بھارت نے فیصلہ کن ون ڈے میں جنوبی افریقا کو 9 وکٹوں سے شکست دے کر سیریز اپنے نام کرلی
اشاعت کی تاریخ: 6th, December 2025 GMT
بھارت نے وشاکاپٹنم میں کھیلے گئے تیسرے اور فیصلہ کن ایک روزہ میچ میں جنوبی افریقا کو یکطرفہ مقابلے کے بعد 9 وکٹوں سے شکست دے کر تین میچوں کی سیریز جیت لی۔ دلچسپ طور پر بھارت نے 20 میچوں بعد پہلی بار ٹاس جیتا اور پروٹیز کو بیٹنگ کی دعوت دی۔
جنوبی افریقا کی ٹیم پہلے کھیلتے ہوئے 47.5 اوورز میں 270 رنز بنا سکی۔ کوئنٹن ڈی کاک نے شاندار 106 رنز کی اننگز کھیل کر اپنی ٹیم کو مشکل صورتحال میں سہارا دیا، جبکہ کپتان ٹیمبا باووما 48 رنز کے ساتھ دوسرے نمایاں بیٹر رہے۔ ڈیوالڈ بریوس 29 اور میتھیو برٹزکے 24 رنز بنا کر آؤٹ ہوئے، تاہم باقی بیٹرز خاطر خواہ کارکردگی نہ دکھا سکے۔ کیشو مہاراج 20 رنز کے ساتھ ناٹ آؤٹ رہے۔
بھارت کی جانب سے کلدیپ یادو اور پرسدھ کرشنا نے شاندار بولنگ کرتے ہوئے 4، 4 وکٹیں حاصل کیں، جبکہ ارشدیپ سنگھ اور رویندر جڈیجا نے ایک ایک شکار کیا۔
جواب میں بھارتی بیٹرز نے جنوبی افریقی بولرز کو کوئی موقع نہیں دیا۔ 271 رنز کا ہدف بھارت نے صرف ایک وکٹ کے نقصان پر 40 ویں اوور میں حاصل کرلیا۔ نوجوان اوپنر یشسوی جیسوال نے جارحانہ اور شاہکار بیٹنگ کا مظاہرہ کرتے ہوئے 116 رنز کی ناقابلِ شکست اننگز کھیلی۔ کپتان روہت شرما 75 رنز بنا کر آؤٹ ہوئے جبکہ ویرات کوہلی نے پرسکون انداز میں 65 رنز ناٹ آؤٹ اسکور کیے۔
جنوبی افریقا کی طرف سے واحد کامیابی کیشو مہاراج کے حصے میں آئی۔
بھارت کی یہ جیت نہ صرف میچ بلکہ پوری سیریز پر ان کی گرفت مضبوط ثابت ہوئی۔
ذریعہ
ذریعہ: Daily Mumtaz
کلیدی لفظ: جنوبی افریقا بھارت نے
پڑھیں:
آئی ایم ایف کی شرط پر ایکسپورٹ پروسیسنگ زونز کی مصنوعات مقامی مارکیٹ کو فروخت نہ کرنے کا فیصلہ
وفاقی حکومت نے عالمی مالیاتی ادارہ (آئی ایم ایف)کی شرائط کے تحت ستمبر 2026 سے ایکسپورٹ پراسسنگ زونز کی پیداوار مقامی مارکیٹ میں فروخت کرنے کی اجازت ختم کرنے کا فیصلہ کیا ہے اور ان زونز کو اپنی 100 فیصد پیداوار برآمد کرنا ہوگی۔
وفاقی وزارت خزانہ حکام کے مطابق آئی ایم ایف کی شرط کے تحت ستمبر 2026 سے ایکسپورٹ پراسسنگ زونز کی پیداوار مقامی مارکیٹ میں فروخت کرنے کی اجازت ختم کر دی جائے گی اور ان زونز کو اپنی 100 فیصد پیداوار برآمد کرنا ہوگی۔
حکام کا کہنا تھا کہ اس وقت ایکسپورٹ پراسسنگ زونز کو اپنی 20 فیصد پیداوار مقامی مارکیٹ میں فروخت کرنے کی اجازت حاصل ہے تاہم آئی ایم ایف نے اس رعایت کو برقرار رکھنے کی حکومتی درخواست مسترد کر دی ہے۔
وزارت خزانہ کے مطابق حکومت نے مزید ایکسپورٹ پراسسنگ زونز کے قیام کی اجازت کی بھی درخواست کی تھی تاہم آئی ایم ایف نے اسے بھی قبول نہیں کیا۔
حکام نے بتایا کہ حکومت آئندہ اقتصادی جائزے کے دوران دوبارہ درخواست کرے گی کہ مقامی مارکیٹ میں 20 فیصد پیداوار فروخت کرنے پر پابندی عائد نہ کی جائے۔
وزارت خزانہ کے مطابق مقامی مارکیٹ میں پیداوار فروخت کرنے کی چھوٹ ختم کرنے کی تجویز فیڈرل بورڈ آف ریونیو(ایف بی آر) کو بھی بھجوائی جا رہی ہے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار