برطانوی ہیوی ویٹ باکسر نائیجیریا میں افسوسناک کار حادثے کا شکار؛ ہلاکتیں
اشاعت کی تاریخ: 29th, December 2025 GMT
نائیجیریا میں عالمی شہرت یافتہ برطانوی باکسر انتھونی جوشوا ایک خوفناک کار حادثے کا شکار ہوگئے۔
عالمی خبر رساں ادارے کے مطابق نائیجیریا کی پولیس نے تصدیق کی کہ اس کار حادثے میں کم از کم 2 افراد جان کی بازی ہار گئے۔
حادثہ اوگون اسٹیٹ میں واقع لگوس ایبادان ایکسپریس وے پر پیش آیا جہاں جوشوا کی گاڑی ایک کھڑے ٹرک سے ٹکرا گئی۔
پولیس اور روڈ سیفٹی حکام کا کہنا ہے کہ حادثہ صبح تقریباً 11 بجے مقامی وقت کے قریب ہوا اور کار غالباً تیز رفتاری یا غلط اوور ٹیک کی وجہ سے کنٹرول کھو بیٹھی۔
برطانیہ اور نائیجیریا کا پس منظر رکھنے والے 36 سالہ جوشوا کو اس حادثے میں معمولی نوعیت کے زخم آئے ہیں اور ان کی حالت خطرے سے باہر ہے۔
پولیس نے بتایا کہ حادثے میں گاڑی میں موجود دو افراد موقع پر ہی ہلاک ہوگئے جبکہ دیگر دو افراد محفوظ رہے۔
جوشوا نے خود یا ان کی ٹیم کی جانب سے ابھی تک کوئی باضابطہ بیان سامنے نہیں آیا۔
سوشل میڈیا پر گردش کرنے والی ویڈیوز اور تصاویر میں انتھونی جوشوا کو زخمی حالت میں مدد لیتے ہوئے دیکھا گیا جبکہ گاڑی بری طرح تباہ ہوگئی۔
خیال رہے کہ انتھونی جوشوا کو مقبول ترین ہیوی ویٹ باکسروں میں شمار کیا جاتا ہے اور انہوں نے 19 دسمبر کو یوٹیوبر سے باکسر بنے جیک پال کے خلاف ایک بڑے میچ میں چھٹے راؤنڈ میں ناک آؤٹ جیتا تھا۔
حادثے کے بعد باکسنگ کمیونٹی میں تشویش پھیل گئی ہے۔
جیک پال نے سوشل میڈیا پر اپنے پیغام میں کہا کہ زندگی باکسنگ سے زیادہ اہم ہے اور وہ جوشوا اور حادثے میں ہلاک ہونے والوں کے اہل خانہ کے لیے دعا گو ہیں۔
ان کے پروموٹر ایڈی ہیرن نے بھی کہا ہے کہ ابتدائی تصاویر دیکھ کر خوشی ہے کہ جوشوا بنیادی طور پر محفوظ ہیں تاہم مزید معلومات کا انتظار ہے۔
.
ذریعہ
ذریعہ: Express News
پڑھیں:
چینی شہریوں کی سیکیورٹی کیلیے بلٹ پروف لینڈ کروزر خریدنے کا فیصلہ
اسلام آباد:حکومت نے چینی شہریوں کی سیکیورٹی کو مزید موثر بنانے کے لیے 95.049 ملین روپے (تقریباً 9 کروڑ 50 لاکھ روپے) مالیت کی نئی بلٹ پروف ٹویوٹا لینڈ کروزر خریدنے کا فیصلہ کیا ہے۔
یہ گاڑی چین پاکستان اقتصادی راہداری (سی پیک) سیکریٹریٹ کے استعمال کے لیے حاصل کی جائے گی تاکہ چینی وفود اور ماہرین کو محفوظ سفری سہولت فراہم کی جا سکے۔
وفاقی وزیر برائے منصوبہ بندی احسن اقبال کے مطابق چینی شہریوں کا تحفظ حکومتِ پاکستان کی اولین ذمے داری ہے اسی مقصد کے تحت یہ گاڑی خریدی جا رہی ہے۔
سرکاری دستاویزات کے مطابق یہ نئی لینڈ کروزر پہلے سے موجود بلٹ پروف گاڑیوں اور کم از کم 2ہیلی کاپٹروں کے علاوہ ہوگی، جنھیں مختلف سرکاری ادارے چینی شہریوں کی حفاظت کے لیے استعمال کر رہے ہیں یا خریدنے کے عمل میں ہیں۔
سی پیک سیکریٹریٹ نے موقف اختیار کیا کہ کابینہ ڈویژن کے محدود گاڑیوں کے بیڑے کے باعث مطلوبہ وقت پر بلٹ پروف گاڑیاں دستیاب نہیں ہوتیں، جس سے اہم سرکاری ملاقاتوں، غیر ملکی وفود کے دوروں اور اجلاسوں میں تاخیر یا بعض اوقات منسوخی کی نوبت آ جاتی ہے۔
دستاویزات کے مطابق نجی مارکیٹ سے کرائے پر بلٹ پروف گاڑیاں لینا نہ صرف غیر یقینی بلکہ انتہائی مہنگا بھی ثابت ہوتا ہے، جس سے قومی خزانے پر اضافی بوجھ پڑتا ہے۔حکومت نے پبلک پروکیورمنٹ ریگولیٹری اتھارٹی (PPRA) کے رول 42(c)(vii) کے تحت براہِ راست معاہدے کے ذریعے گاڑی خریدنے کا فیصلہ کیا ہے۔
3 ٹویوٹا ڈیلرز نے قیمتیں پیش کیں، جن میں،ٹویوٹا سینٹرل موٹرز: 95.049 ملین روپے،ٹویوٹا پورٹ قاسم: 95.25 ملین روپے،ٹویوٹا سوسائٹی: 95.45 ملین روپے ہے،حکومت نے سب سے کم بولی دینے والی ٹویوٹا سینٹرل موٹرز کی پیشکش منظور کر لی۔
سی پیک سیکریٹریٹ کے پاس گاڑی کی خریداری کے لیے مطلوبہ رقم موجود نہیں تھی، جس پر وزارتِ منصوبہ بندی نے مختلف منصوبوں سے 5 کروڑ 83 لاکھ روپے منتقل کرنے کا فیصلہ کیا۔
تاہم مالی سال کے اختتام تک ضروری منظوری نہ ملنے کے باعث آرڈر جاری نہ ہو سکا۔
وزارت نے یہ رقم مختلف منصوبوں سے فراہم کرنے کا انتظام کیا، جن میں،سینٹر فار ایکسی لینس برائے سی پیک سے 1 کروڑ 88 لاکھ روپیوفاقی ایس ڈی جیز پروگرام سے 91 لاکھ روپے،مانیٹرنگ اینڈ ایویلیوایشن منصوبے سے 1 کروڑ 10 لاکھ روپے،پالیسی ریسرچ گرانٹس پروگرام سے 1 کروڑ 60 لاکھ روپے ہے ،ان میں 62 لاکھ روپے وہ بھی شامل تھے جو کنٹریکٹ ملازمین کی ادائیگی کے لیے مختص تھے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار