اسپین کی عدالت نے پاکستانی شہری کو 36 سال قید کی سزا سنادی
اشاعت کی تاریخ: 23rd, January 2026 GMT
اسپین کی ایک عدالت نے آن لائن محبت کے فراڈ سے جڑے قرض کے تنازع پر 3 بزرگ بہن بھائیوں کے قتل کے مقدمے میں ایک پاکستانی شہری کو 36 سال قید کی سزا سنا دی۔
عدالتی فیصلے کے مطابق پاکستانی نژاد ملزم دلاور حسین کو دسمبر 2023 میں میڈرڈ کے قریب موراتا دے تاخونا میں 2 بزرگ بہنوں اور ان کے معذور بھائی کے قتل کا مجرم قرار دیا گیا۔
یہ بھی پڑھیں: جنسی ہراسگی اور بلیک میلنگ: پاکستانی نژاد برطانوی شہری کو 7 سال قید کی سزا
اکتوبر میں جیوری نے ملزم کو قتل کا مرتکب ٹھہرایا تھا، جس کے بعد میڈرڈ کی عدالت نے ہر قتل پر 12، 12 سال قید کی سزا سناتے ہوئے مجموعی طور پر 36 سال قید کا حکم دیا۔ عدالت نے فیصلے میں نفسیاتی حالت میں بگاڑ کو ایک ہلکا عامل قرار دیا۔
44 سالہ دلاور حسین نے خود پولیس کے سامنے پیش ہو کر قتل کا اعتراف کیا تھا۔ مقتولین کی جزوی طور پر جلی ہوئی لاشیں ان کے گھر سے برآمد ہوئی تھیں۔ تینوں بہن بھائی کی عمریں 70 کی دہائی میں تھیں اور انہیں مبینہ طور پر لوہے کی سلاخ سے مارا گیا تھا۔
عدالت میں بیان دیتے ہوئے ملزم نے معافی مانگی اور کہا کہ وہ آوازیں سنتا تھا اور اس وقت ذہنی طور پر درست حالت میں نہیں تھا۔ مقامی افراد کے مطابق یہ واقعہ ایک جعلی آن لائن محبت کے فراڈ سے جڑا تھا، جس میں دونوں بہنیں یہ سمجھتی رہیں کہ وہ امریکی فوجی اہلکاروں کے ساتھ طویل فاصلے کے تعلق میں ہیں۔
یہ بھی پڑھیں: پاکستانی نژاد مسلم خاندان کے قتل کے جرم میں کینیڈین شہری کو 5 مرتبہ عمر قید کی سزا
اطلاعات کے مطابق بہنوں کو بتایا گیا کہ ایک فوجی اہلکار کی موت ہو چکی ہے جبکہ دوسرے کو ایک بڑے یورو وراثتی فنڈ سے رقم حاصل کرنے کے لیے پیسوں کی ضرورت ہے، جس کے باعث وہ بھاری قرض میں ڈوب گئیں۔ عدالتی ریکارڈ کے مطابق دلاور حسین، جو ان کے گھر میں کرائے پر رہتا تھا، نے بہنوں کو تقریباً 60 ہزار یورو قرض دیا جو واپس نہیں کیا گیا۔
اسی تنازع کے باعث فروری 2023 میں ملزم نے ایک بہن پر ہتھوڑے سے حملہ کیا تھا، جس پر اسے 2 سال قید کی سزا سنائی گئی، تاہم پہلی مرتبہ جرم ہونے کے باعث سزا معطل کردی گئی تھی۔
بعد ازاں دسمبر 2023 میں ہونے والے تہرے قتل کے بعد یہ سخت سزا سنائی گئی۔ ملزم نے فیصلے کے خلاف اپیل بھی دائر کر دی ہے۔ مزید یہ کہ دلاور حسین کو فروری 2024 میں میڈرڈ کی جیل میں اپنے 39 سالہ بلغارین ہم سیل قیدی کے مبینہ قتل کے الزام میں ایک اور مقدمے کا بھی سامنا ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news اسپین پاکستان خاور حسین سزا قتل قید ملزم.
ذریعہ
ذریعہ: WE News
کلیدی لفظ: اسپین پاکستان خاور حسین قتل سال قید کی سزا دلاور حسین کے مطابق عدالت نے شہری کو قتل کے
پڑھیں:
حکومت نے نیشنل امیگریشن اینڈ ویلفیئر پالیسی 2026 کا اجرا کر دیا
وفاقی وزیر اوورسیز پاکستانیز چوہدری سالک حسین نے نیشنل امیگریشن اینڈ ویلفیئر پالیسی 2026 کا اجرا کر دیا۔تقریب سے خطاب کرتے ہوئے انہوں نے کہا کہ آج کا دن پاکستان میں لیبر مائیگریشن کے نظم و نسق کو مضبوط بنانے کی جانب ایک اہم سنگ میل ہے۔ یہ پالیسی ہر اس پاکستانی سے کیے گئے قومی عزم کی عکاس ہے جو بہتر مواقع کی تلاش میں اپنا گھر چھوڑتا ہے۔انہوں نے کہا کہ محفوظ اور منظم نقل مکانی، مہارتوں کی ترقی، کارکنوں کا تحفظ، تارکینِ وطن کی شمولیت اور وطن واپس آنے والوں کی بحالی اس پالیسی کے بنیادی ستون ہیں۔ تکنیکی جدت، آبادیاتی تبدیلیاں اور لیبر مارکیٹ کے بدلتے ہوئے تقاضے دنیا بھر کی معیشتوں کو نئی شکل دے رہے ہیں. اس لیے پاکستان کو اپنی افرادی قوت کو آج اور مستقبل دونوں کے مواقع کے لیے تیار کرنا ہوگا۔ ان کا کہنا تھا کہ نیشنل امیگریشن اینڈ ویلفیئر پالیسی 2026 اس سمت میں ایک اہم قدم اور پاکستان کی افرادی قوت کو مستقبل کے تقاضوں سے ہم آہنگ کرنے میں سنگ میل ثابت ہوگی۔چوہدری سالک حسین نے کہا کہ ایک کروڑ 20 لاکھ پاکستانی دنیا بھر میں مقیم ہیں اور اپنی پیشہ ورانہ مہارت، دیانت داری اور محنت کی بدولت پاکستان کے سفیر بن چکے ہیں۔ گزشتہ مالی سال میں سمندر پار پاکستانیوں نے 41 ارب امریکی ڈالر سے زائد کی ترسیلاتِ زر وطن بھیجیں، جو ملکی تاریخ کی بلند ترین رقم ہے۔ انہوں نے کہا کہ بیرون ملک مقیم پاکستانیوں کی کامیابی پاکستان کی کامیابی ہے اور ان کی فلاح و بہبود ہماری قومی ذمہ داری ہے۔انہوں نے کہا کہ یہ پالیسی اداروں، تجربات اور شراکت داریوں کو ایک مشترکہ وژن کے تحت یکجا کرتی ہے تاکہ ہر پاکستانی کارکن نقل مکانی کے پورے سفر کے دوران بہتر طور پر تیار، محفوظ اور معاونت یافتہ ہو۔ اس پالیسی کا محور ہر اس پاکستانی کا سفر ہے جو مواقع کی تلاش میں اپنا گھر چھوڑتا ہے، جبکہ ذمہ داری روانگی سے پہلے ہی شروع ہو جاتی ہے، جہاں نوجوان کارکنوں کو متعلقہ مہارتیں، قابلِ اعتماد معلومات اور اخلاقی بھرتی تک رسائی فراہم کی جائے گی۔وفاقی وزیر نے کہا کہ اس پالیسی کی کامیابی وفاقی اور صوبائی حکومتوں، نفاذ کرنے والے اداروں، آجروں، تربیتی اداروں، ترقیاتی شراکت داروں، نجی شعبے اور سمندر پار پاکستانیوں کے باہمی تعاون سے مشروط ہے۔ انہوں نے صوبائی حکومتوں، آئی سی ایم پی ڈی (ICMPD)، دیگر ترقیاتی شراکت داروں اور تمام اسٹیک ہولڈرز کا مشاورتی عمل میں تعاون پر شکریہ ادا کیا، جبکہ اسپیشل انویسٹمنٹ فیسیلیٹیشن کونسل (SIFC) کی مسلسل معاونت کو بھی سراہا۔انہوں نے کہا کہ ہجرت یا نقل مکانی غیر یقینی کا سفر نہیں بلکہ مواقع، وقار اور قومی ترقی کا راستہ ہونا چاہیے۔ آئیں مل کر ایسا مستقبل بنائیں جہاں ہر پاکستانی اعتماد کے ساتھ بیرون ملک جائے، فخر کے ساتھ وطن واپس آئے اور ہمیشہ ایک ایسی قوم سے جڑا رہے جو اس کی خدمات کی قدر اور عزت کرتی ہو۔ انہوں نے دعا کی کہ اللہ تعالیٰ اس وژن کو عوام کے لیے بامعنی ترقی، پاکستان کے لیے دیرپا خوشحالی اور ہر سمندر پار پاکستانی اور اس کے خاندان کے روشن مستقبل کا ذریعہ بنائے۔
گلوبل سمٹ میں چینی روبوٹ کو اپنا بتانے والی بھارتی یونیورسٹی کا اسٹال بند، شدید تنقید کا سامنا