کرن جوہر یوٹیوبر کیری مناٹی کو عدالت لے گئے، وجہ کیا بنی؟
اشاعت کی تاریخ: 12th, February 2026 GMT
معروف فلم ساز کرن جوہر نے مشہور یوٹیوبر اجے نگر المعروف کیری مناٹی کے خلاف ہتکِ عزت اور توہین آمیز مواد کی اشاعت پر قانونی کارروائی کرتے ہوئے عدالت سے رجوع کر لیا جس پر ممبئی کی مقامی عدالت نے عبوری حکم جاری کرتے ہوئے یوٹیوبر کو متعلقہ مواد ہٹانے کی ہدایت دے دی۔
جج نے اپنے حکم میں کہا کہ بادی النظر میں مدعا علیہان (اجے نگر اور ان کے منیجر دیپک چر) کی جانب سے مدعی کے خلاف ہتک آمیز بیانات اور نامناسب زبان استعمال کی گئی ہے۔ عدالت نے عبوری حکمِ امتناعی جاری کرتے ہوئے نگر کو ہدایت کی کہ وہ ایسا کوئی بھی مواد فوری طور پر ہٹا دیں جو کرن جوہر کو نشانہ بناتا ہو۔
یہ بھی پڑھیں: فلم سَیّارا کی کامیابی پر ’کرن جوہر‘ انتہائی جذباتی کیوں ہوئے؟
اس مقدمے میں اجے نگر ان کے منیجر دیپک چر، ون ہینڈ کلاپ میڈیا پرائیویٹ لمیٹڈ، گوگل اور میٹا کو فریق بنایا گیا ہے۔ اگرچہ نگر کے وکیل نے مؤقف اختیار کیا کہ متنازع ویڈیو پہلے ہی حذف کی جا چکی ہے اور مزید عدالتی کارروائی کی ضرورت نہیں تاہم عدالت نے قرار دیا کہ ابتدائی طور پر مواد ہتک آمیز دکھائی دیتا ہے اس لیے عبوری ریلیف دیا جاتا ہے۔ عدالت نے یہ بھی واضح کیا کہ اسے معاملے کی مکمل سماعت کا دائرہ اختیار حاصل نہیں۔
تنازع کی بنیاد یوٹیوب پر نشر ہونے والی ایک روسٹ ویڈیو ’کافی ود جلن‘ بنی جسے کرن جوہر کے مقبول ٹی وی شو ’کافی ود کرن‘ سے مشابہ قرار دیا گیا۔ کرن جوہر کی قانونی ٹیم کے مطابق ویڈیو میں نہ صرف ان کا تمسخر اڑایا گیا بلکہ بالی وڈ میں اقربا پروری جیسے موضوعات پر گفتگو کے دوران ان کے خلاف توہین آمیز اور ناشائستہ زبان استعمال کی گئی۔
یہ بھی پڑھیں: ارب پتی مکیش امبانی نے کرن جوہر کی دھرما پروڈکشن کمپنی خرید لی؟
کرن جوہر کی جانب سے پیش ہونے والے وکلا نے عدالت میں مؤقف اپنایا کہ مدعی نے دہائیوں کی محنت سے اپنی ساکھ اور نیک نامی قائم کی ہے جبکہ سوشل میڈیا پر گردش کرنے والا مواد ان کی شہرت کو نقصان پہنچا رہا ہے۔
قانونی ٹیم نے یہ بھی مؤقف اختیار کیا کہ اگرچہ اصل ویڈیو حذف کر دی گئی ہے تاہم اس کے کلپس اب بھی مختلف پلیٹ فارمز پر موجود ہیں جس سے مدعی کی ساکھ متاثر ہوئی ہے۔
واضح رہے کہ کیری مناٹی بھارت کے مقبول ترین یوٹیوبرز میں شمار ہوتے ہیں اور ان کے سبسکرائبرز کی تعداد 45 ملین سے زائد ہے۔ انہوں نے اپنے کیریئر کا آغاز گیمنگ مواد سے کیا تھا بعد ازاں وہ سوشل اور تفریحی موضوعات پر تبصراتی اور روسٹ ویڈیوز بنانے لگے جنہوں نے انہیں غیر معمولی شہرت دلائی۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
انڈیا بالی ووڈ کافی ود جلن کافی ود کرن.
ذریعہ
ذریعہ: WE News
کلیدی لفظ: انڈیا بالی ووڈ کافی ود جلن کافی ود کرن کرن جوہر عدالت نے کافی ود یہ بھی
پڑھیں:
مستونگ میں سیشن جج عبدالحکیم کاکڑ فائرنگ میں شہید، گن مین بھی جاں بحق
بلوچستان کے ضلع مستونگ میں قومی شاہراہ پر نامعلوم مسلح افراد کی فائرنگ کے نتیجے میں سیشن جج عبدالحکیم کاکڑ اور ان کے گن مین شہید ہوگئے، جبکہ ایڈیشنل سیشن جج طارق لاشاری سمیت دو افراد شدید زخمی ہو گئے۔ واقعے کے بعد قانون نافذ کرنے والے اداروں نے علاقے کو گھیرے میں لے کر حملہ آوروں کی تلاش اور تحقیقات کا آغاز کر دیا ہے۔
ڈپٹی کمشنر مستونگ بہرام سلیم کے مطابق سیشن جج عبدالحکیم کاکڑ کوئٹہ سے مستونگ جا رہے تھے کہ قومی شاہراہ پر نامعلوم مسلح افراد نے ان کی گاڑی پر اندھا دھند فائرنگ کر دی۔ حملے کے نتیجے میں سیشن جج اور ان کے گن مین موقع پر ہی شہید ہوگئے، جبکہ گاڑی میں سوار ایڈیشنل سیشن جج طارق لاشاری سمیت دو افراد شدید زخمی ہوئے۔
واقعے کے فوری بعد شہداء اور زخمیوں کو قریبی اسپتال منتقل کیا گیا، جہاں زخمیوں کو طبی امداد فراہم کی جا رہی ہے۔ سکیورٹی فورسز نے جائے وقوعہ کو گھیرے میں لے کر شواہد اکٹھے کیے اور حملہ آوروں کی گرفتاری کے لیے سرچ آپریشن شروع کر دیا ہے۔
دوسری جانب بلوچستان بار کونسل نے حملے کو نظامِ انصاف پر دہشت گردانہ حملہ قرار دیتے ہوئے شدید مذمت کی ہے۔ بار کونسل نے واقعے کے خلاف صوبہ بھر میں دو روزہ عدالتی ہڑتال اور تین روزہ سوگ کا اعلان کیا ہے۔ اعلامیے میں ججز، وکلا اور شہریوں کی سکیورٹی یقینی بنانے، حملے میں ملوث عناصر کی فوری گرفتاری اور انہیں قانون کے مطابق سزا دینے کا مطالبہ بھی کیا گیا۔
وزیراعلیٰ بلوچستان میر سرفراز بگٹی اور صوبائی وزیر داخلہ میر ضیاء اللہ لانگو نے بھی واقعے کی سخت الفاظ میں مذمت کرتے ہوئے شہداء کے اہل خانہ سے اظہار تعزیت کیا۔ انہوں نے متعلقہ اداروں کو حملہ آوروں کی فوری گرفتاری اور واقعے کی جامع تحقیقات کی ہدایت دیتے ہوئے کہا کہ ذمہ دار عناصر کو قانون کی گرفت سے نہیں بچنے دیا جائے گا۔
گلوبل سمٹ میں چینی روبوٹ کو اپنا بتانے والی بھارتی یونیورسٹی کا اسٹال بند، شدید تنقید کا سامنا