بنگلادیش انتخابات: وزیراعظم کی بی این پی رہنما طارق رحمان کو کامیابی پر مبارکباد
اشاعت کی تاریخ: 13th, February 2026 GMT
اسلام آباد: وزیراعظم محمد شہباز شریف نے بنگلا دیش کے حالیہ پارلیمانی انتخابات میں بنگلا دیش نیشنلسٹ پارٹی کی شاندار کامیابی پر طارق رحمان کو دلی مبارکباد پیش کی ہے۔
اپنے تہنیتی پیغام میں انہوں نے بنگلا دیش کے عوام کو بھی کامیاب اور پُرامن انتخابی عمل پر سراہتے ہوئے نیک تمناؤں کا اظہار کیا۔
وزیراعظم کا کہنا تھا کہ وہ نئی قیادت کے ساتھ مل کر تاریخی اور برادرانہ تعلقات کو مزید مضبوط بنانا چاہتے ہیں تاکہ خطے میں امن، استحکام اور مشترکہ ترقی کے اہداف کو آگے بڑھایا جا سکے۔
بنگلا دیش میں ہونے والے حالیہ عام انتخابات کو سیاسی استحکام کی بحالی کے لیے نہایت اہم قرار دیا جا رہا تھا۔ مقامی میڈیا کے مطابق 300 رکنی پارلیمنٹ میں بی این پی کی قیادت میں اتحاد نے 209 نشستیں حاصل کر کے دو تہائی اکثریت حاصل کی۔ یہ انتخابات 2024 کی حکومت مخالف تحریک کے بعد منعقد ہوئے، جس کے نتیجے میں شیخ حسینہ واجد کی طویل حکمرانی کا خاتمہ ہوا تھا۔
بی این پی کے سربراہ اور وزارتِ عظمیٰ کے امیدوار طارق رحمان نے اپنی نشست سے کامیابی سمیٹی اور پارٹی کارکنان سے اپیل کی کہ جشن کے بجائے ملک کی ترقی اور استحکام کے لیے دعائیں کی جائیں۔ دوسری جانب جماعتِ اسلامی کے امیر شفیق الرحمان نے نتائج کو تسلیم کرتے ہوئے مثبت اپوزیشن کا کردار ادا کرنے کا اعلان کیا۔ ان کی جماعت کو 68 نشستیں حاصل ہوئیں۔
یاد رہے کہ خودساختہ جلاوطن سابق وزیر اعظم شیخ حسینہ واجد، جو اس وقت بھارت میں مقیم ہیں نے انتخابات کو مسترد کرتے ہوئے انہیں منظم ڈرامہ قرار دیا۔ ان کی جماعت عوامی لیگ اس بار انتخابی عمل میں شریک نہ ہو سکی۔
مبصرین کے مطابق نئی حکومت کے قیام سے بنگلا دیش میں سیاسی سمت واضح ہو گئی ہے اور اب خطے کی نظریں نئی قیادت کی پالیسیوں اور علاقائی تعاون پر مرکوز ہیں۔
.
ذریعہ
ذریعہ: Al Qamar Online
کلیدی لفظ: پاکستان کھیل بنگلا دیش
پڑھیں:
گلگت بلتستان انتخابات کو متنازع بنانے کی ہر کوشش جمہوریت کے خلاف ہے، حلیم عادل شیخ
صدر پی ٹی آئی سندھ نے کہا کہ عوامی مینڈیٹ کو متنازع بنانے اور اس پر اثر انداز ہونے کی کوششوں نے جمہوری عمل کو نقصان پہنچایا، آج بھی عوام عمران خان کے بیانیے اور قیادت پر بھرپور اعتماد کا اظہار کر رہے ہیں اور پاکستان تحریک انصاف ملک کی مقبول ترین سیاسی جماعت ہے۔ اسلام ٹائمز۔ پاکستان تحریک انصاف سندھ کے صدر حلیم عادل شیخ نے کہا ہے کہ گلگت بلتستان کے آئندہ انتخابات کو متنازع بنانے کی کسی بھی کوشش سے گریز کیا جائے اور انتخابی عمل کو مکمل طور پر شفاف، غیر جانبدار اور منصفانہ بنایا جائے۔ انہوں نے کہا کہ گلگت بلتستان کے عوام کو اپنا ووٹ آزادانہ طور پر استعمال کرنے کا مکمل حق حاصل ہے اور کسی قسم کی مداخلت یا دباؤ جمہوری اقدار کے منافی ہوگا۔ حلیم عادل شیخ نے کہا کہ ملک میں سیاسی استحکام کا راستہ صرف آزاد، شفاف اور غیر جانبدار انتخابات سے ہو کر گزرتا ہے، عوامی مینڈیٹ پر ڈاکہ ڈالنے کی روایت نے ماضی میں پاکستان کو سیاسی اور معاشی بحرانوں سے دوچار کیا، اس لیے ضروری ہے کہ عوام کے فیصلے کا مکمل احترام کیا جائے۔ انہوں نے کہا کہ 8 فروری 2024ء کے عام انتخابات میں عوام نے اپنا واضح فیصلہ دیا تھا، تاہم عوامی مینڈیٹ کو متنازع بنانے اور اس پر اثر انداز ہونے کی کوششوں نے جمہوری عمل کو نقصان پہنچایا، آج بھی عوام عمران خان کے بیانیے اور قیادت پر بھرپور اعتماد کا اظہار کر رہے ہیں اور پاکستان تحریک انصاف ملک کی مقبول ترین سیاسی جماعت ہے۔
حلیم عادل شیخ نے مطالبہ کیا کہ پاکستان تحریک انصاف کو گلگت بلتستان میں انتخابی مہم چلانے کے مساوی اور آئینی حقوق فراہم کیے جائیں تاکہ تمام سیاسی جماعتوں کو یکساں مواقع میسر آ سکیں۔ انہوں نے کہا کہ انتخابی عمل کو ہر قسم کے دباؤ، جانبداری اور غیر ضروری مداخلت سے پاک رکھا جائے تاکہ عوام اپنی مرضی کے نمائندوں کا انتخاب کر سکیں۔ انہوں نے کہا کہ گلگت بلتستان کے عوام باشعور ہیں اور وہ اپنے ووٹ کی طاقت سے حقیقی نمائندوں کا انتخاب کریں گے، عوام کا فیصلہ ہی جمہوریت اور پاکستان کے روشن مستقبل کی بنیاد ہے۔ انہوں نے اس امید کا اظہار کیا کہ پاکستان تحریک انصاف گلگت بلتستان کے انتخابات میں عوامی حمایت کے ساتھ بھرپور کامیابی حاصل کرے گی۔ حلیم عادل شیخ نے مزید کہا کہ سیاسی استحکام کے بغیر معاشی ترقی، سرمایہ کاری اور عوامی خوشحالی ممکن نہیں، لہذا تمام متعلقہ حکام اس امر کو یقینی بنائیں کہ انتخابات مکمل طور پر شفاف اور منصفانہ ہوں اور عوام کے مینڈیٹ کا ہر صورت احترام کیا جائے۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ