شائے گل کنسرٹ کے دوران ڈرون حادثے کا شکار، زخمی
اشاعت کی تاریخ: 30th, December 2025 GMT
معروف پاکستانی گلوکارہ شائے گل اسلام آباد میں ایک میوزیکل کنسرٹ کے دوران حادثے کا شکار ہو گئیں، جب پرفارمنس کے دوران ایک ڈرون ان کے بازو پر جا گرا اور انہیں زخمی کر دیا۔
یہ واقعہ پارک ویو سٹی، اسلام آباد میں پیش آیا، جہاں شائے گل اسٹیج پر پرفارم کر رہی تھیں۔ اچانک ایک تیز رفتار ڈرون ان کی جانب بڑھا اور ان کے ہاتھ سے ٹکرایا، جس کے نتیجے میں ان کے بازو پر گہرے کٹ لگ گئے۔
حادثے کے بعد شائے گل نے انسٹاگرام اسٹوری کے ذریعے مداحوں کو آگاہ کیا کہ ڈرون کا کنٹرول ایک غیر تربیت یافتہ شخص کے ہاتھ میں تھا، اور وہ بہت تیز رفتاری سے ان کی طرف آ گیا۔ انہوں نے بتایا کہ اب وہ محفوظ ہیں اور ٹیٹنس کا انجیکشن بھی لگوا لیا ہے۔ شائے گل نے زخمی ہاتھ کی تصاویر اور ویڈیوز بھی شیئر کیں اور کہا کہ اگر زخم زیادہ گہرے ہوتے تو صورتحال سنگین ہو سکتی تھی۔ ایک اسٹوری میں مزاحیہ انداز میں انہوں نے کہا کہ “میں 27 کلب میں شامل نہیں ہونا چاہتی”۔
سوشل میڈیا پر اس واقعے پر ملا جلا ردعمل سامنے آیا ہے۔ کچھ صارفین نے اسے محض ایک حادثہ قرار دیا، جبکہ دیگر نے کنسرٹس میں انتظامات اور آرٹسٹس کی سیکیورٹی پر سوال اٹھائے۔
واضح رہے کہ شائے گل نے 2022 میں کوک اسٹوڈیو سیزن 14 کے مقبول گانے پسوڑی کے ذریعے شہرت حاصل کی، جسے انہوں نے علی سیٹھی کے ساتھ گایا تھا اور یہ گانا تقریباً 92 کروڑ ویوز حاصل کر چکا ہے۔ ان کے دیگر مشہور گانوں میں سکون، لیفٹ رائٹ، انسیکیورٹی، گِلہ، بلّھیا شامل ہیں۔
مزید برآں، شائے گل نے ستمبر 2025 میں اپنا پہلا سولو گانا انسیکیورٹی ریلیز کیا، اور اپریل میں عبدالحنان کے ساتھ گِلہ میں بھی تعاون کیا۔
ذریعہ
ذریعہ: Daily Mumtaz
کلیدی لفظ: شائے گل نے
پڑھیں:
چینی سائنسدانوں کی اہم پیش رفت، نیند بڑھانے والا قدرتی مالیکیول دریافت
دنیا بھر میں لاکھوں افراد بے خوابی اور نیند کی مختلف خرابیوں کا شکار ہیں، تاہم چینی سائنسدانوں نے ایک ایسے قدرتی مالیکیول کی نشاندہی کی ہے جو دماغ میں نیند کی خواہش کو بڑھانے میں اہم کردار ادا کرتا ہے۔ ماہرین کے مطابق یہ دریافت مستقبل میں بے خوابی اور دیگر نیند کے مسائل کے لیے نئی، محفوظ اور مؤثر ادویات کی تیاری میں اہم سنگ میل ثابت ہو سکتی ہے۔
چینی اکیڈمی آف سائنسز اور دیگر تحقیقی اداروں کے سائنسدانوں کی یہ تحقیق معروف سائنسی جریدےنیچر نیورو سائنس (Nature Neuroscience) میں شائع ہوئی ہے۔ تحقیق کے مطابق ٹرپٹامین (Tryptamine یا TrpA) نامی قدرتی مالیکیول دماغ کو یہ اشارہ دیتا ہے کہ جسم کو آرام اور نیند کی ضرورت ہے۔
محققین کا کہنا ہے کہ مناسب نیند انسانی صحت کے لیے انتہائی ضروری ہے، کیونکہ اسی دوران دماغ یادداشت کو منظم کرتا، نئی معلومات محفوظ بناتا اور روزمرہ سرگرمیوں کے دوران جمع ہونے والے فاضل مادوں کو خارج کرتا ہے۔ اس کے باوجود دنیا بھر میں بے خوابی، ذہنی دباؤ، ڈپریشن، بے چینی اور جسمانی گھڑی (سرکیڈین ردھم) کی خرابی کے باعث لاکھوں افراد مناسب نیند سے محروم رہتے ہیں۔
تحقیق کے دوران سائنسدانوں نے رات کو متحرک رہنے والے چوہوں اور دن میں سرگرم رہنے والے سوروں پر تجربات کیے۔ خصوصی فلوروسینٹ سینسر کی مدد سے جانوروں کے دماغی مائع میں ٹرپٹامین کی مقدار مختلف اوقات میں ریکارڈ کی گئی۔
نتائج سے معلوم ہوا کہ جتنا زیادہ وقت جانور جاگتے رہے، ان کے دماغی مائع میں ٹرپٹامین کی مقدار بھی اتنی ہی بڑھتی گئی۔ اس سے ظاہر ہوا کہ یہ مالیکیول جسم میں بڑھنے والے سلیپ پریشر یعنی نیند کی قدرتی طلب کی عکاسی کرتا ہے۔
مزید تحقیق سے پتا چلا کہ جاگنے کے دوران متحرک مخصوص اعصابی خلیے ٹرپٹامین خارج کرتے ہیں، جو بعد ازاں GPR139 نامی ریسیپٹر سے جڑ کر دماغ کے اس حصے کو متحرک کرتا ہے جو نیند کو فروغ دینے میں اہم کردار ادا کرتا ہے۔
سائنسدانوں نے تجرباتی طور پر ایسے مرکبات بھی استعمال کیے جو GPR139 ریسیپٹر کو متحرک کرتے ہیں۔ نتائج کے مطابق ان مرکبات سے نہ صرف نیند کا دورانیہ بڑھا بلکہ اس کے معیار میں بھی نمایاں بہتری دیکھی گئی۔
ماہرین کا کہنا ہے کہ اگر مستقبل کی تحقیقات میں یہی حیاتیاتی نظام انسانوں میں بھی ثابت ہو جاتا ہے تو بے خوابی اور دیگر نیند کی خرابیوں کے علاج کے لیے ایسی نئی ادویات تیار کی جا سکیں گی جو موجودہ ادویات کے مقابلے میں زیادہ محفوظ، مؤثر اور کم مضر اثرات کی حامل ہوں گی۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار