ٹرمپ نے شکاگو میں فوجی دستے تعینات کرنے کی منظوری دے دی
اشاعت کی تاریخ: 7th, October 2025 GMT
امریکی صدر ڈونلڈ ٹرمپ نے شکاگو میں بڑھتے ہوئے جرائم اور بدامنی کے پیشِ نظر فوجی دستے تعینات کرنے کی منظوری دے دی۔ اس فیصلے پر اپوزیشن ڈیموکریٹس نے شدید تنقید کرتے ہوئے اسے طاقت کے ناجائز استعمال سے تعبیر کیا ہے۔
عالمی خبر رساں ادارے اے ایف پی کے مطابق، وائٹ ہاؤس کی ترجمان ایبیگیل جیکسن نے تصدیق کی کہ صدر ٹرمپ نے 300 نیشنل گارڈز مین کو تعینات کرنے کا حکم دیا ہے تاکہ وفاقی املاک اور اہلکاروں کی حفاظت کی جا سکے۔ اس فیصلے کو صدر کے حالیہ ’آپریشن مڈوے بلیٹز‘ کا حصہ قرار دیا جا رہا ہے۔
تاہم، امریکی عدالت نے پورٹ لینڈ میں فوج بھیجنے کے ٹرمپ کے فیصلے کو غیر ضروری اور غیر قانونی قرار دے کر روک دیا۔ عدالت کے مطابق، مقامی پولیس امن و امان کی صورتحال سنبھالنے کی صلاحیت رکھتی ہے۔
ڈیموکریٹ سینیٹر ڈک ڈربن نے اس اقدام کو "قومی تاریخ کا شرمناک باب" قرار دیتے ہوئے کہا کہ صدر ٹرمپ عوامی تحفظ نہیں بلکہ "خوف پھیلانے" کی سیاست کر رہے ہیں۔ دوسری جانب، محکمہ ہوم لینڈ سیکیورٹی کے مطابق، شکاگو میں ایک واقعے کے دوران ایک وفاقی افسر نے مبینہ طور پر مسلح ڈرائیور پر فائرنگ کی، جس سے شہری کشیدگی میں مزید اضافہ ہوا۔
مقامی میڈیا رپورٹس کے مطابق، فائرنگ کے بعد احتجاجی مظاہرے پھوٹ پڑے جنہیں پولیس نے آنسو گیس اور پیپر بالز کے ذریعے منتشر کیا۔ بعد ازاں، مظاہرین دوبارہ جمع ہو گئے لیکن جب وفاقی ایجنٹس علاقے سے واپس گئے تو صورتحال قابو میں آ گئی۔
سیاسی ماہرین کا کہنا ہے کہ ٹرمپ کا یہ قدم آئندہ انتخابات کے تناظر میں عوامی تاثر کو مضبوط کرنے کی کوشش ہے، تاہم اس سے ملک میں سیاسی تقسیم مزید گہری ہو سکتی ہے۔
.
ذریعہ: Express News
کلیدی لفظ: کے مطابق
پڑھیں:
ٹرمپ کا امریکی بحریہ کی سالگرہ کے تقریب میں رقص، فوجی خوشی سے جھوم اٹھے
امریکی صدر ڈونالڈ ٹرمپ نے یو ایس نیوی کی 250ویں سالگرہ کی تقریب میں شرکت کے دوران ایک غیر متوقع لمحے میں اسٹیج پر رقص کر کے حاضرین کو حیران کر دیا۔ تقریب میں موجود فوجی اہلکاروں، افسران اور شہری مہمانوں نے صدر کے اس انداز کو خوش دلی سے سراہا، تالیاں بجائیں اور شور مچاتے ہوئے اپنے سربراہِ مملکت کی داد دی۔
تقریب ورجینیا کے نورفولک نیول بیس پر منعقد ہوئی جہاں ہزاروں اہلکار موجود تھے۔ تقریب کے اختتام پر، جب مشہور گانا ”YMCA“ بجایا گیا، تو صدر ٹرمپ نے اس کی دھن پر ہلکے پھلکے انداز میں رقص شروع کر دیا۔ ان کا یہ اندازہ شاید کسی کو نہیں تھا، لیکن وہاں موجود مجمع نے بھرپور خوشی کا اظہار کیا۔
صدر ٹرمپ نے تقریب میں تقریر بھی کی، جس میں انہوں نے امریکی بحریہ کی خدمات کو سراہا اور کہا کہ نیوی نے ہمیشہ قوم کی حفاظت اور بین الاقوامی امن میں مرکزی کردار ادا کیا ہے۔ انہوں نے نیول اہلکاروں کو ”قوم کا فخر“ قرار دیا۔
تاہم، صدر کے اس غیر رسمی انداز پر سوشل میڈیا پر ملا جلا ردِعمل دیکھنے کو ملا۔ کچھ صارفین نے ان کے انداز کو ”انسانی اور خوشگوار“ قرار دیا، جبکہ بعض نے اسے ”موقع کی مناسبت سے غیر سنجیدہ“ کہا۔ ناقدین نے رقص کو ایک سیاسی چال بھی قرار دیا، جس کا مقصد عوامی مقبولیت حاصل کرنا بتایا جا رہا ہے۔
یہ پہلی بار نہیں ہے کہ صدر ٹرمپ نے کسی عوامی تقریب میں اس نوعیت کا غیر روایتی انداز اپنایا ہو۔ ماضی میں بھی وہ انتخابی ریلیوں اور دیگر تقریبات میں موسیقی پر جھومتے اور حاضرین کو محظوظ کرتے نظر آ چکے ہیں۔
صدر ٹرمپ کے اس رقص کی ویڈیوز سوشل میڈیا پر وائرل ہو گئیں اور لاکھوں صارفین نے انہیں دیکھا، تبصرے کیے اور میمز بھی بنائیں۔
جائز مطالبات ماننے کو تیار ہیں ، وزیراعظم آزاد کشمیر کی عوامی ایکشن کمیٹی کو مذاکرات کی دعوت