چین میں جاپانی نیوکلیئر اہلکار کا موبائل گم ہوگیا، حساس معلومات لیک ہونے کا خدشہ
اشاعت کی تاریخ: 8th, January 2026 GMT
جاپان کے نیوکلیئر ریگولیٹری ادارے کے ایک اہلکار سے چین میں ممکنہ طور پر ایک اسمارٹ فون گم ہو گیا ہے، جس میں حساس نوعیت کی سرکاری رابطہ معلومات موجود تھیں۔
جاپانی حکام اور مقامی میڈیا کے مطابق یہ واقعہ نومبر میں پیش آیا، تاہم اس کا انکشاف حالیہ دنوں میں کیا گیا۔
نیوکلیئر ریگولیشن اتھارٹی (NRA) کے ایک عہدیدار نے بتایا کہ گم ہونے والا فون سرکاری استعمال کے لیے دیا گیا تھا اور اسے قدرتی آفات، جیسے بڑے زلزلوں کے دوران رابطے کے لیے استعمال کیا جاتا تھا۔
اہلکار کے مطابق فون میں نیوکلیئر ڈیٹا تک رسائی موجود نہیں تھی، تاہم اس میں ادارے کے نیوکلیئر سکیورٹی ڈویژن کے عملے کے نام اور رابطہ نمبرز محفوظ تھے۔
جاپانی میڈیا رپورٹس کے مطابق یہ فون ممکنہ طور پر شنگھائی کے ہوائی اڈے پر سیکیورٹی چیک کے دوران گم ہوا، جب اہلکار اپنے کیری آن بیگ سے سامان نکال رہا تھا۔
فون کے گم ہونے کا علم تین دن بعد ہوا، لیکن اسے تلاش نہیں کیا جا سکا۔ مزید یہ کہ فون رینج سے باہر ہونے کے باعث اسے ریموٹ طریقے سے لاک یا ڈیٹا ڈیلیٹ بھی نہیں کیا جا سکا۔
یہ معاملہ ایسے وقت سامنے آیا ہے جب چین اور جاپان کے تعلقات میں تناؤ پایا جاتا ہے، خاص طور پر جاپانی وزیر اعظم کے حالیہ بیان کے بعد جس میں تائیوان سے متعلق ممکنہ فوجی ردعمل کا ذکر کیا گیا تھا۔
ادھر جاپان توانائی بحران اور کاربن نیوٹرل اہداف کے تحت نیوکلیئر پاور کی بحالی پر غور کر رہا ہے۔ نیوکلیئر ریگولیشن اتھارٹی اس وقت ٹوکیو الیکٹرک پاور کمپنی (TEPCO) کی اس درخواست کا جائزہ لے رہی ہے، جس کے تحت دنیا کے سب سے بڑے نیوکلیئر پاور پلانٹ کو دوبارہ فعال کرنے کا منصوبہ ہے۔
.
ذریعہ
ذریعہ: Daily Mumtaz
پڑھیں:
موبائل کال اور انٹرنیٹ پیکجز مہنگے، صارفین پر نیا مالی بوجھ
اسلام آباد: موبائل انٹرنیٹ پیکجز مہنگے ہونے سے ملک بھر کے لاکھوں موبائل صارفین کو اضافی اخراجات کا سامنا کرنا پڑے گا۔ پاکستان ٹیلی کمیونیکیشن اتھارٹی (پی ٹی اے) کی جانب سے جاری کردہ تازہ تفصیلات کے مطابق مختلف موبائل کمپنیوں کے متعدد کال، ہائبرڈ اور ڈیٹا پیکجز کی قیمتوں میں نمایاں اضافہ کیا گیا ہے۔
پی ٹی اے کے مطابق مختلف موبائل آپریٹرز کے 15 مقبول ہائبرڈ اور ڈیٹا اونلی پیکجز کی قیمتوں میں 33 فیصد تک اضافہ ریکارڈ کیا گیا ہے، جس کے بعد صارفین کو پہلے کے مقابلے میں زیادہ رقم ادا کرنا ہوگی۔
جاری کردہ اعداد و شمار کے مطابق ماہانہ کال اور ڈیٹا پیکجز کی قیمتوں میں 500 روپے تک اضافہ کیا گیا ہے، جبکہ 15 روزہ پیکجز اب 300 روپے تک مہنگے ہو گئے ہیں۔
اسی طرح ہفتہ وار ہائبرڈ پیکجز کی قیمت میں 130 روپے تک اضافہ کیا گیا ہے، جبکہ تین روزہ پیکجز 21 روپے، دو روزہ پیکجز 20 روپے اور ایک روزہ ہائبرڈ پیکجز 5 روپے تک مہنگے کر دیے گئے ہیں۔
پی ٹی اے کا کہنا ہے کہ صارفین کی سہولت کے لیے تمام نئی ٹیرف تفصیلات ادارے کی ویب سائٹ پر جاری کر دی گئی ہیں، جہاں مختلف موبائل کمپنیوں کے کال اور انٹرنیٹ پیکجز، ان کی مدت، قیمت اور دستیاب سہولیات کا بآسانی موازنہ کیا جا سکتا ہے۔
اتھارٹی کے مطابق اس اقدام کا مقصد ٹیلی کام شعبے میں شفافیت کو فروغ دینا اور صارفین کو مختلف موبائل کمپنیوں کے پیکجز سے متعلق درست اور مکمل معلومات فراہم کرنا ہے۔
ماہرین کا کہنا ہے کہ موبائل اور انٹرنیٹ خدمات کی قیمتوں میں اضافے سے طلبہ، فری لانسرز، آن لائن کاروبار کرنے والے افراد اور روزمرہ انٹرنیٹ استعمال کرنے والے صارفین کے ماہانہ اخراجات میں مزید اضافہ ہوگا۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار