صدر ٹرمپ طالبان سے بگرام ائیر بیس واپس کیوں لینا چاہتے ہیں؟
اشاعت کی تاریخ: 19th, September 2025 GMT
اسلام آباد (اُردو پوائنٹ ۔ DW اردو۔ 19 ستمبر 2025ء) امریکی صدر ڈونلڈ ٹرمپ نے طالبان سے بگرام ایئر بیس کا کنٹرول دوبارہ حاصل کرنے کی خواہش کا اعادہ کر کے بین الاقوامی اور علاقائی طاقتوں کی توجہ ایک مرتبہ پھر جنگ سے تباہ حال افغانستان پر مرکوز کر دی ہے۔ ٹرمپ، جو اس سے قبل پاناما کینال سے لے کر گرین لینڈ تک مختلف خطوں اور مقامات کو امریکی قبضے میں لینے کی خواہش ظاہر کر چکے ہیں،بگرام پر بھی نظریں جمائے ہوئے ہیں۔
فروری میں دوسری مدت کے لیے عہدہ صدارت سنبھالنے کے بعد اپنی کابینہ کے پہلے اجلاس میں ہی انہوں نے بگرام ائیر بیس کا کنٹرول دوبارہ حاصل کرنے پر زور دیا تھا۔ وہ اس معاملے پر اپنے پیشرو جو بائیڈن کو مسلسل تنقید کا نشانہ بناتے آئے ہیں کہ ان کی وجہ سے افغانستان سے اجلت میں کیے گئے انخلا نے خطے میں امریکی مفادات کو نقصان پہنچایا۔
(جاری ہے)
اس سے ظاہر ہوتا ہے کہ ایسا نہیں کہ ٹرمپ نے جمعرات کو اپنے دورہ برطانیہ کے موقع پر پہلی بار بگرام کی واپسی پر زور دیا ہو، تو پھر انہوں نے ایسا کیا کہا، جس کے سبب اس مرتبہ ان کے بیان پر زیادہ ردعمل سامنے آیا اور تبصروں کا سلسلہ بھی جاری ہے۔ ٹرمپ نے کیا کہا؟ٹرمپ نے جمعرات کو لندن کے دورے کے دوران برطانوی وزیر اعظم کیئر اسٹارمر کے ساتھ مشترکہ پریس کانفرنس کے دوران واضح کیا، ''ہم وہ بیس واپس چاہتے ہیں۔
‘‘ چین کی وجہ سے اپنے اس اقدام کی اسٹریٹجک اہمیت کا حوالہ دیتے ہوئے ٹرمپ نے دعویٰ کیا، ''یہ (بگرام ائیر بیس) اس جگہ سے صرف ایک گھنٹے کی مسافت پر ہے، جہاں چین اپنے جوہری ہتھیار تیار کرتا ہے۔‘‘امریکی صدر کا مزید کہنا تھا کہ امریکہ طالبان کی کسی نہ کسی رضامندی کے ساتھ یہ بیس حاصل کر سکتا ہے تاہم اس بات کی وضاحت نہیں کی کہ یہ معاہدہ کس شکل میں ہوگا۔
تجزیہ کاروں کے مطابق امریکی صدر کی جانب سے اس بارے میں طالبان کے ساتھ بات چیت کے دعوے اور چین کے براہ راست ذکر نے اس بار ان کے بگرام سے متعلق بیان پر سنجیدہ ردعمل اور بحث و مباحثے کو جنم دیا ہے۔
طالبان کا رد عملتاہم کابل نے اس امکان کو یکسر مسترد کر دیا ہے۔ افغان وزارت خارجہ کے اہلکار ذاکر جلال نے ایک بیان میں کہا، ''افغانستان اور امریکہ ایک دوسرے کے ساتھ تعلقات قائم رکھنے چاہئیں، لیکن امریکہ کی کسی بھی حصے میں فوجی موجودگی کے بغیر۔
‘‘ انہوں نے مزید کہا کہ دونوں ممالک باہمی احترام اور مشترکہ مفادات کی بنیاد پر سیاسی اور معاشی تعلقات قائم کر سکتے ہیں۔تجزیہ کاروں کے مطابق اگر طالبان امریکی صدر کی اس تجویز کو مان لیتے ہیں تو یہ اس قدامت پسند افغان گروہ کے لیے ایک غیرمعمولی یوٹرن ہوگا، جس نے امریکی افواج کو نکال باہر کرنے اور امریکہ کی حمایت یافتہ حکومت سے ملک واپس لینے کے لیے برسوں جنگ لڑی۔
تاہم افغان بزنس کونسل یو اے ای کے صدر حاجی عبیداللہ صدر خیل کے مطابق طالبان کی جانب سے بگرام ائیر بیس کی امریکہ حوالگی کو قطعی طور پر خارج از امکان بھی نہیں قرار دیا جا سکتا۔ اس بارے میں وضاحت کرتے ہوئے صدر خیل نے ڈی ڈبلیو اردو کو بتایا، ''ٹرمپ نے ابھی تک ثابت کیا ہے کہ وہ بنیادی طور پر ایک بزنس مین اور ڈیل میکر ہیں، تو بگرام ائیر بیس کو بھی ایک بزنس ڈیل کی طرح دیکھیں، وہ (ٹرمپ) جانتے ہیں کہ طالبان اپنے زیر کنٹرول افغانستان میں اقتصادی بہتری کے لیے شدت سے کسی اچھی بزنس ڈیل کے منتظر ہیں اور اس سے اچھا موقع اور کیا ہوگا؟‘‘
بگرام ائیر بیس ایک نظر میںبگرام ایئر بیس سابق سوویت یونین نے تعمیر کی تھی اور 2001ء میں نائن الیون کے حملوں کے بعد افغانستان پر امریکی حملے کے دوران یہ امریکا کا سب سے بڑا فوجی اڈہ بن گیا۔
یہ اڈہ کابل کے شمال میں واقع ہے اور اس میں 11,800 فٹ طویل رن وے موجود ہے، جس پر بمبار طیارے اور بڑے کارگو جہاز اتر سکتے ہیں۔ یہ اڈہ افغانستان میں امریکی فوجی آپریشنز کا اعصابی مرکز تھا، جہاں ہزاروں فوجی تعینات رہے۔یہاں کبھی امریکی فوجیوں کے لیے برگر کنگ اور پیزا ہٹ جیسے فاسٹ فوڈ ریسٹورنٹس کے علاوہ الیکٹرانکس سے لے کر افغانی قالینوں تک سب کچھ فروخت کرنے والی دکانیں بھی موجود تھیں۔
اس کے علاوہ یہاں ایک بدنام زمانہ جیل بھی قائم تھی، جس طالبان میں جنگجوؤںسمیت القاعدہ اور دیگر شدت پسند گروہوں سے وابستہ درجنوں قیدی رکھے گئے۔2021 میں امریکی انخلا کے دوران بگرام کو اچانک اور بغیر کسی پیشگی اطلاع کے چھوڑ دیا گیا، جس کے بعد طالبان نے اس پر قبضہ کر لیا۔ اس واقعے کو افغانستان میں امریکہ کے سب سے ناکام فیصلوں میں سے ایک قرار دیا گیا تھا۔
چین اور روس کے لیے خطرے کی گھنٹی؟ٹرمپ کا یہ بیان ایک ایسے وقت سامنے آیا ہے، جب امریکی محکمہ دفاع اور اب ٹرمپ انتظامیہ کے ماتحت محمکہ جنگ کہلانے والا پینٹاگون 2021 میں امریکہ کے افغانستان سے افراتفری پر مبنی انخلا کا جائزہ لے رہا ہے، جسے ٹرمپ انتظامیہ میں بہت سے پالیسی ساز امریکہ کے بڑے چیلنجز، خصوصاً چین کے ساتھ مقابلے سے توجہ ہٹانے کا سبب سمجھتے ہیں۔
اسی سبب چین نے بھی امریکی صدر کے اس بیان پر ردعمل میں کہا کہ بیجنگ افغانستان کی آزادی، خودمختاری اور علاقائی سالمیت کا احترام کرتا ہے اور تمام فریقوں سے خطے میں امن و استحکام کے لیے تعمیری کردار ادا کرنے کی اپیل کرتا ہے۔چینی وزاور خارجہ کے ترجمان لن جیان نے جمعے کے روز بریفنگ میں کہا، ''افغانستان کے مستقبل اور تقدیر کا فیصلہ افغان عوام کے ہاتھ میں ہونا چاہیے۔
خطے میں کشیدگی کو ہوا دینا یا محاذ آرائی پیدا کرنا عوامی حمایت حاصل نہیں کر سکتا۔‘‘اسلام آباد میں قائم غیر سرکاری ادارے پاکستان کونسل آن چائنہ کے ایگریکٹو ڈائریکٹر اور علاقائی امور کے ماہر ڈاکٹر فضل الرحمان کا کہنا ہے کہ امریکی صدر کے بیان کو ''عسکری قوت: مصالحت نہیں مخاصمت‘‘ کے تناظر میں دیکھا جانا چاہیے۔
اس بارے میں وضاحت کرتے ہوئے انہوں نے کہا، '' دنیا میں سپر پاورز اپنے اثرو رسوخ کا غلبہ قائم رکھنےکے لیے ہمیشہ ایک دوسرے کے خلاف نبرد آزما رہی ہیں اور ہم اب بھی یہی دیکھ رہے ہیں۔‘‘رواں ماہ کے آوائل میں دوسری عالمی جنگ میں جاپان کی شکست کے اسی سال مکمل ہونے پر بیجنگ میں منعقدہ پریڈ کا حولا دیتے ہوئے ڈاکٹر فضل الرحماٰن نے کہا کہ چین نے دنیا کو دکھا دیا ہے کہ وہ فوجی سازو سامان کے اعتبار سے کس مقام پر کھڑا ہے اور یہ بات یقیناﹰ امریکہ سمیت دیگر ممالک کے لیے باعث تشویش ہے۔
انہوں نے مزید کہا، ''اسٹریٹجک اثرو رسوخ، نایاب معدنیات کے حصول کے لیے دوڑ یہ تمام وہ عوامل ہیں، جو امریکی صدر کی خطے میں دلچسپی کا باعث ہیں۔‘‘تاہم ان کے بقول امریکی صدر کا یہ بیان صرف بیجنگ نہیں بلکہ ماسکو کے لیے بھی اہم ہے۔ افغانستان کے ہمسائے ہونے اور اس وقت یوکرین کے ساتھ جنگ میں ملوث ہونے کی وجہ سے روس بھی ٹرمپ کے اس بیان کو نظر انداز نہیں کر سکتا۔
ان کا کہنا تھا، ''ہمیں یہ نہیں بھولنا چاہیے کہ روس نے حال ہی میں افغان طالبان کی حکومت کو تسلیم کیا ہے۔‘‘اس لیے روس کبھی بھی نہیں چاہے گا کہ امریکہ کو افغانستان میں اسٹریٹجک اہمیت کا ایک اڈہ مہیا کیا جائے۔
حاجی عبیداللہ صدر خیل کا کہنا ہے کہ سفارتی سطح پر تسلیم کیے جانا طالبان کے لیے اہم ضرور ہے لیکن وہ اس سے اپنے عوام کا پیٹ نہیں بھر سکتے۔
انہوں نے کہا، ''اگر طالبان اور امریکہ کے مابین کوئی ڈیل طے پا جاتی ہے تو یہ نہ صرف طالبان کو معاشی طور پر بہت فائدہ دے سکتی ہے بلکہ ان کی عالمی سطح پر قبولیت میں بھی اہم کر دار دار کرے گی۔‘‘ بگرام کا دوبارہ حصول، امریکہ کے لیے 'بڑا چیلنج‘تو موجودہ صورتحال میں امریکہ کے لیے بگرام ائیر بیس کا دوبارہ حصول اور پھر اسے فعال رکھنا کتنا بڑا چیلنج ہو گا۔
برطانوی خبر رساں ادارے روئٹرز کے ساتھ اس حوالے سے باتے کرتے ہوئے امریکی فوج کے ایک سابق اہلکار کا کہنا تھا کہ یہ بیس دوبارہ حاصل کرنے کی کوئی بھی کوشش ایک بڑا چیلنج ہوگی۔اس اہلکار نے نام ظاہر نہ کرنے کی شرط پر بتایا کہ دسیوں ہزار فوجیوں، بھاری اخراجات سے بیس کی بحالی اور رسد کی فراہمی کے لیے مشکل لاجسٹک انتظامات کی ضرورت ہوگی کیونکہ یہ ایک زمینی طور پر بند ملک میں امریکی افواج کے ایک تنہا اڈے کے طور پر کام کرے گا۔
اہلکار نے مزید کہا کہ بیس پر قبضے کے بعد بھی اس کے وسیع و عریض علاقے کو محفوظ بنانا اور راکٹ حملوں سے بچانے کے لیے کلیئر کرنا ایک بڑی مہم ہوگی، ''مجھے سمجھ نہیں آتی کہ یہ حقیقت میں کیسے ممکن ہو سکتا ہے۔‘‘ماہرین کا کہنا ہے کہ اتنے بڑے ایئر بیس کو شروع میں محفوظ بنانا مشکل ہوگا اور اس کے آپریشن اور حفاظت کے لیے بھاری تعداد میں فوجیوں کی ضرورت ہوگی۔
یہاں تک کہ اگر طالبان مذاکرات کے بعد امریکہ کے بگرام پر دوبارہ قبضے کو قبول بھی کر لیں، تب بھی اسے افغانستان میں موجود داعش اور القاعدہ کے عسکریت پسندوں سمیت مختلف خطرات سے بچانا پڑے گا۔یہاں پر قائم کیا گیا، اڈہ ایران کے میزائل حملوں کے لیے بھی کمزور نشانہ ثابت ہو سکتا ہے۔ تہران جون میں اپنی جوہری تنصیبات پر حملوں کے جواب میں قطر میں قائم امریکی فوجی اڈے کو نشانہ بنا چکا ہے۔ امریکہ کہ ایک اور سابق دفاعی اہلکار نے بیس دوبارہ حاصل کرنے کے فوائد کو کم اہم قرار دیا، جن میں وہ نکتہ بھی شامل تھا جس پر ٹرمپ زور دیتے ہیں کہ یہ چین کے قریب ہے۔ اس اہلکار کا کہنا تھا، ''مجھے نہیں لگتا کہ وہاں کوئی خاص فوجی فائدہ ہے۔ خطرات فوائد پر غالب ہیں۔‘‘
.ذریعہ: UrduPoint
کلیدی لفظ: تلاش کیجئے افغانستان میں میں امریکی امریکی صدر امریکہ کے کہنا تھا کے دوران انہوں نے کا کہنا کے ساتھ کرنے کی کہا کہ کے بعد ہیں کہ کے لیے اور اس
پڑھیں:
ہم افغان سرزمین پر امریکی افواج کی واپسی کو مسترد کرتے ہیں، بگرام ایئر بیس سے متعلق صدر ٹرمپ کے بیان پر افغانستان کا رد عمل
کابل(ڈیلی پاکستان آن لائن)بگرام ایئر بیس سے متعلق صدر ٹرمپ کے بیان پر افغانستان نے رد عمل جاری کرتے ہوئے کہا ہے کہ ہم افغان سرزمین پر امریکی افواج کی واپسی کو مسترد کرتے ہیں۔
افغان وزارت خارجہ نے بیان جاری کرتے ہوئے کہا کہ افغانستان میں امریکی افواج کی موجودگی ناقابل عمل ہے۔ یاد رہے کہ گزشتہ روز دورہ برطانیہ کے دوران امریکی صدر ڈونلڈ ٹرمپ نے برطانوی وزیراعظم کیئر سٹارمر کے ہمراہ پریس کانفرنس میں کہا تھا کہ شی جن پنگ سے بات ہو رہی ہے، امید ہے کچھ فائنل ہوجائےگا، چین سے بگرام ایئر بیس واپس لینے کی کوشش کر رہے ہیں۔
پاکستان پر حملے سے متعلق کمسن بچے کاسوال،بھارتی چیف آف ڈیفنس سٹاف لاجواب ہو گئے
مزید :
سپریم کورٹ نے تہرے قتل کے مجرم کی سزائے موت، عمر قید میں کیوں تبدیل کی؟