میدانی علاقوں میں بارش‘ پہاڑوں پر برفباری‘ لاہور میں بھی بادل برس پڑے
اشاعت کی تاریخ: 23rd, January 2026 GMT
لاہور (نوائے وقت رپورٹ) ملک بھر کے میدانی علاقوں میں بارش اور پہاڑوں پر برفباری جاری ہے، پنجاب کے صوبائی دارالحکومت میں بھی بادل برس پڑے، ایبٹ روڈ، لکشمی، گوالمنڈی سمیت شہر کے مختلف علاقوں میں بارش ہو گئی۔ شہر کا موسم ابرآلود ہے، تیز ہوائیں چل رہی ہیں، جوہرٹاو ن، جیل روڈ اور ملحقہ علاقوں میں ہلکی بارش، شادمان ،ایوان صنعت وتجارت روڈ ،قرطبہ چوک پر بھی بارش شروع ہوگئی، ٹاو ن شپ، باگڑیاں اور گرین ٹاو ن کے اطراف بھی بوندا باندی کا سلسلہ جاری ہے۔ شہر میں ہونے والی بارش سے بجلی کا ترسیلی نظام متاثر، بارش کے باعث لیسکو کے 150 سے زائد فیڈرز ٹرپ کر گئے۔ بجلی کی بندش سے شہری پریشان ہیں، لیسکو انتظامیہ کی جانب سے تمام فیلڈ سٹاف کو ہائی الرٹ کر دیا گیا۔ دوسری جانب ترجمان سینٹرل ریجن سید عمران احمد کے مطابق لاہور اسلام آباد موٹروے ایم 2 کے مختلف مقامات پر بوندا باندی ہوئی، پنڈی بھٹیاں ملتان موٹروے ایم 4 کے مختلف حصوں میں ہلکی بوندا باندی ہوئی۔ ترجمان سینٹرل ریجن کے مطابق موٹروے ایم 5 ملتان تا رحیم یار خان متعدد مقامات پربارش کا سلسلہ جاری ہے۔ لاہور سیالکوٹ موٹروے ایم 11 پر بھی بارش جاری ہے۔ سید عمران خان کے مطابق سینٹرل زون قومی شاہراہ پر مانگا منڈی، پتوکی، اوکاڑہ میں ہلکی بارش ہوئی، میاں چنوں، خانیوال، بہاولپور، احمد پور شرقیہ اور رحیم یار خان میں بارش ہوئی۔ کوئٹہ ہند اور اوڑک میں شدید برفباری ہوئی۔ نجی ٹی وی کے مطابق 9 انچ برف پڑی شدید سردی میں متعدد گاڑیاں پھنس گئیں۔ گاڑیوں میں کئی فیملیز بھی موجود ہیں۔ زیارت‘ چمن پشین‘ مستونگ‘ حلات‘ کان میترزئی میں برفباری جاری ہے۔ گھر‘ درخت اور گاڑیاں برف سے ڈھک گئے۔ ضلع نوشکی میں دس سال بعد بر فباری ہوئی۔ مظفر آباد شہر میں بارش‘ پہاڑوں پر برفباری ہوئی۔ اپر ہزارہ ڈویژن کے میدانی علاقوں میں بارش اور پہاڑوں پر برفباری ہوئی۔ شوگرامن میں ڈیڑھ انچ‘ ناران میں 6 انچ برف پڑ چکی ہے۔ وادی لیپا‘ وادی کھلانہ‘ پانڈو سیکٹر ‘ گنگا چوٹی‘ چھم ویلی‘ شانگلہ ‘ الپوری ‘ شاہپور مکانا‘ ہٹیاں بالا‘ چناری‘ چکوٹھی‘ لیپا ویلی میں بارش اور پہاڑوں پر برفباری ہوئی۔ بجلی معطل ہوگئی۔ کوئٹہ سمیت بالائی‘ شمالی بلوچستان میں برفباری کے بعد درجہ حرارت نقطہ انجماد سے گر گیا۔ محکمہ موسمیات کے مطابق کوئٹہ میں درجہ حرارت منفی 6 ریکارڈ کیا گیا۔ قلات اور زیارت میں درجہ حرارت نقطہ انجماد سے 11 درجے گر گیا۔ کان مہترزئی میں درجہ حرارت منفی ریکارڈ کیا گیا۔ کوئٹہ اور بالائی بلوچستان میں آئندہ 24 گھنٹوں میں موسم مزید سرد ہو گا۔
.
ذریعہ
ذریعہ: Nawaiwaqt
کلیدی لفظ: پہاڑوں پر برفباری علاقوں میں بارش برفباری ہوئی موٹروے ایم کے مطابق جاری ہے
پڑھیں:
یو اے ای ویزا آن ارائیول کی نئی شرائط اور فیس جاری
دبئی: یو اے ای ویزا آن ارائیول سے متعلق متحدہ عرب امارات نے نئی شرائط، فیس اور درخواست کے طریقہ کار کی تفصیلات جاری کر دی ہیں۔ نئی ہدایات کے تحت مخصوص ممالک کے اہل شہری امارات پہنچنے پر 14 یا 60 روزہ ویزا حاصل کر سکیں گے، تاہم اس کے لیے مقررہ شرائط پر پورا اترنا لازمی ہوگا۔
دبئی کی جنرل ڈائریکٹوریٹ آف آئیڈینٹیٹی اینڈ فارنرز افیئرز (GDRFA) کے مطابق بھارت، انڈونیشیا، ویتنام، تھائی لینڈ، فلپائن، کینیا اور جنوبی افریقہ کے شہری، اور ان کے ہمراہ سفر کرنے والے اہل خانہ، اس سہولت سے فائدہ اٹھا سکتے ہیں۔
حکام کے مطابق درخواست گزار کے پاس کم از کم چھ ماہ کے لیے کارآمد پاسپورٹ، سفید پس منظر والی حالیہ رنگین تصویر اور امریکا، برطانیہ، یورپی یونین، کینیڈا، آسٹریلیا، نیوزی لینڈ، جاپان، جنوبی کوریا یا سنگاپور کی جانب سے جاری کردہ قابل قبول رہائشی پرمٹ یا ویزا ہونا ضروری ہے۔
اعلامیے کے مطابق 14 روزہ ویزا آن ارائیول کو صرف ایک مرتبہ مزید 14 دن کے لیے توسیع دی جا سکتی ہے، جبکہ 60 روزہ ویزا میں توسیع کی سہولت دستیاب نہیں ہوگی۔
جی ڈی آر ایف اے نے بتایا کہ ویزا کے لیے درخواست اس کی سرکاری ویب سائٹ یا اسمارٹ ایپ کے ذریعے جمع کرائی جا سکتی ہے۔ درخواست کی منظوری کے بعد ویزا رجسٹرڈ ای میل پر ارسال کیا جائے گا، جبکہ عام طور پر درخواستوں پر 48 گھنٹوں کے اندر کارروائی مکمل کر لی جاتی ہے۔
فیس کے حوالے سے جاری تفصیلات کے مطابق 14 روزہ ویزا آن ارائیول کی فیس 172.50 درہم جبکہ 60 روزہ ویزا کی فیس 422.50 درہم مقرر کی گئی ہے۔
جی ڈی آر ایف اے کا کہنا ہے کہ اس سہولت کا مقصد بین الاقوامی مسافروں کے لیے سفری عمل کو مزید آسان بنانا، سیاحت کو فروغ دینا اور زیادہ سے زیادہ سیاحوں کو متحدہ عرب امارات کی جانب راغب کرنا ہے۔
ادارے کے اعداد و شمار کے مطابق سال 2026 کے پہلے چھ ماہ کے دوران اس پروگرام کے تحت 73 ہزار 551 ویزے جاری کیے جا چکے ہیں، جو اس سہولت کی بڑھتی ہوئی مقبولیت کی نشاندہی کرتے ہیں۔
اہم وضاحت: جاری کردہ شرائط میں پاکستانی پاسپورٹ ہولڈرز شامل نہیں ہیں۔ یہ سہولت صرف ان مخصوص ممالک کے شہریوں کے لیے ہے جن کا جی ڈی آر ایف اے نے اعلان کیا ہے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار