8 فروری کے انتخابات پر جے یو آئی کا احتجاج، مولانا فضل الرحمان کا راولپنڈی میں جلسہ عام کا اعلان
اشاعت کی تاریخ: 26th, January 2026 GMT
اسلام آباد(نیوز ڈیسک) 8 فروری 2024 کے عام انتخابات کو دو سال مکمل ہونے پر جمعیت علمائے اسلام (جے یو آئی) نے مبینہ دھاندلی کے خلاف جلسہ عام منعقد کرنے کا فیصلہ کر لیا ہے۔ جے یو آئی کے سربراہ مولانا فضل الرحمان نے 8 فروری کو راولپنڈی میں جلسہ عام کے انعقاد کا اعلان کرتے ہوئے پارٹی کارکنوں کو بھرپور تیاریوں کی ہدایت جاری کر دی ہے۔
مولانا فضل الرحمان کی جانب سے جے یو آئی راولپنڈی اور اسلام آباد کی تنظیموں کو جلسے کے انتظامات فوری طور پر شروع کرنے کی ہدایت کی گئی ہے۔ پارٹی ذرائع کے مطابق جلسے میں انتخابی دھاندلی کے خلاف احتجاج کیا جائے گا اور عوام کو پارٹی مؤقف سے آگاہ کیا جائے گا۔
جے یو آئی قیادت کا کہنا ہے کہ 8 فروری 2024 کے انتخابات میں عوامی مینڈیٹ کو متاثر کیا گیا، جس کے خلاف سیاسی اور جمہوری جدوجہد جاری رکھی جائے گی۔ جلسہ عام میں پارٹی رہنما انتخابات میں شفافیت، جمہوریت کے تحفظ اور عوامی حقِ رائے دہی کے احترام پر زور دیں گے۔
پارٹی ذرائع کے مطابق راولپنڈی جلسہ عام کو سیاسی لحاظ سے اہم قرار دیا جا رہا ہے، جس میں صوبہ پنجاب اور وفاقی دارالحکومت سے بڑی تعداد میں کارکنوں کی شرکت متوقع ہے۔
.
ذریعہ
ذریعہ: Daily Mumtaz
کلیدی لفظ: جے یو آئی
پڑھیں:
اسلام آباد میں مارکیٹوں اور دکانوں کے اوقات کار میں توسیع کی منظوری
دارالحکومت اسلام آباد میں مارکیٹوں اور دکانوں کے اوقات کار میں توسیع کی منظوری دے دی گئی۔
نائب وزیراعظم و وزیر خارجہ اسحاق ڈارکی زیر صدارت کفایت شعاری اقدامات کی نگرانی و عملدرآمد کمیٹی کا اجلاس ہوا، جس میں مارکیٹوں اور دکانوں کے اوقات کار میں توسیع کی منظوری دی گئی۔
اعلامیہ کے مطابق دکانیں، مارکیٹیں، شاپنگ مالز اور جنرل ریٹیل رات 9 بجے تک کھلے رہ سکیں گے جبکہ ریسٹورنٹس رات 11 بجے تک کھلے رہیں گے، ٹیک اوے اور ڈلیوری سروسز مستثنیٰ ہوں گی۔
اعلامیہ کے مطابق شادی ہالز اور تقریباتی مقامات کے اوقات رات 10 بجے تک برقرار رکھنے کا فیصلہ کیا گیا ہے۔
اعلامیہ کے مطابق فارمیسی، اسپتال، پیٹرول پمپس، آئی ٹی اور ٹیلی کام سے متعلق ضروری خدمات اوقات کار کی پابندی سے مستثنیٰ ہوں گی۔
صوبائی حکومتوں کو وفاقی اداروں کے تعاون سے نئے اوقات کار پر مؤثر عملدرآمد یقینی بنانے کی ہدایت کی گئی ہے۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ