2025 میں فیشن کے عجیب و ’’امیر‘‘ رجحانات نے دنیا کو دنگ کردیا
اشاعت کی تاریخ: 31st, December 2025 GMT
فیشن کی دنیا میں 2025 ایک ایسے رجحان کے ساتھ یاد رکھا جائے گا جس نے صارفین کو بیک وقت حیرت اور تشویش میں مبتلا کر دیا۔ عالمی لگژری برانڈز نے اس سال نہایت منفرد، غیر معمولی اور ناقابلِ فہم فیشن آئٹمز متعارف کروائے، جن کی قیمتیں سن کر لوگ یہ سوال کرنے پر مجبور ہو گئے کہ آیا یہ تخلیقی جدت ہے یا صرف توجہ حاصل کرنے کی کوشش۔
اس برس مہنگے مگر چھوٹے فیشن آئٹمز خاص طور پر بحث کا مرکز بنے۔ لگژری برانڈز نے نہ صرف ڈیزائن کے معاملے میں روایات توڑیں بلکہ قیمتوں میں بھی ایسی حدیں عبور کیں جنہیں عام صارف کے لیے سمجھنا مشکل ہوگیا۔ سوشل میڈیا پر یہ سوال بار بار اٹھتا رہا کہ کیا واقعی فیشن کا معیار یہی رہ گیا ہے یا محض غیر معمولی پن ہی نئی لگژری بن چکا ہے۔
پیرانی کی ایک ٹانگ والی جینز
مارچ 2025 میں فرانسیسی لگژری برانڈ کوپیرانی نے ایک ٹانگ والی جینز متعارف کروائی، جس کی قیمت 440 ڈالر رکھی گئی۔ بظاہر ایک عام جینز، مگر ایک ٹانگ کے بغیر، صارفین کے لیے حیرت کا باعث بنی۔ سوشل میڈیا پر کئی افراد نے اسے فیشن کے نام پر سب سے غیر منطقی تجربہ قرار دیا اور سوال اٹھایا کہ ایسی جینز پہننے کا مقصد کیا ہو سکتا ہے۔
داغ دار شرٹ
موسچینو نے مارچ 2025 میں مردانہ فیشن کے لیے ایک ایسی شرٹ متعارف کروائی جس کی جیب پر نیلے رنگ کے قلم کا داغ بنا ہوا تھا۔ اس شرٹ کی قیمت 755 ڈالر رکھی گئی، جس پر لوگوں نے طنزیہ انداز میں کہا کہ اسکول کے زمانے میں قلم کے داغ اس سے کہیں بہتر ہوا کرتے تھے۔
پراڈا کی کولہاپوری چپل
پراڈا کی کولہاپوری چپلیں بھی بحث کا موضوع بنیں، جو 1,500 ڈالر میں فروخت کی گئیں۔ ناقدین کا کہنا تھا کہ اس ڈیزائن میں ایشیائی ثقافت اور کاریگروں کے حوالے کو نظر انداز کیا گیا۔
ٹماٹر کی شکل کا کلچ
جون 2025 میں لووے کی جانب سے پیش کی گئی ٹومیٹو کلچ نے بھی خاصی توجہ حاصل کی، جسے ٹماٹر کی شکل میں دھات کے فریم کے ساتھ تیار کیا گیا تھا اور اس کی قیمت تقریباً 3,950 ڈالر رکھی گئی۔
آٹو رکشہ بیگ
لوئس ووٹن نے اپنے سمر ’26 مردانہ فیشن شو میں ’آٹو بیگ‘ پیش کیا، جو تین پہیوں والے آٹو رکشہ کی شکل میں تیار کیا گیا تھا۔ اس بیگ کی قیمت تقریباً 39 ہزار ڈالر، یعنی لگ بھگ دو کروڑ روپے رکھی گئی، جس پر سوشل میڈیا صارفین نے طنز کرتے ہوئے کہا کہ اتنی رقم میں کئی اصل آٹو رکشے خریدے جا سکتے ہیں۔
کم کارڈیشین کی کمفرٹ وِگ
اکتوبر 2025 میں کِم کارڈیشین نے انڈر گارمنٹس کے تصور کو ایک اور عجیب موڑ دیتے ہوئے ’دی الٹیمیٹ بش‘ کے نام سے مصنوعی بالوں والی کمفرٹ گارمنٹ لانچ کی۔ 32 ڈالر کی قیمت پر دستیاب اس پروڈکٹ میں مصنوعی پبک بال شامل تھے، جو 12 مختلف رنگوں اور بالوں کی ساخت کے انتخاب کے ساتھ فروخت کی گئی، جس پر صارفین نے ملا جلا ردِعمل دیا۔
پراڈا کی سیفٹی پن
نومبر 2025 میں پراڈا کی آن لائن کیٹلاگ میں ایک عام سی سیفٹی پن نظر آئی، جسے ’کراؤچ سیفٹی پن بروچ‘ کا نام دیا گیا تھا۔ اس کی قیمت 775 ڈالر مقرر کی گئی، جو پاکستانی روپے میں دو لاکھ سے زائد بنتی ہے۔ اگرچہ یہ آئٹم جلد ہی کیٹلاگ سے ہٹا دیا گیا، مگر اس وقت تک سوشل میڈیا پر اس کا خوب مذاق بن چکا تھا، اور صارفین نے اسے امیروں کی بے مقصد خریداری کی مثال قرار دیا۔
مجموعی طور پر 2025 لگژری فیشن کے لیے ایک ایسا سال ثابت ہوا جس میں غیر معمولی اور مہنگے آئیڈیاز نے مارکیٹ پر غلبہ حاصل کیے رکھا۔ ناقدین کا کہنا ہے کہ اب فیشن میں خوبصورتی یا افادیت سے زیادہ چونکانے کی صلاحیت اہم ہو چکی ہے، اور لگژری برانڈز کسی بھی منفرد خیال کو بھاری قیمت کے ساتھ پیش کرنے سے نہیں ہچکچا رہے۔
.
ذریعہ
ذریعہ: Express News
کلیدی لفظ: سوشل میڈیا رکھی گئی پراڈا کی کے ساتھ کی قیمت فیشن کے کے لیے کی گئی
پڑھیں:
ایلون مسک نے ’اوڈیسی‘ کا اے آئی ورژن اسی سال پیش کرنے کا اعلان کردیا
ارب پتی ٹیکنالوجی کاروباری شخصیت ایلون مسک نے اعلان کیا ہے کہ ان کا مصنوعی ذہانت پر مبنی پلیٹ فارم گروک امیجن (Grok Imagine) رواں سال کے اختتام سے پہلے قدیم یونانی رزمیہ شاہکار اوڈیسی پر مبنی ایک مکمل فلم تیار کرے گا۔ مسک کا کہنا ہے کہ یہ فلم شاعر ہومر کی اصل تخلیق کے مطابق ہوگی اور تاریخی اعتبار سے بھی زیادہ درست انداز میں پیش کی جائے گی۔
ایلون مسک نے سماجی رابطے کی ویب سائٹ ایکس پر اپنی پوسٹ میں دعویٰ کیا کہ اے آئی کے ذریعے بنائی جانے والی یہ فلم ہومر کے اصل فن اور کہانی کی حقیقی روح کی عکاسی کرے گی۔ انہوں نے اس اعلان کے ساتھ تقریباً تین منٹ طویل ایک اے آئی ویڈیو بھی شیئر کی، جس میں اوڈیسیئس اور کلیپسو کے درمیان ایک منظر دکھایا گیا ہے۔
Before this year ends, Grok Imagine will make a full-length movie of The Odyssey that is historically accurate and true to the art of Homer https://t.co/bVHzUmY9WN
— Elon Musk (@elonmusk) July 22, 2026اس سے قبل بھی ایلون مسک نے ایک صارف کی اس تجویز کی حمایت کی تھی کہ ہدایت کار میل گبسن تقریباً 100 ملین ڈالر کی لاگت سے اوڈیسی پر ایسی فلم بنائیں جس میں تاریخی طور پر درست جہاز، ہتھیار، زرہیں، کردار اور ہومر کی اصل نظم کے مکالمے شامل ہوں۔ اس تجویز پر مسک نے مختصر جواب دیتے ہوئے کہا تھا، ’میں تیار ہوں۔‘
دوسری جانب ایلون مسک حالیہ دنوں میں برطانوی نژاد امریکی فلم ساز کرسٹوفر نولن کی فلم اوڈیسی پر بھی سخت تنقید کرتے رہے ہیں۔ ان کا الزام ہے کہ نولن نے ایوارڈز حاصل کرنے کی غرض سے اصل داستان میں تبدیلیاں کیں۔ انہوں نے فلم کی کاسٹنگ پر بھی اعتراض اٹھایا، خاص طور پر اداکارہ لوپیٹا نیونگو کو ہیلن آف ٹرائے کے کردار میں لینے کے فیصلے کو تنقید کا نشانہ بنایا، جبکہ ایک موقع پر نولن کو ’نسل پرستانہ رویہ رکھنے والا‘ فلم ساز بھی قرار دیا۔
تاہم ایلون مسک کی تنقید کے باوجود کرسٹوفر نولن کی اوڈیسی نے باکس آفس پر شاندار آغاز کیا ہے۔ باکس آفس رپورٹس کے مطابق فلم نے ریلیز کے پہلے ہفتے میں دنیا بھر سے 264.06 ملین ڈالر سے زائد کا بزنس کیا، جس کے بعد اسے رواں برس کی نمایاں کامیاب فلموں میں شمار کیا جا رہا ہے۔
گلوبل سمٹ میں چینی روبوٹ کو اپنا بتانے والی بھارتی یونیورسٹی کا اسٹال بند، شدید تنقید کا سامنا