میرواعظ مولوی محمد فاروق کی 35ویں برسی پر سرینگر میں خون کا عطیہ
اشاعت کی تاریخ: 19th, May 2025 GMT
کیمپ میں مختلف تعلیمی اداروں سے وابستہ طلبہ و طالبات کی خاصی تعداد کے علاوہ مختلف طبقہ ہائے فکر سے تعلق رکھنے والے افراد نے بھی شرکت کرکے سماجی ذمہ داری اور خدمت خلق کا مظاہرہ کیا۔ اسلام ٹائمز۔ جموں و کشمیر کے سرکردہ دینی اور سیاسی رہنما اور کشمیر کے سابق میرواعظ مولوی محمد فاروق کی 35ویں برسی کے موقع پر پیر کو سرینگر کی گنج بخش پارک، نوہٹہ میں بلڈ ڈونیشن کیمپ کا انعقاد عمل میں لایا گیا۔ یہ کیمپ میرواعظ فاؤنڈیشن اور نجی گروپ آف ہاسپٹلز کے باہمی اشتراک سے منعقد کیا گیا۔ بلڈ ڈونیشن کیمپ میں میں (موجودہ) میرواعظ کشمیر ڈاکٹر مولوی محمد عمر فاروق نے خون کا عطیہ پیش کیا، اور منتظمین کے مطابق کیمپ کے دوران تقریباً 150 پائنٹس خون کا عطیہ جمع کیا گیا جو عوامی صحت اور ایمرجنسی طبی خدمات کے دوران لوگوں کی جان بچانے کا کام آ سکتا ہے۔ کیمپ میں مختلف تعلیمی اداروں سے وابستہ طلبہ و طالبات کی خاصی تعداد کے علاوہ مختلف طبقہ ہائے فکر سے تعلق رکھنے والے افراد نے بھی شرکت کرکے سماجی ذمہ داری اور خدمت خلق کا مظاہرہ کیا۔
سابق میرواعظ کشمیر اور مولوی عمر فاروق کے والد مرحوم مولوی محمد فاروق کی 35ویں برسی کی نسبت سے تقریبات کا سلسلہ جاری ہے اور ہفتہ بھر رہنے والی ان تقاریب کا آغاز گزشتہ کل قرآن خوانی، دعائیہ مجلس اور مقابلہ حسن قرأت کی محفل سے کیا گیا۔ قابل ذکر ہے کہ مرحوم مولوی محمد فاروق میرواعظ خاندان کے چشم و چراغ تھے، جن کے اجداد نے کشمیر میں مذہبی تبلیغ، تعلیم کے فروغ اور سیاسی بیداری کے لئے قابل ستائش کام انجام دیا ہے۔ مولوی فاروق اُس وقت کشمیر کے مقبول سیاسی رہنما شیخ محمد عبداللہ کے حریف کے طور پر بھی یاد کئے جاتے ہیں۔ 1977ء کے انتخابات میں انہوں نے شیخ عبداللہ کو انتخابات میں شکست دینے کے لئے اُس وقت کے وزیراعظم اور جنتا پارٹی کے ساتھ سیاسی اتحاد کیا تاہم شیخ عبداللہ نے انتخابات میں جیت درج کی تھی۔
مولوی محمد فاروق کو 21 مئی 1990ء کو نامعلوم بندوق برداروں نے ان کی رہائش گاہ واقع نگین، سرینگر میں گولیاں برسا کر قتل کر دیا۔ مرحوم مولوی محمد فاروق حریت کانفرنس (م) کے موجودہ چیئرمین اور میر واعظ مولوی عمر فاروق کے والد ہیں۔ 21 مئی 1990ء کو میرواعظ مولوی محمد فاروق کے قتل کے بعد ان کے جنازے میں شریک 50 سے زائد سوگوار اُس وقت ہلاک کر دئے گئے تھے جب سینٹرل ریزرو پولیس فورس (سی آر پی ایف) نے مبینہ طور پر گوجوارہ کے مقام پر جلوس جنازہ پر گولیاں برسائیں۔ مرحوم میرواعظ مولوی محمد فاروق کو وادی کشمیر میں ’شہید ملت‘ کے لقب سے جانا جاتا ہے۔ مرحوم مولوی محمد فاروق نے ہمیشہ مذاکرات اور بات چیت کے ذریعے تنازعات کے حل کرنے کا طریقہ اپنایا کیونکہ ان کا ماننا تھا کہ مذاکرات کے راستے سے تعمیر و ترقی کے مواقع پیدا ہوتے ہیں اور امن و انصاف کی بالادستی یقینی بن جاتی ہے۔ اسی عمل سے نہ صرف جموں و کشمیر بلکہ پورے برصغیر میں امن و سلامتی کی راہیں استوار ہو سکتی ہیں۔
ذریعہ
ذریعہ: Islam Times
پڑھیں:
مہاجرین کی نشستوں کے مستقبل پر بڑا فیصلہ قریب، اہم پیش رفت سامنے آگئی
مظفرآباد: مہاجرین کی نشستیں آزاد جموں و کشمیر کی سیاست میں ایک بار پھر توجہ کا مرکز بن گئی ہیں، جہاں ان نشستوں کے مستقبل سے متعلق اہم پیش رفت سامنے آئی ہے۔ ذرائع کے مطابق وفاقی حکومت نے اس معاملے پر نرم رویہ اختیار کرتے ہوئے مکمل خاتمے کے بجائے نشستوں کی تعداد میں کمی کی تجویز پر غور شروع کر دیا ہے۔
ذرائع کا کہنا ہے کہ وادی کشمیر سے تعلق رکھنے والے مہاجرین کی چھ نشستیں کم کرنے کی ابتدائی تجویز زیر غور ہے۔ اس پیش رفت کو انتخابی اصلاحات کے حوالے سے ایک اہم قدم قرار دیا جا رہا ہے، جس سے طویل عرصے سے جاری سیاسی بحث کو کسی نتیجے تک پہنچانے میں مدد مل سکتی ہے۔
اطلاعات کے مطابق وفاقی حکومت جلد آزاد کشمیر کی قیادت کو اپنے مؤقف سے آگاہ کرے گی۔ اس سلسلے میں وزیراعظم آزاد کشمیر کی جانب سے جوائنٹ پبلک ایکشن کمیٹی سے رابطے کا بھی امکان ظاہر کیا جا رہا ہے تاکہ مختلف سیاسی اور سماجی حلقوں کو اعتماد میں لیا جا سکے۔
دوسری جانب آزاد کشمیر میں انتخابی اصلاحات کے موضوع پر کل ہونے والی آل پارٹیز کانفرنس بھی غیر معمولی اہمیت اختیار کر گئی ہے۔ سیاسی مبصرین کا کہنا ہے کہ مہاجرین کی نشستیں کم کرنے کی تجویز پر اتفاق رائے پیدا ہونے سے انتخابی نظام میں اصلاحات کی راہ ہموار ہو سکتی ہے۔
ذرائع کے مطابق اس معاملے پر مختلف سیاسی جماعتوں اور اسٹیک ہولڈرز کے درمیان مشاورت جاری ہے، جبکہ وفاقی حکومت بھی ایسا حل تلاش کرنے کی کوشش کر رہی ہے جو تمام فریقوں کے لیے قابل قبول ہو۔
سیاسی حلقوں کا ماننا ہے کہ اگر اس معاملے پر اتفاق رائے پیدا ہو جاتا ہے تو یہ آزاد کشمیر کی سیاسی تاریخ میں ایک اہم سنگ میل ثابت ہو سکتا ہے۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ