بنگلہ دیش: انتخابات سے قبل 3 ہزار مسلح ملزمان کی فہرست تیار، 352 ’شوٹرز‘ کی نشاندہی
اشاعت کی تاریخ: 10th, February 2026 GMT
بنگلہ دیش میں آئندہ عام انتخابات سے قبل قانون نافذ کرنے والے اداروں نے ملک بھر میں تقریباً 3 ہزار مسلح جرائم پیشہ افراد اور مشتبہ عناصر کی فہرست تیار کر لی ہے، جن میں 352 افراد کو ’شوٹرز‘ کے طور پر شناخت کیا گیا ہے۔
پولیس حکام کے مطابق یہ فہرست 2 انٹیلی جنس اداروں نے مرتب کر کے پولیس ہیڈکوارٹرز کو ارسال کی ہے۔ حکام کا کہنا ہے کہ یہ اقدام انتخابی تشدد کی روک تھام کے لیے احتیاطی تدابیر کا حصہ ہے اور اس کا کسی سیاسی جماعت سے تعلق نہیں، بلکہ مقصد پرامن اور منصفانہ انتخابات کو یقینی بنانا ہے۔
یہ بھی پڑھیے: امریکا کے اسسٹنٹ سیکریٹری پال کپور کا انتخابات کے بعد بنگلہ دیش کے متوقع دورے کا امکان
پولنگ سے 5 روز قبل منشی گنج میں بنگلہ دیش نیشنلسٹ پارٹی کے ایک امیدوار اور باغی امیدوار کے حامیوں کے درمیان تصادم کے بعد کشیدگی میں اضافہ ہوا۔ جھڑپوں کے دوران اسلحہ استعمال کیا گیا اور پولیس نے فائرنگ میں ملوث 4 افراد کی نشاندہی کی۔ ان میں سے ایک، اکرم دیوان، مبینہ طور پر معروف ’شوٹر‘ ہے تاہم پیر تک اسے گرفتار نہیں کیا جا سکا تھا۔
پولیس ذرائع کے مطابق فہرست میں شامل نمایاں جرائم پیشہ افراد میں شیخ محمد اسلم المعروف ’سویڈن اسلم‘ بھی شامل ہے، جس پر متعدد قتل کے مقدمات درج ہیں۔ وہ تقریباً 2 دہائیاں جیل میں گزارنے کے بعد 2024 میں ضمانت پر رہا ہوا تھا۔ اسی طرح ’رونی‘ نامی ملزم، جو گزشتہ نومبر پرانے ڈھاکا میں گینگ سے متعلق ایک قتل کے بعد سے مفرور ہے، بھی فہرست میں شامل ہے۔
سینیئر پولیس حکام کے مطابق فہرست میں مسلح جرائم پیشہ افراد، کرائے کے قاتل، شدت پسند، مفرور ملزمان اور منظم جرائم کے نیٹ ورکس سے وابستہ افراد شامل ہیں۔ ان میں سے متعدد کے خلاف قتل، بھتہ خوری، اغوا، غیر قانونی قبضہ اور اسلحہ سے متعلق مقدمات درج ہیں۔ مجموعی طور پر 124 افراد کالعدم شدت پسند تنظیموں کے ارکان کے طور پر شناخت کیے گئے ہیں۔
یہ بھی پڑھیے: بنگلہ دیش: جماعتِ اسلامی کی انتخابی مہم کے دوران وکیل کی جانب سے رقم دینے کی ویڈیو پر تنقید
پولیس ہیڈکوارٹرز نے تمام 64 اضلاع کے ضلعی پولیس سربراہان اور 8 میٹروپولیٹن پولیس یونٹس کے کمشنرز کو ہدایت کی ہے کہ فہرست میں شامل افراد کی نگرانی، گرفتاری یا کڑی نگرانی کو یقینی بنایا جائے۔ خصوصاً مفرور اور ضمانت پر رہا ملزمان پر خصوصی توجہ دی جا رہی ہے۔
پولیس ہیڈکوارٹرز کے ترجمان اے ایچ ایم شہادت حسین نے کہا کہ ’ہم مجرمانہ ریکارڈ اور انٹیلی جنس معلومات کی بنیاد پر کارروائی کر رہے ہیں تاکہ انتخابات کے دوران کسی بھی قسم کے تشدد یا تخریب کاری کو روکا جا سکے۔ یہ غیر جانبدار، قانونی اور احتیاطی اقدام ہے جس کا واحد مقصد آزاد، منصفانہ اور پرامن انتخابات کا انعقاد ہے‘۔
ڈھاکا میٹروپولیٹن پولیس کے مطابق تھانوں اور ڈٹیکٹو یونٹس کو مشترکہ طور پر متحرک کیا گیا ہے تاکہ مسلح گروہوں کو پولنگ کے عمل میں خلل ڈالنے سے روکا جا سکے۔ حکام نے خاص طور پر ان شدت پسند عناصر پر تشویش ظاہر کی ہے جو حراست سے فرار ہو چکے ہیں یا روپوش ہیں۔
پولیس اعداد و شمار کے مطابق ڈھاکا میں 115 مسلح جرائم پیشہ افراد سرگرم ہیں، جبکہ چٹاگانگ، سلہٹ، راجشاہی، کھلنا اور دیگر بڑے شہروں میں بھی قابلِ ذکر تعداد موجود ہے۔ مجموعی طور پر تقریباً 2,500 مشتبہ افراد میٹروپولیٹن علاقوں سے باہر اضلاع میں موجود ہیں۔
یہ بھی پڑھیے: الیکشن کمیشن بنگلہ دیش نے پولنگ اسٹیشنز کے احاطے میں موبائل فون کے استعمال پر پابندی واپس لے لی
انسپکٹر جنرل آف پولیس بہارال عالم نے کہا کہ فہرستوں کو مرحلہ وار اپڈیٹ کر کے ملک بھر میں شیئر کیا جا رہا ہے۔ ان کا کہنا تھا کہ غیر قانونی اسلحہ عمومی خطرہ ہے، تاہم انتخابات کے دوران سب سے بڑا خدشہ مفرور اور روپوش شدت پسند عناصر سے ہے، اسی لیے ان کی گرفتاری کو ترجیح دی جا رہی ہے۔
پولیس حکام کا کہنا ہے کہ ماضی میں سیاسی تشدد اور جرائم پیشہ عناصر کی انتخابی عمل میں مداخلت کے واقعات کے پیش نظر یہ اقدامات ناگزیر اور احتیاطی نوعیت کے ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
بنگلہ دیش پولیس جرائم ڈھاکا مسلح افراد.
ذریعہ
ذریعہ: WE News
کلیدی لفظ: بنگلہ دیش پولیس ڈھاکا مسلح افراد جرائم پیشہ افراد فہرست میں بنگلہ دیش کے دوران کے مطابق کے بعد
پڑھیں:
جاپان نے شدید گرمی سے بچاؤ کے لیے ‘انسانی ریفریجریٹر’ تیار کرلیا
جاپان نے شدید گرمی میں کام کرنے والے افراد کے لیے ایک منفرد ٹھنڈا کرنے والا کیبن متعارف کرا دیا ہے جسے ‘انسانی ریفریجریٹر’ کہا جا رہا ہے۔
یہ آلہ چند منٹ میں جسم کا درجہ حرارت کم کرنے میں مدد دیتا ہے اور خاص طور پر تعمیراتی شعبے، فیکٹریوں اور کھلے مقامات پر کام کرنے والے افراد کے لیے تیار کیا گیا ہے۔
یہ بھی پڑھیں: موسمیاتی تبدیلی کے نتیجے میں بڑھتی گرمی انسانی دماغ پر کیا اثر ڈال رہی ہے؟
جاپانی کمپنیوں کی تیار کردہ اس مشین کو ‘دو ہائیمون باکس’ کا نام دیا گیا ہے۔ یہ ایک چھوٹے کمرے یا کیبن کی طرح ہے جس میں ایک شخص داخل ہوکر گرمی سے فوری راحت حاصل کرسکتا ہے۔ اس کے اندر درجہ حرارت تقریباً 15 ڈگری سینٹی گریڈ رکھا جاتا ہے جبکہ ٹھنڈی ہوا سر، گردن، کندھوں اور کمر کی جانب پھینکی جاتی ہے۔
کمپنی کے مطابق چند منٹ کے استعمال سے جسم کو ٹھنڈک کا احساس ہونا شروع ہوجاتا ہے، جبکہ تقریباً 10 منٹ تک اس میں رہنے سے شدید گرمی کے اثرات کم کرنے میں مدد مل سکتی ہے۔ یہ نظام پورے کمرے کو ٹھنڈا کرنے کے بجائے صرف انسان کے جسم کو ٹھنڈا کرنے پر توجہ دیتا ہے، جس سے توانائی کی بچت بھی ہوتی ہے۔
یہ بھی پڑھیں: ریفریجریٹر سے پہلے پانی ٹھنڈا کرنے کی سعودی صحرائی ایجاد کیا تھی؟
یہ ایجاد ایسے وقت میں سامنے آئی ہے جب جاپان سمیت دنیا کے کئی ممالک میں شدید گرمی کی لہریں بڑھ رہی ہیں اور بیرونی کام کرنے والے افراد کو گرمی سے متعلق مسائل کا سامنا ہے۔
‘دو ہائیمون باکس’ کو کاروباری اداروں کے لیے فروخت کیا جا رہا ہے اور اسے فیکٹریوں، تعمیراتی مقامات اور دیگر گرم ماحول والی جگہوں پر استعمال کے لیے تیار کیا گیا ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news انسانی فریج جاپان گرمی
گلوبل سمٹ میں چینی روبوٹ کو اپنا بتانے والی بھارتی یونیورسٹی کا اسٹال بند، شدید تنقید کا سامنا