منوڑہ کے قریب کشتی حادثہ: لاپتہ ماہی گیروں میں سے ایک کی لاش مل گئی، تلاش جاری
اشاعت کی تاریخ: 24th, January 2026 GMT
کراچی میں منوڑہ کے قریب سمندر میں پیش آنے والے افسوسناک کشتی حادثے کے بعد لاپتہ ہونے والے چار ماہی گیروں میں سے ایک کی لاش برآمد کر لی گئی ہے، جب کہ باقی تین کی تلاش اب بھی جاری ہے۔
نجی میڈیا رپورٹس کے مطابق یہ حادثہ گزشتہ روز اس وقت پیش آیا جب ایک ماہی گیر کشتی سمندر میں ایک بحری جہاز سے ٹکرا کر الٹ گئی۔ کشتی میں مجموعی طور پر 11 ماہی گیر سوار تھے، جن میں سے 7 کو بروقت ریسکیو کر کے بچا لیا گیا تھا، تاہم چار افراد لاپتہ ہو گئے تھے۔
ایدھی فاؤنڈیشن کے رضاکاروں نے ہفتے کے روز جاری ریسکیو آپریشن کے دوران ایک ماہی گیر کی لاش سمندر سے نکالی۔ ریسکیو حکام کے مطابق جاں بحق ہونے والے ماہی گیر کی شناخت 30 سالہ ہارون کے نام سے ہوئی ہے، جس کی لاش ضابطے کی کارروائی کے لیے سول اسپتال منتقل کر دی گئی۔
ایدھی حکام کا کہنا ہے کہ اندھیرے کے باعث ہفتے کی رات سرچ آپریشن عارضی طور پر روک دیا گیا تھا، تاہم باقی تین لاپتہ ماہی گیروں کی تلاش آج اتوار کی صبح دوبارہ شروع کر دی جائے گی۔
حادثے نے ماہی گیر برادری میں گہرے دکھ اور تشویش کی لہر دوڑا دی ہے، جب کہ متاثرہ خاندان اپنے پیاروں کی بحفاظت واپسی کے لیے دعاگو ہیں۔
ذریعہ
ذریعہ: Daily Mumtaz
پڑھیں:
یو اے ای ویزا آن ارائیول کی نئی شرائط اور فیس جاری
دبئی: یو اے ای ویزا آن ارائیول سے متعلق متحدہ عرب امارات نے نئی شرائط، فیس اور درخواست کے طریقہ کار کی تفصیلات جاری کر دی ہیں۔ نئی ہدایات کے تحت مخصوص ممالک کے اہل شہری امارات پہنچنے پر 14 یا 60 روزہ ویزا حاصل کر سکیں گے، تاہم اس کے لیے مقررہ شرائط پر پورا اترنا لازمی ہوگا۔
دبئی کی جنرل ڈائریکٹوریٹ آف آئیڈینٹیٹی اینڈ فارنرز افیئرز (GDRFA) کے مطابق بھارت، انڈونیشیا، ویتنام، تھائی لینڈ، فلپائن، کینیا اور جنوبی افریقہ کے شہری، اور ان کے ہمراہ سفر کرنے والے اہل خانہ، اس سہولت سے فائدہ اٹھا سکتے ہیں۔
حکام کے مطابق درخواست گزار کے پاس کم از کم چھ ماہ کے لیے کارآمد پاسپورٹ، سفید پس منظر والی حالیہ رنگین تصویر اور امریکا، برطانیہ، یورپی یونین، کینیڈا، آسٹریلیا، نیوزی لینڈ، جاپان، جنوبی کوریا یا سنگاپور کی جانب سے جاری کردہ قابل قبول رہائشی پرمٹ یا ویزا ہونا ضروری ہے۔
اعلامیے کے مطابق 14 روزہ ویزا آن ارائیول کو صرف ایک مرتبہ مزید 14 دن کے لیے توسیع دی جا سکتی ہے، جبکہ 60 روزہ ویزا میں توسیع کی سہولت دستیاب نہیں ہوگی۔
جی ڈی آر ایف اے نے بتایا کہ ویزا کے لیے درخواست اس کی سرکاری ویب سائٹ یا اسمارٹ ایپ کے ذریعے جمع کرائی جا سکتی ہے۔ درخواست کی منظوری کے بعد ویزا رجسٹرڈ ای میل پر ارسال کیا جائے گا، جبکہ عام طور پر درخواستوں پر 48 گھنٹوں کے اندر کارروائی مکمل کر لی جاتی ہے۔
فیس کے حوالے سے جاری تفصیلات کے مطابق 14 روزہ ویزا آن ارائیول کی فیس 172.50 درہم جبکہ 60 روزہ ویزا کی فیس 422.50 درہم مقرر کی گئی ہے۔
جی ڈی آر ایف اے کا کہنا ہے کہ اس سہولت کا مقصد بین الاقوامی مسافروں کے لیے سفری عمل کو مزید آسان بنانا، سیاحت کو فروغ دینا اور زیادہ سے زیادہ سیاحوں کو متحدہ عرب امارات کی جانب راغب کرنا ہے۔
ادارے کے اعداد و شمار کے مطابق سال 2026 کے پہلے چھ ماہ کے دوران اس پروگرام کے تحت 73 ہزار 551 ویزے جاری کیے جا چکے ہیں، جو اس سہولت کی بڑھتی ہوئی مقبولیت کی نشاندہی کرتے ہیں۔
اہم وضاحت: جاری کردہ شرائط میں پاکستانی پاسپورٹ ہولڈرز شامل نہیں ہیں۔ یہ سہولت صرف ان مخصوص ممالک کے شہریوں کے لیے ہے جن کا جی ڈی آر ایف اے نے اعلان کیا ہے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار