’جب بلیو ہونڈا سوک کی جگہ بندوق تھامے شخص آگیا‘
اشاعت کی تاریخ: 31st, October 2025 GMT
اسلام آباد کی رہائشی رمشا تبسم کے لیے چند ہفتے قبل کی ایک رات ان کی زندگی کا سب سے خوفناک لمحہ ثابت ہوئی، وہ محض ایک معمولی سی رائیڈ بُک کر رہی تھیں، مگر انہیں اندازہ نہیں تھا کہ وہ چند منٹوں میں ایک ایسے خطرناک تجربے سے گزریں گی جس نے ان پر گہرا نفسیاتی اثر چھوڑ دیا۔
رمشا تبسم نے بتایا ’میں نے ایک بلیو ہونڈا سوک بُک کروائی تھی۔ جیسے ہی میں اپنے پک پوائنٹ پر پہنچی تو ایک گاڑی پہلے سے کھڑی تھی۔ اُس کا ڈبل انڈیکیٹر آن تھا، لیکن وہ وہ والی گاڑی نہیں تھی جو میں نے ایپ پر دیکھی تھی۔‘
یہ بھی پڑھیں: آن لائن ٹیکسی سروس کریم کے بائیکاٹ کی مہم کیوں چل رہی ہے؟
انہیں کچھ عجیب سا محسوس ہوا۔ کہتی ہیں کہ انہوں نے ڈرائیور سے پوچھا: ’یہ وہی گاڑی نہیں جو میں نے بُک کی تھی، چینج کیوں ہے؟‘
ڈرائیور نے فوراً جواب دیا کہ ایپ پر گاڑی کی اپ ڈیٹ ابھی نہیں ہوئی، نئی پالیسی کے تحت رجسٹریشن کا عمل جاری ہے۔ رمشا تبسم نے کہا کہ چونکہ ڈرائیور کا نام اور تفصیل تقریباً ایک جیسی تھی، اس لیے وہ مطمئن ہوکر بیٹھ گئیں۔
گاڑی اسلام آباد کے علاقے آئی ایٹ مرکز کی طرف روانہ ہوئی۔ راستے میں سب کچھ معمول کے مطابق لگ رہا تھا۔ مگر جیسے ہی گاڑی ایک نسبتاً سنسان اور اندھیرے مقام پر رکی، حالات اچانک بدل گئے۔
رمشا بتاتی ہیں کہ جیسے ہی گاڑی رکی، اُس نے ہینڈ بریک کے ساتھ سے گن نکالی اور مجھ پر تان دی اُس نے کہا ’پرس میں جو کچھ ہے نکالو۔‘
یہ بھی پڑھیں: بائیکیا رائیڈر کے روپ میں 25 وارداتیں کرنے والا ڈکیت گرفتار
اُن کے مطابق اُس لمحے خوف نے انہیں مفلوج کردیا۔ ہاتھ میں موجود موبائل کی لائٹ آن کی تو ایک چونکانے والا انکشاف ہوا۔
’مجھے اندازہ ہوا کہ یہ تو وہ ڈرائیور بھی نہیں تھا جس کی ڈیٹیل ایپ پر تھی۔ گاڑی تو پہلے ہی چینج تھی اور اب وہ ڈرائیور بھی وہ نہیں تھا۔‘
خوف اور گھبراہٹ کے عالم میں انہوں نے شور مچانے کی کوشش کی مگر اردگرد اندھیرا اور سنّاٹا تھا۔ خوش قسمتی سے ایک راہ گیر موٹر سائیکل سوار وہاں سے گزرا، جس کی ہیڈ لائٹس دیکھ کر حملہ آور گھبرا گیا اور موقع سے فرار ہوگیا۔ رمشا تبسم نے اسی وقت پولیس سے رابطہ کیا۔
تاہم، ان کا کہنا ہے کہ پولیس کی کارروائی توقعات کے برعکس تھی۔ ’میں نے 2 بار تھانے جا کر شکایت درج کروانے کی کوشش کی مگر انہوں نے کہا کہ ’ہم دیکھتے ہیں‘ اور کوئی خاص کارروائی نہیں ہوئی۔‘
یہ واقعہ نہ صرف ان کے لیے صدمے کا باعث بنا بلکہ اُن تمام خواتین کے لیے تشویش کی علامت ہے جو روزانہ آن لائن رائیڈنگ ایپس استعمال کرتی ہیں۔
یہ بھی پڑھیں: ;یوں لگا جیسے جرم کررہی ہوں، بائیکیا استعمال کرنے والی خواتین کو کس بات نے رلا دیا
اس حوالے سے اسلام آباد پولیس کے ایس ایس پی ڈاکٹر محمد اقبال نے بتایا کہ شہریوں کی سیکیورٹی کے لیے ایک نیا نظام متعارف کرایا گیا ہے۔
کہتے ہیں کہ ’ہم نے تمام موبائل ٹرانسپورٹ کمپنیوں، جیسے یینگو، ان ڈرائیو اور بائیکیا کے ساتھ میٹنگز کی ہیں۔ پولیس نے ہر ٹیکسی پر ایک کیو آر کوڈ لگانے کا عمل شروع کیا ہے، جسے شہری ہمارے ’ٹی وی ایس ایپ‘ یعنی ٹیکسی ویری فکیشن ایپ کے ذریعے اسکین کرسکتے ہیں۔ جب آپ یہ کوڈ اسکین کرتے ہیں تو گاڑی اور ڈرائیور کی مکمل تفصیل سامنے آ جاتی ہے۔ ہم شہریوں سے گزارش کرتے ہیں کہ رائیڈ میں بیٹھنے سے پہلے یہ کوڈ لازمی اسکین کریں تاکہ فراڈ سے بچا جا سکے۔‘
ماہرِ سوشل سیفٹی سعدیہ قریشی کے مطابق ’پاکستان میں آن لائن ٹرانسپورٹ سروسز نے خواتین کو سہولت تو دی ہے لیکن سیکیورٹی کے اعتبار سے نظام ابھی بھی کمزور ہے۔ ایپ کمپنیاں اکثر ویریفکیشن اور مانیٹرنگ میں لاپرواہی برتتی ہیں، جس کے نتیجے میں ایسے واقعات بڑھ رہے ہیں۔‘
یہ بھی پڑھیں: گن پوائنٹ پر وارداتیں: کیا اسلام آباد بھی اب کراچی جیسا ہو گیا ہے؟
سائبر اور ٹرانسپورٹ سیکیورٹی ماہر احمد وقار کا کہنا ہے کہ اس طرح کے کیسز میں مجرم اکثر جعلی شناختوں کے ذریعے اکاؤنٹس بناتے ہیں۔
’ایپ کمپنیوں کو چاہیے کہ گاڑی اور ڈرائیور کی تبدیلی کی صورت میں صارف کو فوری الرٹ دیا جائے، اور بغیر ویریفکیشن رائیڈ شروع ہی نہ ہو۔‘
رمشا کہتی ہیں کہ وہ اس واقعے کے بعد اتنا گھبرا چکی ہیں کہ اب وہ ہر رائیڈ بُک کروانے سے پہلے ہزار بار سوچتی ہیں۔
’اب جب بھی ایپ کھولتی ہوں تو دل میں خوف سا بیٹھ جاتا ہے۔ میں ہر نمبر، ہر تفصیل چیک کرتی ہوں، کیونکہ ایک بار جو خوف محسوس ہو جائے، وہ آسانی سے نہیں جاتا۔‘
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news اسلام اباد آن لائن ٹیکسی ایپ پاکستان پولیس خواتین ڈکیتی ہونڈا سوک.
ذریعہ
ذریعہ: WE News
کلیدی لفظ: اسلام اباد ا ن لائن ٹیکسی ایپ پاکستان پولیس خواتین ڈکیتی ہونڈا سوک یہ بھی پڑھیں اسلام آباد کے لیے ایپ پر ن لائن ہیں کہ
پڑھیں:
شانگلہ:چھت منہدم‘6بچے‘گاڑی کھائی میں جا گرنے پر 6مسافر گلگت میں جاںبحق
شانگلہ+ گلگت (نامہ نگار+ ایجنسیاں) شانگلہ کے علاقے رحیم آباد باسی میں کچے مکان کی چھت گر گئی جس کے نتیجے میں چھ بچے جاں بحق ہوگئے ۔ریسکیو حکام کے مطابق مکان کے ملبے تلے دب کر 6 بچے‘ کوہستان کے مقام پر گاڑی کھائی میں گرنے سے 6 مسافر جاں بحق ہو گئے۔ تفصیلات کے مطابق جاں بحق ہونے والوں میں 4 بچیاں اور 2 بچے شامل ہیں، جن کی عمریں 4 سے 15 سال کے درمیان تھیں، ایک بچی کو زندہ نکال لیا گیا۔ گلگت بلتستان میں سکردو سے راولپنڈی جانے والی ایک مسافر گاڑی پٹن کوہستان کے علاقے میں کھائی میں گر گئی۔اس ہولناک حادثے کے نتیجے میں گاڑی میں سوار چھ افراد موقع پر ہی جاں بحق ہو گئے۔ دوسری جانب سکردو میں ہی دیوسائی روڈ کی بندش کی وجہ سے سیکڑوں ملکی و غیر ملکی سیاح شدید مشکلات کا شکار ہیں۔ سڑک کا ایک حصہ پانی کے تیز بہائو میں بہہ گیا جس کے بعد سے یہ اہم راستہ ہر قسم کی ٹریفک کے لیے بند ہو چکا ہے۔ پورے علاقے کا رابطہ بھی منقطع ہو چکا ہے جس کی وجہ سے پھنسے ہوئے لوگوں کا اپنے پیاروں سے رابطہ کرنا ناممکن ہو گیا۔ سکردو گلگت روڈ لینڈ سلائیڈنگ کی وجہ سے بند ہونے کے سبب پٹرول کی سپلائی متاثر ہوگئی۔ ہیوی مشینری کے ذریعے راستہ کھولنے کی کوششیں جاری ہیں، قلت کے باعث کئی پیٹرول پمپس بند ہوگئے۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ