برآمدات پر مبنی ترقیاتی اہداف ہماری اولین ترجیح ہے، وزیراعظم
اشاعت کی تاریخ: 7th, January 2026 GMT
اسلام آباد:(نیوزڈیسک) وزیراعظم محمد شہباز شریف کی زیر صدارت ملکی برآمدات کے فروغ کے حوالے سے اعلیٰ سطحی جائزہ اجلاس منعقد ہوا، جس میں برآمدات پر مبنی ترقیاتی اہداف کے حصول کو حکومت کی ترجیح قرار دیا گیا۔ وزیراعظم نے خصوصاً زرعی برآمدات میں اضافے اور تجارتی خسارے میں کمی کے لیے واضح اور قابلِ عمل لائحہ عمل تیار کرنے کی ہدایت کی۔
اجلاس کے دوران وزیراعظم نے چاول کی برآمدات میں اضافے کے لیے رائس ایکسپورٹرز ایسوسی ایشن کے ساتھ مل کر جامع حکمت عملی ترتیب دینے کی ہدایت دیتے ہوئے کہا کہ برآمدات میں اضافے اور ایکسپورٹرز کو سہولیات کی فراہمی کے لیے ادارہ جاتی اصلاحات پر کام تیز کیا جائے۔ انہوں نے واضح کیا کہ برآمد کنندگان کو ٹیکس ری فنڈز کی ادائیگی میں کسی قسم کی کوتاہی قابل قبول نہیں ہوگی۔
اجلاس کو برآمدات میں اضافے سے متعلق حکومتی حکمت عملی پر تفصیلی بریفنگ دی گئی، جس میں جولائی تا دسمبر 2025 کے تجارتی اعداد و شمار پیش کیے گئے۔ شرکاء کو ہائی ویلیو سیکٹرز، جن میں انجینئرنگ، ادویات، میڈیکل ڈیوائسز اور پراسیسڈ فوڈ شامل ہیں، کی برآمدات بڑھانے کے اقدامات سے بھی آگاہ کیا گیا۔
بریفنگ میں بتایا گیا کہ ملکی برآمدات کو گلوبل ویلیو چین کا حصہ بنانے پر کام جاری ہے، جبکہ ایکسپورٹرز کو سہولت فراہم کرنے کے لیے بندرگاہوں اور لاجسٹکس نظام میں بہتری لائی جا رہی ہے۔اجلاس کو یہ بھی بتایا گیا کہ چاول کی برآمدات کے حوالے سے متعدد ممالک کے ساتھ گورنمنٹ ٹو گورنمنٹ معاہدوں پر بات چیت جاری ہے۔
اجلاس میں وفاقی وزیر خزانہ و محصولات محمد اورنگزیب، وفاقی وزیر قومی غذائی تحفظ و تحقیق رانا تنویر حسین، وفاقی وزیر اطلاعات و نشریات عطاء اللہ تارڑ، وزیر مملکت برائے خزانہ و ریلوے بلال اظہر کیانی، گورنر اسٹیٹ بینک آف پاکستان جمیل احمد اور متعلقہ اعلیٰ سرکاری افسران نے شرکت کی۔
.
ذریعہ
ذریعہ: Daily Mumtaz
کلیدی لفظ: برا مدات میں اضافے کی برا مدات کے لیے
پڑھیں:
سرکاری ملازمین کے سفری اور تفریقی الاؤنس میں اضافے کی منظوری، نئی شرحیں جاری
کراچی: سندھ حکومت نے سرکاری ملازمین کو مہنگائی کے اثرات سے ریلیف دینے کے لیے سفری الاؤنس اور تفریقی الاؤنس میں اضافے کی منظوری دے دی ہے۔ وزیراعلیٰ سندھ سید مراد علی شاہ کی زیر صدارت ہونے والے صوبائی کابینہ کے اجلاس میں اس فیصلے کی منظوری دی گئی، جبکہ نئی شرحوں کا اطلاق یکم جولائی 2026 سے ہوگا۔
صوبائی کابینہ نے سرکاری ملازمین کے لیے ریلیف پیکیج، صحت، تعلیم، بنیادی ڈھانچے، گورننس اور غذائی تحفظ سے متعلق متعدد اہم فیصلوں کی منظوری بھی دی۔
بی پی ایس 1 سے 16 تک ملازمین کے لیے تفریقی الاؤنس
کابینہ نے بی پی ایس 1 سے 16 تک کے ملازمین کے لیے تفریقی الاؤنس 2026 کی منظوری دی ہے۔ یہ الاؤنس منجمد بنیادی پے اسکیل 2022، جو 30 جون 2026 تک نافذ تھا، پر 2 فیصد کی شرح سے ادا کیا جائے گا۔
حکومت کے مطابق اس الاؤنس کا مقصد وہ فرق ختم کرنا ہے جو 2025 میں سندھ حکومت کی جانب سے وفاقی حکومت کے مقابلے میں زیادہ تنخواہوں میں اضافے کے باعث پیدا ہوا تھا۔
سفری الاؤنس میں 50 فیصد اضافہ
سندھ کابینہ نے تمام صوبائی سرکاری ملازمین کے سفری الاؤنس میں 50 فیصد اضافے کی بھی منظوری دی ہے۔ نئی شرحیں درج ذیل ہوں گی:
گریڈ پرانا الاؤنس نیا الاؤنس
بی پی ایس 1 تا 4 1,785 روپے 2,678 روپے
بی پی ایس 5 تا 10 1,932 روپے 2,898 روپے
بی پی ایس 11 تا 15 2,856 روپے 4,284 روپے
بی پی ایس 16 اور اس سے اوپر 5,000 روپے 7,500 روپے
معذور ملازمین کے لیے خصوصی سہولت
کابینہ نے معذور سرکاری ملازمین کے لیے خصوصی سفری الاؤنس میں بھی اضافہ کرتے ہوئے اسے 6 ہزار روپے سے بڑھا کر 10 ہزار روپے ماہانہ کرنے کی منظوری دی ہے۔ یہ رقم معمول کے سفری الاؤنس کے علاوہ ادا کی جائے گی۔
اطلاق کب سے ہوگا؟
حکومت سندھ کے مطابق سفری اور تفریقی الاؤنس سے متعلق تمام منظور شدہ فیصلوں پر یکم جولائی 2026 سے عمل درآمد ہوگا اور یہ موجودہ قواعد و ضوابط کے تحت نافذ رہیں گے۔
دوسری جانب صوبائی کابینہ نے ایگزیکٹو الاؤنس دینے کی تجویز منظور نہیں کی۔ وزیر اطلاعات نے اجلاس کے بعد میڈیا کو بریفنگ دیتے ہوئے بتایا کہ اس تجویز پر فی الحال اتفاق نہیں ہو سکا۔
سندھ حکومت کا کہنا ہے کہ ان اقدامات کا مقصد بڑھتی مہنگائی کے تناظر میں سرکاری ملازمین کو مالی ریلیف فراہم کرنا اور ان کے سفری اخراجات میں کمی لانا ہے، جبکہ آئندہ بھی ملازمین کی فلاح و بہبود کے لیے اقدامات جاری رکھے جائیں گے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار