خلا کی گہرائیوں میں ستاروں کی نرسری، ناسا نے دلکش تصویر جاری کردی
اشاعت کی تاریخ: 4th, February 2026 GMT
data-id="863a0a8" data-element_type="widget" data-e-type="widget" data-widget_type="theme-post-content.default">
امریکی خلائی ادارے ناسا نے خلا کی وسعتوں میں موجود ایک حیرت انگیز ’ستاروں کی نرسری‘ کی نئی تصویر جاری کی ہے، جس نے سائنس دانوں اور خلائی تحقیق سے دلچسپی رکھنے والوں کو مسحور کر دیا ہے۔
یہ دلچسپ اور خوبصورت تصویر ایک ایسے خطے کو ظاہر کرتی ہے جہاں نئے ستارے جنم لے رہے ہیں اور کائنات میں زندگی کے ابتدائی مراحل کو دیکھا جا سکتا ہے۔
یہ خوبصورت اور پراسرار منظر لُوپس 3 نامی ستارہ ساز بادل کا ہے، جو زمین سے سیکڑوں نوری سال کے فاصلے پر واقع ہے۔ ناسا کے مطابق یہ بادل تقریباً 500 نوری سال دور اسکارپیئس نامی جھرمٹ میں موجود ہے، جہاں گیس اور گرد کے گھنے بادل ستاروں کی تخلیق کے عمل میں مصروف ہیں۔
اس تصویر کو ناسا کی مشہور ہبل اسپیس ٹیلی اسکوپ نے محفوظ کیا ہے، جو گزشتہ کئی دہائیوں سے خلا کی باریک ترین تفصیلات زمین تک پہنچا رہی ہے۔ تصویر میں بادلوں کے اندر روشنی اور سائے کا امتزاج دیکھا جا سکتا ہے، جو نئے بننے والے ستاروں کے ابتدائی لمحات کی عکاسی کرتا ہے۔
ناسا سے وابستہ سائنس دان مونیکا لاؤبیا کے مطابق اگرچہ یہ تصویر پہلی نظر میں خوفناک یا ڈراؤنی محسوس ہو سکتی ہے، تاہم حقیقت میں یہ نئی کائناتی زندگی سے بھرپور ہے۔ انہوں نے کہا کہ ایسے ستارہ ساز بادل دراصل کائنات کے وہ علاقے ہیں جہاں مستقبل کے ستارے اور ممکنہ سیارے تشکیل پاتے ہیں۔
تصویر میں ٹی ٹاؤری ستارے بھی نمایاں ہیں، جو انتہائی کم عمر ستارے ہوتے ہیں اور اپنی ابتدائی نشوونما کے مراحل میں ہوتے ہیں۔ یہ ستارے اپنی تیز روشنی اور سرگرمی کے باعث آس پاس کے بادلوں کو روشن کر دیتے ہیں، جس سے یہ منظر مزید دلکش بن جاتا ہے۔
ماہرین کے مطابق لُوپس 3 جیسے ستارہ ساز بادل کائنات کو سمجھنے میں کلیدی کردار ادا کرتے ہیں کیوں کہ یہ ہمیں یہ جاننے میں مدد دیتے ہیں کہ ستارے اور نظامِ شمسی کس طرح وجود میں آتے ہیں۔ ناسا کی جانب سے جاری کی گئی یہ تصویر ایک بار پھر اس بات کی یاد دہانی ہے کہ کائنات مسلسل تخلیق کے عمل میں مصروف ہے۔
.
ذریعہ
ذریعہ: Jasarat News
پڑھیں:
خبردار اپنی سمز کسی اور کو نہ دیں۔۔۔ پی ٹی اے نے اہم ہدایات جاری کردیں۔
پاکستان ٹیلی کمیونیکیشن اتھارٹی (پی ٹی اے) نے موبائل فون صارفین کو سمز کے غیر قانونی استعمال اور فراڈ سے بچنے کے لیے اہم ہدایات جاری کرتے ہوئے خبردار کیا ہے کہ اپنی سم کسی دوسرے شخص کو دینا قابلِ سزا جرم ہے، کیونکہ آپ کے نام پر رجسٹرڈ سم کسی بھی غیر قانونی سرگرمی میں استعمال ہو سکتی ہے، جس کی قانونی ذمہ داری بھی سم ہولڈر پر عائد ہو سکتی ہے۔پی ٹی اے کی جانب سے جاری کردہ آگاہی پیغام میں کہا گیا ہے کہ تمام صارفین اپنی رجسٹرڈ سمز کی تعداد کی باقاعدگی سے جانچ کریں تاکہ کسی بھی غیر مجاز یا غیر ضروری سم کی بروقت نشاندہی کرکے اسے بلاک کرایا جا سکے۔ اس مقصد کے لیے صارفین cnic.sims.pk پر جا کر یا اپنا 13 ہندسوں پر مشتمل شناختی کارڈ نمبر بغیر ڈیش کے 668 پر ایس ایم ایس کرکے اپنے نام پر رجسٹرڈ سمز کی تفصیلات حاصل کر سکتے ہیں۔اتھارٹی نے ہدایت کی کہ اگر کسی صارف کے نام پر ایسی سم رجسٹرڈ ہو جس کے بارے میں وہ لاعلم ہو یا جس کی ضرورت نہ ہو تو اسے فوری طور پر متعلقہ موبائل کمپنی سے رابطہ کرکے بند کرایا جائے تاکہ کسی بھی ممکنہ دھوکا دہی یا غیر قانونی استعمال سے بچا جا سکے۔پی ٹی اے نے مزید کہا کہ نئی سم ہمیشہ متعلقہ موبائل کمپنی کی مستند فرنچائز یا کسٹمر سروس سینٹر سے ہی حاصل کی جائے اور بائیو میٹرک تصدیق کے عمل کے دوران مکمل احتیاط برتی جائے۔ صارفین اس بات کو یقینی بنائیں کہ ان کی اجازت اور علم کے بغیر ان کے شناختی کارڈ پر کوئی نئی سم رجسٹرڈ نہ کی جائے۔اتھارٹی نے ایک بار پھر عوام کو متنبہ کیا کہ "مفت سم" یا دیگر پرکشش پیشکشوں کے لالچ میں اپنی بائیو میٹرک تصدیق ہرگز نہ کرائیں، کیونکہ دھوکے باز عناصر اس عمل کے ذریعے آپ کے نام پر اضافی سمز جاری کرا سکتے ہیں، جو بعد ازاں جرائم یا فراڈ میں استعمال ہو سکتی ہیں۔پی ٹی اے نے شہریوں پر زور دیا کہ وہ اپنی ذاتی معلومات، شناختی دستاویزات اور بائیو میٹرک ڈیٹا کی حفاظت کو یقینی بنائیں اور کسی بھی مشتبہ سرگرمی کی صورت میں فوری طور پر متعلقہ موبائل آپریٹر یا پی ٹی اے سے رابطہ کریں تاکہ محفوظ اور ذمہ دارانہ موبائل استعمال کو فروغ دیا جا سکے۔
بھارت سے جنگ اور افغانستان میں کارروائی خارج ازامکان نہیں، وزیردفاع