سکولوں میں پاک فوج یکجتی ‘ یوپ نشکر ‘ مریم نواز کا دورہ کا لاہور ِ ترقیاتی منصوبو ں کا جائزہ : سبزیوں کے نرخ چیک کئے پاکستان زندہباہ کے نعرے لگوائے
اشاعت کی تاریخ: 14th, May 2025 GMT
لاہور (نیوز رپورٹر+لیڈی رپورٹر + نوائے وقت رپورٹ) وزیراعلیٰ مریم نواز کی ہدایت پر پنجاب بھر کے سکولوں میں پاک فوج سے اظہار یکجہتی اور یوم تشکر منایا گیا۔ پنجاب کے تعلیمی ادارو ں میں ’’آپریشن بنیان مرصوص‘‘ کی کامیابی پر جشن کا سماں تھا۔ طلبہ نے پاک فوج کے سربراہ کی تصاویر بھی اٹھا رکھی تھیں اورننھے بچوں نے یونیفارم پہن کر مارچ کیا۔ ننھی طالبات نے پاک فضائیہ کے جانبازوں کو خراج تحسین پیش کیا۔ طلبہ نے افواج پاکستان کی جرات اور شجاعت کو سلام پیش کیا۔قصور کے طلبہ کی ریلی کی قیادت کرنے کے لئے صوبائی وزیر تعلیم رانا سکندر حیات خود پہنچ گئے۔ طلبہ نے پاکستان زندہ باد اور پاک فوج زندہ باد کے نعرے لگائے۔ مصنوعی بارڈر پر مصنوعی جنگ کے روح پرور مناظر، موک فائرنگ، دشمن کو بری طرح پچھاڑ دیا۔ طلبہ نے دشمن سے مصنوعی جنگ جیتنے پر پیس پریڈ کر کے فتح کا جشن منایا۔ ننھے طلبہ نے سرحدی گاؤں کے کچے گھروں کے ماڈل بھی بنائے۔طلبہ نے پاک فوج کی کامیابیوں کا تالیاں بجا کر خیرمقدم کیا۔ننھی بچیوں نے قومی پرچم لہرائے اور پاکستان زندہ باد کے نعرے لگائے۔ طالبات نے پاک فوج کے حق میں بینرز اٹھا کر جلوس نکالے۔ پتوکی کے گرلز سکول کی طالبات نے مارچ کیا اور نعرے لگا کر پاک فوج کو خراج تحسین پیش کیا۔طلبہ نے پینٹنگ اور پوسٹر بنا کر پاک دھرتی سے محبت کا اظہار کیا۔سکولوں میں جنگ کے علامتی سائرن بجائے گئے،بچوں نے قومی ترانے اور نغمے پیش کئے۔ننھے بچوں نے امن اور اپنے ہیروز کی سلامتی کے لئے خصوصی دعائیں کیں۔’’آپریشن بنیان مرصوص‘‘کے حوالے سے پوسٹر اور ڈرائنگ کے مقابلے بھی ہوئے۔ننھے بچوں نے نغمے اور نظمیں بھی پیش کیں۔ ننھے طلبہ نے پاک فوج کے سربراہ اور سپاہیوں کو محبت بھرے خط لکھے۔ سکول اسمبلی کے دوران بچوں نے پاک فوج زندہ باد کے نعرے لگائے اور گرمجوشی سے وطن عزیز سے محبت کا اظہار کیا۔ علاوہ ازیں مریم نواز نے لاہور کے مختلف علاقوں کے اچانک دورے کئے۔ لاہور ڈویلپمنٹ پلان کے تحت مختلف زونزکا معائنہ کیا۔ آپریشن بنیان مرصوص کی کامیابی پر عوام نے مریم نواز کو مبارکباد پیش کی، وزیراعلیٰ نے پاکستان زندہ باد کے نعرے لگوائے۔ مریم نواز اچانک سبزی کی دکان پر پہنچ گئیں اور نرخ چیک کئے۔ وزیراعلیٰ نے گزشتہ روز اچانک مختلف پراجیکٹس کے دورے کئے اور تعمیراتی معیار کا جائزہ لیا۔ وزیراعلیٰ مریم نواز شریف نے زیر تعمیر روڈز، سٹریٹس اور نکاسی آب کے پراجیکٹس کا معائنہ کیا۔ وزیراعلیٰ مریم نواز شریف نے زیر تکمیل پراجیکٹس میں معیار کو یقینی بنانے کا حکم دیا۔ وزیراعلیٰ مریم نواز شریف نے لاہور ڈویلپمنٹ پلان کی بروقت تکمیل کی ہدایت بھی کی۔ مریم نواز نے مقامی شہریوں سے بات چیت کرتے ہوئے ترقیاتی منصوبوں کے بارے میں دریافت کیا۔ شہریوں نے لاہور ڈویلپمنٹ پلان کے آغاز پر وزیراعلیٰ کا شکریہ ادا کیا۔ مریم نواز نے خاتون کو گلے لگا لیا اور سبزیوں کے ریٹ پوچھے۔ پیاز،کریلے،آلو،گوبھی اور گوار کی پھلیاں کے نرخ دریافت کئے۔ وزیراعلیٰ کے پوچھنے پر خاتون نے سبزیوں کے نرخ میں کمی کے بارے میں بتایا۔ مریم نے سبزی کی دکان پر سرکاری نرخنامہ بھی چیک کیا۔ مریم نواز نے کہا کہ سارا دن مجھے فکر ہوتی ہے کہ عوام کے لئے کھانے پینے کی چیزیں مہنگی نہ ہو جائیں۔’’جیتے رہیں، خوش رہیں‘‘وزیراعلیٰ نے ننھے بچے کو پاس بلا کر اظہار شفقت کیا۔ وزیراعلیٰ نے چوبرجی کے علاقے میں بازار کا دورہ کیا۔ دکاندار مریم نواز کو دیکھ پاس آ گئے۔ شہریوں نے بازار کی نئی بننے والی سڑک عرصہ دراز سے ٹوٹی اور خراب ہونے کے بارے میں بتایا۔ وزیراعلیٰ نے کہا کہ میں چاہتی تھی کہ خود جا کر دیکھوں کہ لاہور کے علاقوں کی گلیاں کیسی ہیں۔ کوئی خدمت میرے لائق ہو تو بتائیں، خیریت بھی دریافت کی۔ مریم نواز کو دیکھ کر شہری پاس آ گئے، وزیراعلیٰ مریم نواز شریف نے صفائی اور پراجیکٹس کے بارے میں پوچھا۔ اللہ تعالی آپ کو خوش رکھے، شہری کی وزیراعلیٰ اور نواز شریف کو دعائیں۔ شہری نے مریم نواز سے گفتگو کرتے ہوئے بتایا کہ کسی وزیراعلیٰ نے ہمارا یہاں کبھی حال تک نہیں پوچھا، آپ یہاں آنے والی پہلی وزیراعلیٰ ہیں۔ ہماری گلیاں ٹوٹی ہوئی تھیں، ہر طرف گندگی تھی، آپ نے سب ٹھیک کرایا، اللہ اجر دے۔ اللہ تعالی نواز شریف کو صحت و سلامتی عطا کرے۔ سالوں سے منتظر تھے کہ کوئی آئے، ہماری گلی صاف کرائے اور بنائے۔ 40 سال بعد ہماری گلی بنائی گئی، 15دن پہلے کام شروع ہوا اور آج مکمل ہو چکی ہے۔ مریم نواز نے کہا کہ میں گلیاں اور روڈز بنتے دیکھنا چاہتی تھی، اسی لئے خود آئی ہوں۔
.ذریعہ: Nawaiwaqt
پڑھیں:
وزیراعلیٰ پنجاب مریم نواز کی آپریشن بُنیان مرصوص کے غازیوں کی عیادت
وزیراعلی پنجاب مریم نواز شریف نے بھارت کے خلاف آپریشن بُنیان مرصوص میں حصہ لینے والے غازیوں کی عیادت کی ہے۔
ایکسپریس نیوز کے مطابق بھارت کے خلاف آپریشن بُنیان مرصوص کے دوران زخمی ہونے والے غازیوں کی عیادت کے لئے وزیراعلی مریم نواز شریف کی سی ایم ایچ لاہور پہنچیں۔
وزیراعلی مریم نواز شریف نے بھارتی جارحیت کے دوران زخمی افسروں اور جوانوں سے ملاقات کی اور سرجیکل وارڈ میں زیر علاج ہر غازی سے علیحدہ علیحدہ گفتگو بھی کی۔
انہوں نے غازی افسروں اور جوانوں کی مزاج پرسی کی جبکہ زخمی افسروں اور جوانوں کی جلد صحت یابی کی دعا کی۔ وزیراعلی مریم نواز شریف نے غازی افسروں اور جوانوں کے ہمت وحوصلہ کو سراہا۔
وزیراعلی مریم نواز شریف نے غازیوں کی جرات اور بہادری کو شاندار خراج تحسین پیش کیا اور جلد اُن کی صحت یابی کیلیے نیک خواہشات کا اظہار کیا۔
کور کمانڈر لاہور نے وزیر اعلیٰ مریم نواز شریف کی آمد پر شکریہ ادا کیا۔
پاک بھارت کشیدگی: پاکستان نے اب تک بھارت کے کتنے ڈرونز گرادیے؟