سانحہ گل پلازہ؛ جماعت اسلامی اور پی ٹی آئی نے احتجاج میں ہمارا ساتھ نہیں دیا، ایم کیو ایم رہنما
اشاعت کی تاریخ: 30th, January 2026 GMT
کراچی:
سندھ اسمبلی میں ایم کیو ایم پاکستان کے اپوزیشن لیڈر علی خورشیدی نے کہا ہے کہ سانحہ گل پلازہ پر احتجاج میں جماعت اسلامی اور پی ٹی آئی نے ہمارا ساتھ نہیں دیا۔
میڈیا گیلری میں پریس کانفرنس سے خطاب کرتے ہوئے علی خورشیدی کا کہنا تھا کہ کراچی میں سانحہ گل پلازہ کے نتیجے میں 80 سے زائد قیمتی جانیں ضائع ہوئیں اور اربوں روپے کا مالی نقصان ہوا۔ اس شہر میں بنیادی سہولیات کا شدید فقدان ہے، امن و امان کی صورتحال بھی خراب ہے۔ یہ وہ شہر ہے جہاں گٹر میں گر کر اور ڈمپر کی ٹکر سے ہلاکتیں ہو جاتی ہیں، ٹرانسپورٹ کی سہولیات تک دستیاب نہیں ہیں۔
علی خورشیدی نے کہا کہ ایم کیو ایم نے ہمیشہ طرزِ حکمرانی پر تنقید کی ہے ۔ سانحہ گل پلازہ کے بعد بھی ان کا پہلا مطالبہ غیر جانبدارانہ انکوائری کا تھا، مگر انکوائری ان ہی لوگوں سے کروائی گئی جو اس سانحہ کے ذمہ دار تھے۔ انہوں نے کہا کہ حکومتی تحقیقاتی کمیٹی کی رپورٹ کل سامنے آئی ہے جس میں بتایا گیا ہے کہ اب جوڈیشل کمیشن بنانا ہوگا جب کہ یہی مطالبہ ایم کیو ایم پہلے دن سے کر رہی تھی اور اس پر انہیں سیاست کرنے کا طعنہ دیا جا رہا تھا۔ اب حکومت نے سندھ ہائیکورٹ کو جوڈیشل کمیشن کے قیام کے لیے خط لکھ دیا ہے۔
اپوزیشن لیڈر نے افسوس کا اظہار کرتے ہوئے کہا کہ ایک افسوسناک صورتحال یہ رہی کہ جماعت اسلامی اور تحریک انصاف کے اراکین نے احتجاج میں ایم کیو ایم کا ساتھ نہیں دیا۔ انہوں نے کہا کہ متحدہ قومی موومنٹ نے عوام کا مقدمہ لڑا اور الحمدللہ کامیاب بھی ہوئے۔
میڈیا سے گفتگو کرتے ہوئے علی خورشیدی کا مزید کہنا تھا کہ سانحہ گل پلازہ پر وفاقی حکومت کی خاموشی بھی تشویشناک ہے۔ سب کو اس حادثے پر جھنجھوڑنے کی کوشش کی مگر افسوسناک بات یہ ہے کہ اس شہر کو وفاق کی جانب سے بھی نظر انداز کیا جا رہا ہے۔ آگ بجھانے والے تمام ادارے میئر کراچی کے ماتحت نہیں ہیں ۔ سوال یہ ہے کہ ایسا کیوں ہے۔
علی خورشیدی نے کہا کہ حکومتی تحقیقاتی رپورٹ میں کسی ذمہ دار کا نام شامل نہیں کیا گیا۔ وہ خود بھی موقع پر موجود تھے ، فائر بریگیڈ کے پاس پانی نہیں تھا، جس کا ذکر حکومتی رپورٹ میں بھی موجود ہے۔ انہوں نے کہا کہ خیر جیسے تیسے تحقیقاتی رپورٹ تیار ہو گئی ہے اور جوڈیشل کمیشن بنانے کا مطالبہ بھی مان لیا گیا ہے، اس لیے اب ایم کیو ایم ایوان میں احتجاج نہیں کرے گی۔
.
ذریعہ
ذریعہ: Express News
کلیدی لفظ: سانحہ گل پلازہ علی خورشیدی ایم کیو ایم
پڑھیں:
حیسکو میں ایک ارب 6 کروڑ سے زائد کی کرپشن کا انکشاف
حیدرآباد الیکٹرک سپلائی کمپنی (حیسکو) میں تنخواہوں اور الاؤنسز کی مد میں ایک ارب 6 کروڑ سے زائد کرپشن کا انکشاف ہوا ہے۔
قومی اسمبلی کی پبلک اکاؤنٹس کمیٹی کے اجلاس میں آڈٹ حکام نے انکشاف کیا کہ حیسکو میں گھوسٹ ملازمین، ڈبل تنخواہوں کے ذریعے قومی خزانے کو نقصان پہنچایا گیا اور وفاقی تحقیقاتی ادارہ (ایف آئی اے)99 کروڑ 62 لاکھ کی مبینہ کرپشن کی تحقیقات کر رہا ہے۔
آڈٹ حکام نے مزید انکشاف کیا کہ حیسکو کی اندرونی انکوائری میں مزید 6 کروڑ 78 لاکھ روپے کی مشتبہ ادائیگیاں ہوئی ہیں۔
چیئرمین کمیٹی شاہدہ اختر کی زیرصدارت اجلاس میں ایف آئی اے حکام نے بتایا کہ اس معاملے میں ایف آئی آرز کی تعداد 5 ہوگئی تھی، 151 ملزمان تھے جن میں سے 14 کو گرفتار کیا گیا جبکہ دیگر ضمانت پر ہیں، ایک ارب روپے میں سے 13 کروڑ روپے کی ریکوری ہوئی ہے۔
رکن کمیٹی قاسم نون نے کہا کہ 13 کروڑ روپے کچھ بھی نہیں ہیں، سخت ایکشن لیا جائے، سید امین الحق نے کہا کہ گھوسٹ ملازمین کی تصدیق بھی کی گئی کہ وہ موجود ہیں۔
سینیٹر افنان اللہ خان نے کہا کہ وزارت کو چاہیے کہ وہ مداخلت کرے اور ذمہ داران کا تعین کرے۔
چیئرمین کمیٹی شاہد اختر نے کہا کہ یہ تو آڈٹ نے نشان دہی کر دی ہے، لگتا ہے کہ پاور ڈویژن کا کوئی چیک اینڈ بیلنس نہیں ہے، جس پر سی ای او حیسکو نے بتایا کہ 756 ملین روپے کی ذمہ داری بھی فکس ہو چکی ہے۔
شاہدہ اختر نے کہا کہ عدالت کے حکم تک یہ آڈٹ پیرا زیر التوا رہے گا، رکن کمیٹی سید حسین طارق نے سوال کیا کہ حیسکو میں بائیو میٹرک سسٹم کیوں نہیں ہے۔
پاکستان پیپلزپارٹی (پی پی پی) کی رکن شازیہ مری نے کہا کہ ہم ڈسکوز کو یہاں کمنٹس کے لیے نہیں احتساب کے لیے بلاتے ہیں، یہ لوگوں کو چور کہتے ہیں اور اپنی پرفارمنس کے گیت گاتے نہیں تھکتے۔
پبلک اکاؤنٹس کمیٹی نے ہدایت کی کہ 13 کروڑ روپے کی ریکوری کی آڈٹ سے تصدیق کرائی جائے، جو ریکوری رہ گئی ہے وہ معاملہ زیر التوا رہے گا۔
گلوبل سمٹ میں چینی روبوٹ کو اپنا بتانے والی بھارتی یونیورسٹی کا اسٹال بند، شدید تنقید کا سامنا