بنگلہ دیش کی عبوری حکومت نے جولائی عوامی تحریک کے شرکا کو قانونی تحفظ دینے کی منظوری دیدی
اشاعت کی تاریخ: 15th, January 2026 GMT
بنگلہ دیش کی عبوری حکومت نے جولائی 2024 کی عوامی تحریک میں شریک افراد کو قانونی استثنا دینے کی منظوری دے دی ہے۔ اس مقصد کے لیے ایڈوائزری کونسل نے ایک آرڈیننس کی منظوری دی، جسے جمہوریت کی بحالی کے لیے کی گئی سیاسی مزاحمت سے جوڑا جارہا ہے۔
یہ بھی پڑھیں: بنگلہ دیش: جولائی تحریک کے 31 متاثرین کا پاکستان میں علاج کا فیصلہ
یہ فیصلہ چیف ایڈوائزر محمد یونس کی زیر صدارت تیجگاؤں، ڈھاکہ میں ہونے والے اجلاس میں کیا گیا۔ اجلاس کے بعد قانون کے مشیر آصف نذرل نے فارن سروس اکیڈمی میں میڈیا کو بریفنگ دیتے ہوئے بتایا کہ یہ آرڈیننس آئندہ 5 سے 7 دن کے اندر گزٹ کر دیا جائے گا۔
بنگلہ دیش کے مشیر برائے قانون آصف نزرل کے مطابق جولائی ماس اپ رائزنگ پروٹیکشن اینڈ اکاؤنٹیبلٹی آرڈیننس کے تحت جولائی اور اگست کے دوران کیے گئے ان اقدامات کو قانونی تحفظ حاصل ہوگا جو فاشسٹ نظام کے خاتمے اور جمہوری نظام کی بحالی کے لیے سیاسی مزاحمت کے دائرے میں آتے ہیں۔
انہوں نے کہا کہ حکومت جولائی تحریک کے شرکا کے خلاف درج تمام مقدمات واپس لے گی اور اس نوعیت کے نئے مقدمات کے اندراج پر بھی پابندی ہوگی۔
یہ بھی پڑھیں: بنگلہ دیش میں انتخابات: امن و امان کے لیے سیکیورٹی اداروں کو غیر معمولی اختیارات تفویض
انہوں نے واضح کیا کہ یہ قانونی استثنا قتل یا ذاتی مفاد، ذاتی دشمنی یا انتقامی کارروائی کے تحت کیے گئے جرائم پر لاگو نہیں ہوگا، چاہے انہیں سیاسی مزاحمت کا نام دیا گیا ہو۔ ان کا کہنا تھا کہ یہ قانون ذاتی لالچ یا ذاتی رنجش کی بنیاد پر کیے گئے قتل کو تحفظ دینے کے لیے نہیں بنایا گیا۔
آصف نذرل نے بتایا کہ یہ تعین کرنا کہ کوئی قتل سیاسی مزاحمت کا حصہ تھا یا ذاتی جرم، نیشنل ہیومن رائٹس کمیشن کے سپرد کیا جائے گا، متاثرہ خاندان اگر یہ سمجھتے ہوں کہ قتل کا جولائی تحریک سے کوئی تعلق نہیں تھا تو وہ کمیشن میں درخواست دے سکتے ہیں۔
کمیشن کی تحقیقاتی رپورٹ کو پولیس رپورٹ کے برابر قانونی حیثیت حاصل ہوگی اور اسے عدالت میں پیش کیا جائے گا۔
یہ بھی پڑھیں: عثمان ہادی کے قتل میں ملوث کسی فرد کو نہیں بخشا جائے گا، بنگلہ دیش
صحافیوں کے سوال پر قانون کے مشیر نے کہا کہ نیشنل ہیومن رائٹس کمیشن 31 جنوری تک دوبارہ تشکیل دیا جائے گا۔ انہوں نے زور دیا کہ یہ آرڈیننس جولائی تحریک کے شرکا سے عبوری حکومت کے پہلے سے کیے گئے وعدے کی تکمیل ہے، تاہم سیاسی مزاحمت کے دائرے سے باہر آنے والے جرائم پر احتساب بدستور ہوگا۔
یہ فیصلہ بنگلہ دیش کے سیاسی اور قانونی حلقوں میں بحث کو جنم دے سکتا ہے، خاص طور پر ایسے وقت میں جب ملک 2025 کے وسط میں پیش آنے والے سیاسی بحران کے بعد عبوری مرحلے سے گزر رہا ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news آصف نزرل بنگلہ دیش جولائی تحریک چیف ایڈوائزر محمد یونس عوامی تحریک قانونی تحفظ مشیر قانون.
ذریعہ
ذریعہ: WE News
کلیدی لفظ: بنگلہ دیش جولائی تحریک چیف ایڈوائزر محمد یونس عوامی تحریک سیاسی مزاحمت جولائی تحریک بنگلہ دیش تحریک کے جائے گا کیے گئے کے لیے
پڑھیں:
کوئٹہ، سرکاری دفاتر میں ایجنٹس کیخلاف ایف آئی اے کی کارروائی، 14 افراد گرفتار
ڈائریکٹر ایف آئی اے بلوچستان کے مطابق ملزمان مبینہ طور پر برتھ سرٹیفکیٹس، قومی شناختی کارڈز، پاسپورٹس اور دیگر سرکاری دستاویزات کے حصول کیلئے غیر قانونی طریقے سے سہولت فراہم کرتے اور شہریوں سے رقوم وصول کرتے تھے۔ اسلام ٹائمز۔ وفاقی تحقیقات ادارے ایف آئی ای نے کوئٹہ شہر میں مختلف وفاقی اداروں کے مبینہ ایجنٹس کے خلاف بڑے پیمانے پر کریک ڈاؤن کرتے ہوئے 14 افراد کو گرفتار کرلیا ہے۔ ڈائریکٹر ایف آئی اے بلوچستان بہرام مندوخیل کے مطابق کارروائی کے دوران نادرا، سوئی سدرن گیس کمپنی، پاسپورٹ آفس اور میٹروپولیٹن کارپوریشن سے متعلق مبینہ ایجنٹس کو حراست میں لیا گیا ہے، جو شہریوں کو مختلف سرکاری امور میں غیر قانونی سہولت کاری فراہم کرنے میں ملوث تھے۔ انہوں نے بتایا کہ گرفتار ملزمان مبینہ طور پر برتھ سرٹیفکیٹس، قومی شناختی کارڈز، پاسپورٹس اور دیگر سرکاری دستاویزات کے حصول کے لئے غیر قانونی طریقے سے سہولت فراہم کرتے اور شہریوں سے رقوم وصول کرتے تھے۔
ڈائریکٹر ایف آئی اے نے کہا کہ گرفتار ملزمان سے تفتیش جاری ہے اور ابتدائی تحقیقات کی روشنی میں ان کے نیٹ ورک میں شامل دیگر افراد کی نشاندہی کی جا رہی ہے۔ امید ہے کہ مزید گرفتاریاں بھی عمل میں آئیں گی۔ بہرام مندوخیل نے کہا کہ ایف آئی اے سرکاری اداروں میں بدعنوانی، جعلسازی اور غیر قانونی سہولت کاری کے خاتمے کے لئے کارروائیاں جاری رکھے گی اور قانون شکنی میں ملوث عناصر کے خلاف بلاامتیاز کارروائی کی جائے گی۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار