اقوامِ متحدہ کی سلامتی کونسل کی اسلام آباد میں امام بارگاہ پر خودکش حملے کی شدید مذمت
اشاعت کی تاریخ: 14th, February 2026 GMT
اسلام آباد میں امام بارگاہ پر ہونے والے خودکش حملے کی عالمی سطح پر شدید مذمت کی جا رہی ہے۔ اقوامِ متحدہ کی سلامتی کونسل (یو این ایس سی) نے حملے کو ‘گھناؤنا اور بزدلانہ’ قرار دیتے ہوئے کہا ہے کہ عبادت گاہ میں نہتے شہریوں کو نشانہ بنانا انتہائی افسوسناک اور چونکا دینے والا ہے۔
سلامتی کونسل کے صدر جیمز کیریوکی نے بیان میں کہا کہ کونسل اس حملے کی ‘شدید ترین الفاظ میں’ مذمت کرتی ہے۔ انہوں نے عبادت گزاروں کے خلاف بے معنی تشدد پر گہری تشویش کا اظہار کرتے ہوئے ذمہ داران کو انصاف کے کٹہرے میں لانے کی ضرورت پر زور دیا۔
یہ بھی پڑھیے: اسلام آباد: ترلائی کی امام بارگاہ میں دھماکا، 30 سے زیادہ افراد جاں بحق، 80 سے زائد زخمی
سلامتی کونسل نے متاثرین کے اہلِ خانہ، حکومتِ پاکستان اور پاکستانی عوام سے ‘دلی ہمدردی اور تعزیت’ کا اظہار کیا اور زخمیوں کی ‘جلد اور مکمل صحت یابی’ کی دعا کی۔
اپنے دیرینہ مؤقف کو دہراتے ہوئے کونسل نے کہا کہ ‘دہشت گردی اپنی تمام شکلوں اور مظاہر میں بین الاقوامی امن و سلامتی کے لیے سنگین ترین خطرات میں سے ایک ہے۔’
بیان میں مزید کہا گیا کہ سلامتی کونسل کے ارکان نے اس بات پر زور دیا کہ ‘ان قابلِ نفرت دہشت گردانہ کارروائیوں کے مرتکبین، منتظمین، مالی معاونین اور سرپرستوں کو قانون کے کٹہرے میں لایا جائے۔’
کونسل نے تمام ممالک پر زور دیا کہ وہ بین الاقوامی قانون اور متعلقہ سلامتی کونسل کی قراردادوں کے مطابق پاکستان کے ساتھ مکمل تعاون کریں۔
یہ بھی پڑھیے: اسلام آباد کی امام بارگاہ میں خودکش حملہ، امریکا کی مذمت
اس سے قبل اقوامِ متحدہ کے سیکریٹری جنرل انتونیو گوتریس نے بھی حملے کی سخت مذمت کی تھی۔ ان کے ترجمان نے کہا کہ ‘شہریوں اور عبادت گاہوں پر حملے ناقابلِ قبول ہیں’ اور ذمہ دار عناصر کو شناخت کر کے انصاف کے تقاضے پورے کیے جائیں۔
واضح رہے کہ یہ حملہ 6 فروری کو اسلام آباد کے نواحی علاقے میں واقع امام بارگاہ قصرِ خدیجۃ الکبریٰ میں نمازِ جمعہ کے دوران کیا گیا۔ سرکاری حکام کے مطابق حملے میں کم از کم 38 افراد شہید جبکہ 150 سے زائد زخمی ہوئے، جن میں سے متعدد کی حالت تشویشناک بتائی جاتی ہے اور انہیں قریبی اسپتالوں میں منتقل کیا گیا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
.
ذریعہ
ذریعہ: WE News
کلیدی لفظ: سلامتی کونسل امام بارگاہ اسلام آباد حملے کی
پڑھیں:
مستونگ میں فائرنگ،سیشن جج گن مین سمیت شہید،2 افراد زخمی
مستونگ میں فائرنگ سے سیشن جج عبدالحکیم کاکڑ اوران کے گن مین شہید جبکہ ایڈیشنل سیشن جج طارق لاشاری سمیت دو افراد شدید زخمی ہوگئے.وزیراعلیٰ بلوچستان اور وزیر داخلہ نے واقعے کی مذمت کرتے ہوئے فوری کارروائی کا حکم دیا۔ضلع مستونگ میں قومی شاہراہ پرنامعلوم مسلح افراد کی فائرنگ کے نتیجے میں سیشن جج عبدالحکیم کاکڑ اور ان کے گن مین شہید ہوگئے، جبکہ ایڈیشنل سیشن جج طارق لاشاری سمیت دو افراد شدید زخمی ہوگئے۔ڈپٹی کمشنر مستونگ بہرام سلیم کے مطابق سیشن جج عبدالحکیم کاکڑ کوئٹہ سے مستونگ جا رہے تھے کہ راستے میں ان کی گاڑی پر نامعلوم مسلح افراد نے فائرنگ کردی۔واقعے کے بعد لاشوں اور زخمیوں کو فوری طور پر اسپتال منتقل کردیا گیا، جبکہ قانون نافذ کرنے والے اداروں نے علاقے کو گھیرے میں لے کر تحقیقات اور حملہ آوروں کی تلاش شروع کردی۔بلوچستان بار کونسل نے حملے کو نظام انصاف پر دہشت گرد حملہ قرار دیتے ہوئے شدید مذمت کی. واقعے کے خلاف صوبہ بھر میں دو روزہ عدالتی ہڑتال اور تین روزہ سوگ کا اعلان کیا، جبکہ ججز، وکلاء اور شہریوں کے تحفظ کے لیے مؤثر اقدامات اور ملوث عناصر کی فوری گرفتاری کا مطالبہ کیا۔
دوسری جانب وزیراعلیٰ بلوچستان میر سرفراز بگٹی اور صوبائی وزیر داخلہ میر ضیاء اللہ لانگو نے بھی واقعے کی شدید مذمت کرتے ہوئے شہداء کے لواحقین سے اظہار تعزیت کیا اور حملہ آوروں کو جلد قانون کے کٹہرے میں لانے کی ہدایت کی۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار