کشمیر میں غیر اعلانیہ انہدامی کارروائی پر خورشید احمد شیخ کا احتجاج
اشاعت کی تاریخ: 28th, June 2025 GMT
لوگوں کا الزام ہے کہ انہدامی کارروائی بغیر کسی بیشگی اطلاع یا نوٹس کے انجام دی گئی اور سڑک کنارے عوامی استعمال کیلئے تعمیر کئے گئے متعدد ڈھانچوں، بشمول مسافر شیڈز کو منہدم کردیا گیا۔ اسلام ٹائمز۔ مقبوضہ کشمیر میں بارہمولہ-کپوارہ فورلین سڑک منصوبے کی تعمیر و کشادگی کے تحت کپوارہ ضلع کے لنگیٹ علاقے میں کی گئی ایک انہدامی کارروائی پر مقامی آبادی نے شدید ناراضگی ظاہر کرتے ہوئے اس کے خلاف اپنے غصے کا اظہار کیا۔ لوگوں کا الزام ہے کہ انہدامی کارروائی بغیر کسی بیشگی اطلاع یا نوٹس کے انجام دی گئی اور سڑک کنارے عوامی استعمال کے لئے تعمیر کئے گئے متعدد ڈھانچوں، بشمول مسافر شیڈز، کو منہدم کر دیا گیا۔ اس انہدامی کارروائی کے خلاف لنگیٹ کے ایم ایل اے خورشید احمد شیخ نے لنگیٹ چوک پر ایک پُرامن احتجاج کی قیادت کرتے ہوئے انہدامی کارروائی کو عوام کے ساتھ سراسر ناانصافی اور قانونی تقاضوں کی صریح خلاف ورزی قرار دیا۔
ایم ایل اے نے میڈیا نمائندوں کو بتایا کہ سڑک کی کشادگی کا نقشہ صرف چھ ماہ قبل تبدیل کیا گیا اور اب عوامی ڈھانچے حتیٰ کہ رہائشی مکانات کو بھی بغیر نوٹس کے منہدم کیا جا رہا ہے۔ انہوں نے الزام عائد کیا کہ متاثرین کو نہ کوئی پیشگی اطلاع دی گئی اور نہ معاوضے کی پیشکش کی گئی۔ انہوں نے کہا کہ متاثرین کے لئے کسی بازآبادکاری کا بھی کوئی باضابطہ منصوبہ زیر غور نہیں ہے۔ ایم ایل اے نے اس انہدامی کارروائی کو سراسر ظلم قرار دیتے ہوئے اس کے خلاف پُرامن طور پر آواز بلند کرنے کا عندیہ دیا۔ انہوں نے کہا کہ وہ جلد ہی عدالت کا دروازہ کھٹکھٹائیں گے اور اس کارروائی کے ذمہ داروں، بشمول کنسٹرکشن کمپنی، متعلقہ افسران اور موقع پر موجود مجسٹریٹ کو جوابدہ بنائیں گے۔
احتجاج کے پیش نظر ایڈیشنل ڈپٹی کمشنر (اے ڈی سی) ہندوارہ موقع پر پہنچے اور ایم ایل اے اور مظاہرین کو یقین دہانی کی کہ اس معاملے کی مکمل اور شفاف تحقیقات کی جائے گی اور آئندہ کوئی بھی انہدامی کارروائی قانونی تقاضے پورے کئے بغیر انجام نہیں دی جائے گی۔ دوسری جانب مقامی آبادی نے مطالبہ کیا ہے کہ فوری طور پر انہدامی کارروائی پر روک لگائی جائے، متاثرین کو معاوضہ دیا جائے اور تعمیراتی ایجنسی کی جانب سے شفاف طریقہ کار اختیار کرنے کو بھی یقینی بنایا جائے۔ عوام کا کہنا ہے کہ اگر ان کے جائز مطالبات کو نظر انداز کیا گیا تو احتجاج کا دائرہ وسیع کیا جائے گا۔
ذریعہ: Islam Times
کلیدی لفظ: انہدامی کارروائی ایم ایل اے
پڑھیں:
بھارت نے نہتے کشمیریوں کے خلاف جنگ چھیڑ رکھی ہے، حریت کانفرنس
ایڈووکیٹ عبدالرشید منہاس نے سرینگر سے جاری ایک بیان میں کہا کہ بھارت کے غیر انسانی، سفاکانہ اور غیر اخلاقی ہتھکنڈے ماضی میں بھی حق خودارادیت کے حصول کے لئے کشمیریوں کی جدوجہد کو دبانے میں ناکام رہے اور مستقبل میں بھی ناکام رہیں گے۔ اسلام ٹائمز۔ غیر قانونی طور پر بھارت کے زیر قبضہ جموں و کشمیر میں کل جماعتی حریت کانفرنس نے کہا ہے کہ بھارت کی بی جے پی حکومت اور اس کے مسلط کردہ لیفٹیننٹ گورنر کی انتظامیہ نے نہتے کشمیریوں کے خلاف جنگ چھیڑ رکھی ہے۔ ذرائع کے مطابق بھارت کی پیراملٹری فورسز اور پولیس نے مقبوضہ جموں و کشمیر کے مختلف علاقوں میں گھروں پر چھاپوں اور تلاشی کارروائیوں کا سلسلہ جاری رکھا ہے اور مکینوں کو مسلسل ہراساں کیا جا رہا ہے۔ کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر سے جاری ایک بیان میں کہا کہ بھارت کے غیر انسانی، سفاکانہ اور غیر اخلاقی ہتھکنڈے ماضی میں بھی حق خودارادیت کے حصول کے لئے کشمیریوں کی جدوجہد کو دبانے میں ناکام رہے اور مستقبل میں بھی ناکام رہیں گے۔ بیان میں کہا گیا کہ بھارتی فورسز کے اہلکار گھروں پر چھاپوں اور تلاشی کی کارروائیوں کے دوران گھریلو سامان، موبائل فون، لیپ ٹاپ اور دیگر قیمتی اشیاء لوٹتے ہیں اور پھر واپس نہیں کرتے۔
حریت ترجمان نے کہا کہ بھارت نے کشمیریوں کو ان کے حق خودارادیت سے محروم کر رکھا ہے جس کے لیے مقبوضہ جموں و کشمیر کے عوام سات دہائیوں سے زائد عرصے سے بے مثال قربانیاں دے رہے ہیں۔ترجمان نے انسانی حقوق کی بین الاقوامی تنظیموں بالخصوص اقوام متحدہ کی انسانی حقوق کونسل سے اپیل کی کہ وہ مقبوضہ علاقے میں بھارتی فورسز کی من مانی اور غیر قانونی کارروائیوں کا نوٹس لیں۔ انہوں نے عالمی برادری پر زور دیا کہ وہ کشمیری عوام کو بھارتی جبر سے بچانے کے لیے تنازعہ کشمیر کو جلد از جلد حل کرنے میں اپنا کردار ادا کرے۔
دریں اثناء جموں و کشمیر ینگ مینز لیگ نے ایک بیان میں بھارتی فورسز اور ایجنسیوں کی طرف سے مقبوضہ جموں و کشمیر کے مختلف علاقوں میں چھاپوں اور تلاشی کارروائیوں کی مذمت کی۔ بیان میں ان کارروائیوں کو ہراساں کرنے اور اجتماعی سزا کے ہتھکنڈے قرار دیا گیا جن کا مقصد مقامی آبادی کو ڈرانا دھمکانا اور حق خودارادیت کے لیے جاری جدوجہد کو دبانا ہے۔
وزیراعظم شہباز شریف سے مسلم لیگ (ق) وفد کی ملاقات، 27ویں آئینی ترمیم پر مشاورت