اندھیرا، دھواں اور بند دروازے، سانحہ گل پلازہ کیسے پیش آیا؟ ہوشربا انکشافات
اشاعت کی تاریخ: 20th, January 2026 GMT
کراچی کے مصروف علاقے ایم اے جناح روڈ پر واقع گل پلازہ میں پیش آنے والے المناک سانحے سے متعلق دل دہلا دینے والے انکشافات سامنے آگئے ہیں، جنہوں نے حادثے کو ایک بڑے سانحے میں بدلنے کی وجوہات کو بے نقاب کر دیا ہے۔
متاثرہ دکانداروں کے مطابق گل پلازہ میں مجموعی طور پر 26 داخلی و خارجی دروازے موجود ہیں، تاہم معمول کے مطابق رات 10 بجے کے بعد 24 دروازے بند کر دیے جاتے تھے اور صرف 2 گیٹس کھلے رکھے جاتے تھے۔
افسوسناک واقعے کے وقت بھی یہی صورتحال تھی، جس کے باعث عمارت میں موجود افراد کو باہر نکلنے میں شدید مشکلات کا سامنا کرنا پڑا۔
یہ بھی پڑھیے سانحہ گل پلازہ: آنکھوں میں امید لیے پریشان اہل خانہ کیا کہتے ہیں؟
دکانداروں کا کہنا ہے کہ آگ لگنے کے وقت عمارت میں کوئی ایمرجنسی ایگزٹ موجود نہیں تھا، جبکہ آگ انتہائی تیزی سے پھیل گئی اور چند ہی لمحوں میں پوری مارکیٹ دھوئیں سے بھر گئی۔
صورتحال اس وقت مزید خطرناک ہوگئی جب آگ کے دوران بجلی بھی بند تھی، جس کے باعث عمارت مکمل اندھیرے میں ڈوب گئی۔ نہ کچھ نظر آرہا تھا اور نہ ہی کسی کو یہ سمجھ آرہا تھا کہ باہر نکلنے کا راستہ کون سا ہے۔
متاثرین کے مطابق اندھیرے اور دھوئیں کے باعث شدید بھگدڑ مچ گئی، جبکہ دم گھٹنے کے سبب کئی افراد کو سانس لینے میں شدید دشواری کا سامنا کرنا پڑا۔ دکانوں میں موجود ورکرز اور گاہک خوف و ہراس کا شکار ہو گئے، اور کچھ ہی دیر بعد متعدد افراد بے ہوش ہو کر زمین پر گر پڑے۔
یہ بھی پڑھیے ’گل پلازہ کی آگ اور وہ ادھوری خریداری جو کبھی مکمل نہ ہو سکی‘
دکانداروں نے بتایا کہ ریسکیو کا بروقت انتظام نہ ہونے کے باعث کئی افراد کو اپنی مدد آپ کے تحت عمارت سے باہر نکالا گیا، جس سے کئی قیمتی جانیں بچ سکیں، تاہم بند دروازوں اور ناقص حفاظتی انتظامات نے جانی نقصان میں اضافہ کر دیا۔
واضح رہے کہ گل پلازہ میں آگ بجھنے کے بعد ملبہ ہٹانے اور لاپتا افراد کی تلاش کا کام تاحال جاری ہے۔ اب تک 26 افراد کے جاں بحق ہونے کی تصدیق ہوچکی ہے، جبکہ 83 افراد اب بھی لاپتا ہیں۔
سانحے نے شہر میں تجارتی عمارتوں کے حفاظتی انتظامات پر سنگین سوالات کھڑے کر دیے ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
سانحہ گل پلازہ.
ذریعہ
ذریعہ: WE News
کلیدی لفظ: سانحہ گل پلازہ گل پلازہ کے باعث
پڑھیں:
چیمپئنز لیگ جیتنے کی خوشی تشدد میں بدل گئی، پیرس میں جلاؤ گھیراؤ اور پولیس سے جھڑپیں
یورپی چیمپئنز لیگ میں پی ایس جی کی کامیابی کے بعد فرانس کے دارالحکومت پیرس میں جشن پرتشدد ہنگاموں میں تبدیل ہو گیا۔ مظاہرین اور پولیس کے درمیان جھڑپوں، جلاؤ گھیراؤ اور توڑ پھوڑ کے واقعات میں متعدد افراد زخمی ہوئے، جبکہ پولیس نے 400 سے زائد افراد کو حراست میں لے لیا۔
یورپی چیمپئنز لیگ کے فائنل میں پی ایس جی کی فتح کے بعد فرانس کے دارالحکومت پیرس میں جشن کا ماحول بدامنی اور تشدد میں تبدیل ہو گیا، جہاں مشتعل افراد نے جلاؤ گھیراؤ، توڑ پھوڑ اور پولیس کے ساتھ جھڑپوں کا سلسلہ شروع کر دیا۔
میڈیا رپورٹس کے مطابق شہر کے مختلف علاقوں میں مظاہرین نے بوتل بم پھینکے، متعدد دکانوں پر حملے کیے اور سڑکوں پر موجود کچرے کے ڈبوں سمیت دیگر اشیا کو آگ لگا دی۔ ہنگامہ آرائی کے دوران درجنوں گاڑیوں کو بھی نقصان پہنچایا گیا۔
مظاہرین اور پولیس کے درمیان ہونے والی جھڑپوں میں کم از کم سات پولیس اہلکار زخمی ہوئے۔ بعض شرپسند عناصر نے آتش بازی کا رخ آسمان کے بجائے پولیس اہلکاروں کی جانب کر دیا، جس کے باعث کشیدگی میں مزید اضافہ ہوا۔
فرانسیسی پولیس نے کارروائی کرتے ہوئے 400 سے زائد افراد کو گرفتار کر لیا۔ حکام کے مطابق گرفتار افراد کے قبضے سے تیزاب سے بھری بوتلیں اور دیگر خطرناک مواد بھی برآمد کیا گیا ہے۔
حکام کو پہلے ہی ممکنہ ہنگامہ آرائی کا خدشہ تھا، جس کے پیش نظر پیرس میں 22 ہزار سے زائد پولیس اہلکار تعینات کیے گئے تھے۔ اس کے باوجود شہر کے مختلف حصوں میں جلاؤ گھیراؤ اور پرتشدد واقعات کو مکمل طور پر روکنا ممکن نہ ہو سکا۔
واضح رہے کہ پیرس سینٹ جرمین (PSG) نے چیمپئنز لیگ کے فائنل میں آرسنل کو شکست دے کر ٹائٹل اپنے نام کیا، جس کے بعد ہزاروں شائقین جشن منانے کے لیے سڑکوں پر نکل آئے۔ تاہم بعض مقامات پر یہ جشن بدامنی اور تشدد میں تبدیل ہو گیا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ