علی امین اور بیرسٹر گوہر کی آرمی چیف سے علیحدگی میں ملاقات نہیں ہوئی، وزیر اطلاعات عطااللہ تارڑ
اشاعت کی تاریخ: 20th, January 2025 GMT
وفاقی وزیر اطلاعات و نشریات عطااللہ تارڑ نے کہا ہے کہ علی امین گنڈاپور اور بیرسٹر گوہر کی آرمی چیف سے علیحدگی میں کوئی ملاقات نہیں ہوئی۔
’وی نیوز‘ کو انٹرویو دیتے ہوئے عطااللہ تارڑ نے کہاکہ خیبرپختونخوا میں امن و امان کے حوالے سے پشاور میں ایک میٹنگ تھی، جس میں صوبے کے تمام سیاسی قائدین موجود تھے۔ میٹنگ کے بعد علی امین گنڈاپور اور بیرسٹر گوہر نے جنرل عاصم منیر سے کہاکہ ہم نے کوئی بات کرنی ہے جس پر آرمی چیف نے جواب دیا کہ سیاسی باتیں سیاستدانوں سے کریں۔
یہ بھی پڑھیں پی ٹی آئی کے مطالبات پر جواب تیار کرنے میں ایک ہفتے سے زیادہ وقت لگ سکتا ہے، عرفان صدیقی
’9 مئی اور 26 نومبر پر جوڈیشل کمیشن بنانے کا مطالبہ تسلیم نہیں کریں گے‘
وزیر اطلاعات نے کہاکہ پی ٹی آئی نے 9 مئی اور 26 نومبر پر جوڈیشل کمیشن بنانے کا جو مطالبہ کیا ہے یہ ہم تسلیم نہیں کریں گے، کیونکہ اب ٹرائل کورٹس سے ملزمان کو سزائیں ہوچکی ہیں اس لیے جوڈیشل کمیشن کا قیام ممکن نہیں رہا۔
انہوں نے کہاکہ ہم تحریک انصاف کی مذاکراتی کمیٹی کو اس حوالے سے سمجھائیں گے کہ کمیشن نہیں بن سکتا۔ دیکھ لیں یہ مذاکرات کسی کو این آر او دینے کے لیے تو نہیں ہورہے۔
عطااللہ تارڑ نے کہاکہ بشریٰ بی بی کو اب 190 ملین پاؤنڈ کیس میں سزا ہوچکی ہے، ان سے کسی کے کوئی مذاکرات نہیں ہورہے۔ 26 نومبر کو ڈی چوک جانے کا فیصلہ بشریٰ بی بی کا ہی تھا، علی امین گنڈاپور ان کو روکتے رہے لیکن ان کی بات نہیں سنی گئی۔
انہوں نے کہاکہ تحریک انصاف کے لوگ کیمرے کے سامنے کچھ اور جبکہ کیمرے کے پیچھے بہت اچھے ہوتے ہیں۔ علی امین گنڈاپور کیمرے کے پیچھے وزیراعظم شہباز شریف اور وزیر داخلہ محسن نقوی سے بڑے ادب سے ملتے ہیں۔
عطا تارڑ نے کہاکہ آج میں اپنے حلقے میں گیا اور وہاں لوگوں سے پوچھا کہ عمران خان نے کتنے کا ڈاکا مارا ہے تو سب نے یک زبان ہوکر کہاکہ 190 ملین پاؤنڈز کا۔ میرے حلقے کے بچے بچے کو معلوم ہے کہ عمران خان نے 190 ملین پاؤنڈز کی کرپشن کی ہے۔
انہوں نے کہاکہ پی ٹی آئی اگر 190 ملین پاؤنڈ کیس میں اسلام آباد ہائیکورٹ سے رجوع کرتی ہے تو ان کی اپیل عجلت میں نہیں لگنی چاہیے۔
’اگر بشیر اور بوٹے کی اپیلیں دو دو سال سے التوا کا شکار ہیں تو عمران خان کی اپیل بھی جلد نہیں سننی چاہیے، اس سے پہلے کتنی اپیلیں موجود ہیں، پہلے وہ سنی جائیں پھر ان کی اپیل پر سماعت ہو۔‘
وزیر اطلاعات نے کہاکہ عالمی سطح پر تعلقات ریاستوں کے درمیان ہوتے ہیں، سوشل میڈیا کے بیانیے کی بنیاد پر تعلقات نہیں بنتے۔ بلاول بھٹو نومنتخب امریکی صدر ڈونلڈ ٹرمپ کی تقریب حلف برداری میں شرکت کے لیے گئے ہیں، ہر کسی کے اپنے تعلقات ہوتے ہیں۔ جس طرح پی ٹی آئی کے لوگ بتاتے ہیں بین الاقوامی سطح پر تعلقات میں ایسے نہیں ہوتا۔
انہوں نے کہاکہ پی ٹی آئی کی امریکا میں بہت مضبوط لابی ہے، تحریک انصاف کی خواہش تو ہے کہ ٹرمپ یا ان کی انتظامیہ عمران خان کی رہائی پر بات کریں۔ مجھے نہیں لگتا کہ عدالتی فیصلے پر کوئی دوسرا ملک آکر کہے کہ آپ یہ فیصلہ تبدیل کردیں۔ ہمارے ہر ملک کے ساتھ برابری کی بنیاد پر تعلقات ہیں، اس حوالے سے وزارت خارجہ میں پالیسی بنائی جاتی ہے۔
ٹرمپ کی تقریب حلف برداری میں وزیراعظم شہباز شریف نے شرکت کیوں نہیں کی؟
ایک سوال کے جواب میں انہوں نے کہاکہ میں نہیں سمجھتا کہ ٹرمپ کی حلف برداری تقریب میں وزیراعظم شہباز شریف کو دعوت نہ ملنا کوئی بہت بڑا ایشو ہے، پی ٹی آئی تو کہہ رہی تھی ان کی ساری جماعت کو بلایا جائےگا، وہ بتائیں کس کس کو دعوت ملی ہے۔ یہ ریاستیں خود طے کرتی ہیں کہ کس کو تقریب میں بلانا ہے کس کو نہیں بلانا۔
انہوں نے کہاکہ 190 ملین پاؤنڈ کیس میں علما کرام میرے ساتھ پریس کانفرنس کرنے اس لیے آئے تھے کہ عمران خان اپنی چوری چھپانے کے لیے اللہ اور اس کے رسول ﷺ کا نام مت لیں۔ ہم تین نسلوں سے سیاست کررہے ہیں آج تک مذہب کا استعمال نہیں کیا۔
عطااللہ تارڑ نے کہاکہ علما کرام نے واضح کیاکہ کرپشن پر مذہب کارڈ کا استعمال نہ کیا جائے۔ بتایا جائے القادر یونیورسٹی میں کون سی سیرت کی کلاسز پڑھائی جارہی ہیں، کون سا عالم ہے جو وہاں پر عالم کورس کرواہا رہا ہے۔ یہ سب جھوٹ ہے۔
انہوں نے کہاکہ شہزاد اکبر نے 190 ملین پاؤنڈ کے حوالے سے کہا تھا کہ یہ کرپشن کا پیسا تھا جسے ہم نے ریکور کیا۔
وزیر اطلاعات نے کہاکہ عمران خان دور میں کابینہ کے اندر بند لفافے کو ابھی تک ڈی کوڈ اس لیے نہیں کیا گیا کیوں کہ نیب اس حوالے سے بہتر فیصلہ کرےگا۔ اپیل میں اگر نیب کی جانب سے حکومت سے معاونت مانگی گئی تو ہم ضرور معاونت کریں گے۔ قومی احتساب بیورو نے عمران خان کرپشن اور اختیارات کے ناجائز استعمال پر سزا دلوائی۔
190 ملین پاؤنڈ کی رقم اس وقت سپریم کورٹ کے اکاؤنٹ میں پڑی ہے۔
وزیر اطلاعات نے کہاکہ 190 ملین پاؤنڈ کی رقم اس وقت سپریم کورٹ کے اکاؤنٹ میں پڑی ہے، یہ پیسا اب حکومت کے پاس آنا چاہیے، وزارت قانون کی لیگل ٹیم بھی یہ معاملہ دیکھے گی۔
یہ بھی پڑھیں پی ٹی آئی کا اسٹیبلشمنٹ سے کوئی چینل نہیں کھلا، سیاسی جماعتوں سے مذاکرات کے سوا کوئی اور آپشن نہیں ، راناثنااللہ
ایک اور سوال کے جواب میں انہوں نے کہاکہ القادر ٹرسٹ یونیورسٹی کو وفاق چلائے گا یا پنجاب، اس حوالے سے ابھی تک فیصلہ نہیں ہوسکا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
190 ملین پاؤنڈ کیس wenews آرمی چیف بیرسٹر گوہر عطااللہ تارڑ علی امین گنڈاپور علیحدگی ملاقات عمران خان وفاقی وزیر اطلاعات وی نیوز.ذریعہ: WE News
کلیدی لفظ: 190 ملین پاؤنڈ کیس ا رمی چیف بیرسٹر گوہر عطااللہ تارڑ علی امین گنڈاپور علیحدگی ملاقات وفاقی وزیر اطلاعات وی نیوز وزیر اطلاعات نے کہاکہ علی امین گنڈاپور عطااللہ تارڑ نے انہوں نے کہاکہ ملین پاؤنڈ کیس تارڑ نے کہاکہ ملین پاؤنڈ کی کہ عمران خان بیرسٹر گوہر اس حوالے سے پر تعلقات پی ٹی ا ئی ا رمی چیف کی اپیل کے لیے
پڑھیں:
دہشت گردی پاکستان کےلیے ریڈ لائن ہے، اس پر کوئی سمجھوتہ نہیں کیا جائے گا، بیرسٹر دانیال چوہدری
وفاقی پارلیمانی سیکرٹری برائے اطلاعات و نشریات بیرسٹر دانیال چوہدری نے کہا ہے کہ وکلا برادری جمہوری اقدار کے فروغ، قانون کی بالادستی اور انصاف کی فراہمی میں ریڑھ کی ہڈی کی حیثیت رکھتی ہے دہشت گردی پاکستان کے لیے ایک ریڈ لائن ہے اور اس پر کوئی سمجھوتہ نہیں کیا جائے گا۔
جوڈیشل کمپلیکس راولپنڈی کے باہر میڈیا سے گفتگو کرتے ہوئے بیرسٹر دانیال چوہدری نے کہا کہ پنجاب بار کونسل کے انتخابات انتہائی اہم ہیں جن کے نتائج نہ صرف وکلا برادری بلکہ ملک کے عدالتی و قانونی نظام پر بھی گہرے اثرات مرتب کریں گے۔
انہوں نے کہا کہ حالیہ سپریم کورٹ بار ایسوسی ایشن کے انتخابات میں وہی پینل کامیاب ہوا جسے حکومتی حمایت حاصل تھی جو اس امر کا ثبوت ہے کہ وکلا استحکام، انصاف اور قانون کی بالادستی پر یقین رکھتے ہیں۔
انہوں نے توقع ظاہر کی کہ پنجاب بار کونسل کے انتخابات میں بھی وہ امیدوار کامیاب ہوں گے جو عدلیہ کی آزادی، قانون کی حکمرانی اور ملک میں امن و امان کے قیام کے لیے سرگرم کردار ادا کر رہے ہیں۔
انہوں نے کہا کہ نئی قیادت انصاف کے فروغ، وکلا کے مسائل کے حل اور پاکستان کی ترقی میں فعال کردار ادا کرے گی۔
افغانستان کی صورتحال پر بات کرتے ہوئے وفاقی پارلیمانی سیکرٹری نے بتایا کہ حکومت پاکستان نے افغان حکام کے ساتھ تین تفصیلی مذاکرات کیے ہیں جن میں دہشت گردی کے خاتمے اور امن کے فروغ پر تبادلہ خیال ہوا۔
انہوں نے واضح کیا کہ دہشت گردی پاکستان کے لیے ایک ریڈ لائن ہے اور اس پر کوئی سمجھوتہ نہیں کیا جائے گا۔
بیرسٹر دانیال چوہدری نے کہا کہ پاکستان کے خلاف بھارتی پراکسی اور دہشت گردی کی کارروائیاں ناقابل قبول ہیں۔ پاکستان اپنی سرزمین پر کسی بھی دہشت گردی کے اقدام کو برداشت نہیں کرے گا اور مؤثر جواب دیا جائے گا۔
انہوں نے کہا کہ پاکستان کا استحکام مودی سرکار کے لیے ناقابل برداشت ہے، لیکن پاکستان ترقی کی راہ پر گامزن ہے اور اپنے دشمنوں کے عزائم ناکام بنائے گا۔
بیرسٹر دانیال چوہدری نے کہا کہ پاکستان شروع سے ہی فلسطینی عوام، خصوصاً غزہ کے مظلوم بچوں کے ساتھ کھڑا ہے۔
حکومت، افواج اور عوام سب فلسطینی بھائیوں کے حامی ہیں اور ان کی حمایت جاری رکھیں گے۔ راولپنڈی میں ترقیاتی منصوبوں کے حوالے سے بیرسٹر دانیال چوہدری نے بتایا کہ کچہری چوک کا طویل عرصے سے رکا ہوا بڑا منصوبہ دوبارہ شروع کیا جا رہا ہے، جو دو دہائیوں سے التوا کا شکار تھا۔ انہوں نے کہا کہ وکلا کے لیے دو پارکنگ پلازے اور نئے چیمبرز کی تعمیر کے منصوبے بھی شامل ہیں۔
انہوں نے بتایا کہ شہری سہولت کے لیے سگنل فری روڈ کی تعمیر پر بھی کام جاری ہے جس سے ٹریفک کے نظام میں بہتری آئے گی۔
انہوں نے کہا کہ جب مسلم لیگ (ن) نے حکومت سنبھالی تو ملک شدید بحران کا شکار تھا مگر وزیر اعظم شہباز شریف کی قیادت میں پاکستان نہ صرف معاشی استحکام حاصل کر رہا ہے بلکہ عالمی سطح پر اپنی ساکھ بھی بحال کر رہا ہے۔ آج پاکستان ترقی، امن اور استحکام کی راہ پر گامزن ہے۔
انہوں نے کہا کہ ملک میں جب بھی کارکردگی کا جائزہ لیا جاتا ہے تو پنجاب حکومت ہمیشہ دیگر صوبوں سے آگے نظر آتی ہے۔
مسلم لیگ (ن) نے صحت، تعلیم، اسپتالوں کی تعمیر و توسیع اور عوامی فلاحی منصوبوں میں ہمیشہ نمایاں کارکردگی دکھائی ہے۔
بیرسٹر دانیال چوہدری کا کہنا تھا کہ مسلم لیگ (ن) عوام کی خدمت کے عزم پر قائم ہے اور وزیر اعظم شہباز شریف کی قیادت میں پاکستان ترقی، انصاف اور قانون کی بالادستی کی نئی مثال قائم کرے گا۔
امریکا میں عوامی احتجاج و غزہ پر مشترکہ حملے کی تیاری، علامہ عقیل انجم قادری کا خصوصی انٹرویو