مشیر خیبر پی کے کی ملاقات: فنڈز کے اجراء این ایف سی پر گفتگو، تعاون کرینگے: وزیر خزانہ
اشاعت کی تاریخ: 4th, February 2026 GMT
اسلام آباد (نمائندہ خصوصی + نوائے وقت رپورٹ) وزیر خزانہ ، سینیٹر محمد اورنگزیب سے خیبر پی کے حکومت کے وزیرِ اعلیٰ کے مشیر برائے خزانہ، مزمل اسلم نے ملاقات کی۔ اس موقع پر فنانس ڈویڑن اور حکومتِ خیبر پی کے کے سینئر حکام بھی موجود تھے۔ ملاقات میں مالیاتی اور ترقیاتی امور کے ایک وسیع دائرہ کار پر تبادلہ خیال کیا گیا، جن میں ضم شدہ اضلاع کے لیے اہم ترقیاتی مدات کے تحت فنڈز کی بروقت فراہمی، عارضی طور پر بے گھر ہونے والے افراد کی بحالی اور معاونت سے متعلق زیر التوا ضروریات، اور صوبائی حقوق و وسائل کی تقسیم کے وسیع تر فریم ورک بشمول قومی مالیاتی کمیشن (این ایف سی) سے متعلق امور شامل تھے۔خیبرخیبر پی کے کی ٹیم نے ضم شدہ اضلاع میں درپیش انتظامی اور ترقیاتی ضروریات کو اجاگر کیا۔ فوری ضروریات کو پورا کرنے کے لیے فنڈز کی پیشگی منصوبہ بندی کے ساتھ بروقت اجرا کی اہمیت پر زور دیا۔ وزیر خزانہ نے کہا کہ وفاق مسائل حل کرنے کیلئے بھرپور تعاون فراہم کرے گا۔ وفاقی وزیر نے اس امر کی نشاندہی کی کہ جہاں ضروری ہو وہاں مؤثر رابطہ کاری اور کھاتوں کی بروقت تطبیق شفاف اور ہموار فنڈز کے اجرا کے لیے نہایت اہم ہے، ملاقات میں این ایف سی سے متعلق جاری کام اور مشاورت کا بھی جائزہ لیا گیا، جن میں تکنیکی سطح پر مذاکرات اور ذیلی گروپس کی سرگرمیوں کو برقرار رکھنے کی ضرورت پر زور دیا گیا تاکہ اہم امور پر اتفاقِ رائے کو آگے بڑھایا جا سکے۔دونوں فریقین نے اس بات پر اتفاق کیا کہ متعلقہ فورمز اور تکنیکی ذرائع کے ذریعے قریبی رابطہ کاری جاری رکھی جائے گی۔ ملاقات خوشگوار ماحول میں اختتام پذیر ہوئی، دریں اثناء وزیر خزانہ محمد اورنگزیب کی زیرصدارت اقتصادی رابطہ کمیٹی کا اجلاس ہوا۔ اعلامیہ کے مطابق وفاقی وزراء اور اعلیٰ حکام نے شرکت کی۔ ای سی سی نے بلدیاتی انتخابات کیلئے فنڈز پر وضاحت مانگ لی۔ الیکشن کمشن کی 43 کروڑ 50 لاکھ کی سمری تفصیلات کے ساتھ دوبارہ پیش کرنے کی ہدایت کی ہے۔ ای سی سی نے داخلہ اور نارکوٹکس ڈویژن کیلئے 10 کروڑ سی ڈی اے کے ذریعے ایس ڈی جی پروگرام کے تحت ترقیاتی سکیموں کیلئے فنڈز منظور کر لئے۔ فرنٹیر کور بلوچستان کے ہیلی کاپٹرز کی مرمت کیلئے 87 لاکھ 90 ہزار روپے منظور کر لئے۔ تعلیمی وظائف اور نئے پروگرامز کیلئے فنڈز منظور کر لئے۔ آؤٹ آف سکول بچوں کے لئے نئی تعلیمی سکیمیں شروع کرنے کا فیصلہ کیا ہے۔ کسٹمز سے ضبط شدہ امدادی سامان گلگت بلتستان حکومت کو دینے کی منظوری دی گئی۔ امدادی سامان قدرتی آفات سے متاثرہ علاقوں میں جی بی ڈیزاسٹر مینجمنٹ اتھارٹی استعمال کرے گی۔
.
ذریعہ
ذریعہ: Nawaiwaqt
پڑھیں:
کوہستان کرپشن کیس، نیب نے 6 ارب کے ریکور اثاثے خیبر پختونخوا کے حوالے کردیے
فائل فوٹوکوہستان مالیاتی کرپشن کیس میں قومی احتساب بیورو (نیب) نے 6 ارب روپے کے اثاثے ریکور کرکے خیبر پختونخوا حکومت کے حوالے کردیے جبکہ مزید ریکوری کا عمل جاری ہے۔
چیئرمین نیب لیفٹیننٹ جنرل (ر) نذیر احمد نے پشاور میں اثاثے چیف سیکرٹری خیبر پختونخوا شہاب علی شاہ کے حوالے کیے۔
نیب حکام کے مطابق پہلے مرحلے میں 6 ارب روپے سے زائد مالیت کے اثاثے صوبائی حکومت کے حوالے کیے گئے ہیں، جن میں نقد رقم، سونا، قیمتی جائیدادیں اور لگژری گاڑیاں شامل ہیں، اثاثوں کی واپسی منظم اور جامع تحقیقات کے نتیجے میں عمل میں آئی۔
نیب حکام کے مطابق کوہستان مالیاتی کرپشن میں سرکاری فنڈز سے 37 ارب روپے سے زائد کا غبن ہوا ہے، پیچیدہ مالیاتی غبن کو مؤثر تحقیقات کے ذریعے بے نقاب کیا گیا۔
چیئرمین نیب نے کہا کہ ڈائریکٹر جنرل (ڈی جی) نیب خیبر پختونخوا فرمان اللہ اور تحقیقاتی ٹیم کی کارکردگی قابل ستائش ہے۔
انہوں نے مزید کہا کہ کوہستان مالیاتی کرپشن میں مزید ریکوری کا عمل جاری ہے، قانونی کارروائی مکمل ہونے پر مزید اثاثے خیبر پختونخوا حکومت کو منتقل کیے جائیں گے، عوامی وسائل قومی امانت ہیں، ان کے تحفظ کے لیے ہر ممکن اقدام کیا جائے گا۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ