امریکہ مذاکرات میں سنجیدہ نہیں، سید عباس عراقچی
اشاعت کی تاریخ: 26th, November 2025 GMT
اپنے ایک انٹرویو میں ایرانی وزیر خارجہ کا کہنا تھا کہ ایران اور سعودی عرب کے درمیان گہرا اعتماد پایا جاتا ہے۔ اسلام ٹائمز۔ اسلامی جمہوریہ ایران کے وزیر خارجہ "سید عباس عراقچی" نے کہا کہ ہم ہمیشہ جوہری پروگرام پر مذاکرات کے لئے تیار ہیں۔ مگر مذاکرات میں اصل رکاوٹ امریکہ کا رویہ ہے۔ امریکی فریق ہی ہے جس نے حقیقی اور منصفانہ مذاکرات کے لیے کبھی سنجیدہ رویہ نہیں اپنایا۔ وہ مذاکرات کی بجائے ڈکٹیشن اور اپنی مرضی مسلط کرنا چاہتا ہے۔ سید عباس عراقچی نے ان خیالات کا اظہار فرانس24 کو انٹرویو دیتے ہوئے کیا۔ ماضی میں ریاض اور تہران کے درمیان کشیدگی کے باوجود، واشنگٹن_تہران کے درمیان ثالث کے طور پر سعودی عرب کے کردار کے بارے میں انہوں نے کہا کہ اب ایران اور سعودی عرب کے درمیان گہرا اعتماد پایا جاتا ہے۔ انہوں نے اس امر کی بھی یقین دہانی کروائی کہ ان کا امریکی صدر کے نمائندہ خصوصی "اسٹیو وٹکوف" یا سیکرٹری خارجہ "مارکو روبیو" سے حال ہی میں کوئی رابطہ نہیں ہوا۔ انہوں نے واضح کیا کہ جب تک امریکہ، حقیقی مذاکرات کے لیے تیار نہیں، ایران کو بھی كوئی جلدی نہیں۔
اس موقع پر انہوں نے جاسوسی کے الزام میں قید دو فرانسوی شہریوں "سیسل کوهلر" اور "جیک پیرس" کے بارے میں ایک سوال کے جواب میں اس بات کی تصدیق کی کہ مذکورہ قیدیوں کی حوالگی، تبادلے کے تناظر میں انجام پا رہی ہے۔ واضح رہے کہ دونوں مذکورہ قیدیوں کو حال ہی میں جیل سے رہا کیا گیا، لیکن یہ اب بھی ایران میں نظر بند ہیں۔ اسی سلسلے میں سید عباس عراقچی نے مزید کہا کہ مجھے امید ہے اور میرے خیال میں اگلے دو ماہ کے اندر عدالتی طریقہ کار کو مدنظر رکھتے ہوئے، یہ تبادلہ مکمل ہو جائے گا۔ ایران کی جانب سے سب کچھ تیار ہے اور تہران اب فرانس میں عدالتی عمل کے اختتام کا انتظار کر رہا ہے۔ اسی ضمن میں فرانس24 نے رپورٹ دی کہ ان شہریوں کے بدلے میں ایک ایرانی شہری "مہدیہ اسفندیاری" كو رہا کیا جائے گا جنہیں فرانس میں دہشت گردی کی تبلیغ کے الزام میں حراست میں لیا گیا۔ ان کی عدالتی سماعت جنوری کے وسط میں طے کی گئی ہے۔
ایرانی وزیر خارجہ نے مزید کہا کہ ایران رواں برس جون کے مہینے میں امریکہ و اسرائیل کے خلاف جنگ میں فاتح کے طور پر ابھرا۔ ایرانی جوہری تنصیبات پر دوبارہ اسرائیلی حملے کے ارادے کے بارے میں سید عباس عراقچی نے کہا کہ اگر آپ پہلے ہی ایک اقدام اٹھا چکے ہیں اور وہ ناکام ہو چکا ہے، تو عقل یہ کہتی ہے کہ اسے دُہرانے سے آپ دوبارہ صرف شکست کا ہی مزہ چکھیں گے۔
ذریعہ
ذریعہ: Islam Times
کلیدی لفظ: سید عباس عراقچی کے درمیان انہوں نے کہا کہ
پڑھیں:
فیصل آباد:حکومت سے مذاکرات ناکام ہونے پر پیٹرول پمپ مالکان کا پمپس بند رکھنے کا اعلان
اسلان درانی : فیصل آباد میں حکومت اور پٹرول پمپ مالکان کے درمیان مذاکرات کامیاب نہ ہو سکے، جس کے بعد پٹرول پمپ مالکان نے ہڑتال کا اعلان کر دیا, ہڑتال کے باعث شہر میں متعدد پٹرول پمپس پر پٹرول کی فراہمی معطل ہو گئی، جس سے شہریوں کو ایندھن کے حصول میں شدید مشکلات کا سامنا ہے۔
اطلاعات کے مطابق پاکستان اسٹیٹ آئل (PSO) اور گو (GO) کے چند پمپس کے علاوہ بیشتر مقامات پر پٹرول دستیاب نہیں، جبکہ کھلے پمپس پر بھی گاڑیوں کی لمبی قطاریں دیکھی جا رہی ہیں۔ شہریوں کا کہنا ہے کہ پٹرول تک رسائی ان کے لیے ایک بڑا چیلنج بن چکی ہے۔
پاکستان کے ماحولیاتی نمونوں میں پولیو وائرس کی مثبت شرح میں کمی آگئی
شہریوں نے شکایت کی کہ پٹرول پہلے ہی مہنگا ہو چکا ہے اور اب اس کی عدم دستیابی نے مشکلات میں مزید اضافہ کر دیا ہے۔ بعض شہریوں کا کہنا ہے کہ پٹرول پمپ مالکان سپلائی میں تعطل کو جواز بنا رہے ہیں، جس سے عام صارفین متاثر ہو رہے ہیں۔
شہریوں نے حکومت سے مطالبہ کیا ہے کہ عوامی مفاد کو مدنظر رکھتے ہوئے فوری اقدامات کیے جائیں، پٹرول کی بلا تعطل فراہمی یقینی بنائی جائے اور حکومت و پٹرول پمپ مالکان کے درمیان پیدا ہونے والے تنازع کو جلد از جلد حل کیا جائے تاکہ معمولاتِ زندگی متاثر نہ ہوں۔
جعلی امیدواروں کی شامت، پی پی ایس سی امتحانات میں بائیو میٹرک نظام نافذ
متنازع ٹوئٹس کیس: ایمان مزاری، ہادی چٹھہ کی اپیل کی سماعت کل ہوگی