ارجنٹینا: گہرے سمندر میں نایاب دریافت، اسکول بس کے سائز کی جیلی فِش نمودار
اشاعت کی تاریخ: 4th, February 2026 GMT
سائنس دانوں نے ایک نایاب گہرے سمندری مشن کے دوران ارجنٹینا کے ساحل کے قریب انتہائی بڑی جسامت کی فینٹم جیلی فِش دریافت کی ہے جس کا سائز ایک اسکول بس کے برابر بتایا جا رہا ہے۔
یہ بھی پڑھیں: کہکشانی مہمان، انوکھے سمندری جاندار، جنگلی کیٹرپلر اور یورپ کی آگ
یہ شاندار منظر شمٹ اوشن انسٹیٹیوٹ کے محققین نے ایک ریموٹ کنٹرولڈ آبدوز کی مدد سے ریکارڈ کیا۔ ویڈیو میں نایاب دیوہیکل فینٹم جیلی فِش کو تقریباً 820 فٹ گہرائی میں تیرتے ہوئے دیکھا جا سکتا ہے۔
ماہرین کے مطابق یہ جیلی فِش لمبائی میں ایک اسکول بس جتنی ہو سکتی ہے جبکہ اس کے 4 بازو 30 فٹ سے زائد لمبے ہیں۔ اس کی گھنٹی (بالائی گول اور چھتری نما حصہ) کا قطر ایک میٹر تک ہے۔
اس دریافت پر ردِعمل دیتے ہوئے مشن کی سربراہ سائنس دان ماریہ ایمیلیا براوو نے کہا کہ انہیں ارجنٹینا کے گہرے سمندر میں اس قدر حیاتیاتی تنوع دیکھنے کی توقع نہیں تھی اور یہ دیکھ کر خوشی ہوئی کہ یہ علاقہ زندگی سے بھرپور ہے۔
مزید پڑھیے: دنیا کی سب سے مہنگی مچھلی کا ریکارڈ، جاپان میں بلیو فِن ٹونا 92 کروڑ روپے میں فروخت
محققین کی ٹیم نے بیونس آئرس سے لے کر جنوب میں تیئرا ڈیل فیوگو تک ارجنٹینا کے ساحلی علاقوں میں تحقیق کے دوران دیگر اہم دریافتیں بھی کیں۔
ان میں جنوب مغربی بحر اوقیانوس میں دنیا کی سب سے بڑی مرجانی چٹان شامل ہے جو جھینگوں، مچھلیوں اور آکٹوپس کے لیے اہم مسکن فراہم کرتی ہے۔
اس کے علاوہ، ٹیم نے ملک میں پہلی بار گہرے پانی میں وہیل فال (مردہ وہیل کا مسکن بن جانا) اور 28 نئی حیوانی اقسام بھی دریافت کیں۔
ماریہ ایمیلیا کے مطابق اتنے وسیع حیاتیاتی تنوع، ماحولیاتی نظام کے افعال اور ان کے باہمی تعلقات کو ایک ساتھ دیکھنا ناقابلِ یقین تھا۔ انہوں نے کہا کہ ہم نے اپنے ملک کی حیاتیاتی دولت کی ایک کھڑکی کھولی، مگر ابھی بہت سی کھڑکیاں باقی ہیں۔
مزید پڑھیں: برازیل کی شارک مچھلیاں بھی کوکین کی شوقین
شمٹ اوشن انسٹیٹیوٹ کی ایگزیکٹو ڈائریکٹر جیوٹیکا ورمانی نے کہا کہ ہر گہرے سمندری مشن کے ساتھ یہ حقیقت سامنے آ رہی ہے کہ سمندر زندگی سے بھرپور ہے جتنا ہم خشکی پر دیکھتے ہیں بلکہ شاید اس سے بھی زیادہ کیونکہ زمین پر موجود 98 فیصد قابلِ رہائش جگہ سمندر پر مشتمل ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
.
ذریعہ
ذریعہ: WE News
کلیدی لفظ: گہرے سمندر جیلی ف ش
پڑھیں:
لاہور میں موسلا دھار بارش، سڑکیں زیر آب، معمولات زندگی متاثر
لاہور میں مون سون کی شدید بارشوں نے معمولات زندگی متاثر کر دیے، کئی علاقوں میں سڑکیں، چوراہے اور انڈر پاسز پانی میں ڈوب گئے جبکہ ٹریفک کی روانی شدید متاثر ہوئی۔ محکمہ موسمیات کے مطابق گزشتہ 48 گھنٹوں کے دوران شہر میں 343 ملی میٹر بارش ریکارڈ کی گئی، جس کے باعث متعدد نشیبی علاقوں میں پانی جمع ہوگیا۔
لاہور کے مختلف علاقوں میں بارش کا پانی جمع ہونے سے شہریوں کو آمدورفت میں مشکلات کا سامنا کرنا پڑا۔ بعض سڑکوں اور گلیوں میں 3 سے 4 فٹ تک پانی کھڑا رہا، جبکہ کئی مقامات پر گاڑیوں کی لمبی قطاریں لگ گئیں۔
یہ بھی پڑھیں: لاہور میں بارش کے بعد کئی علاقے زیر آب، ’اب آفس جانےکے لیے کشتی کی ضرورت ہوگی‘
ڈیفنس کے فیز ون سے فیز فائیو تک مختلف مقامات پر پانی جمع ہونے سے ٹریفک متاثر ہوئی، جبکہ غازی انڈر پاس اور مسجد چوک انڈر پاس کو پانی بھرنے کے باعث بند کرنا پڑا اور ٹریفک کو متبادل راستوں پر منتقل کیا گیا۔
حربنس پورہ، مال روڈ، کوپر روڈ، لکشمی چوک اور چوبرجی چوک سمیت متعدد علاقوں میں بھی پانی جمع ہونے کی اطلاعات ملیں، جہاں واسا کی ٹیمیں نکاسی آب میں مصروف رہیں۔
شدید بارش کے باعث شہر کی کئی سڑکوں پر گڑھے بھی پڑ گئے۔ کینال روڈ، جوہر ٹاؤن مین بلیوارڈ اور بھیکے والا موڑ سمیت مختلف مقامات پر سڑکیں متاثر ہوئیں، جس کے بعد ٹریفک پولیس نے متاثرہ علاقوں کو بند کرکے متبادل راستے فراہم کیے۔
یہ بھی پڑھیں: مون سون سیزن: لاہور سے ایک گھنٹے میں بارش کا پانی نکالنا ہدف ہے، ڈی ایم ڈی واسا
صوبائی ڈیزاسٹر مینجمنٹ اتھارٹی کے مطابق پنجاب میں حالیہ مون سون بارشوں کے دوران مختلف حادثات میں اب تک 21 افراد جاں بحق اور 154 زخمی ہو چکے ہیں۔ جاں بحق ہونے والوں میں 15 افراد مکانات گرنے، 2 آسمانی بجلی گرنے، 3 کرنٹ لگنے جبکہ ایک شخص ڈوبنے سے جاں بحق ہوا۔
واسا لاہور کے مطابق شہر میں ہنگامی بنیادوں پر نکاسی آب کا عمل جاری ہے، تمام ڈسپوزل اسٹیشن مکمل استعداد کے ساتھ کام کر رہے ہیں جبکہ متاثرہ مقامات پر اضافی مشینری اور عملہ تعینات کیا گیا ہے۔
ضلعی انتظامیہ اور واسا نے شہریوں کو غیر ضروری سفر سے گریز کرنے، نشیبی علاقوں اور بجلی کے کھمبوں سے دور رہنے کی ہدایت کی ہے۔ شہریوں نے تاہم ہر سال بارشوں کے دوران پانی جمع ہونے کے مسئلے پر تشویش کا اظہار کرتے ہوئے نکاسی آب کے نظام کو بہتر بنانے کا مطالبہ کیا ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news بارش پانی زیر آب لاہور
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار