بھارتی حکام سے حقوق انسانی تنظیم کا روہنگیا ماں کی رہائی کا مطالبہ
اشاعت کی تاریخ: 2nd, January 2026 GMT
بھارت کی ایک انسانی حقوق کی تنظیم نے نیشنل ہیومن رائٹس کمیشن (این ایچ آر سی) سے اپیل کی ہے کہ وہ ایک کم عمر روہنگیا خاتون اور ان کے 5 ماہ کے بچے کی رہائی کو یقینی بنائے جنہیں عدالتی سزا پوری ہونے کے باوجود مبینہ طور پر غیرقانونی طور پر حراست میں رکھا گیا ہے۔
یہ بھی پڑھیں: بنگلہ دیش نے روہنگیا مہاجرین کو سمیں جاری کرنے کا عمل شروع کردیا
تحریری شکایت میں بنگلار مانب ادھیکار سُرکشا منچا (ماسُم) نے بتایا کہ مذکورہ خاتون، جن کی شناخت مس امینہ (عمر تقریباً 20 سال) کے طور پر کی گئی ہے، کو مغربی بنگال کے ضلع مرشد آباد میں واقع بہارام پور سینٹرل کریکشنل ہوم میں رکھا گیا ہے۔
درخواست کے مطابق امینہ، جو میانمار سے جبری بے دخلی کے بعد بنگلہ دیش پہنچی تھیں اور یو این ایچ سی آر میں رجسٹرڈ ہیں، کو مئی 2025 میں بھارت کے فارنرز ایکٹ کے تحت گرفتار کیا گیا۔
بعد ازاں نادیہ ضلع کی ایک عدالت نے ستمبر 2025 میں انہیں 6 ماہ قید سادہ اور ایک ہزار بھارتی روپے جرمانے کی سزا سنائی جو ادا کی جاچکی ہے۔
مزید پڑھیے: ملائیشیا کے قریب روہنگیا مہاجرین کی کشتی ڈوب گئی، 7 ہلاک، سینکڑوں لاپتا
ماسُم کا کہنا ہے کہ امینہ آٹھ ماہ سے زائد عرصے سے حراست میں ہیں، جس کا مطلب ہے کہ وہ اپنی قانونی سزا سے تقریباً دو ماہ زائد قید کاٹ چکی ہیں، جبکہ ان کے ساتھ ان کی نومولود بیٹی بھی قید ہے۔ تنظیم کے مطابق یہ حراست “کسی قانونی جواز کے بغیر” ہے اور بنیادی آئینی حقوق کی خلاف ورزی کے مترادف ہے۔
خط میں بتایا گیا ہے کہ امینہ کو انسانی اسمگلنگ کے ذریعے بنگلہ دیش-بھارت سرحد کی جانب لایا گیا اور بعد ازاں بھارت میں داخل ہونے پر دیگر افراد کے ساتھ گرفتار کر لیا گیا۔ انسانی حقوق کی تنظیم نے انہیں انسانی اسمگلنگ کا شکار اور ایک کم عمر ماں قرار دیتے ہوئے ان کی کمزور حیثیت پر بھی زور دیا۔
ماسُم نے این ایچ آر سی سے مطالبہ کیا ہے کہ وہ اس معاملے کی تحقیقات کرے، فوری رہائی کو یقینی بنائے اور ذمہ دار حکام کے خلاف کارروائی کرے، جسے تنظیم نے من مانی حراست قرار دیا ہے۔
مزید پڑھیں: ترک پارلیمانی وفد کی بنگلہ دیش کے خارجہ مشیر سے ملاقات، روہنگیا کیمپوں کا دورہ
بھارتی حکام کی جانب سے تاحال ان الزامات پر کوئی عوامی ردِعمل سامنے نہیں آیا، تاہم نیشنل ہیومن رائٹس کمیشن کی جانب سے درخواست کا جائزہ لیے جانے کی توقع ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
بنگلار مانب ادھیکار سُرکشا منچا روہنگیا روہنگیا ماں روہنگیا ماں کی رہائی کی اپیل نیشنل ہیومن رائٹس کمیشن.
ذریعہ
ذریعہ: WE News
کلیدی لفظ: روہنگیا روہنگیا ماں نیشنل ہیومن رائٹس کمیشن بنگلہ دیش
پڑھیں:
’مضبوط رہیں‘، ریپر طلحہ انجم کا بھارتی طلبا کے ساتھ اظہارِ یکجہتی
پاکستان کے معروف ریپر اور گلوکار طلحہ انجم نے نئی دہلی میں تعلیمی نظام کے خلاف احتجاج کرنے والے بھارتی طلبا سے اظہارِ یکجہتی کرتے ہوئے ان کے حوصلے اور ثابت قدمی کو سراہا ہے۔ انہوں نے طلبا پر ہونے والی پولیس کارروائی کے بعد ایک پیغام جاری کرتے ہوئے کہا کہ وہ ان کے غصے اور احساسات کو بخوبی سمجھتے ہیں۔
طلحہ انجم نے اپنی انسٹاگرام اسٹوری پر بھارتی طلبا کے احتجاج کی ایک ویڈیو شیئر کی، جس میں مظاہرین پر آنسو گیس اور لاٹھی چارج ہوتے دکھایا گیا۔ ویڈیو کے ساتھ انہوں نے لکھا کہ ’بھارت کے طلبا مظاہرین کے نام، مجھے آپ کی ثابت قدمی کا بے حد احترام ہے، میں آپ کی مایوسی اور غصے کو سمجھ سکتا ہوں، اور یہ بھی جانتا ہوں کہ آپ کے ساتھ کیا کیا جا رہا ہے، مضبوط رہیں۔‘
طلحہ انجم پاکستان کے سب سے زیادہ سنے جانے والے موسیقاروں میں شمار ہوتے ہیں اور اسٹریمنگ پلیٹ فارم اسپاٹیفائی پر ان کی مقبولیت کئی ریکارڈ قائم کر چکی ہے۔ بھارت میں بھی ان کے مداحوں کی بڑی تعداد موجود ہے۔ گزشتہ برس نیپال میں ایک کنسرٹ کے دوران ایک مداح کی جانب سے بھارتی پرچم پیش کیے جانے پر وہ خبروں میں آئے تھے، بعد ازاں انہوں نے پاکستان میں اس معاملے پر وضاحت بھی کی تھی۔
سماجی اور انسانی مسائل پر کھل کر مؤقف اختیار کرنے والے طلحہ انجم اس سے قبل بھی کئی معاملات پر آواز بلند کر چکے ہیں۔ اپریل میں صومالیہ کے ساحل کے قریب قزاقوں کے قبضے میں جانے والے پاکستانی ملاحوں کی رہائی کے لیے انہوں نے حکومت سے مؤثر اقدامات کا مطالبہ کیا تھا اور وزارتِ خارجہ سے متاثرہ خاندانوں کے لیے مستقل ہیلپ لائن قائم کرنے کی اپیل بھی کی تھی۔
دوسری جانب بھارت میں تعلیمی امتحانات کے مبینہ پیپر لیکس کے خلاف احتجاج کا سلسلہ گزشتہ ماہ سے جاری ہے۔ کاکروچ جنتا پارٹی (CJP) کے پلیٹ فارم سے ہونے والے اس دھرنے میں طلبہ وزیرِ تعلیم دھرمیندر پردھان کے استعفے اور تعلیمی نظام میں اصلاحات کا مطالبہ کر رہے ہیں۔ حالیہ دنوں پارلیمنٹ کی جانب مارچ کی کوشش کے دوران پولیس نے مظاہرین کو روکنے کے لیے طاقت کا استعمال کیا، جس کے نتیجے میں متعدد افراد زخمی ہوئے۔
گلوبل سمٹ میں چینی روبوٹ کو اپنا بتانے والی بھارتی یونیورسٹی کا اسٹال بند، شدید تنقید کا سامنا