جڑانوالہ، پولیس مقابلہ میں دو سگے بھائی ہلاک، کار کی ٹکر سے راہگیر بھی جان سے گیا
اشاعت کی تاریخ: 17th, February 2026 GMT
جڑانوالہ:
تھانہ روڈالہ کے علاقے چک نمبر 364 گ ب میں مبینہ پولیس مقابلے کے دوران دو سگے بھائی ہلاک ہوگئے، جبکہ ملزمان کی گاڑی کی زد میں آکر ایک راہگیر بھی جاں بحق ہوگیا۔
پولیس کے مطابق ملزمان کی شناخت سعید اور آصف کے نام سے ہوئی ہے، جو تھانہ پیپلز کالونی کے علاقے سے مبینہ طور پر ایک گاڑی چھین کر فرار ہوئے تھے۔
واردات کی اطلاع ملتے ہی تھانہ روڈالہ سمیت چار تھانوں کی پولیس نے ملزمان کا تعاقب شروع کیا۔
پولیس کا کہنا ہے کہ سرکل بڑا گھر سیدوالہ کی حدود میں ملزمان اور پولیس کے درمیان آمنا سامنا ہوا، جہاں مبینہ طور پر دوطرفہ فائرنگ کا تبادلہ ہوا۔
فائرنگ کے نتیجے میں دونوں بھائی شدید زخمی ہوگئے اور بعد ازاں دم توڑ گئے۔
حکام کے مطابق تعاقب کے دوران ملزمان کی گاڑی بے قابو ہو کر ایک راہگیر پر چڑھ دوڑی جس سے وہ موقع پر ہی جاں بحق ہوگیا۔
پولیس کا دعویٰ ہے کہ دونوں ملزمان ریکارڈ یافتہ اور اشتہاری تھے، جبکہ واقعے کی مزید تفتیش جاری ہے۔
.
ذریعہ
ذریعہ: Express News
پڑھیں:
مردان: گھر سے خاتون سمیت 3 افراد کی لاشیں برآمد
مردان: خیبرپختونخوا کے ضلع مردان کے علاقے شیخ ملتون سیکٹر بی میں ایک گھر سے خاتون سمیت تین افراد کی لاشیں برآمد ہونے کا واقعہ سامنے آیا ہے۔
ریسکیو 1122 کے مطابق اطلاع موصول ہوتے ہی میڈیکل ٹیم فوری طور پر موقع پر پہنچ گئی اور پولیس کی موجودگی میں کارروائی کا آغاز کیا گیا۔
ریسکیو حکام کے مطابق تینوں لاشوں کو قانونی کارروائی اور ضروری معائنے کے لیے مردان میڈیکل کمپلیکس (ایم ایم سی) اسپتال منتقل کر دیا گیا ہے۔
ابتدائی اطلاعات کے مطابق جاں بحق افراد کی شناخت جلال، زوجہ جلال اور مصطفیٰ کے ناموں سے ہوئی ہے۔
واقعے کی وجوہات فوری طور پر سامنے نہیں آسکیں، جبکہ پولیس نے معاملے کی تحقیقات شروع کر دی ہیں۔ حکام کا کہنا ہے کہ پوسٹ مارٹم اور تفتیشی عمل مکمل ہونے کے بعد واقعے کی اصل نوعیت واضح ہو سکے گی۔
پولیس اور متعلقہ ادارے مختلف پہلوؤں سے واقعے کا جائزہ لے رہے ہیں، جبکہ اہلِ علاقہ میں واقعے کے بعد تشویش کی لہر دوڑ گئی ہے۔
وزارت آئی ٹی نے 1.67 ارب روپے سے زاید کے فنڈز طلب کرلیے