ٹک ٹاک نے نیا ’نیئربائی فیڈ‘ فیچر متعارف کرا دیا
اشاعت کی تاریخ: 5th, December 2025 GMT
data-id="863a0a8" data-element_type="widget" data-widget_type="theme-post-content.default">
چین کی معروف ٹیک کمپنی بائیٹ ڈانس کے زیر انتظام دنیا کی مقبول ترین مختصر ویڈیو شیئرنگ ایپلیکیشن ٹک ٹاک نے صارفین کے تجربے کو مزید متحرک اور مقامی نوعیت کا بنانے کے لیے “نیئر بائی فیڈ” کے نام سے ایک نیا فیچر متعارف کرایا ہے، جس کے ذریعے اب پلیٹ فارم پر موجود افراد اپنے اردگرد کے ماحول، سرگرمیوں اور مقامات سے متعلق ویڈیوز براہِ راست دیکھ سکیں گے۔
کمپنی کا کہنا ہے کہ نیئر بائی فیڈ فیچر کا بنیادی مقصد صارفین کو ایسی جگہوں، ایونٹس اور مقامی سرگرمیوں سے روشناس کرانا ہے جن کے بارے میں شاید وہ پہلے نہ جانتے ہوں، یہ فیچر ابتدائی طور پر برطانیہ، فرانس، اٹلی اور جرمنی میں متعارف کرایا گیا ہے۔
بین الاقوامی خبر رساں اداروں کے مطابق اس سے قبل 2022 میں جنوب مشرقی ایشیا میں محدود پیمانے پر اس کی آزمائش کی گئی تھی، آزمائشی مرحلے کے بعد اس فیچر پر کچھ عرصہ کام روک دیا گیا تھا، تاہم اب اسے باقاعدہ طور پر چند یورپی ممالک میں فعال کر دیا گیا ہے۔
ٹک ٹاک نے ایک تفصیلی بلاگ پوسٹ میں وضاحت کی ہے کہ نیئر بائی فیڈ میں صارفین کو وہ ویڈیوز دکھائی جائیں گی جو ان کی موجودہ لوکیشن، مواد کے موضوع اور پوسٹ کے وقت کے مطابق ترتیب دی گئی ہوں۔
اس کا مطلب یہ ہے کہ اگر کوئی صارف سیاحت، فوڈ، مقامی تقریبات یا ایونٹس سے متعلق ویڈیوز دیکھنا چاہے تو اسے اپنے ہی علاقے کا تازہ ترین مواد دیکھنے کو ملے گا۔ یہ فیچر نہ صرف صارفین کے لیے سہولت فراہم کرے گا بلکہ ویڈیوز بنانے والوں کو بھی اپنے شہر یا خطے کے نئے ناظرین تک رسائی کا موقع دے گا۔
کمپنی کے مطابق صارف کی لوکیشن شیئر کرنا مکمل طور پر اختیاری ہوگا اور یہ سہولت صرف 18 سال یا اس سے زیادہ عمر کے افراد استعمال کر سکیں گے۔ لوکیشن شیئرنگ فعال ہونے کی صورت میں ٹک ٹاک ڈیوائس کی جی پی ایس معلومات استعمال کرتے ہوئے صارف کو مقامی مواد دکھائے گا۔
اس کے ساتھ کمپنی نے واضح کیا ہے کہ 18 سال سے کم عمر صارفین کی ویڈیوز اس فیڈ میں نظر نہیں آئیں گی، جبکہ پرائیویٹ، فرینڈز اونلی یا صرف خود تک محدود کیے گئے اکاؤنٹس کا مواد بھی نیئر بائی فیڈ میں شامل نہیں ہوگا۔
اگر کوئی صارف اپنے موجودہ شہر کے بجائے کسی دوسرے خطے یا شہر کا مقامی مواد دیکھنا چاہے تو وہ لوکیشن سیٹنگ میں جا کر مقام تبدیل کر سکتا ہے۔
تاہم ٹک ٹاک کی جانب سے یہ نہیں بتایا گیا کہ اس فیچر کو عالمی سطح پر صارفین کے لیے کب تک پیش کیا جائے گا، مگر ماہرین کے مطابق یہ اپ ڈیٹ پلیٹ فارم کے مقامی مواد کے کلچر میں اہم تبدیلی کا پیش خیمہ ثابت ہو سکتی ہے۔
ذریعہ
ذریعہ: Jasarat News
کلیدی لفظ: نیئر بائی فیڈ کے مطابق ٹک ٹاک
پڑھیں:
معاشی سرگرمیوں میں تیزی، کے الیکٹرک صنعتی صارفین کا بجلی استعمال ریکارڈ سطح پر پہنچ گیا
کراچی: ملک میں معاشی سرگرمیوں میں بہتری کے ساتھ کے الیکٹرک صنعتی صارفین کی جانب سے بجلی کے استعمال نے نئی بلند ترین سطح حاصل کر لی۔ مالی سال 2026 کے دوران کے الیکٹرک کے صنعتی فیڈرز پر بجلی کی مجموعی کھپت 6 ارب 8 کروڑ یونٹس (6.08 ارب یونٹس) ریکارڈ کی گئی، جو ادارے کی تاریخ میں کسی بھی مالی سال کے دوران سب سے زیادہ ہے۔
کے الیکٹرک کے جاری کردہ اعلامیے کے مطابق صنعتی بجلی کی طلب میں یہ نمایاں اضافہ ایسے وقت میں سامنے آیا جب پاکستان کی مجموعی قومی پیداوار (جی ڈی پی) کی شرح نمو 3.7 فیصد رہی۔ کمپنی کا کہنا ہے کہ کراچی کی صنعتوں کو مسلسل، قابل اعتماد اور بلا تعطل بجلی کی فراہمی نے صنعتی پیداوار اور معاشی سرگرمیوں کو فروغ دینے میں اہم کردار ادا کیا۔
کے الیکٹرک کے چیف ایگزیکٹو آفیسر سید محمد طہٰ نے کہا کہ صنعتی بجلی کے استعمال میں ریکارڈ اضافہ حکومت پاکستان، اسپیشل انویسٹمنٹ فسیلیٹیشن کونسل (SIFC) اور کراچی کی صنعتی برادری کی مشترکہ کوششوں کا نتیجہ ہے۔ ان کے مطابق سرمایہ کاری کے بہتر ماحول، صنعتی سرگرمیوں میں تیزی اور کاروباری اعتماد میں اضافے نے اس کامیابی کو ممکن بنایا۔
انہوں نے کہا کہ کراچی ملک کی معاشی شہ رگ ہے اور کے الیکٹرک 2013 سے صنعتی فیڈرز کو لوڈشیڈنگ سے مستثنیٰ رکھے ہوئے ہے تاکہ صنعتوں کی پیداوار اور برآمدات متاثر نہ ہوں۔
بی تھری کیٹیگری میں سب سے زیادہ بجلی استعمال
اعلامیے کے مطابق سب سے زیادہ بجلی کا استعمال بی تھری (B3) کیٹیگری میں ریکارڈ کیا گیا، جس میں 501 سے 5 ہزار کلوواٹ تک بجلی استعمال کرنے والی صنعتیں شامل ہیں۔ اس زمرے میں سیمنٹ، اسٹیل، ٹیکسٹائل، کیمیکل اور دیگر بڑے صنعتی شعبے شامل ہیں۔
ماہانہ بنیاد پر جون 2026 میں صنعتی بجلی کی کھپت سب سے زیادہ رہی، جبکہ اپریل 2026 دوسرے نمبر پر رہا۔
گزشتہ سال کے مقابلے میں 20 فیصد سے زائد اضافہ
اعداد و شمار کے مطابق مالی سال 2025 میں صنعتی صارفین نے 5.04 ارب یونٹس بجلی استعمال کی تھی، جبکہ مالی سال 2026 میں یہ مقدار بڑھ کر 6.08 ارب یونٹس تک پہنچ گئی، جو 20 فیصد سے زائد سالانہ اضافہ ظاہر کرتی ہے۔
اس سے قبل مالی سال 2022 میں صنعتی بجلی کی کھپت 5.84 ارب یونٹس ریکارڈ کی گئی تھی، تاہم رواں مالی سال میں یہ ریکارڈ بھی ٹوٹ گیا۔
349 نئے صنعتی کنکشنز فراہم
کے الیکٹرک کے مطابق مالی سال 2026 کے دوران 349 نئے صنعتی کنکشنز جاری کیے گئے، جبکہ 273 صنعتی صارفین نے اپنے بجلی کے لوڈ میں اضافہ کیا، جس سے مجموعی طور پر 168 میگاواٹ اضافی طلب قومی گرڈ میں شامل ہوئی۔
اعلامیے میں کہا گیا کہ حکومت کی جانب سے صنعتوں کو کیپٹو پاور پلانٹس سے قومی گرڈ پر منتقل کرنے کی پالیسی، معاشی بحالی اور صنعتی پیداوار میں اضافے نے بھی بجلی کی طلب بڑھانے میں اہم کردار ادا کیا۔
کمپنی کا مزید کہنا ہے کہ صنعتی فیڈرز کی ریکوری کی شرح تمام صارفین کے مختلف زمروں میں سب سے بہتر رہی، جو بروقت بلوں کی ادائیگی اور لوڈشیڈنگ سے استثنیٰ کے درمیان مضبوط تعلق کو ظاہر کرتی ہے۔
کے الیکٹرک نے اس عزم کا اعادہ کیا کہ کراچی کی صنعتوں اور کاروباری سرگرمیوں کو قابل اعتماد اور بلا تعطل بجلی کی فراہمی آئندہ بھی اس کی اولین ترجیح رہے گی تاکہ ملکی معیشت کی ترقی میں اپنا کردار جاری رکھا جا سکے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار