عمران خان کیخلاف فارن فنڈنگ کیس: عدالت نے مکمل چالان جمع کرانے کی ڈیڈ لائن دیدی
اشاعت کی تاریخ: 21st, February 2026 GMT
اسلام آباد: بینکنگ کورٹ میں سابق وزیر اعظم اور بانی پی ٹی آئی عمران خان کے خلاف فارن فنڈنگ کیس میں اہم پیش رفت سامنے آئی ہے جہاں عدالت نے تفتیشی ادارے کو 5 مارچ تک مکمل چالان جمع کرانے کا حکم دے دیا۔
کیس کی سماعت جج عبدالغفور کاکڑ کے روبرو ہوئی جس دوران تفتیش کے دائرہ کار میں توسیع اور نئے ملزمان کی شمولیت کے باعث کارروائی نے نیا رخ اختیار کر لیا۔
عدالت کو بتایا گیا کہ پاکستان تحریک انصاف کے چیف فنانشل آفیسر سراج احمد اور ایک نجی بینک کے ملازم فیصل قاضی کو بھی شامل تفتیش کر لیا گیا ہے، جس کے بعد کیس کی نوعیت اور دستاویزی پہلوؤں میں مزید وسعت آ گئی ہے۔
ایف آئی اے کے نمائندوں نے مؤقف اختیار کیا کہ دو نئے ملزمان کی شمولیت کے باعث پہلے سے تیار کردہ جزوی چالان کو ازسرنو مرتب کرنے کا فیصلہ کیا گیا ہے تاکہ مکمل اور جامع رپورٹ عدالت میں پیش کی جا سکے۔
سماعت کے دوران اسپیشل پراسیکیوٹر واثق ملک نے عدالت کو آگاہ کیا کہ اس سے قبل کیس کا جزوی چالان جمع کرایا جا چکا ہے، تاہم تازہ پیش رفت کے بعد ضمنی چالان کے بجائے مکمل چالان پیش کرنا زیادہ مناسب ہوگا۔ انہوں نے کہا کہ تمام شواہد، بینکاری ریکارڈ اور متعلقہ دستاویزات کو یکجا کر کے حتمی شکل دی جا رہی ہے تاکہ قانونی تقاضے پورے کیے جا سکیں۔
جج عبدالغفور کاکڑ نے استفسار کیا کہ تفتیش مکمل کرنے اور نیا چالان جمع کرانے کے لیے کتنا وقت درکار ہوگا۔ اس پر اسپیشل پراسیکیوٹر نے عدالت سے 10 سے 15 روز کی مہلت طلب کی اور یقین دہانی کرائی کہ مقررہ مدت میں مکمل چالان جمع کرا دیا جائے گا۔ عدالت نے دلائل سننے کے بعد ایف آئی اے کو 5 مارچ تک مکمل چالان پیش کرنے کا حکم جاری کر دیا۔
دوسری جانب عدالت نے سراج احمد اور فیصل قاضی کی عبوری ضمانت میں بھی 5 مارچ تک توسیع کر دی اور آئندہ سماعت تک انہیں ریلیف فراہم کیا۔
قانونی ماہرین کے مطابق مکمل چالان جمع ہونے کے بعد کیس باقاعدہ ٹرائل کے مرحلے میں داخل ہو سکتا ہے، جہاں شواہد اور گواہوں کی بنیاد پر فرد جرم عائد کیے جانے یا نہ کیے جانے کا فیصلہ ہوگا۔
.
ذریعہ
ذریعہ: Al Qamar Online
کلیدی لفظ: پاکستان کھیل مکمل چالان جمع عدالت نے کے بعد
پڑھیں:
کراچی: زیادتی کی شکار غیرملکی خاتون نے ملزم کو معاف کردیا
کراچی کے علاقے ڈیفنس میں زیادتی کا شکار غیر ملکی خاتون نے ملزم کو معاف کردیا۔ جوڈیشل مجسٹریٹ جنوبی ملزم کے جسمانی ریمانڈ میں چار روز کی توسیع کردی۔
کراچی میں درخشاں تھانے کی حدود میں امریکی خاتون سے زیادتی کے مقدمے کی سماعت جوڈیشل مجسٹریٹ جنوبی کی عدالت میں ہوئی پولیس نے گرفتار ملزم جیسپر عرف آدی محمود کو عدالت میں پیش کیا۔
متاثرہ خاتون نے عدالت میں زیر دفعہ 164 کا بیان ریکارڈ کروایا، متاثرہ خاتون نے ملزم کو معاف کرنے کا بیان دیا۔
پولیس کا کہنا ہے کہ مقدمہ میں ملوث ملزم آدی محمود کو گرفتار کرلیا ہے، ملزم تھانا درخشاں میں گزشتہ ڈیڑھ ماہ سے صفائی کا کام کر رہا تھا۔
خاتون نے بیان میں کہا کہ پولیس افسر نے اس کا دستخط شدہ بیان جلادیا، پولیس افسر نے کہا کہ مقدمہ درج کروائیں ورنہ ہمارے لیے مشکل ہوجائے گی۔
متاثرہ خاتون نے کہا کہ ملزم کی زندگی خراب نہیں کرنا چاہتی۔
عدالت نے متاثرہ خاتون کا بیان کیس کا حصہ بنادیا جبکہ عدالت نے ملزم جیسپر کے جسمانی ریمانڈ میں چار روز کی توسیع کردی۔
عدالت نے تفتیشی افسر کو ملزم کی عمر کے تعین سے متعلق رپورٹ پیش کرنے کی ہدایت کی۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار