سعودی ولی عہد محمد بن سلمان کی مسجد نبوی ﷺ میں حاضری، روضہ رسول ﷺ پر نماز ادا کی
اشاعت کی تاریخ: 20th, February 2026 GMT
سعودی عرب کے ولی عہد اور وزیراعظم محمد بن سلمان نے مدینہ منورہ میں مسجد نبوی میں حاضری دی، جہاں انہوں نے روضۂ رسول ﷺ کے قریب ریاض الجنہ میں نماز ادا کی اور رسول اکرم ﷺ اور آپ ﷺ کے رفقائے کرام کو سلام پیش کیا۔
سعودی میڈیا کے مطابق ولی عہد کی مسجد نبوی آمد پر مسجد الحرام اور مسجد نبوی کے امور کے سربراہ شیخ ڈاکٹر عبدالرحمن السدیس، وزیر حج و عمرہ ڈاکٹر توفیق الربیعہ اور مسجد نبوی کے ائمہ کرام نے ان کا استقبال کیا۔
یہ بھی پڑھیں: اسلامی ممالک کی شاہ سلمان اور ولی عہد کو رمضان المبارک کی مبارکباد
اس موقع پر مدینہ ریجن کے گورنر شہزادہ سلمان بن سلطان، وزیر ثقافت شہزادہ بدر بن عبداللہ بن فرحان، ریاض ریجن کے نائب گورنر شہزادہ محمد بن عبدالرحمن سمیت متعدد اعلیٰ حکام اور وزرا بھی ولی عہد کے ہمراہ موجود تھے۔
ولی عہد کی یہ حاضری مدینہ منورہ کے دورے کا اہم حصہ تھی، جس کے دوران انہوں نے مسجد نبوی میں عبادت کی سعادت حاصل کی اور مقدس مقام پر حاضری دے کر عقیدت کا اظہار کیا۔
محمد بن سلمان سے علما، شہزادوں اور شہریوں کی ملاقات، رمضان کی مبارکباد پیشسعودی عرب کے ولی عہد اور وزیراعظم محمد بن سلمان سے علما، شہزادوں، وزرا اور شہریوں نے قصر الیمامہ میں ملاقات کی اور انہیں ماہ رمضان کی آمد پر مبارکباد پیش کی۔
استقبالیہ تقریب کے آغاز میں شرکا نے قرآن پاک کی تلاوت سنی، جس کے بعد ولی عہد نے مہمانوں سے ملاقات کی اور ان کے ساتھ رمضان کی مبارکباد کا تبادلہ کیا۔
ولی عہد نے اس موقع پر دعا کی کہ اللہ تعالیٰ تمام مسلمانوں کے روزے، قیام اور نیک اعمال قبول فرمائے اور سعودی عرب کو شاہ سلمان بن عبدالعزیز کی قیادت میں امن اور استحکام نصیب ہو۔
یہ بھی پڑھیں: رمضان میں بین المذاہب اور بین المسالک ہم آہنگی کا فروغ، علما و مشائخ کی ضابطہ اخلاق پر عملدرآمد کی اپیل
اس تقریب میں بڑی تعداد میں شاہی خاندان کے افراد، سینئر علما، اعلیٰ حکام اور شہری شریک ہوئے، جنہوں نے ولی عہد سے ملاقات کر کے نیک تمناؤں کا اظہار کیا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news روضہ رسول سعودی عرب محمد بن سلمان مسجد نبوی نماز ولی عہد.
ذریعہ
ذریعہ: WE News
کلیدی لفظ: روضہ رسول مسجد نبوی ولی عہد مسجد نبوی ولی عہد کی اور
پڑھیں:
مسجد اقصیٰ کی حیثیت تبدیل کرنے کی ہر کوشش مسترد، 8 اسلامی ممالک کا اسرائیل کو فوری انتباہ
پاکستان سمیت 8 عرب اور اسلامی ممالک کے وزرائے خارجہ نے مسجد اقصیٰ اور الحرم الشریف میں اسرائیلی اشتعال انگیز اقدامات کی شدید مذمت کرتے ہوئے انہیں بین الاقوامی قانون اور اقوام متحدہ کی قراردادوں کی صریح خلاف ورزی قرار دیا ہے۔ مشترکہ اعلامیے میں اسرائیل سے فوری طور پر ان اقدامات کو روکنے اور عالمی برادری سے مؤثر کردار ادا کرنے کا مطالبہ کیا گیا ہے۔
پاکستان، مصر، ترکیہ، انڈونیشیا، اردن، قطر، سعودی عرب اور متحدہ عرب امارات کے وزرائے خارجہ نے مسجد اقصیٰ (الحرم الشریف) میں اسرائیل کی حالیہ اشتعال انگیزی اور کشیدگی میں اضافے کی شدید ترین الفاظ میں مذمت کرتے ہوئے کہا ہے کہ یہ اقدامات بین الاقوامی قانون، اقوام متحدہ کی متعلقہ قراردادوں اور مقبوضہ مشرقی یروشلم میں مقدس مقامات کی تاریخی و قانونی حیثیت کی کھلی خلاف ورزی ہیں۔
پاکستان کے دفتر خارجہ کی جانب سے جاری مشترکہ اعلامیے میں کہا گیا کہ اسرائیلی فورسز کی سرپرستی میں انتہا پسند اسرائیلی وزراء کی قیادت میں یہودی آبادکاروں کی مسلسل اجتماعی دراندازی، مسجد اقصیٰ کے صحن میں اسرائیلی پرچم لہرانا، اسرائیلی پولیس کی جانب سے دو خیمے نصب کرنا اور دیگر اشتعال انگیز اقدامات نہایت خطرناک اور ناقابل قبول ہیں۔
وزرائے خارجہ نے اسرائیلی انتہا پسند وزراء اور گروہوں کی جانب سے اشتعال انگیزی، مسجد اقصیٰ میں دراندازی پر اکسانے اور تشدد پر مبنی بیانات کی بھی شدید مذمت کی۔ اعلامیے میں خبردار کیا گیا کہ ایسے اقدامات نفرت اور انتہا پسندی کو فروغ دیتے ہیں اور دو ریاستی حل کی بنیاد پر منصفانہ اور پائیدار امن کی کوششوں کو نقصان پہنچاتے ہیں۔
مشترکہ اعلامیے میں کہا گیا کہ یروشلم کے قدیم شہر اور اس کے مذہبی مقامات تک رسائی پر پابندیاں، خصوصاً مسلمانوں اور دیگر عبادت گزاروں کے ساتھ امتیازی سلوک، بین الاقوامی قانون اور بین الاقوامی انسانی قانون کی سنگین خلاف ورزی ہے۔ یہ اقدامات مقدس مقامات کی تاریخی اور قانونی حیثیت کو تبدیل کرنے کی ایک غیرقانونی کوشش ہیں۔
وزرائے خارجہ نے واضح کیا کہ اسرائیل کو مقبوضہ یروشلم یا وہاں موجود اسلامی اور مسیحی مقدس مقامات پر کسی قسم کی خودمختاری حاصل نہیں۔
اعلامیے میں مزید کہا گیا کہ اسرائیل بطور قابض طاقت مقبوضہ مشرقی یروشلم کی تاریخی، قانونی اور آبادیاتی حیثیت تبدیل کرنے کے لیے منظم اقدامات کر رہا ہے، جو اسلامی اور مسیحی مقدس مقامات کے تقدس اور حیثیت کو نقصان پہنچانے کے مترادف ہیں۔
آٹھوں ممالک نے یروشلم اور اس کے اسلامی و مسیحی مقدس مقامات کی تاریخی اور قانونی حیثیت میں کسی بھی قسم کی تبدیلی کی کوشش کو دوٹوک انداز میں مسترد کرتے ہوئے اس حیثیت کے تحفظ پر زور دیا۔ اعلامیے میں مقدس مقامات کی نگرانی کے حوالے سے ہاشمی سرپرستی کے خصوصی کردار کو بھی تسلیم کیا گیا۔
مشترکہ بیان میں کہا گیا کہ مسجد اقصیٰ/الحرم الشریف کا پورا 144 دونم (تقریباً 35 ایکڑ) رقبہ صرف مسلمانوں کی عبادت گاہ ہے۔ مزید کہا گیا کہ اردن کی وزارت اوقاف و اسلامی امور کے ماتحت یروشلم اوقاف اور مسجد اقصیٰ امور کا محکمہ ہی وہ واحد قانونی ادارہ ہے جو مسجد اقصیٰ کے انتظام و انصرام اور وہاں داخلے کے معاملات کا مجاز ہے۔
وزرائے خارجہ نے اسرائیل سے مطالبہ کیا کہ وہ بطور قابض طاقت فوری طور پر یروشلم کے قدیم شہر میں عائد تمام پابندیاں ختم کرے، مسجد اقصیٰ میں مسلمانوں کی عبادت میں رکاوٹ ڈالنے سے باز آئے اور مقدس مقامات کے تقدس کا احترام کرے۔
مشترکہ اعلامیے میں عالمی برادری سے بھی مطالبہ کیا گیا کہ وہ اسرائیل کو یروشلم میں اسلامی اور مسیحی مقدس مقامات کے خلاف جاری غیرقانونی اقدامات اور خلاف ورزیوں سے باز رکھنے کے لیے واضح، مضبوط اور مؤثر موقف اختیار کرے، تاکہ مقدس مقامات کی حرمت اور تاریخی حیثیت کا تحفظ یقینی بنایا جا سکے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
بھارت سے جنگ اور افغانستان میں کارروائی خارج ازامکان نہیں، وزیردفاع