود ہے، ’’بنو قابل پروگرام‘‘ کے تحت پاکستان میں 12 لاکھ عوام رجسٹرڈ ہو چکے ہیں۔
بجلی کمپنیوں کی غفلت سے 30 اموات، نیپرا کا 5 کروڑ 75 لاکھ جرمانہ