قلنگی مرغ اور بازوئے شمشیر زن (حصہ اول)
اشاعت کی تاریخ: 31st, May 2025 GMT
پچھلے دنوں یہاں پشاور میں مدتوں بعد ایک خوبصورت تقریب دیکھنے سننے کو ملی۔پروگرام تیکنیکی اعتبار سے کیا تھا؟ کانفرنس سیمینار یا افتتاح یہ تو ہم کہہ نہیں پائیں گے کیونکہ ہم درمیان میں پہنچے تھے لیکن پروگرام بہرحال خوبصورت تھا۔اکادمی ادبیات کی سربراہ نجیبہ عارف بھی وہاں تھیں۔ بعض لوگ بڑھاپے میں اس سے کہیں زیادہ خوبصورت اور باوقار لگتے ہیں جتنے جوانی میں ہوتے ہیں۔بقول فراق گورکھپوری
ایک رنگینی ظاہر ہے گلستاں میں اگر
ایک شادابی پنہاں ہے بیابانوں میں
پروگرام کئی نشستوں پر مبنی کئی موضوعات پر مشتمل تھا میرے حصے میں ’’ادب اور فکشن یا اس خطے میں’’فکشن‘‘ آیا تھا۔اس میں تو جو بولنا تھا ہم بول گئے۔لیکن ہم سے پہلے جو نشست تھی وہ اس خطے میں’’ادب اور امن‘‘ پر تھی، شرکاء اس میں اچھا بولے لیکن اس موضوع پر وہ نہیں بولا گیا جو بولنا چاہیے تھا۔اور اسی موضوع پر ہمیں بولنا ہے اور بہت بولنا ہے۔یعنی یہ کہ اس خطے کو ہمیشہ ہمیشہ سے بدامنی کیوں لاحق ہے
تم سے مل کر مجھے رونا بہت رونا تھا
تنگی وقت ملاقات نے رونے نہ دیا
اس لیے اپنا’’رونا‘‘ اپنے کالم میں روتے ہیں۔ ظاہر سی بات ہے کہ موضوعات کا انتخاب کرنے والوں نے اسی لیے اس موضوع کا انتخاب ہی اس لیے کیا تھا کہ’’امن‘‘ ہمیشہ سے صرف آج کل نہیں بلکہ صدیوں سے اس خطے کی ضرورت رہا ہے عام طور پر تو دور دور سے دیکھیے سننے والوں کو صرف اتنا پتہ ہے یا بتایا گیا ہے کہ پشتون ایک لڑاکو قوم ہے ہر وقت لڑائی جھگڑوں اور مرنے مارنے میں مصروف رہتی ہے بلکہ یہاں کوئی شریف اور امن پسند بندہ ہے ہی نہیں سارے پشتون لڑاکو مرغے ہیں، خونریز ہیں اور تشدد پسند ہیں اور اس کے علاوہ اور بھی بہت لکھا پڑھا اور کہا سنا جاتا ہے۔لیکن کسی نے کبھی اس پر غور نہیں کیا ہے کہ پشتون ایسے کیوں ہیں؟کیا ان میں کوئی پیدائشی یا خاندانی نقص ہے؟یا یہ کوئی بیماری ہے مرض ہے یا عارضہ ہے جو پشتونوں کو لاحق ہے آخر کیوں یہ لڑنے مرنے کے اتنے رسیا ہیں ؟ تو آج اس پر بات ہوہی جائے اگرچہ میں نے اپنی تاریخ کی کتابوں میں اس موضوع پر بہت کچھ لکھا ہے لیکن کون پڑھتا ہے غم کے افسانے۔وہ تو جہالتوں، حماقتوں اور برائیوں میں اتنے مصروف ہیں کہ کچھ اور سوچتا ہی نہیں بلکہ اس پر برائیاں ڈال کر خوش ہولیتے ہیں اور بس۔لیکن یہ کبھی کسی نے سوچا تک نہیں کہ اس میں یہ ’’بُرائیاں‘‘ آئی کہاں سے؟کیونکہ انسان خود کبھی اچھا یا بُرا نہیں بنتا۔بلکہ اس کا ماحول اس کی ضرورتیں اس کی مجبوریاں اور محرومیاں ہی اسے’’بناتی‘‘ہیں۔
کہاوت ہے کہ کسی نے ’’تیر‘‘ سے پوچھا کہ تم اتنا تیز کیوں جا رہے ہو یا اُڑ رہے ہو۔ تو تیر نے کہا یہ جاکر تم’’کمان‘‘ کی ’’تانت‘‘ سے پوچھو۔میں تو بے جان تنکا ہوں، میرے پیچھے سارا زور کمان کا ہے، کمان کی تانت کا ہے۔پشتون ایسے کیوں ہیں؟یہ بات آپ کو اس کا جغرافیہ بتا دے گی اگر غور کریں تو۔ سب کو معلوم ہے کہ زمانہ قدیم سے ہندوستان ایک سونے کی چڑیا کے طور پر مشہور رہا ہے۔اور اس ’’سونے کی چڑیا‘‘کو شکار کرنے بھی طالع آزما آتے رہے ہیں ان کو ان پہاڑی سلسلوں سے گزرنا پڑا ہے جہاں یہ بدنصیب پشتون آباد ہیں۔خیبر تو سب کو معلوم ہے لیکن اور بھی بے شمار چھوٹے بڑے دروازے ہیں باجوڑ، کرم، گومل، وزیرستان ژوب اور چمن۔ اور سارے دروازوں میں یہی بدنصیب پڑے تھے۔
چنانچہ شکاری ابتدا انھی سے کردیتے تھے یا ان کا پہلا’’ٹاکرا‘‘ ان سے ہوجاتا تھا۔ بابر نے اپنی تزک میں لکھا ہے کہ’’اس دن ہم نے صبح سے شام تک ان نابکار افغانوں کو جہنم واصل کیا اور پھر شام کو شکرانے کی دو رکعت پڑھ کر ساری رات’’ناو نوش‘‘ میں مشغول رہے‘‘۔اسی طرح سب کرتے رہے، ایرانی، یونانی، مغل، ترک، عرب، ظاہر ہے کہ بے مہار افواج لوٹ مار،قتل و قتال اور آبروریزی کی ابتدا یہیں سے کردیتی تھیں۔تو یہاں کے بدنصیب باسی اور کیا کرتے؟لڑتے اور لڑتے لڑتے لڑاکو مرغ بن گئے یہ تو جاہل لکھت پڑھت اور عیاریوں سے نابلد سیدھے سادے لڑاکو مرغ ہوتے تھے اور جہاں دیدہ جہاں گشتہ لوگ بہت جلد ان کو ’’پہچان‘‘ لیتے تھے پھر ہاتھ پھیر کر اپنے ساتھ لے جاتے اور مختلف میدانوں میں لڑانے لگتے۔جیت جاتے تو فتح بادشاہ کی ہوتی اور مرجاتے تو دشمن تھا مر گیا۔
اصیل مرغوں کی لڑائی میں جب کوئی مرغ ہار جاتا ہے تو مالک چھری پھیر کر کھاجا بنا لیتا ہے۔ دنیا کی تاریخ گواہ ہے کہ حکمرانوں اور اشرافیہ کا ہمیشہ سے یہ وطیرہ رہا ہے اور میں اکثر ان کالموں میں تذکرہ بھی کرتا رہتا ہوں کہ اس اشرافیہ یا حکمرانیہ نے ’’عوامیہ‘‘ کو ہمیشہ سے دماغ کے عدم استعمال اور جسم کی کثرت استعمال پر لگایا ہوا ہے اور خود کو دماغ کے کثرت استعمال اور جسم کے عدم استعمال کے لیے مختص کر رکھا ہے جس کا لازمی نتیجہ یہی نکلنا تھا اور نکل گیا کہ عوامیہ کے دماغ زنگ آلود ہوکر رفتہ رفتہ صفر ہوگئے اور حکمرانیہ دماغ انتہائی تیز چالاک اور عیار ہوگئے ہیں۔ پشتونوں کے ساتھ ہوا یوں کہ جب ان آنے والے ’’طالع آزما شکاریوں نے ان کو پہچان لیا کہ’’قلنگی مرغ‘‘ ہیں تو ان کی پیٹھ ٹھونک کر بہادر شجاع اور بازوئے شمشیرزن کے خطابات بھی عطا فرما دیے۔
(جاری ہے)
.ذریعہ: Express News
پڑھیں:
سگنل خراب ہے لیکن کیمرے سے ڈر لگ رہا ہے، سڑک پر پھنسے کراچی کے نوجوانوں کی ویڈیو وائرل
کراچی کے تین تالور کے مقام پر ٹریفک سگنلز کے خراب ہونے کی ویڈیو سوشل میڈیا پر وائرل ہو گئی ہے، جس میں ایک شہری نے اس موقع پر اپنی تشویش کا اظہار کیا کہ سگنل خراب ہونے کے باوجود کیمروں کے فعال ہونے کے باعث وہ کس طرح اپنی گاڑی چلائیں۔
ویڈیو میں شہری کا کہنا تھا کہ وہ کافی دیر سے سگنل پر کھڑے ہیں، لیکن چونکہ صرف سرخ لائٹ جل رہی ہے اور سگنل کھل نہیں رہا، اس لیے وہ اس مقام پر پھنس گئے ہیں اور انہیں خدشہ ہے کہ ای چالان جاری ہو سکتا ہے، کیونکہ سامنے کیمرے لگے ہیں اور انہیں کمیروں سے ڈر لگتا ہے۔
سوشل میڈیا صارفین نے اس ویڈیو پر دلچسپ اور مزاحیہ ردعمل بھی دیا۔ ایک صارف نے کہا کہ ’سگنل توڑنے کے بارے میں سوچنا بھی نہیں، اس وقت تک انتظار کریں جب تک کوئی اسے ٹھیک نہ کر دے، ورنہ ای چالان آپ تک پہنچ جائے گا‘۔
رمیز نامی صارف نے مزاحیہ انداز میں مشورہ دیا کہ ’کمبل اور تکیہ لے کر سگنل لائٹ پر سو جائیں‘، جبکہ ایک اور صارف نے کہا کہ ’دو چھوٹے تولیے لے کر نمبر پلیٹس ڈھانپیں اور اطمینان سے خراب سگنل کراس کریں‘۔
یہ بھی پڑھیں: کراچی: ڈی آئی جی ٹریفک قانون کی خلاف ورزی پر ای چالان کی زد میں آگئے
واضح رہے کہ کراچی ٹریفک پولیس نے جدید کیمروں اور ڈیجیٹل ڈیٹا بیس کے ذریعے ای چالان کا نظام متعارف کرایا ہے تاکہ ٹریفک قوانین کی خلاف ورزیوں کی روک تھام کی جا سکے۔ سیف سٹی کیمروں کی تنصیب کے بعد مختلف شاہراہوں اور سگنلز پر گاڑیوں کی خلاف ورزیوں کو خودکار طریقے سے ریکارڈ کیا جاتا ہے اور اس کی بنیاد پر الیکٹرانک چالان جاری کیے جاتے ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
ای چالان ریڈ سگنل کراچی ویڈیو وائرل
آئی بی ایم طلبا کے احتجاج پر بےدخل طالبہ بحال، یونیورسٹی تاحال بند