شہباز شریف کا دورۂ ملائیشیا مکمل، وطن واپس روانہ
اشاعت کی تاریخ: 7th, October 2025 GMT
فوٹو بشکریہ سوشل میڈیا
وزیراعظم شہباز شریف ملائیشیا کا سرکاری دورہ مکمل ہونے کے بعد وطن واپس روانہ ہوگئے۔
ملائیشین وزیراعظم انور ابراہیم نے کوالا لمپور ایئرپورٹ پر شہباز شریف کو الوداع کیا۔
وزیراعظم کے دورۂ ملائیشیا کے دوران غیر معمولی گرمجوشی دیکھنے میں آئی۔
شہباز شریف کو ان کی رہائش سے ایئرپورٹ تک غیر معمولی سرکاری پروٹوکول دیا گیا اور دورۂ ملائیشیا کا تصاویر پر مبنی یادگاری البم بھی پیش کیا گیا۔
وزیراعظم آفس کے اعلامیے کے مطابق شہباز شریف ملائیشیا کے انتظامی مرکز پتراجایا گئے جہاں ان کا شاندار استقبال کیا گیا۔
اعلامیے میں بتایا کہ شہباز شریف کو ملائیشیا کی مسلح افواج کے دستے کی جانب سے گارڈ آف آنر پیش کیا گیا تھا۔
اعلامیے کے مطابق دونوں ممالک کے وزرائے اعظم کے درمیان دو طرفہ ملاقات بھی ہوئی۔
وزیر اعظم کا کہنا ہے کہ خواہش ہے کہ پاکستان اور یونیورسٹی کے درمیان علمی تعاون مزید مضبوط ہو۔
اعلامیے میں مزید بتایا کہ دونوں وزرائے اعظم نے وفود کی سطح پر ملاقات میں اپنے اپنے ملک کے وفد کی قیادت کی، دونوں ممالک کے درمیان کئی شعبوں میں تعاون کی مفاہمتی یادداشتوں پر بھی دستخط کیے گئے۔
اعلامیے کے مطابق دونوں وزرائے اعظم نے پاکستان ملائیشیاء بزنس اینڈ انویسٹمنٹ کانفرنس میں بھی شرکت کی۔
اعلامیے میں مزید بتایا کہ وزیراعظم کو اسلامک یونیورسٹی ملائیشیا نے لیڈر شپ اور گورننس میں پی ایچ ڈی کی اعزازی ڈگری بھی دی۔
اعلامیے کے مطابق وزیراعظم کا دورہ دونوں ممالک کے درمیان تیزی سے بڑھتے سفارتی و اقتصادی تعلقات کا عکاس ہے۔
وزیر اعظم شہباز شریف کا دورہ دو طرفہ تعلقات کو مزید مستحکم کرنے میں مددگار ثابت ہو گا۔
.ذریعہ: Jang News
کلیدی لفظ: اعلامیے کے مطابق شہباز شریف کو کے درمیان
پڑھیں:
وزیراعظم شہباز شریف کا باغ دانش سکول کا سنگِ بنیاد، افتتاح 23 مارچ 2026 کو ہوگا
باغ (نیوز ڈیسک) وزیراعظم شہباز شریف نے کہا کہ انہیں اس تاریخی موقع پر دلی مسرت ہے، کیونکہ یہ وہ تعلیمی سفر ہے جس کا آغاز پنجاب سے ہوا تھا اور جو اب اللہ تعالیٰ کے فضل و کرم سے پورے ملک میں تعمیر و ترقی کے ساتھ تیزی سے پھیل رہا ہے۔ انہوں نے کہا کہ باغ میں دانش سکول کی تعمیر کا کافی حصہ مکمل ہو چکا ہے اور محکمہ تعلیم کو یہ ہدف دیا گیا ہے کہ اس منصوبے کا افتتاح 23 مارچ 2026 کو کر دیا جائے گا۔ وزیراعظم نے اعلان کیا کہ وادیٔ نیلم میں بھی بہت جلد دانش سکول کا سنگِ بنیاد رکھا جائے گا اور آزاد جموں و کشمیر کی نئی قیادت کی درخواست پر ایک مزید دانش سکول کے قیام کی منظوری بھی دی جا رہی ہے۔
باغ دانش سکول کا سنگِ بنیاد رکھنے کی تقریب سے خطاب کرتے ہوئے وزیراعظم نے کہا کہ دانش سکول ایسے ادارے ہیں جن کا تعلیمی معیار ملک کے بہترین اداروں ایچیسن کالج، لارنس کالج، برن ہال ایبٹ آباد اور دیگر ممتاز درسگاہوں—سے کسی طور کم نہیں۔ انہوں نے کہا کہ ان اداروں میں جدید تعلیم، تربیت یافتہ اساتذہ، معیاری خوراک، بہترین رہائش، کھیلوں کے میدان، ڈیجیٹل لائبریریاں اور سمارٹ بورڈز جیسی سہولیات فراہم کی جا رہی ہیں۔ وزیراعظم نے کہا کہ یہ ادارے بانیٔ پاکستان قائد اعظم محمد علی جناح اور علامہ اقبال کے اس خواب کی تعبیر ہیں جس میں ایک ایسے پاکستان کا تصور پیش کیا گیا تھا جہاں ہر بچہ اور بچی صرف محنت، امانت اور دیانت کی بنیاد پر ترقی کا حق رکھتا ہو۔
انہوں نے اس موقع پر پنجاب کے ایک دانش سکول کی ایک طالبہ کا واقعہ بھی سنایا، جو یتیم تھی اور معاشی مشکلات کے باوجود ڈاکٹر بننے کا خواب رکھتی تھی۔ وزیراعظم کا کہنا تھا کہ یہ صرف ایک بچی کی کہانی نہیں، بلکہ آج ہزاروں طلبہ اور طالبات دانش سکولوں سے تعلیم حاصل کرکے ڈاکٹر، انجینیئر، محقق اور دیگر اہم شعبوں میں اپنا لوہا منوا رہے ہیں، جن میں وہ طالبعلم بھی شامل ہیں جو اس وقت کیمبرج یونیورسٹی میں زیر تعلیم ہیں۔ انہوں نے امید ظاہر کی کہ آزاد کشمیر کے بچے بھی انہی اداروں سے فارغ التحصیل ہو کر ملک و قوم کا نام روشن کریں گے۔
وزیراعظم نے اپنی تقریر میں ملکی سلامتی کے حوالے سے کہا کہ پاکستان کی مسلح افواج نے حالیہ مختصر جنگ میں دشمن کو واضح پیغام دیا اور دنیا نے پاکستانی افواج کی صلاحیتوں کا اعتراف کیا ہے۔ انہوں نے کہا کہ امریکہ کی کانگرس کی حالیہ رپورٹ میں بھی اس جرات مندانہ کارکردگی کی تائید کی گئی ہے۔ وزیراعظم کا کہنا تھا کہ یہ کامیابیاں اللہ تعالیٰ کے فضل اور افواجِ پاکستان کی بہادری کا نتیجہ ہیں، اور اسی عزم کے ساتھ حکومت معاشی میدان میں بھی دن رات محنت کر رہی ہے۔
انہوں نے کہا کہ جس طرح باغ میں یہ ادارے تعمیر ہو رہے ہیں، اسی طرح ایک دن مقبوضہ کشمیر کے بچے بھی آزاد فضا میں انہی سہولیات سے فائدہ اٹھائیں گے۔ پاکستان گزشتہ سات دہائیوں سے کشمیریوں کی اخلاقی، سیاسی اور سفارتی حمایت کر رہا ہے اور یہ تعاون اس وقت تک جاری رہے گا جب تک انہیں ان کا حق خودارادیت نہیں مل جاتا۔ وزیراعظم نے امید ظاہر کی کہ جلد وہ وقت آئے گا جب کشمیر آزاد ہوگا اور وہاں بھی ایسے تعلیمی ادارے تعمیر ہوں گے جو نئی نسل کے مستقبل کو روشن کریں گے۔
خطاب کے اختتام پر وزیراعظم نے کہا کہ حکومت آزاد کشمیر کے ساتھ ہونے والے تمام فیصلوں پر مکمل عملدرآمد کرے گی اور انہوں نے آزاد کشمیر کی قیادت سے توقع ظاہر کی کہ وہ گورننس کے اعلیٰ معیار قائم کریں گے تاکہ ترقی کے ثمرات ہر گھر تک پہنچیں۔ انہوں نے شرکا کے نعروں کے ساتھ خطاب مکمل کرتے ہوئے کہا کہ پاکستان زندہ باد، آزاد کشمیر پائندہ باد۔
بھارتی چیف آف ڈیفنس اسٹاف کا ملکی دفاعی صنعت پر عدم اعتماد اور برہمی کا اظہار