اسکن کیئر اور میک اپ ٹپس ؛ سادہ طریقے، بہترین نتائج
اشاعت کی تاریخ: 3rd, December 2025 GMT
خوبصورت چہرہ صرف مہنگے میک اپ سے نہیں بلکہ روزانہ کی سادہ اور مستقل اسکن کیئر عادات سے بنتا ہے۔
پاکستان میں بدلتے موسم کی شدت اور خشکی کے باعث ماہرین مشورہ دیتے ہیں کہ خواتین اور مرد دونوں اپنی جلد کے مطابق چند بنیادی اصول اپنا کر بغیر اضافی خرچ کے چمکدار اور صحت مند اسکن حاصل کر سکتے ہیں۔ یہی وجہ ہے کہ اسکن کیئر اور میک اپ ٹپس آج کل لائف اسٹائل کے اہم ترین موضوعات بن گئے ہیں۔
ماہرین کے مطابق اسکن کیئر کی بنیاد کلینزنگ، موئسچرائزنگ اور سن بلاک پر ہوتی ہے۔ دن میں دو بار چہرہ صاف کرنا لازمی ہے، چاہے آپ میک اپ نہ بھی لگائیں۔ پاکستان میں دھول اور آلودگی جلد کے مسام بند کر دیتی ہے، اس لیے نرم اور سادہ کلینزر کا استعمال ضروری ہے۔ کلینزنگ کے بعد ہلکا موئسچرائزر جلد میں نمی برقرار رکھتا ہے اور چہرے کو تازگی دیتا ہے۔
جلد چاہے آئلی ہو یا خشک، ماہرین کے مطابق سن بلاک کا استعمال روزانہ کرنا چاہیے، کیونکہ چہرے پر ہونے والی 90 فیصد قبل از وقت جھریاں سورج کی شعاعوں کی وجہ سے ہوتی ہیں۔
میک اپ کی بات کی جائے تو ماہرین کا کہنا ہے کہ قدرتی اور نو۔میک اپ لک اس وقت ٹرینڈ میں ہے۔ اس ٹرینڈ میں ہلکا بیس، نیوڈ لپ کلرز اور نرم آئی شیڈوز شامل ہیں۔ بھاری بیس نہ صرف چہرے کو غیر فطری دکھاتی ہے بلکہ مسام بھی بند کرتی ہے، اس لیے روزمرہ کے لیے ہلکی فاؤنڈیشن یا بی بی کریم بہترین انتخاب ہے۔
بہت سے میک اپ آرٹسٹس مشورہ دیتے ہیں کہ فاؤنڈیشن سے پہلے پرائمر لگا لیا جائے تاکہ میک اپ دیر تک تازہ رہے اور جلد پر ہلکا محسوس ہو۔
بھنوؤں کی شیپنگ آج کل میک اپ کا اہم حصہ بن چکی ہے۔ صرف بھنوؤں کو تھوڑا سا ڈِفائن کرنے سے چہرے کی مکمل شکل نکھر جاتی ہے۔ اسی طرح ٹِنٹ یعنی ہلکا بلش یا لپ اینڈ چیک ٹِنٹ نوجوان لڑکیوں میں خاصا مقبول ہے، کیونکہ یہ بغیر زیادہ میک اپ کیے چہرے پر فوری گلو لے آتا ہے۔
اسکن کیئر میں ایک اور اہم رجحان ڈبل کلینزنگ ہے جو خاص طور پر میک اپ استعمال کرنے والوں کے لیے مفید ہے۔ پہلے آئل بیسڈ کلینزر سے میک اپ صاف کیا جاتا ہے اور پھر فومنگ کلینزر سے جلد کو مکمل طور پر دھویا جاتا ہے۔ اس عمل سے نہ صرف مسام صاف رہتے ہیں بلکہ دانوں اور اسکن بریک آؤٹس سے بھی بچاؤ ہوتا ہے۔
اسکن کیئر ایکسپرٹس مشورہ دیتے ہیں کہ روزانہ 8 گلاس پانی پینا، مناسب نیند اور تیل میں بھنے ہوئے کھانوں سے پرہیز وہ قدرتی تراکیب ہیں جن سے چہرے کی تازگی بغیر کسی اضافی خرچ کے برقرار رہتی ہے۔ میک اپ صرف جلد کو نکھارتا ہے، اصل خوبصورتی صحت مند اسکن سے آتی ہے۔
.
ذریعہ
ذریعہ: Express News
پڑھیں:
پولیس بہترین کارکردگی کے ذریعے اپنے تاثرکو بہتر بناسکتی ہے: وزیراعلیٰ سندھ
وزیراعلیٰ سندھ مراد علی شاہ کا کہنا ہے کہ عوام کا تحفظ، انصاف کی فراہمی اور قانون شکن عناصر کو عدالتوں کے کٹہرے میں لانا پولیس فورس کی بنیادی ذمہ داری ہے۔
سعید آباد پولیس ٹریننگ سینٹر میں 132ویں پاسنگ آؤٹ پریڈ کی تقریب سے خطاب کرتے وزیراعلیٰ سندھ کا کہنا تھا آج 300 سے زائد خواتین اپنی ٹریننگ مکمل کررہی ہیں، مجھےخواتین کی کامیابی پر بہت خوشی ہوئی کہ ایک تازہ دم دستہ عوام کی خدمت کےلیے تیار ہے، شہریوں کو پر امن زندگی دینے کی ذمےداری اب آپ پر عائد ہوتی ہے۔مراد علی شاہ کا کہنا تھا کہ ملک دہشتگردی جیسے مسائل سے دوچار ہے، ہمارے جوانوں نے بہت قربانیاں دیں ہیں، کچے کے علاقے کچھ عرصے پہلے تک بحران سے دوچار تھے، یقین دہانی کرواتا ہوں کہ ان شہداء کا خون رائیگاں نہیں جائےگا، پولیس کی کارکردگی کو مزید بہتر بنانا سندھ حکومت کی اولین ترجیح ہے۔انہوں نے مزید کہا کہ پولیس کی فلاح و بہبود ہمیشہ سے میری اولین ترجیح رہی ہے، مستقبل میں بھی پولیس کے تمام مسائل کو بہتر اور ترجیحی انداز میں حل کیا جائے گا، پاس آؤٹ ہونے والے جوان فیلڈ میں جا کر سندھ پولیس کا نام مزید روشن کریں گے۔مراد علی شاہ نے یہ بھی کہا کہ پولیس اپنی بہترین کارکردگی کے ذریعے ہی اپنے امیج (تاثر) کو بہتر بنا سکتی ہے، عوام کا تحفظ، انصاف کی فراہمی اور قانون شکن عناصر کو عدالتوں کے کٹہرے میں لانا پولیس فورس کی بنیادی ذمہ داری ہے، سندھ حکومت پولیس فورس کو جدید خطوط پر استوار کرنے کے لیے پرعزم ہے۔اس موقع پر آئی جی سندھ جاوید عالم اوڈھو نے تقریب سے خطاب کرتے ہوئے کہا کہ پولیس فورس کی بنیاد معیاری افرادی قوت اور انسانی وسائل پر ہوتی ہے، عوام کا تحفظ، انصاف کی فراہمی اور خلوصِ دل سے خدمت پولیس کا مقصد ہے، پولیس کی وردی جوانوں کے لیے اعزاز بھی ہے اور ایک بڑا امتحان بھی۔آئی جی سندھ کا کہنا تھا کہ صوبے کے عوام اور حکومت کی نظریں پولیس فورس پر مرکوز ہیں، کراچی میں اسٹریٹ کرائم کے خاتمے اور کچے میں ڈاکوؤں کا صفایا بڑا چیلنج ہے۔انہوں نے کہا کہ وزیراعلیٰ سندھ کی جانب سے ڈائٹ چارجز بڑھانےکی منظوری محکمہ فنانس میں زیر التوا ہے، ہمارا مطالبہ ہے کہ گریڈ ایک سے گریڈ 16 کے ٹرینرز کا الاؤنس 3 ہزار سے بڑھا کر 30 ہزار روپے کیا جائے اور گریڈ 17 سے 21 کے افسران کا ٹریننگ الاؤنس 5 ہزار سے بڑھا کر 50 ہزار روپے کیا جائے، رزاق آباد، سکرنڈ اور حیدرآباد کے مراکز کو پولیس ٹریننگ اسکول کا درجہ دیا جائے۔
بھارت سے جنگ اور افغانستان میں کارروائی خارج ازامکان نہیں، وزیردفاع