ایگریکلچر فوڈ، ڈرگ اتھارٹی کا قیام وقت کی ضرورت، شہباز شریف: گیم چینجر ثابت ہو گی، مریم نواز
اشاعت کی تاریخ: 1st, February 2026 GMT
لاہور (نوائے وقت رپورٹ) جنوبی ایشیاء کا سب سے پہلا اور جدید ترین پنجاب سائنس انکلیو قائم، ایگریکلچر ٹیسٹنگ، ڈرگ ٹیسٹنگ اور فوڈ ٹیسٹنگ کی ہائی ٹیک لیب ایک ہی چھت تلے ممکن ہوگی۔ وزیر اعظم پاکستان محمد شہباز شریف اور وزیراعلیٰ مریم نواز شریف نے پنجاب ایگریکلچر، فوڈ اینڈ ڈرگ اتھارٹی کاباقاعدہ افتتاح کر دیا ۔ پنجاب ایگریکلچر، فوڈ اینڈ ڈرگ اتھارٹی (PAFDA) اور لیبارٹری آپریشنز کی لانچنگ کردی گئی۔ وزیراعظم محمد شہبازشریف اوروزیراعلیٰ مریم نوازشریف نے خواتین سائنسدانوں کے ہاسٹل کی تعمیر کے پراجیکٹ کا سنگ بنیادبھی رکھا۔ افتتاحی تقریب میں 20ممالک کے سفارتکاروں نے شرکت کی۔ وزیراعظم محمد شہبازشریف اوروزیراعلیٰ مریم نوازشریف نے سفارتکاروں کاخیر مقدم کیا۔ وزیراعظم محمد شہبازشریف نے اپنے خطاب میں وزیراعلیٰ مریم نوازشریف کو ’’فل مارکس‘‘ دیئے اورعلامتی سلوٹ پیش کیا۔ وزیراعظم محمد شہباز شریف اور وزیراعلیٰ مریم نوازشریف نے پنجاب ایگریکلچر، فوڈ اینڈ ڈرگ اتھارٹی کے مختلف شعبوں کا دورہ کیا۔ اتھارٹی کے افعال کار کا مشاہدہ‘ لیب میں جدید ترین آلات کا معائنہ کیا۔ وزیراعظم محمد شہبازشریف اور وزیراعلیٰ مریم نوازشریف نے لیبارٹریز میں سیمپلنگ کے طریقہ کار کا بھی مشاہدہ کیا۔ پنجاب ایگریکلچر، فوڈ اینڈ ڈرگ اتھارٹی کے ڈی جی ڈاکٹر طلعت نصیر پاشا نے بریفنگ دی۔ بریفنگ کے دوران بتایا گیاکہ پی اے ایف ڈی اے میں 232 سائنسدان، بیشتر گولڈ میڈلسٹ اور70 فیصد خواتین سائنسدان ہیں۔ پی اے ایف ڈی اے لیب میں پنجاب کے علاوہ دیگر صوبوں کے سائنٹسٹ بھی کام کر رہے ہیں۔ علاوہ ازیں تقریب سے خطاب کرتے ہوئے وزیراعظم شہباز شریف کا کہنا تھا کہ زرعی مصنوعات، ادویات کی شفاف نگرانی کیلئے اتھارٹی کا قیام وقت کی ضرورت ہے، امید ہے کہ اتھارٹی خطے میں سینٹر آف ایکسیلنس بنے گی۔ حفظان صحت کو یقینی بنایا جائیگا۔ اتھارٹی ملاوٹ کا خاتمہ کریگی۔ زرعی اشیاء‘ خوراک کی شفاف نگرانی ہو گی۔ وزیراعظم نے پنجاب میں اہم اقدامات پر وزیراعلیٰ مریم نواز کو خراج تحسین پیش کرتے ہوئے کہا کہ شفافیت کو یقینی بنانے کیلئے جدید ٹیکنالوجی کا استعمال ہمارا عزم ہے، سائنسدانوں اور ماہرین کی کاوشیں لائق تحسین ہیں۔ فوڈ اینڈ ڈرگ اتھارٹی پنجاب ہی نہیں پورے ملک کی خدمت کیلئے بنائی گئی جبکہ جرائم کیخلاف ناقابل تردید ثبوت فراہم کرنے کیلئے فرانزک لیب کا جال بچھایا گیا ہے۔وزیراعلیٰ مریم نواز شریف نے کہا ہے کہ پنجاب ایگریکلچر فوڈ اینڈ ڈرگ اتھارٹی محض سٹیل اور سیمنٹ کی بنی عمارت نہیں بلکہ گیم چینجر ہے۔ پنجاب ایگریکلچر فوڈ اینڈ ڈرگ اتھارٹی کا خواب شہبازشریف نے بطور وزیراعلی دیکھا، آج تعبیر دیکھ رہے ہیں۔ وزیراعلی مریم نوازشریف نے پنجاب ایگریکلچر فوڈ اینڈ ڈرگ اتھارٹی کی افتتاحی تقریب سے خطاب کرتے ہوئے کہاکہ محمد شہبازشریف نے پنجاب ایگریکلچر فوڈ اینڈ ڈرگ اتھارٹی کے بارے میں سوچا اور بنانے کی کاوش کی۔ پنجاب ایگریکلچر فوڈ اینڈ ڈرگ اتھارٹی کیلئے 42مشینیں آچکی ہیں 565مزید آئیں گی،اگلے مہینے پراسس مکمل ہو جائیگا۔ وزیراعلی مریم نوازشریف نے کہاکہ جدید ترین لیب بنانے کا مقصد انصاف اور معیار ہر دہلیز تک پہنچانا ہے۔ جب شہبازشریف کی وراثت کا کہا جاتا ہے تو میرے لئے میڈل ہے۔ محنت اورمیرٹ کا سبق شہبازشریف سے سیکھا۔محفوظ پنجاب کے تصور کو حقیقی شکل دینے کے لئے38اضلاع میں سٹیلائٹ کرائم سین یونٹ قائم کیے جارہے ہیں۔ پنجاب ایگریکلچر فوڈ اینڈ ڈرگ اتھارٹی کے 232سائنسدانوں میں 100سے زائد گولڈ میڈلسٹ اور28پی ایچ ڈی ہیں۔ پی اے ایف ڈی اے کے سائنسدانوں میں 70فیصد خواتین ہیں۔ آٹا، چاول یا ادویات جو ایکسپورٹ کیلئے موزوں نہیں اسے یہاں بھی استعمال نہیں کیا جانا چاہیے۔ 300خواتین کیلئے پہلا سائنٹسٹ وویمن ہوسٹل بنائیں گے۔ پنجاب میں ای ٹینڈرنگ،ای پکیورمنٹ اورای بزنس کا آغاز ہو چکا ہے۔ 23 ہزار سے زائد کاروباری حضرات کو آن لائن فیس لیس اجازت دی گئی۔ کسی بھی واقعہ کی صورت میں پولیس سے پہلے ڈرون بھیجا جاتا ہے۔ ڈرون کے ذریعے ہوٹل میں آگ بجھانے کے آپریشن کی ڈیجیٹل مانیٹرنگ کی۔ مشکل وقت میں خواتین کو تھانے نہیں جانا پڑتا بلکہ 15پر کام کرنے والی پولیس خود پہنچتی ہے۔ ٹریفک،چائلڈ پروٹیکشن اور دیگر امور کیلئے AIسے معاونت لے رہے ہیں۔ اپریل سے پنجاب کے تمام سکولوں میں AI ایجوکیشن لازمی قرار دی گئی ہے۔ علاوہ ازیں وزیراعلیٰ پنجاب مریم نوازشریف کے نوٹس پر سرگودھا میں صفائی، سیوریج اور بیوٹیفکیشن کے ہنگامی اقدامات کر دئیے گئے۔ وزیراعلیٰ مریم نوازشریف کی ہدایت پر صوبائی مشیر شعیب مرزا سرگودھا پہنچے اور کمشنرآفس میں ہنگامی اجلاس میں شرکت کی۔ اجلاس میں صفائی اور سیوریج مسائل کے حل کے لیے تین دن کی ڈیڈ لائن مقررکر دی گئی۔ اجلاس میں واسا کو شہر بھر میں کھڑا پانی فوری نکالنے کی ہدایت کی اور ستھرا پنجاب کے تحت اضافی مشینری فیلڈ میں اتارنے کا حکم دیا گیا۔ مزیدسڑکوں،بازاروں اور گلیوں کی مکمل صفائی اور دھلائی کی ہدایت کی۔ سکولوں کے سامنے زیبراکراسنگ اور ٹریفک سیفٹی اقدامات فوری مکمل کرنے کا حکم دیاگیا۔ اجلاس میں کمشنر سرگودھا حافظ شوکت علی، ڈپٹی کمشنر سرگودھا حسین احمد رضا چوہدری، ایڈیشنل کمشنر، ڈائریکٹر ڈویلپمنٹ، ایم ڈی واسا، سی ای او سالڈ ویسٹ مینجمنٹ کمپنی، میونسپل کارپوریشن، ضلع کونسل، پارکس اینڈ ہارٹیکلچر اتھارٹی، ہائی ویز اور لوکل گورنمنٹ کے متعلقہ افسران نے شرکت کی۔ دریں اثناء وزیراعلی پنجاب مریم نواز شریف نے صحافی عدنان شیخ کے بیٹے کے انتقال پر گہرے دکھ اور افسوس کا اظہار اور سوگوار خاندان سے دلی ہمدردی کا اظہار کیا اور تعزیت کی۔ دریں اثناء وزیراعظم شہباز شریف اور وزیراعلیٰ مریم نواز شریف نے آسٹریلیا کیخلاف ٹی 20 سیریز میں فتح پر مبارکباد دیتے ہوئے کہا ہے کہ پاکستانی شاہینوں نے شاندار کھیل کا مظاہرہ کر کے عوام کے دل جیت لئے ہیں۔ علاوہ ازیں وزیراعظم شہباز شریف اور وزیراعلیٰ پنجاب مریم نواز شریف نے بلوچستان میں دہشتگردوں کی ہلاکت پر سکیورٹی فورسز کو خراج تحسین پیش کیا ہے۔
.
ذریعہ
ذریعہ: Nawaiwaqt
کلیدی لفظ: پنجاب ایگریکلچر فوڈ اینڈ ڈرگ اتھارٹی وزیراعظم محمد شہبازشریف شہباز شریف اور وزیراعلی فوڈ اینڈ ڈرگ اتھارٹی کے مریم نواز شریف نے مریم نوازشریف نے اتھارٹی کا اجلاس میں پنجاب کے
پڑھیں:
حکومت نے نیشنل امیگریشن اینڈ ویلفیئر پالیسی 2026 کا اجرا کر دیا
وفاقی وزیر اوورسیز پاکستانیز چوہدری سالک حسین نے نیشنل امیگریشن اینڈ ویلفیئر پالیسی 2026 کا اجرا کر دیا۔تقریب سے خطاب کرتے ہوئے انہوں نے کہا کہ آج کا دن پاکستان میں لیبر مائیگریشن کے نظم و نسق کو مضبوط بنانے کی جانب ایک اہم سنگ میل ہے۔ یہ پالیسی ہر اس پاکستانی سے کیے گئے قومی عزم کی عکاس ہے جو بہتر مواقع کی تلاش میں اپنا گھر چھوڑتا ہے۔انہوں نے کہا کہ محفوظ اور منظم نقل مکانی، مہارتوں کی ترقی، کارکنوں کا تحفظ، تارکینِ وطن کی شمولیت اور وطن واپس آنے والوں کی بحالی اس پالیسی کے بنیادی ستون ہیں۔ تکنیکی جدت، آبادیاتی تبدیلیاں اور لیبر مارکیٹ کے بدلتے ہوئے تقاضے دنیا بھر کی معیشتوں کو نئی شکل دے رہے ہیں. اس لیے پاکستان کو اپنی افرادی قوت کو آج اور مستقبل دونوں کے مواقع کے لیے تیار کرنا ہوگا۔ ان کا کہنا تھا کہ نیشنل امیگریشن اینڈ ویلفیئر پالیسی 2026 اس سمت میں ایک اہم قدم اور پاکستان کی افرادی قوت کو مستقبل کے تقاضوں سے ہم آہنگ کرنے میں سنگ میل ثابت ہوگی۔چوہدری سالک حسین نے کہا کہ ایک کروڑ 20 لاکھ پاکستانی دنیا بھر میں مقیم ہیں اور اپنی پیشہ ورانہ مہارت، دیانت داری اور محنت کی بدولت پاکستان کے سفیر بن چکے ہیں۔ گزشتہ مالی سال میں سمندر پار پاکستانیوں نے 41 ارب امریکی ڈالر سے زائد کی ترسیلاتِ زر وطن بھیجیں، جو ملکی تاریخ کی بلند ترین رقم ہے۔ انہوں نے کہا کہ بیرون ملک مقیم پاکستانیوں کی کامیابی پاکستان کی کامیابی ہے اور ان کی فلاح و بہبود ہماری قومی ذمہ داری ہے۔انہوں نے کہا کہ یہ پالیسی اداروں، تجربات اور شراکت داریوں کو ایک مشترکہ وژن کے تحت یکجا کرتی ہے تاکہ ہر پاکستانی کارکن نقل مکانی کے پورے سفر کے دوران بہتر طور پر تیار، محفوظ اور معاونت یافتہ ہو۔ اس پالیسی کا محور ہر اس پاکستانی کا سفر ہے جو مواقع کی تلاش میں اپنا گھر چھوڑتا ہے، جبکہ ذمہ داری روانگی سے پہلے ہی شروع ہو جاتی ہے، جہاں نوجوان کارکنوں کو متعلقہ مہارتیں، قابلِ اعتماد معلومات اور اخلاقی بھرتی تک رسائی فراہم کی جائے گی۔وفاقی وزیر نے کہا کہ اس پالیسی کی کامیابی وفاقی اور صوبائی حکومتوں، نفاذ کرنے والے اداروں، آجروں، تربیتی اداروں، ترقیاتی شراکت داروں، نجی شعبے اور سمندر پار پاکستانیوں کے باہمی تعاون سے مشروط ہے۔ انہوں نے صوبائی حکومتوں، آئی سی ایم پی ڈی (ICMPD)، دیگر ترقیاتی شراکت داروں اور تمام اسٹیک ہولڈرز کا مشاورتی عمل میں تعاون پر شکریہ ادا کیا، جبکہ اسپیشل انویسٹمنٹ فیسیلیٹیشن کونسل (SIFC) کی مسلسل معاونت کو بھی سراہا۔انہوں نے کہا کہ ہجرت یا نقل مکانی غیر یقینی کا سفر نہیں بلکہ مواقع، وقار اور قومی ترقی کا راستہ ہونا چاہیے۔ آئیں مل کر ایسا مستقبل بنائیں جہاں ہر پاکستانی اعتماد کے ساتھ بیرون ملک جائے، فخر کے ساتھ وطن واپس آئے اور ہمیشہ ایک ایسی قوم سے جڑا رہے جو اس کی خدمات کی قدر اور عزت کرتی ہو۔ انہوں نے دعا کی کہ اللہ تعالیٰ اس وژن کو عوام کے لیے بامعنی ترقی، پاکستان کے لیے دیرپا خوشحالی اور ہر سمندر پار پاکستانی اور اس کے خاندان کے روشن مستقبل کا ذریعہ بنائے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار